Ŋwà’ne Ngyà jʉ’ 1:5 - Nouveau Testament en Ngienboum

⁵ Yěsô Kristo gẅie aa njÿò ńgyá we nénʉ́, ńgwɔ́ ndùŋ mvfò múɔ, ńgwɔ́ ndùŋ mvfò nyìŋ gẅie à la kwé ḿbiŋ ńzím, ńgwɔ́ Fùɔ cʉa mefùɔ pie ée ndùmo ssé tsetsá’, á gíŋe ńne ńgwɔ́ né pi, ńgíŋe ńne ńnéŋe sẅétè ntʉ́m pi. Yé Kristo kwoŋo wégè tɛ’, à la lɔg metse mé ńkyɛ́’ nkÿo menò tepòŋ ná pege.

Ŋwà’ne Ngyà jʉ’ 1:5 ပူးပေါင်းရင်းမြစ်များ

Matio 20:28

Ndʉŋ ndʉŋ pá’ *Míŋ Nyìŋ la te tóo ndùmo ssé tsetsá’, pɔ́ pá’ epʉ̀a mesoŋ gee fa’a mbwó yé wɔ́, á la tó pɔ́ lefa’a mbwó pʉ̀a mesoŋ, éfa’ fa’ tà gíŋe náa twó yé lélɔg ncu’ pʉ̀a tà ńgyɔ́ɔn.

Matio 28:18

Yěsô tóo lejʉ́ŋ pɔ́b, ńgɔɔn né pɔ́b ngie: E Ssé leen ńná tʉ̀ ntsèm né mèŋ lélɔg sá’ shúm sie ée tÿǒ lepwó mbɔɔ sie ée ndùmo ssé tsetsá’.

Ŋwà’ne Jâŋ 13:1

Á la cʉ́’ pɔ́ pá’ njÿó ge lʉ́a mé jÿó línɔ́ɔn *Páskà, Yěsô ne ńzsé ngie ayé fʉ̀’ kǔ’ pá’ à ge fó tsɛ̀ɛ yɔɔn njÿó é gʉa kẅɛ́te Tá we. Pá’ yé Yěsô lɔ̌ɔn ńkwoŋo pʉ̀a pie ée tsɛ̀ɛ njÿó ńgwɔ́ pé la, á kẅi’i ńkwoŋo wɔ́b tà ńcʉ́me.

Ŋwà’ne Jâŋ 13:34

Mèŋ n ge ná *lepʉ̌ se sẅé né pi, e gwɔ́ ngie: Pi kwoŋe pi né pi. Pá’ mèŋ n da kwoŋo gẅi lá, pi gí kwoŋe pi né pi.

Ŋwà’ne Jâŋ 15:9

Pá’ Tá wɔ̀ɔn kwoŋo wɔ̀ɔn ma, mbɔɔ mèŋ yɔ́ɔn, n kwoŋo gẅí. Pi la nnɛ́ gi ná mèŋ nà ntí gie mèŋ n ge ké ne kwoŋo gẅi kwoŋ.

Ŋwà’ne Jâŋ 18:37

*Pilato leen ńké ńzɛ́te yé ngie: Ɔ̀ lɔgɔ ńgwɔ́ fùɔ wɔ́? Yěsô tsɔ́’ ngie, ɔ̀ gɔ̌ɔn pú’u, mèŋ n gee fùɔ. Jú’u mmó gie á la gÿo mé zyé wɔ̀ɔn, ńgíŋe ńjú’u mmó gie á la gÿo mèŋ n tóo tsɛ̀ɛ njÿó. N da tó légɔɔn mmó gie mèŋ n zsé nà nò nénʉ́. Nyìŋ gwɔ́ ná nò nénʉ́, á jú’ ngyè yɔ̀ɔn.

Ŋwà’ne Jâŋ 3:11

Tà mèŋ shwóŋó gú, kwà’ nénʉ́, peg gɔɔn nò nà mmó gie pèg ne ńzsé, ńgɔɔn gie peg ne ńzsé nà mmó gie peg la gyá, tá’ pi ké tè zẅíŋe nò gie peg gɔɔn wɔ́.

Ŋwà’ne Jâŋ 3:16

Á nue ntí gie e Ssé la lɔg ńkwoŋ njÿó pú’u la gwɔ́ tà á náa Míŋ we wémɔ’ɔ́, légwɔ́ gie wɛ̌ nyìŋ wɔ́ gẅie à zǎb ntʉ́m wé ná Míŋ we ŋwɛ́, à tě ńdá’a ńkaa ndòon tèmì wɔ́, à ge lá’ gẅiin le gwɔ́ tèmì.

