Roma 12:3 - Nouveau Testament en Ngienboum

³ Mèŋ n ge fó ná pá’ e Ssé la cʉ́’ʉ lécÿó gem yɔ́ɔn, ńtÿɔ́gɔ wɔ̀ɔn nà jʉ’e lÿò, é gɔɔn mbwo wɔ̌wɔ́ɔ tsestsɛ̀ɛ pi ngie: Tà nyìŋ kwaŋ ngie aa mmó té gwɔ́ gie aa yɛ̌. Nyìŋ gẅiin we nkwaŋá é ku’ ku’. Nyìŋ kú’te pɔ́ yé fà’ gie e Ssé la ná, ńgwɔ́ ná, éfó ná pá’ à zǎb ntʉ́m ná Kristo.

Roma 12:3 ပူးပေါင်းရင်းမြစ်များ

Lukase 18:11

Nyìŋ *farisay kúu wó, ńtyé mángyɛ̌ ńně sẅíŋte Ssé ngie: E Ssé yɔ̀ɔn, mèŋ n nǎ ndǎg mbwo gù tɛ’, ńtí pá’ ɔ̀ la gÿo mèŋ n tè gwɔ́ pá’ petsɔ́ pʉ̀a mesoŋ wɔ́. Pɔ́ ée metsǒŋ, pɔ́ té gÿo mmó gie ɔ̀ ne ńkwòŋo wɔ́, éfʉte mezwě pɔ́b, mèŋ n nǎ ndǎg mbwo gù, mélà’mie mèŋ n tè pá’ nkẅè ncùb pà *Roma ŋwɛ́ wɔ́.

Ŋwà’ne Jâŋ 3:34

Nyìŋ gẅie e Ssé túmo yé, à gɔɔn menò mie é fóo mbwo Ssé, á nue e Ssé gÿo Zẅìge yé gwɔ́ pɔ́ ná yé fʉ̀’ ntsèm.

Roma 1:5

E Ssé la cʉa pɔ́ nà yé Kristo ńcÿó gem yɔ́ɔn, ńdɔgɔ wɔɔn ńgÿo ngàŋ ntúm Yěsô Kristo légwɔ́ gie mèŋ n ge gʉa shwóŋó nò Ssé, tsɛ̀ɛ mengwòŋ ntsèm. Epʉ̀a záb ntʉ́m nà yé, ńjú’ ncwò wé, à cʉa pú’u, pɔ́ ná mekù’ mbwo Yěsô Kristo.

Roma 11:20

Oon mé la ké ńkɔ́’ɔ wɔ́b ńgwá’, á gwɔ́, mélà’mie pɔ́ kaa záb ntʉ́m ná Kristo wɔ́. Ɔ̀ piŋ ńgwɔ́ jʉ’ó, mélà’mie ɔ̀ zǎb ntʉ́m ná Kristo, tá’ tè ké ńŋá’te, tà ńcʉ́’ pú’u, ɔ̀ lag pɔ́ twó jú.

Roma 11:25

Mefɛ́ pɔ́ɔn, mèŋ n ne ńkwoŋo ngie pi zsé mmó gie áa ná yɔɔn nò, mbà á la zɔɔn ńgwɔ́ pɔ́ lelyěen, ḿbɔ́gɔ gẅi lékwaŋ ngie pi ee pàzsé nò. Yɛ̌ mmó áa ngie atsɔ́ gwǒŋo pà Israel ne ńtʉʉ twó mbwo Ssé fʉ̀’ɔɔn, tá á ké lěen ńdá’a ńgwɔ́ pɔ́ pú’u wɔ́. Pɔ́ ge tʉʉ twó tà kú fʉ̀’ gie pʉ̀a metsèm pie e Ssé la tsɔ́’, é piŋ tè pà Yuda wɔ́, ge cʉ́me nzèm yé.

Roma 12:16

Pi gẅiin tà’ ncwò tsetsɛ̀ɛ pi, tà pi tsɔ́ɔn pɔ́ mencwò fà’ melÿò, pi zẅíŋe légÿo mefà’ mie é ku’ ku’, tà pi kwaŋ ngie pi zsé nò.

