2 VaKolinti 11:3 - ULufingwi uLupwa

³ Ileelo ishi nkwogopa kuuti inza uEeva vwe áhopeliilwe ni njoha yiila, niimwe mutahinze muhopelwe, muvhuleshe uvhugolosu na mooyo giinyu amazelu kwa Chilisiti.

Tesitamenti Umupwa 1965

³ Nkandi nkusaganya ukuti ingavanga injoha yingavatezyʼimwe injele, inza she yamutezizye uEva mushifumbo shakwe, ukuti yivafumwʼinsivo zyinyu nuvusitamaganigani namuvuzelu vwe vukuvahondezyʼimwe kwa Chilisiti.

2 VaKolinti 11:3 ပူးပေါင်းရင်းမြစ်များ

Matayi 24:24

Yeenya, vhalifumila avhantu vhe vhakuluma ilenga kuuti, ine ne Chilisiti nu kuuti ne mukuvhwi. Vhalivhomba ivilolesyo ivipiti havhili ivwa kusukumizya, inga vhavhahopenkanye avhantu, inga zingavha poosye na vhasaavhulwa avha Mulungu.

Yohani 8:44

Imwe utaata wiinyu wu Mukwalanzi. Havhili mukwanza kuvhomba zye utaata wiinyu uyo akwanza. USeetano mugozi kufuma hali, havhili atakwanza kuvhulandata uvhwanalyoli, mwe pe uvhwanalyoli vhutali mu mwoyo waakwe. Uweene kuluma ilenga, we mwata waakwe, mwe pe uweene ali ni ilenga, havhili wu taata uwa vhe vhakuluma ilenga vhonti.

VaLoma 12:8

We ali ni shikunjilwa isha kuvhasuvhaalizya avhanji, avhombaje vhwevhulo, woope umutesi ku vhantu, afumwaje ivintu ku mwoyo wonti. We ali ni shikunjilwa isha kuvhalongozya avhanji, avhombaje ku mute, woope we ali ni shikunjilwa isha kuvhafwila avhanji uvhwila, avhombaje vhwevhulo ku luseshelo.

2 VaKolinti 1:12

Ishi iswe tukuyitumvwa kuli ili: Tukuyilola mu mooyo giitu kuuti mu nsi umu, inkaani kuli imwe, twálandiiye ku vhugolosu, havhili na ku mwoyo umuzelu kufuma kwa Mulungu. Tutávhomvile vhwevhulo ku vhushindamu vhwitu uvhwa njeele, nkandi ku vhwila uvhwa Mulungu.

2 VaKolinti 11:20

Yeenya, mukumujimbiilila nu kumwitiha poosye umuntu we akuvhavhiiha mu vhuzya nu kuvhiivhila nu kugoma ivintu vwinyu nu kuyitumvwa nu kuvhaliga nu kuvhahoma ku minso.

2 VaKolinti 11:29

Inga wumo muyeyevhazu, niine nkuyiivwa kuuti ne muyeyevhazu, inga wumo vhamupelela kuvhomba uvhutalamalandu, niine nkuvha nu vhuswimiilizu.

2 VaKolinti 2:17

Iswe tutali inza avhantu avhinji vhe vhalivhiisile izwi ilya Mulungu ngati shintu sha kulyajila ilonka. Ileelo ku maha aga Chilisiti, tukukumusya izwi ilyo ku vhugolosu vhwonti, nu Mulungu amanyile, mwe pe we atusonteleziizye.

2 VaKolinti 4:2

Tuhaanile nziila kuvhomba izya kukwilu izya nsoni, poosye kuvhahopenkanya avhantu, poosye kusangaanya izwi ilya Mulungu ni ilenga. Ileelo tukuyanga uvhwanalyoli apazelu, inga avhantu vhonti vhamanyaje mu mooyo gaavho kuuti twe vha nalyoli pilongolela ilya Mulungu.