Ŋwà’ne Jâŋ 3:32

À gɔɔn nò gie à zsé nà shúm sie à la gyá mbɔɔ sie à la jú’, tá nyìŋ tè zẅíŋ.

Megàŋ ntúm 20:28

Pi pɔ́ɔn gí twó kwà’ mboŋó, ḿbiŋ ḿbɔ́ɔn ye nùɔ *njʉ̀njÿò gie Zẅìge Ssé ka cʉ́me mbwo pi ngie pi ne ḿbyɛ́bɛ. Pi líe cú’tè pʉ̀a Ssé mboŋó. À la pfɛte metse Míŋ we ńdɔg ńgÿo pɔ́ tsẅɛ́.

Megàŋ ntúm 26:23

Mé la gɔɔn ngie, *Nzà’nkÿo pù’ ge gÿo tó, é gyá ngɔ́’, ńgie yé zɔ ge gÿo gwɔ́ ndùŋ mvfò nyìŋ lézíme ná legwé, ńgie yé zɔ ge gÿo gɔɔn shwóŋè gie á ge kyɛ’ pà Yuda mbɔɔ pʉ̀a pie pɔ́ té pà Yuda wɔ́, pɔ́ tsẅɛ́.

Roma 3:25

E Ssé ka lɔgɔ́ yé ńnuŋe pwɔ́’ pá’ metse mé ge sɔg menò tepòŋ pʉ̀a pie pɔ́ záb ntʉ́m ná yé Kristo. Pá’ nyìŋ la gẅiin lékwé ná menò tepòŋ pʉ̀a la, á lɔgɔ ńnyɛɛ ngie e Ssé gÿo menò mé ndʉŋ ndʉŋ. Á kaa tsɔ́ fʉ̀’, pʉ̀a mesoŋ ne ńgÿo nò tepòŋ, yé Ssé gÿo pɔ́ pá’ fʉ̀’ gie à tè ne ńgyá wɔ́ la.

Roma 8:37

Tá’ á ké ńgʉa ná shúm sɛ̌ ntsèm, pege gwɔ́ pà tántʉ̀, pà cʉa sɛ̌ shúm ńzẅɛ́’ɛ nyìŋ gẅie à la kwoŋo wégè.

1 Korento 6:11

Áa pá’ tsɔ́ pʉ̀a tsetsɛ̀ɛ pi ka zɔɔn ńgwɔ́ pú’u. Tá’ e Ssé ka sɔg mɛ̌ menò ná pi, ńdɔgɔ gẅi ńgÿo pʉ̀a pé. E Ssé yege ka lɔgɔ Zẅìge yé ńgÿo pi cʉ́’ ńgwɔ́ pɔ́ pʉ̀a pie ée ndʉŋ ndʉŋ mvfò ye ńtí Cʉ̀apʉ̀a Yěsô Kristo.

Galatia 2:20

Mèŋ n zɔ tè pá’ɔɔn ńgíŋe sá’a twó mbùm yɔ́ɔn mɔ́, Kristo zɔ cʉ̌’ ńgwɔ́ soŋ nnɛ́ mèŋ ésá’a wɔ̀ɔn. N dɔɔn ńgÿo pɔ́ kɔ́ wɔ́, mbà á gwɔ́ pɔ́ ngie m bǔ ńzáb ntʉ́m wɔ̀ɔn ná Míŋ Ssé. Àa nyìŋ gẅie à la kwoŋo wɔ̀ɔn kwoŋ tà ńkwé nà twó yɔ́ɔn.

Efeso 2:4

Tá’ e Ssé kě ńtsɔ́ɔn mezìŋe pʉ̀a mesoŋ tɛ’. Á la piŋ ńcʉa pɔ́ nà ntí gie à la lɔg ńkwoŋo wégè,

Efeso 5:2

Pi gwaa gÿo kɔ̀ɔkɔ́ɔ gí wɔ́, ńdɔg pɔ́ nkwòŋe ndʉŋ ndʉŋ pá’ Kristo la kwoŋo wégè tà ńnáa twó yé ńdɔg ńnuŋe pwɔ́’ mvfò Ssé ńtí wégè. Epwɔ́’ ŋwɛ́ ée gẅie gyě poŋo mbwo Ssé.