1 Korento 15:10

Á la ké ńcʉa pɔ́ ná pá’ e Ssé cÿǒ gem yɔ́ɔn, ńnéŋe ńkẅéte wɔ̀ɔn tá mèŋ n cʉ́’ʉ mmó gie mèŋ n gee yɛ̌ lɔɔn. Yɛ̌ ntí lecÿó gem yɔ́ɔn e la tè cʉa sẅɛ̀ɛ wɔ́, mèŋ fa’a fà’ ńcʉa petsɔ́ megàŋ ntúm, tá mèŋ n zɔ tě ńdɔgɔ mɔ́ɔn metʉ̀ fa’a wɔ́. E Ssé zɔ kẅéte wɔ̀ɔn ńnáa metʉ̀ n dɔgɔ fa’a.

1 Korento 3:10

E Ssé ka cÿó gem yɔ́ɔn, mèŋ n nuŋe cÿó ndá pá’ ngàŋ levfò we mbòŋo. Mèŋ n ka nuŋe cÿó ndá, wetsɔ́ nyìŋ ne ńdɔgɔ fà’ ńgee mvfò. À ne ńkwɛ́ɛ ndá ndùmó. Tá’ awɔ̌wɔ́ɔ laga twó yé nà ntí gie à lɔgɔ ńkwɛ́ɛ ndá ndùmó.

1 Korento 7:17

Tá á gʉa ná mɔɔn menò ntsèm, mbà á poŋ ngie àwɔ̌wɔ́ɔ gwɔ́ pɔ́ nà jʉ’ gie e Ssé la záb ngie à gwɔ́ wó, ńnéŋe nà jʉ’ gie e Ssé ka gwaa tóŋo yé á ńnéŋe wó. Áa mmó gie mèŋ n ne ńgɔɔn tsɛ̀ɛ mecú’tè pʉ̀a Kristo ntsèm ngie mé gÿo.

2 Korento 10:13

Á gʉa ná peg, mbà ńgwɔ́ peg é le ka’te tà ńzyɛ́’ ndège wɔ́, ńcʉ́’ pú’u, peg gwɔ ka’te ńdɔg pɔ́ mejʉ’ mie e Ssé la cʉ́me mbwo peg pá’ peg ge gʉa wó. À la gÿo peg gʉa tà ńkúu mbɔɔ lá’ pi.

2 Korento 12:13

Àpì yɔ́ɔn mie metsɔ́ mecú’tè pʉ̀a Kristo la jÿó ńcʉa gẅi áa kɔ́? Kà á fó ńgwɔ́ pɔ́ pá’ n da tè nkáb gí kẅé. Pi gyá wɛ̌ légwɔ́ tě ńdɔgɔ ńgiŋe wɔ́. Pi ké ńdege ńná né mèŋ la.

2 Korento 12:7

Pá’ n da gyá menò mmɔɔn mmɔɔn la, e Ssé gyá ngie ńgwaa ńgwɔ́ n dɔg ńŋá’te, ńzẅíŋ mântúm Sátà ńnéŋe ńcúa wɔ̀ɔn, é gwɔ́ ngɔ́’ gie e la kúu ná mèŋ pá’ nzóŋ gie e lé’e ná mèŋ ńne ńnéŋe ńgége wɔ̀ɔn la, pú’u, légwɔ́ gie n te ka’te wɔ́,

Galatia 6:3

Nyìŋ lɔɔn ńkwaŋ ngie aa mmó, té gwɔ́ yɛ̌ mmó, mbà à sele fʉte twó mbùm yé.

Efeso 3:2

Á ge gǎ wɔ́, mbà pi la jú’ ngie e Ssé zɔ la náa yɔɔn fà’ mbwo mèŋ, légwɔ́ gie mèŋ n gÿo yɔɔn fà’ pi zẅɛ́’. À lɔ̌ɔn ńdɔgɔ ńcÿó pɔ́ gʉm yɔ́ɔn.

Efeso 3:4

Pi ge tóŋo yɔɔn ŋwà’ne é jú’ ntí gie mèŋ n dɔg ńzsé ntsèm gie ee nà nò Kristo.

Efeso 4:16

Yé zɔ gÿo mejʉ’ nnɛ́ cú’te ńtemte ńgwɔ́ tà’a mmó. Menŋàŋ nnɛ́ tà ńgyɔ́ɔn kẅéte légÿo mejʉ’ mbùm temte, yɛ̌ jʉ’e nnɛ́ wɔ́ piŋ ńgwɔ́ tà ne fa’a yé fà’, mbùm nnɛ́ ntsèm pú ńgú’, ńtʉte ńcʉa pɔ́ nà nkwòŋe gie ee tsetsɛ̀ɛ pɔ́b.