VaGalati 1:6

Nkusukumila nkaani, ahavhaliilizyo hansi vhweleele hatuuha, imwe mwamuleha uMulungu we ávhiisite ku vhwila uvhwa Chilisiti, havhili mukulandata izinji zye vhamo vhakuti lye Lizwi iLyinza,

VaGalati 2:4

poosye inga vháliipo avhiitisi avhanji avha ilenga vhe vhahanzaga kuuti atahiililwe. Avhantu ivho vháyinjiziizye ku vhushevu kuvhupenza uvhusatushe vhwitu vhwe tupeliilwe nu Chilisiti uYeesu, inga vhatuvhiishe mu vhuzya uvhwa kulandata indajizyo izya Vhayuuda.

VaGalati 3:1

Mwe Vhagalaatiya, nalyoli mwe vhapukupuuku! Wu naanu we avhalozile? Návhalumbiliiye imwe, niimwe muhamanya ahinza inongwa izya Yeesu Chilisiti, vwe vhámuhomeleeye pa shihovhenkanyo.

VaGalati 4:11

Kulandatana niizyo, nkwogopa kuuti, imbombo ye mbayimbiiye imwe, yitahinze yivhe ya vhweleele!

VaEfeso 4:14

Pe te tuhaavhe inza avhaana, vhe vhali inza ivhooti lye amavhilingwa ni nkungu vikulipempenusya uku nuukwo. Kwe kuuti, avhasambiilizi avha ilenga te vhahatulunzaanye ku vhushevu ni ilenga lyavho.

VaEfeso 4:22

Mwásambiliiye kuleha ulujendo lwinyu uluvhiivhi nu kuzuula amooyo giinyu aga vhutalamalandu vhwe mwáli navhwo. Impapilo zyinyu zye zikuvhahopenkanya zikuvhananganya amooyo giinyu.

VaEfeso 6:24

UMulungu avhafwile uvhwila vhonti vhe vhakumukunda uMwene wiitu uYeesu Chilisiti ku shikunzi she shitali nu vhusililishilo.

Kolosi 2:18

Mutahiitishe umuntu wonti we akuhomeelezya izya vhwahayiisye uvhwa ilenga nu kuvhapuuta avhahavhizya. Umuntu inza uyo atahavhafwule ishipambwi isha shiima. Akuti ali na maha aga kusambiilizya, mwe pe avhwenyi injozi iya pa minso amazelu. Akuyitumvwa ku njeele izya vhuntu vhwakwe uvhwa vhutalamalandu.

Kolosi 2:4

Nkuvhasimbila izyo, inga mutahiitishe kuuti umuntu wonti avhahopenkanye ku mazwi aga kuvhakundiilizya.

Kolosi 2:8

Muvhe minso, umuntu wonti atahavhavhiishe kuvha mwe vhagomwa ku nsambiilizyo izya ilenga zye zitangavhaavwa. Insambiilizyo izyo, maata aga vhantu, havhili nsiivho zyavho izya mu nsi. Zitakufuma kwa Chilisiti.

1 VaTesaloniki 3:5

Pe lwe napootwa kujimbiilila, nkamusonteelezya uTiimoti kuli imwe, inga imanye inongwa izya lwitiho lwinyu. Nkavhomba vhwevhulo, mwe pe nkasiivha kuuti lumo We Akulinga avhalinzile nu kuvhateezya. Pe imbombo yonti ye tuhayivhomba kuli imwe, yihaavhe ya vhweleele.

1 Timoti 1:3

Nkwanza kuuti usyale kunuukwo mu nkaaya iya Hefeeso, inza vwe nákuhomeleziizye ahavhaliilizyo he násogooye ku shigavho isha nsi isha Makedooniya. Nátili uvhalajizye avhantu kuuti vhatasambilizyaje insambiilizyo izya ilenga.

1 Timoti 2:14

Havhili, te wu Aadamu we áhopenkiinywe, nkandi uEeva we áhopenkiinywe, ahavha mutalamalandu.