Kolosia 1:18

Ye zɔɔ twó nà mbùm nnɛ́ gie áa cú’tè pʉ̀a pé. Legwɔ́ wó we sẅé à zye pɔ́ ná yé, aa ndùŋ mvfò nyìŋ gẅie à la kwé ḿbiŋ ńzím, pú’u ńzsé ngie yé zɔ ge gwɔ́ ndùŋ mvfò ná kɔ̀ɔkɔ́ɔ.

1 Timote 6:13

Mèŋ n tsẅii yɔɔn nò né gú, ńtyé mvfò Ssé gẅie à gÿo shúm ntsèm gwɔ́ wó, mbɔɔ mvfò Yěsô Kristo gẅie à la tyé mvfò Ponte *Pilato ńgɔɔn nò nénʉ́ gie à zsé.

1 Timote 6:15

À ge gÿo tóo nà fʉ̀’ gie e Ssé la záb. Yé Ssé gẅie à gẅiin tʉ̀ ntsèm. Yé zɔ̌ ndà’ Ssé, ńnéŋe pɔ́ tsɛ̀ɛ lekág, ńgwɔ́ Fùɔ cʉa mefùɔ, ńgwɔ́ Cʉ̀apʉ̀a mecʉ̀apʉ̀a,

Heber 10:29

Tà á lɔɔn ńgwɔ́ pú’u, mbà pi kwǎŋ gí ngie ngʉ̀ngʉ̀ gie á ne ńzɛ́te ngie mé zába twó nyìŋ gẅie à lɔgɔ́ míŋ Ssé ńtóŋ sɛ̌ shúm e ge lá’ ńgwá’a la? Mé gɔɔn nyìŋ gẅie à gwagá nò metse mie e Ssé lɔgɔ ńgwaa *kʉ̀a, é gwɔ́ mie mé la lɔg ńgÿo á cʉ́’ʉ nyìŋ Ssé, á nyìŋ gẅie à zoonté Zẅìge Ndʉalʉ̌a gie á gÿo pege zsé pá’ ntʉ́m Ssé poŋo nzèm pege pú’u.

Heber 9:14

Á lɔɔn ńgwɔ́ gie á laa pú’u, mbà ngʉ̀a shÿɔ́’ɔ ná pá’ metse Kristo ge gwɔ́? Á Kristo gẅie Zẅìge tèmì la gÿo, á lɔgɔ twó yé ńnuŋe pwɔ́’ gẅie *lɔ̌’ té mǒ wɔ́, á mvfò Ssé. Metse mé ge lá’ sɔg ncÿǒ mefà’ mie é náa pɔ́ legwé gẅie ée ná pege tà ntʉ́m wégè é le gíŋe ńŋaga wégè wɔ́, légwɔ́ gie pege ge fa’a mbwo Ssé gẅie aa ńgwɔ́ pɔ́ wó.

1 Piɛ 1:19

À la lɔg pɔ́ tʉ̀ nzẅìŋ metse Kristo gẅie tsɔ́ nò tepòŋ té ná yé wɔ́, atsɔ́ *lɔ̌’ ké tè ná yé wɔ́. Kristo laa pá’ mûɔ *njʉ̀njÿò gẅie mé la zẅé yé ńdɔg ńnuŋe pwɔ́’.

1 Jâŋ 1:7

Tá ńké ńgwɔ́ gie pege lɔɔn ne ńgiŋe ná jʉ’e fɔ̌g pá’ yé lê twó yé aa nà jʉ’ʉ fɔ̌g la, mbà pege ge pú gẅiin tà’ ncwò tsetsɛ̀ɛ pege, metse Míŋ we Yěsô leen ńké sɔgɔ wégè ná nò tepòŋ ntsèm.

1 Jâŋ 4:10

Nkwòŋe léen ńgwɔ́ pɔ́ pá’ɔɔn, pege zɔ la tè kwoŋ Ssé wɔ́, yé zɔ la kwoŋo wégè. À la kwoŋo wégè kwoŋ tà ńtúmo Míŋ we, á tó ńdɔgɔ twó yé ńnuŋe pwɔ́’ ńtí wégè, áa mmo gie á gÿo Ssé lege menò tepòŋ mégè.

Ŋwà’ne Ngyà jʉ’ 11:15

*Cÿɔ́’ Ssé mbɔ́ɔntè sɔɔn mbʉ́a tóŋ wé ntaŋ. Mé jú’ *Mecÿɔ́’ Ssé gwɔ́ tÿǒ lepwó ńdɔgɔ ngyè tetʉ́ʉ ńgɔɔn ngie: Lesǎ’ njÿó cʉ̌’ ńgwɔ́ pɔ́ nà mbwo Cʉ̀apʉ̀a wege mbɔɔ ná mbwo *Nzà’nkÿo gẅie à la tsɔ́’. Wɛ̌ lésá’ ge lá’ gwɔ́ nà ngù’ nkɔ́ɔn nê nkɔ̌ɔn.