Filipo 2:13

E Ssé zɔɔn ne fa’a tsɛ̀ɛ ntʉ́m pi légwɔ́ gie pi ge kwoŋ shúm sie é poŋo yé, mbɔɔ légwɔ́ gie pi ge gíŋ gÿo sɛ̌ shúm.

Kolosia 1:29

Pi jú’u mmó gie mèŋ n kwé mǒ. Mèŋ n kě ńdɔgɔ pɔ́ metʉ̀ mie é fóo mbwo Kristo tá fa’a yɔɔn fà’. Mɛ̌ metʉ̀ kwa’ ńgwɔ́ soŋ nnɛ́ mèŋ ńne fa’a.

Kolosia 2:13

Pi laa tsɔ́ fʉ̀’ ńgwɔ́ mbwo Ssé, ńgwɔ́ pɔ́ mepfó, ńtí menò tepòŋ mí, mbɔɔ pá’ pi la tè pʉ̀a pie mé la pú’u wɔ́b lélɔgɔ wɔ́b ńgÿo pʉ̀a Ssé wɔ́. Á ké ńgwɔ́ nà fʉ̀’ɔɔn, mbà Ssé kéen ḿbúte gẅia Kristo ńzíme nà legwé. À kéen ḿbú ńdege menò tepòŋ mégè ntsèm, ńnáa mbwo pege.

1 Timote 1:14

Cʉ̀apʉ̀a wege Yěsô Kristo, la gÿo nò mbòŋo yé ná mèŋ tà á zyɛ́’. Á la gÿo mèŋ n záb ntʉ́m ná yé, mèŋ m biŋ ńkwoŋ petsɔ́ pʉ̀a. Á fóo ná pá’ mèŋ n da nnɛ́ ná yé.

1 Timote 2:15

Tá’, mèŋ n gɔɔn pá’ɔɔn, manzwě ge lɔg pɔ́ pá’ à gẅiin penkʉ́ tá tsẅɛ́. Tá’, á zɛ́te ngie à ké ńzáb pɔ́ ntʉ́m nà Ssé, ńkwoŋ pʉ̀a mesoŋ, ńgẅiin mbùm yé lê mekù’, ńgÿo mmó gie á poŋ Ssé.

1 Timote 2:9

N giŋé ne ńtsɔ́ɔn ngie pànzwě lɔɔn ńne ńgee lê tsɛ̀ɛ cú’tè pʉ̀a Kristo, pɔ́ ma’ menzsǒ mie ée mbòŋ mbwo pʉ̀a Ssé, é menzsǒ mie é té gwɔ́ pɔ́ tsɔ̌ ntí wɔ́, é mie é gwɔ́ pɔ́ mé pànzwě pie mekù’ ée ná pɔ́b. Tà pɔ́ cʉ́’ʉ lékẅiŋ mbùm yɔb, ńtáŋte menòŋo twó mɔ́b pɔ́ nà tsɔ̌ ntí gie e sẅile sẅile. Kà ńjÿɔ́g pɔ́ shúm sie é cÿɔ́g pɔ́ nkáb tɛ’ wɔ́, tà pɔ́ ma’ menzsǒ lélɔg ńnyɛ pɔ́ nnɛ́.

Titus 2:12

Yɛ̌ ntí nkwòŋe ne ńzí’i wege légwá’a mà gẅie à tè Ssé poŋ mbɔɔ pá’ pege tè gíŋe ńgÿo shúm sie ntʉ́m wege tsóte wege ngie pege gÿo wɔ́. Pege cʉ́’ ńgwɔ́ tsɛ̀ɛ yɔɔn njÿó, ńgwɔ́ pʉ̀a pie é sáŋa nò tá ńgÿo, ńgÿo pɔ́ menò mie é tyé ndʉŋ ndʉŋ, ḿbiŋe ńjú’u pɔ́ ndà’ ncwò Ssé.

Titus 2:2

Gɔɔn né mbàŋa gie é zẅǐŋ ngie tà pɔ́ gÿo tsɔ́ mmo tà á cʉa, ńgie pɔ́ gwɔ́ pʉ̀a mekù’, ńgie pɔ́ gwɔ́ pʉ̀a pie é sáŋa nò tá ńgÿo. Pɔ́ gíŋ ńzáb ntʉ́m nà Ssé tà ńzáb, ńnéŋe ńkwoŋo pʉ̀a tà ńkwoŋo, éshÿɔgɔ menò tà shÿɔgɔ.

