uLuuka 9:51 - ULufingwi uLupwa

⁵¹ Insiku zyakwe izya kuzuvha ku mwanya lwe zyapalamila, uYeesu ahaamula kusogola ku Yelusaleemu.

Tesitamenti Umupwa 1965

⁵¹ Ilelo lwʼisiku lyakwe lya kumusenda kumwanya lwe lyamakupalamila, pe wope ahenyezyʼisheni ku-Yelusalemu, ahati kwe mbale.

uLuuka 9:51 ပူးပေါင်းရင်းမြစ်များ

Maliko 16:19

Pe lwe ayanga navho, uMwene Yeesu ahanyatulwa kusogola ku mwanya, ahatendama ku luvhazu ulwa kundiilo ulwa Mulungu pa vhushindamu uvhupiti nkaani.

uLuuka 12:50

Niine ndi na mayimba ge nkwanzilwa kutuushila, kwe njendeelele kuyimba nkaani mu mwoyo waane, kufishila kuuti galunjishe.

uLuuka 13:22

UYeesu ahajendeelela nu vhulendo vhwakwe kusogola ku Yelusaleemu. Ahatuuhaga mu nkaaya na mu ntala kuvhalumbiilila avhantu.

uLuuka 17:11

Lwe uYeesu akusogola ku Yelusaleemu, ahatuuha idala lye lyátuusile mu nshinji iya shigavho isha nsi isha Samaliya ni sha Galilaaya.

uLuuka 18:31

UYeesu ahavhanyatula avhasundikwa vhaakwe 12, ahasogola navho kukwilu, pe ahavhavhuuzya ahati, “Yeenyi, tukuzuvha ku Yelusaleemu. Ukwo, zyonti zye avhakuvhwi vhásimvile mu Vhusimbe uVhufinjile ku zyane ne Mwana wa Aadamu, kwe zilunjishe.

uLuuka 19:11

Avhantu vhe vhahamutejelezyaga uYeesu vhahasiivhaga kuuti uvhumwene uvhwa Mulungu vhupalamiiye, mwe pe vhápalamiiye kufiha ku Yelusaleemu. Pe uYeesu ahavhavhuuzya ku shiholanyo ahati,

uLuuka 19:28

UYeesu lwe ayanga izyo, ahajendeelela kusogola ku Yelusaleemu she alongoleeye ku mpuga yiila iya vhantu.

uLuuka 24:51

Lwe akujendeelela kuvhaloota, ahaseguha hansi, pe ahanyatulwa kusogola ku mwanya.

uLuuka 9:57

UYeesu na vhasundikwa vhaakwe lwe vhali mwi idala, umuntu wumo ahamuvhuuzya ahati, “Kuuti nkulandate kwonti kwe ukusogola!”

Yohani 13:1

Lwe isiku ilya shikulukuulu isha Pasaaka lishiili kufiha, uYeesu ahamanya kuuti ahavhaliilizyo haakwe haafiha aha kwepa mu nsi umu, nu kusogola kwa Taata. Ahavhaliilizyo honti lwe ali mu nsi umu, ávhakunzite avhantu vhaakwe vhe vhámwitisile mu nsi, havhili ájendeleeye kuvhakunda kufishila kumpeleela.

Yohani 16:28

Nínzile mu nsi kufuma kwa Taata, havhili ishi nkwepa mu nsi, nkusogola kwa Taata.”

Yohani 16:5

“Ishi nkusogola kwa Taata we ansonteleziizye kuli imwe. Ileelo nuumo muli imwe we akumbuziilizya kuuti, ‘Vhuli, wasogola kwoshi?’

Yohani 17:11

Ishi nkwinza kuli iwe, te mbe havhili mu nsi umu. Ileelo avheene kwe vhajendeelele kuvha mu nsi umu. We Taata Mufinjile, nkulaavha uvhaguulile kwi izina lyaho lye umpiiye, inga vhavhe ishintu shooka inza vwe ine niiwe tuli ishintu shooka.

Yohani 6:62

Ishi yiliivha vhuli, inga mukundola ine ne Mwana wa Aadamu, nkuzuvha kusogola ku mwanya kwe náamile ku vhwandilo?

iMbombo izya Vhatumwa 1:2

kufishila isiku lye ányatuliilwe kusogola ku mwanya. Lwe ashiili kunyatulwa, uMupepo uMufinjile ahamulongola kuvhalajizya avhatumwa vhaakwe vhe ávhasavhuuye, vwe yikwanzilwa vhavhombaje imbombo.

iMbombo izya Vhatumwa 1:9

Lwe uYeesu ayanga izyo, pe ahanyatulwa kusogola ku mwanya, she avhatumwa vhonti vhakulola. Ivhingo lihamudindila, vhatahamulola havhili.

VaEfeso 1:20

ge uMulungu ámuzyusiziizye uChilisiti nu kumuvhiiha uluvhazu ulwa nyoovhe yaakwe iya kundiilo, pa vhushindamu uvhupiti nkaani ku mwanya.

Filipi 3:14

Ishi nkujendeelela kudaga, inga mposheele ishipeelwa. Ishipeelwa isho, lwito ulupiti lwe uMulungu anitiiye mwa Chilisiti uYeesu.

1 Timoti 3:16

Nalyoli, zye uMulungu atulolesiizye, iswe tukwitinkana kuuti zya kusukumizya, havhili zye zino: UChilisiti álolesile nu muvhili uwa vhuntu, uMupepo uMufinjile ahahomeshezya kuuti mugolosu. Avhahavhizya vhahamulola. Amazwi gaakwe gahakumuha ku vhantu avha mu nsi zyonti, vhoope vhahamwitiha. UMulungu ahamunyatula kusogola ku mwanya ku vhushindamu vhwakwe.

VaHebuli 12:2

Tuvhombaje vhwevhulo, uku tukumwenyeelezya uYeesu we átalisiizye idala ilya kuuti iswe tumwitihaje uMulungu, havhili we akuutupa umwoyo kuuti tujendelelaje kumwitiha kufishila ku vhusililishilo. Havhili ávhujimbiliiye uvhufwe pa shihovhenkanyo ishisita kusaajila kulola insoni, kuzya luseshelo lwe lwávhisiilwe pilongolela lyakwe. Ishi atendiime uluvhazu ulwa kundiilo ulwa shitengo isha vhumwene isha Mulungu, pa vhushindamu uvhupiti nkaani.

VaHebuli 6:20

UYeesu atulongoleeye kwinjila penepo ku zyitu. Uweene avha mupuuti umupiti shiima, inza vwe uMelikizeedeki áamile.

1 Peteli 3:22

UYeesu uyo ásogooye ku mwanya, niishi atendiime uluvhazu ulwa nyoovhe iya kundiilo iya Mulungu, pa vhushindamu uvhupiti nkaani. Akuvhakonzya avhahavhizya pooka ni vipelwa vwonti vwe vili na maha.