2 Timoti 3:13

Ileelo avhantu ivho avhavhiivhi, havhili vhe vhakuhopela, kwe vhajendeelele kuvha vhavhiivhi nkaani. Kwe vhahopenkanyaaje, ileelo vhoope kwe vhahopenkanywaje.

uTiiti 1:10

Nkuti avhanje vhwevhulo, mwe pe kuli avhinji vhe vhatakushindiha insambiilizyo izyo, inkaani avhiitisi vhamo vhe vhafumile mu Vhayuuda. Vhakuhomeelezya amaata gaavho na mazwi ge gatali ni ilonka nu kuhopenkanya. Ivho vhakwanzilwa vhahaanwe kusambiilizya,

VaHebuli 13:9

Mutalandataje insambiilizyo injeni izya mavhiila mu mavhiila. Yeenya, amaha aga mu mooyo giinyu gakufuma mu vhwila uvhwa Mulungu, gatakufuma mu ndajizyo izya vwakulya zye zitangavhaavwa naashimo vhaala vhe vhakuzilandata.

2 Peteli 3:17

Ishi ileelo imwe vhankundwa, mwe pe mwazimanya inongwa izya vhasambiilizi avha ilenga, muvhanje minso kuuti vhatahinze vhavhahopenkanye kwi idala ilya kuvhalumila ilenga. Inga mukuvhatejeelezya, munginze mugwe nu kululeha ulwitiho lwinyu ulwa nalyoli.

2 Peteli 3:3

Yikwanzilwa mumanye suuti kuuti insiku izya vhusililishilo vhaliyinza avhantu avha isuufwo, vhe vhalivhasufwaga imwe nu kuzilandata impapilo zyavho.

1 Yohani 2:18

Mwe vhaana vhaane, ahavhaliilizyo aha kumpeleela hafisile! Mwivuuye kuuti umulugu uwa Chilisiti akwinza, niishi avhalugu avhinji avha Chilisiti vhinzile. Ilyo lye likutuvhiiha kumanya kuuti, tuli mu havhaliilizyo aha kumpeleela.

1 Yohani 4:1

Mwe vhankundwa, mutavhitihaje avhantu vhonti vhe vhakuti vhali nu Mupepo uwa Mulungu, mwe pe avhakuvhwi avha ilenga avhinji vhafumiiye mu nsi. Mwenyelezyaje ahinza, kumanya inga umuntu akulongolwa nu Mupepo uwa Mulungu pamo haa.

uYuuda 1:4

Nkuvhasimbila ukalaata uno, mwe pe kuli avhantu vhamo vhe vhatakumushindiha uMulungu, vhayinjiziizye ku vhuzigizigi nu kusangaana niimwe. Avhantu ivho vhakugalulanya izwi ilya vhwila, inga livhitishilaje kuvhomba uvhumalaaya. Ivha vhantu vhe vhakumuhaana we ali weeka uMulongozi uMupiti, we wu Yeesu Chilisiti uMwene wiitu. Ileelo kufuma hali, uVhusimbe uVhufinjile vhwáyanzile kuuti vhalilongwa.

Ishitushizya 12:15

Iyoha lihaswila aminzi inza ijenje kufuma mwi ilomu lyakwe, mwisinda ilya mwantanda uyo, inga ijenje ilyo limwisye.

Ishitushizya 12:9

UMikayeeli na vhahavhizya vhaakwe vhahalisumbila pa nsi iyoha ilyo pooka na vhahavhizya vhaakwe. Iyoha ilyo ye njoha iya hali, ye wu Mukwalanzi nu Seetano, we akuyihopela insi yonti.

Ishitushizya 20:2

Ahalilema iyoha ilyo, injoha iya hali, ye wu Mukwalanzi, poosye wu Seetano, ahalikunga ku havhaliilizyo aha maaha 1,000.