Titus 2:4

ńzsé ngie pɔ́ ge nyɛ pànzwě pie é nyé ńzɔ́’ɔ pá’ wɛ̌wɛ̌ wɔ́ à ge kwoŋo ndǔm we mbɔɔ penkʉ́ pé,

Titus 2:6

Á gíŋ ńgwɔ́ pɔ́ ndʉŋ ndʉŋ pá’ ɔ̀ ge kẅiŋte pûɔ mbàŋa lésáŋa nò fʉ̀’ ntsèm tá ńgÿo.

Ŋwà’ne Jâg 4:6

Tá, e Ssé kě ńne ńcÿó gʉm yégè, apòŋo ntʉ́m yé nzèm pege fáŋ ńcʉa kɔ̀ɔkɔ́ɔ. Ŋwà’ne Ssé zɔɔn ńgɔɔn ngie: E Ssé lʉ’ pàŋá’te nnɛ́ lʉ’, ńké ńdɔgɔ pòŋo ntʉ́m ńdíe pʉ̀a pie é sẅí’i mbùm yɔb ńnáa ssé.

1 Piɛ 1:13

Pú’u, legyè sí tyé pɔ́ nà legÿo mmó nà ntí ye pʉ̀a Ssé, tà pi gwá’a lÿɔg, pi ńnéŋe ńne ńnyɛte ńzwí’te fù’ gie Ssé ge gÿo ná né pi, á ná fʉ̀’ gie Yěsô Kristo ge gÿo tó.

1 Piɛ 4:11

Afù’ ye nyìŋ lɔɔn ńgwɔ́ légɔɔn nò Ssé, á gɔɔn pɔ́ gie á fóo mbwo Ssé. Aye nyìŋ gwɔ́ léfa’ mefà’ tsɛ̀ɛ cú’tè, á lɔg pɔ́ metʉ̀ mie Ssé náa mbwo yé ńdɔg fa’. Pi gÿo pá’ɔɔn ńzsé ngie mé ge cʉa ná Yěso Kristo, égu’te Ssé nà kɔ̀ɔkɔ́ɔ, yé gẅie metʉ̀ ntsèm, mbɔɔ lésá’ njÿó ée mbwo yé nà mengù’ nkɔ́ɔn nê nkɔ́ɔn. Amɛn

1 Piɛ 4:7

Afʉ̀’ʉ nzsòte kɔ̀ɔkɔ́ɔ wɔ́, á ne ńku’u. Pá’ áa pú’u la, pi gwɔ́ pàzsé nò. Tà pi gwá’a lÿɔg, ńzsé ngie pi ge ku’u lésẅíŋte Ssé.

1 Piɛ 5:5

Á gʉa ná pi gí pûɔ shùm, pi ná nnɛ́ ssé mvfò pàkẅé mvfò tsɛ̀ɛ cú’tè, ńgʉa ná pʉ̀a metsèm, tà pi ne ńgÿo tsɔ́ mmó, nyìŋ gẅi kwaŋ ngie à cʉa wetsɔ̌. Á nue ŋwà’ne Ssé gɔɔn ngie: E Ssé lʉ’ pàŋá’te nnɛ́ lʉ’, ńké ńdɔgɔ pòŋo ntʉ́m ńdíe pʉ̀a pie é sẅí’i mbùm yɔb ńnáa ssé.

1 Piɛ 5:8

Tà pi gwá’a lÿɔg, tà pi lyé. Angàŋ mbù gẅi, Sátà, à ne ńgwá ńzéme, éfa’a nyìŋ gẅie à ge gwoon yé, pá’ pú’ ntʉ̀ gẅie à ga’te éfa’a mmó gie à ge pfɛ́ la.

3 Jâŋ 1:9

Mèŋ n ka ŋwe’e mékème ŋwà’ne, ńnáa tsɛ̀ɛ gí cú’tè pʉ̀a Kristo, tá Ndiotelɛf gẅie à kwoŋo lézá’te mvfò mânyìŋ ntsem lʉ’ʉ lé jú’u nò gie mèŋ n gɔɔn tsoló.