Kolosi 1:10 - ULufingwi uLupwa

¹⁰ Tukulaavha isho, inga muvhombaje zye zikulolesya uvhushindamu kwa Mwene uYeesu, havhili kwi idala lyonti muvhombaje zye zikumuhondezya uweene. Mufishile kuvhomba imbombo inyinza izya mavhiila mu mavhiila, nu kwonjela kumumanya uMulungu.

Tesitamenti Umupwa 1965

¹⁰ ukuti mujendaje inza mwe zivahondeyʼimwe mwa Mwene, lwe mukuhomʼinsanga zya mbombʼinyinza nukukula munjele zya kumumanyinsanyʼuMulungu,

Kolosi 1:10 ပူးပေါင်းရင်းမြစ်များ

Yohani 15:16

Te mwemwe mwánsavhuuye ine, ine ne návhasavhuuye imwe kuvha mwe vhasundikwa vhaane. Návhasavhuuye, inga mupaapaje amantonongwa ge gatakusila naalumo. Pe zyonti zye mukumulaavha uTaata uMulungu kwi izina lyane, aliivhapa.

Yohani 15:8

Inga mukuhoma amantonongwa aminji, nu kuvha mwe vhasundikwa vhaane avha nalyoli, kwe mulolesyaje apazelu uvhushindamu uvhwa Taata waane.

Yohani 17:3

Uvhulanzi uvhwa shiima uvhwo vhukuposheelwa kwi idala ilya vhantu kukumanya kuuti iwe we Mulungu weeka uwa nalyoli, havhili kumanya niine kuuti ne Yeesu Chilisiti ne untumile ku kwavho.

VaLoma 1:13

Mwe vhamwitu, nkwanza mumanye kuuti, ulwinji nkwanza kwinza kuli imwe, ileelo shimo shikundindila poosye ahavhaliilizyo iha. Nkwanza ininze ukwo kwope, imbalumbiilile avhantu vhamwitishe uMwene uYeesu, inza vwe mbomvile apanji.

VaLoma 4:12

Avhantu vhe vhatahiliilwe vhoope, uAabulahamu wu taata waavho mu lwitiho. Yeenya, atakuvha wu taata waavho, mwe pe vhatahiliilwe, nkandi, mwe pe vhakumwitiha uMulungu inza vwe uweene uAabulahamu áali lwe ashiili kutahiililwa.

2 VaKolinti 2:14

Tukumusalifwa uMulungu, mwe pe mwa Chilisiti akutulongola ahavhaliilizyo honti kuvhapoota avhalugu. Havhili akutuvhiiha iswe kuuti tukumusyaje izwi ilya Chilisiti imbazu zyonti, inza umununsi umwinza vwe wukusaata kwonti.

2 VaKolinti 4:6

UMulungu we áyanzile kuuti, “Uvhuzelu vhuhozye mu shiisi,” we akuhozya amooyo giitu, nu kutuvhiiha kumanya uvhushindamu vhwakwe vhwe vhukulama ku minso kwa Yeesu Chilisiti.

2 VaKolinti 5:9

Kuli izyo, insiivho zyitu kwe kumuhondezya uMwene, inga tuli mu muvhili uno, poosye inga tutali mu muvhili uno.

2 VaKolinti 9:8

Pe uMulungu kwe avhalootaje mu nyinji, inga ahavhaliilizyo honti muvhanje ni vintu vwonti vwe mukwanza, inga muvhanje mwe vhantu avha kuvhomba inyinza inyinji izya kuvhaavwa avhanji.

VaEfeso 1:17

Nkulaavha kuuti, uMulungu uwa Mwene wiitu uYeesu Chilisiti we wu Taata uwa Vhushindamu, aavhape uvhushindamu uvhwa njeele nu kuvhalolesya vwe ali, inga mumumanye ahinza nkaani.

VaEfeso 2:10

Iswe swe vipelwa ivipwa ivwa Mulungu. Uweene atupezile vhupwa kwi idala ilya kusopenkana nu Chilisiti uYeesu, inga tuvhombe imbombo inyinza. Imbombo izyo uMulungu ázisengiinye kufuma hali, inga iswe tuzivhombaje.

VaEfeso 4:1

Ishi ine ne nkunziilwe mu jeela kuzya Mwene uYeesu, nkuvhalambiilizya kuuti muvhe nu lujendo lwe lukuvhalilana nu lwito lwinyu ulwa vhushindamu kwa Mulungu.

VaEfeso 4:13

Ishivhanza shizengwe, kufishila pe ulwitiho lwitu swenti lwavha lwoka na pe twamumanya uMwana wa Mulungu, kwe kuuti, kufishila pe twakula nu kugoma nu kuvhufishila uvhulunjisu uvhupiti inza uvhwa Chilisiti.

VaEfeso 5:10

Mulondolaje zye zikumuhondezya uMwene uYeesu.

VaEfeso 5:15

Pe ishi, muvhanje minso vwe mukulandila, mutalandilaje inza avhapukupuuku, nkandi ku vhushindamu uvhwa njeele.

VaEfeso 5:2

Mukundanaje ahavhaliilizyo honti, inza vwe uChilisiti ahatukunda nu kufwa ku zyitu. Ahayifumwa inza impuutile iya mununsi umwinza ye yikumuhondezya uMulungu.

Filipi 1:11

Muvhavhombelaje inyinza avhamwinyu, kwi idala ilya Yeesu Chilisiti, kuzya kumushindiha nu kumutiima uMulungu.