Ŋwà’ne Ngyà jʉ’ 11:3

ńgʉa ná pʉ̀a pɔɔn mépʉ́a pie pɔ́ ge gɔɔn nò gie pɔ́ zsé ná mèŋ, mbà mèŋ n ge gÿo náa wɔ́b metʉ̀ lélɔg ńtsẅi nkʉ̀ wɔ̀ɔn. Pɔ́ ne ńtsẅii, ḿma’ menzsǒ lɔg ńdúŋ legwé ma’ nà melyɛ’ɛ́ lá’ ntsá’ lê nkÿo pʉ́a lê móm ntɔgɔ́ (1.260).

Ŋwà’ne Ngyà jʉ’ 17:14

Pɔ́ ge ma’a Mûɔ *Njʉ̀njÿò lê ncù, tá à ké ńcʉa wɔ́b, á nue aa Cʉ̀apʉ̀a mecʉ̀apʉ̀a, ńgwɔ́ Fùɔ mefùɔ. Epʉ̀a pie à la tóŋo wɔ́b, ńtsɔ́’ɔ wɔ́b, pɔ́ zsé pɔ́ ndà’ yé, pâ pɔ̌ pú ńcʉa nɔ̀ɔn ŋwɛ́.

Ŋwà’ne Ngyà jʉ’ 19:11

M biŋ ńgyá ncwò lepwó nyɛ́’ɛ ńtyé, fɔ́gɔ lÿóon kẅɛ ńtyé. Nyìŋ gẅie à ńnéŋe ná wɛ̌ lÿóon, mé tóŋo yé lê tèkubé shwóŋè, mbɔɔ lê nyìŋ gẅie à gÿo pɔ́ mmó gie áa ndʉŋ ndʉŋ. À tsɔ́’te ntsaŋ pɔ́ ndʉŋ ndʉŋ, ńdÿɔ́’ pɔ́ ncù gẅie ée ndʉŋ ndʉŋ.

Ŋwà’ne Ngyà jʉ’ 19:16

Mbà mé ŋwe’é tsɔ́ lezíŋ nà nzsǒ fÿɔ́g ye, mbɔɔ nà ntɔ́ɔn wé, é gwɔ́ lê: Fùɔ ncʉ̀a mefùɔ, mbɔɔ lê Cʉ̀apʉ̀a mecʉ̀apʉ̀a.

Ŋwà’ne Ngyà jʉ’ 2:13

Mèŋ n ne ńzsé jʉ’ gie pi ńnéŋe wó. Alʉ̀ŋe lefùɔ Sátà tyé jʉ’ó tá’, n ké ńne ńzsé ngie pi cwoŋó ńcʉŋe pɔ́ ná mèŋ. Pi laa nyé lézáb ntʉ́m ná mèŋ wɔ́, tà mbɔɔ ná melyɛ̌’ mie mé la zẅé Antipas á mbʉ̀a pi, á nà jʉ’ gie Sátà ńnéŋe wó. Antipas laa nyìŋ ńgɔɔn yé pɔ́ ndà’ nò gie à zsě ná mèŋ.

Ŋwà’ne Ngyà jʉ’ 3:14

Ŋwe’e menò mɔɔn, ńtúm ńnáa mbwo *cÿɔ́’ Ssé gẅie à líe cú’tè pʉ̀a Kristo gie áa tÿǒsoŋo Laodisé. Ŋwe’e ngie: Nyìŋ gẅie lezíŋ sé ée lê *Amen, á gwɔ́ njÿò ńgyá we tè kubé shwóŋè, gẅie à gɔɔn nò gie áa nénʉ́, gẅie yé zɔ nzyeté nà kɔ̀ɔkɔ́ɔ gie e Ssé la nyɛte, à ne ńgɔɔn ngie:

Ŋwà’ne Ngyà jʉ’ 7:14

Mèŋ n tsɔ́’ ngie, a Ndè, gù zɔ ne ńzsé. Á gɔɔn ngie ée pʉ̀a pie éfóo tsɛ̀ɛ máamáa ngɔ́’ ya. Pɔ́ ka lɔg metse mûɔ *Njʉ̀njÿò, ésɔg menzsǒ mɔ́b tà é lʉ́a, ńcʉ́’ʉ féfɔ́gɔ.