Ishitushizya 14:10 - ULufingwi uLupwa

¹⁰ uweene alimwela idivaayi inkali ye vhuhalazu uvhwa Mulungu. Idivaayi iyo, vhasuusile ishisita kusangaanya na minzi, mu lupindi ulwa mulaha waakwe. Woope uMulungu alimuyimvwa ku mwoto na ku mbaluuti pilongolela ilya vhahavhizya avhafinjile, na pilongolela ilya Hagonzi aha MWENE uMulungu.

Tesitamenti Umupwa 1965

¹⁰ wope vwelele pe lwʼakungʼwelʼipele lya vuhalazu ṿwa Mulungu lye lyenzilwe shisitakusanganya naminzi mushikombe sha mulaha wakwe, wʼaliyimba nkani mumwoto nakuṿibiliti, kuminso ga vahavizya avafinjile naga Hagonzi.

Ishitushizya 14:10 ပူးပေါင်းရင်းမြစ်များ

Matayi 20:22

UYeesu ahavhaamula ahati, “Mutamanyile zye mukulaavha. Vhuli, mungayimba amayimba inza ge nandi nsogole kuyimba ine?” Vhoope vhahamwamula vhahati, “Eena tungayifumwa.”

Matayi 25:41

“Pe vhoope vhe vhali ku luvhazu lwane ulwa kumongo ndivhavhuuzya ndiiti, ‘Yeepi ipa imwe mwe mutifiilwe! Mwinjile mu mwoto uwa shiima we uMulungu ámusenganiziinye uMukwalanzi na vhahavhizya vhaakwe.

Matayi 26:39

Ahasogola pilongolela hansi, ahagwa ishikupama, ahalaavha ahati, “We Taata, inga zingavhombeha, nkulaavha uyeefwe amayimba iga kuli ine. Ileelo utahavhombe inza vwe nkasiime ine, nkandi vwe ukasiime weneewe.”

Maliko 8:38

Umuntu wonti we akundolela insoni ine na mazwi gaane ku vhavhembu na vhatalamalandu avha havhaliilizyo iha, niine ne Mwana wa Aadamu, ndimuhaana lwe nkwinza havhili nu vhushindamu uvhwa Taata waane, pooka na vhahavhizya avhafinjile.”

Maliko 9:44

Pa vhuyo paala imvinyu zililyanga ivwala vwavho havhili zitaliifwa, nu mwoto wutaliizima.

iMbombo izya Vhatumwa 10:22

Vhahamwamula vhahati, “Umupiti wumo uwa vhasikaali we izina lyakwe wu Kolineeliyo, atusonteleziizye. Uweene muntu umugolosu, havhili we akumunyila uMulungu na Vhayuuda vhonti vhakumutiima. Ishi, uhavhizya umufinjile amulajiziizye kuuti akwite, usogole mu nyumba yaakwe, inga atejeelezye amazwi ge kwe umuvhuuzye.”

2 VaTesaloniki 1:7

nu kuuvhapa ulutuuzyo imwe mwe mukuyimvilwa pooka niiswe. Alivhomba izyo lwe uMwene uYeesu akugaluha kufuma ku mwanya nu mwilo uwa mwoto, pooka na vhahavhizya vhaakwe avha maha.

uYuuda 1:7

Mukumbushe havhili avhantu avha mu nkaaya iya Sodooma ni ya Gomoola, pooka na vha mu nkaaya impalamani. Avhahaaya avha mu nkaaya izyo, vhávhomvile inza avhahavhizya ivho. Vhávhomvile uvhulugusu nu kulandata izya vhuntu uvhwa vhutalamalandu, zye zitakuvhalilana nu vhupezi. Kuli izyo, vhahapeelwa isunde ilya mwoto uwa shiima, inga livhe nsoshi ku vhantu vhonti.

Ishitushizya 15:7

Pe shooka mu viila ivipelwa vine shihaavhapa avhahavhizya ivho 7 imbiga impiti 7 izya sahaabu zye zyizuuye uvhuhalazu uvhwa Mulungu, uweene we mulanzi shiima shiima.

Ishitushizya 16:19

UMulungu atáyiluviilwe iBabeeli, inkaaya impiti. Áyimwensiizye ulupindi ulwa divaayi inkali iya vhuhalazu vhwakwe uvhupiti. Pe inkaaya yiila impiti yihatapunkana imbazu zitatu, zyope inkaaya izya nsi zyonti zihananjinkana.

Ishitushizya 18:3

Nkuyanga vhwevhulo, mwe pe insi zyonti zihoziilwe ku divaayi inkali iya vhulugusu vhwakwe, vhoope avhamwene avha nsi izyo vhavhembusile nawo. Vhoope avhavhomvi avha kutaanania avha mu nsi zyonti vhadumbusile kufumiilana nu vhumalaaya vhwakwe vhwe vhupoosite nkaani.”

Ishitushizya 18:6

Mumuvhombele inza vwe woope ávhomvile, mumulanduzye luvhili ku ziila zye ávhomvile. Mu lupindi lwakwe lwe ávhenjeeye, imwe mumwenjele luvhili.

Ishitushizya 19:15

Ipanga ihozu likufumaga mwi ilomu lyakwe na kwi ipanga ilyo alivhapoota avhantu avha mu nsi zyonti. “Uweene we alivhakonzya ku ndiisa iya shijela” nu kusuusa idivaayi inkali mu shiliilo isha kusuusila amampensya. Ishiliilo isho sha vhuhalazu uvhupiti uvhwa Mulungu uweene uwa Maha Gonti.

Ishitushizya 19:20

Ileelo we átendiime pa mfwalaasi ahashigoma ishihanu isho pooka nu mukuvhwi waakwe uwa ilenga, we ahavhombaga ivilolesyo pa luvhambo lwakwe. Ku vilolesyo vwakwe ivwo, ávhahopenkiinye vhaala vhe vháamile ni vimanyilo ivwa shihanu isho, na vhe vhahashipuutaga ishiholanyo shaakwe. Ishihanu isho pooka nu mukuvhwi uyo vhahasumbwa vhonti vhavhili, she vhapuuma mwa sumbi we akwaha umwoto uwa mbaluuti.

Ishitushizya 20:10

Woope uMukwalanzi we ahavhahopenkanyaaga, alisumbilwa mwa sumbi we akwaha umwoto uwa mbaluuti. Umwo mwe shili ishihanu shiila nu mukuvhwi ula uwa ilenga, vhoope vhaliyimvilwa uvhusiku nu musanya, shiima shiima.

Ishitushizya 20:14

Pe uVhufwe nu Vhuzimu vhahasumbilwa mwa sumbi we akwaha mwoto. Usumbi uyo we akwaha umwoto we vhufwe uvhwa vhuvhili.

Ishitushizya 21:8

Ileelo avhantu avha ilyoga na vhe vhatakwitiha na vhapoopo na vhagozi na vhalugusu na vhalozi na vhe vhakupuuta iviholanyo na vha ilenga vhonti, uvhuyo vhwavho vhuliivha mwa sumbi ula we akwaha umwoto ni mbaluuti. Uwo we vhufwe uvhwa vhuvhili.”