Filipi 1:27

Ileelo ulujendo lwinyu luvhe inza vwe Izwi iLyinza ilya Chilisiti likwanza. Pe inga nkwinza kuvhavuula, poosye inga ntaliipo, inivwaje inongwa zyinyu kuuti mukusimpa ku mwoyo wooka. Havhili inivwaje kuuti, mukulwila ulwitiho ulwa Izwi iLyinza pooka.

Filipi 4:18

Vhamwitu, mposheleeye ivintu vwonti viila vwe mwámusonteleziizye uEpafulodiito, kuuti andeetele. Havhili andeteeye ivwinji kuluusya vwe naasovheliilwe, pe ishi indi navwo ivwinji. Ivintu ivwo, vili ngati mpuutile iya mununsi umwinza, havhili mpuutile ye yikwitishilwa nu kumuhondezya uMulungu.

Kolosi 2:19

Uyo ayefwizye kwa Chilisiti we akulongozya avhantu vhaakwe inza itwe vwe likulongozya umuvhili. Itwe lisopenkiine nu muvhili kutuushila impinga ni nkole. Kufuma kwi itwe kwe umuvhili wonti wukuposheela ishaakulya nu kukula inza vwe uMulungu akwanza.

Kolosi 2:6

Ishi, inza vwe mumwitisile uChilisiti uYeesu kuuti wu Mwene, mujendeelele kumulandata.

Kolosi 3:20

Niimwe mwe vhaana, muvhashindihaje avhapaafi vhiinyu ku zyonti, mwe pe kuvhomba isho yikumuhondezya uMwene uYeesu.

Kolosi 4:5

Mutatezyaje ahavhaliilizyo shaaha he muli naho aha kulolesya ulujendo ulwinza ku vhantu vhe vhatamwitisile uChilisiti.

1 VaTesaloniki 2:12

kuuti mulandataje zye uMulungu akwanza. UMulungu we akuvhiita kuuti, mwinjile mu vhumwene na mu vhushindamu vhwakwe.

1 VaTesaloniki 4:1

Ishi vhamwitu, musambiliiye kufuma kuli iswe vwe yikwanzilwa kulandila, inga kumuhondezya uMulungu. Mwe muumwo vwe mukuvhomba vhwevhulo. Ishi, tukuvhalambiilizya ku maha aga Mwene uYeesu kuuti muvhombaje vhwevhulo nu kuluusya.

2 Timoti 2:4

Ataliipo umusikaali we akuvha mu mbombo, havhili akuyinjizya mu zinji zye te zya vhusikaali. Nalyoli akwanzilwa kumuhondezya usongo waakwe.

uTiiti 3:1

Uvhakumbusyaje avhantu kuuti vhayisyaje ku vha maha na vhapiti avha nsi nu kuvhashindiha. Vhavhanje vhayisengiinye kuvhomba imbombo zyonti inyinza.

uTiiti 3:14

Avhantu vhiitu vhasambililaje kuvhomba inyinza ahavhaliilizyo honti, inga vhavhavwaje avhantu avhanji ivintu vwe vhasovheliilwe. Ipo pe vhakuvha vhakuvhahondezya avhanji mu vhuyo vhwavho.

VaHebuli 11:5

Mwe pe uEenoki ámwitisile uMulungu, uMulungu ámunyatuuye uEenoki kusogola ku mwanya ishisita kufwa. Atálolesile havhili, mwe pe uMulungu ámunyatuuye. Yeenya, uVhusimbe uVhufinjile vhukuhomeshezya kuuti lwe uMulungu ashiili kumunyatula, uEenoki ahavhombaga zye zihondeeye pilongolela ilya Mulungu.

VaHebuli 13:16

Mujendeelele kuvhomba inyinza nu kuvhaavwa avhamwinyu ivintu vwe muli navwo, mwe pe kuvhomba vhwevhulo, ye mpuutile ye yikumuhondezya uMulungu.

VaHebuli 13:21

Havhili uMulungu ajendeelele kuuvhapa amaha aga kuvhomba zye uweene akasiime, avhombe mu mooyo giinyu kwi idala ilya Yeesu Chilisiti zye zikuhondela pilongolela lyakwe. Uweene ashindikwaje shiima shiima! Amina.

2 Peteli 1:8

Inga vwonti ivwo vwonjela kukula mu mooyo giinyu, vikuvhaavwa kumumanya uMwene wiitu uYeesu Chilisiti nu kuvhomba inyinza mu vhulanzi vhwinyu.

2 Peteli 3:18

Ileelo mujendeelele kukula mu vhwila nu kumumanya uMwene wiitu nu Muposhi uYeesu Chilisiti. Uvhushindamu vhuvhanje nu weene ishi na shiima! Amina.

1 Yohani 3:22

Havhili tukuposheela kufuma ku kwakwe shonti she tukumulaavha, mwe pe tukuzishindiha indajizyo zyakwe nu kuvhomba zye zikumuhondezya.

1 Yohani 5:20

Havhili tumanyile kuuti uMwana wa Mulungu ayinzile, atupiiye uvhumanyi, inga tumumanye uMulungu uwa nalyoli. Tuli nu vhuliilani nu Mulungu uwa nalyoli, kwi idala ilya kuvha nu vhuliilani nu Mwana waakwe uYeesu Chilisiti. Uno we wu Mulungu uwa nalyoli, havhili we vhulanzi uvhwa shiima shiima.

3 Yohani 1:6

Vhashivhuziizye ishivhanza isha ipa izya shikunzi shaaho. Nkulaavha kuuti, ujendeelele kuvhaavwa mu vhulendo vhwavho inza vwe uMulungu akasiime.