Matio 13:23 - Nouveau Testament en Ngienboum

²³ Mbyè mmó gie gwě nà tsetsá’a mbòŋo lɔgɔ ńgwɔ́ pʉ̀a pie pɔ́ jú’u shwóŋò Ssé tà nkwà’ ńjú’. Pɔ́ ée pá’ metsìŋe shúm mie setsɔ́ gwɔ́ ná memvòm nkÿo, setsɔ́ ná móm ntɔgɔ́, setsɔ́ ná móm ntá.

Matio 13:23 ပူးပေါင်းရင်းမြစ်များ

Matio 12:33

Yěsô gíŋe ngie: Àtÿǒ lɔɔn ńgwɔ́ tÿǒ mbòŋo, mbà á ge zém pɔ́ ntɔ̌ɔn mbòŋo. Àtÿǒ ké ńgwɔ́ yé tepòŋ, mbà á ge zém pɔ́ ntɔ̌ɔn tepòŋ. Mé zɔ́ɔn ńzsé yɛ̌ tÿǒ wɔ́ pɔ́ nà mentɔ̌ɔn mé.

Matio 13:8

Etsɔ́ memvòm gwe ná jʉ’e tsetsá’ mbòŋo, ésá’ ńgú’, ńzém. Etsɔ́ letsiŋe gwɔ́ ná mvòm nkÿo, etsɔ́ ná mvòm móm ntɔgɔ́, setsɔ́ ná mvòm móm ntá.

Matio 3:10

Mé ně ńzɔɔn ndá’ ńkaa ńzɔɔn lélɔg ńkɔ́’ɔ yɛ̌ yɛ̌ tÿǒ wɔ́ gie á té zém ntɔ̌ɔn mbòŋo wɔ́, éfó ssé kɔ́’ɔ yé, e ké ma’ pɔ́ mmɔ̌g

Matio 3:8

Pi gÿo pɔ́ menò mbòŋo mie e nyɛɛ ngie pi kubé mà.

Malékuse 10:15

Mèŋ shwóŋó gẅí, kwà’ nénʉ́, nyìŋ lɔɔn tè cʉ́’ pá’ mûɔ mémúɔ, ńzẅíŋ ngie Ssé zɔ cʉ’ʉ́ sá’a yé wɔ́, mbà pɔ́ Ssé té ńdá’a ńteme nò wɔ́.

Malékuse 4:20

Mbyè mmó gie e gwě nà tsetsá’a mbòŋo, lɔgɔ ńgwɔ́ pʉ̀a pie pɔ́ jú’u shwóŋè Ssé, ńzẅíŋ, ḿbiŋ ńně ńgÿo pá’ nò Ssé ne ńzɛ́te, ńdɔgɔ ńgee mvfò, pɔ́ lɔgɔ ńgwɔ́ pá’ mbyè mmó gie tsɔ̌ mvòm gwɔ̌ sá’ tó ńná memvòm móm ntá, yetsɔ̌ ná móm ntɔgɔ́, yetsɔ̌ ná nkÿo.

Lukase 13:9

pú’u, kà à lɔɔn ńgwɔ́ á lá’a fʉ̀’ pá’ɔɔn ńzém ntɔ̌ɔn wɔ́? Ńké ḿbiŋ tè zém ɔ̀ tsẅi mèŋ n kɔ́’.

Lukase 8:15

Mbyè mmó gie e gwě nà tsetsá’a mbòŋo lɔgɔ ńgwɔ́ pʉ̀a pie pɔ́ jú’u shwóŋè Ssé, ńzẅíŋ lê ntʉ́m mbòŋo, ńgÿo pá’ á ne ńzɛ́te, ḿbiŋ ne ńkaga tʉ̀ lékú’te fʉ̀’ ntsèm, ḿbiŋe ne ńzéme ntɔ̌ɔn.

Lukase 8:8

Metsɔ́ memvòm gwe ná jʉ’ʉ tsetsá’a mbòŋo, ńgú’, ńgÿo ńzém, tà’ letsiŋé ná mvòm nkÿo. Yěsô gɔɔn pú’u, ngie, nyìŋ lɔɔn ńgẅiin metuŋó lélɔg ńjú’u nò á jú’.

Ŋwà’ne Jâŋ 15:16

Pi zɔ la tè tsɔ́’ɔ wɔ̀ɔn mɔ́, mèŋ n zɔ la tsɔ́’ɔ gẅí, ńtúmo gẅi ngie pi gʉa fa’a fà’ yɔ́ɔn. Ammó gie pi gÿǒ lá’a ńgwɔ́ pɔ́ wó, á le cʉa sẅɛɛ wɔ́. À cʉa pú’u, ńgwɔ́ gie pi lɔɔn ńdɔg lezíŋ sɔ́ɔn ńdúɔ pɔ́ kɔ́ mbwo Tá wɔ́, mbà à ge náa mbwo pi.

Ŋwà’ne Jâŋ 8:47

Nyìŋ gẅie aa nyìŋ Ssé à zẅí’te shwóŋè Ssé. Pi piŋ tě ńzẅí’te shwóŋè yɔ́ɔn mɔ́, mélà’mie pi tè pʉ̀a Ssé wɔ́.

Megàŋ ntúm 16:14

Atsɔ̌ tà’ gwɔ́ tsetsɛ̀ɛ pɔ́b, mé tóŋo yé lê Litiɔ. Mbà à la fó tÿǒsoŋo Tiatire. Á táŋa tsɔ́ mepàŋ nzsǒ é poŋ tɛ’. Mbà à la zẅíŋe nò Ssé pà Yuda. Peg ne ńgɔɔn nò, á nyɛte ńzẅí’te kwà’ mboŋó, ńtí nue Cʉ̀apʉ̀a la tsɔ́’ ntʉ́m wé pá’ à ge téŋe letuŋó sé ńnyɛte zẅí’te nò gie Pɔl ne ńgɔɔn.

Megàŋ ntúm 17:11

Pà Yuda pie ée nà yɛ̌ tÿǒsoŋ gẅiin ntʉ́m mbòŋo ńcʉa pie ée Tesalonika. Pɔ́ zẅí’te shwóŋè Pɔl pɔ́ Silas lê ntʉ́m mbòŋo, ńgwɔ́ lyɛ̌’ ntsèm, ńne ńtóŋo ŋwà’ne Ssé, ńtuu nò ńnáa mǒ, éfa’a lézsé ka nò gie pɔ́ shwóŋó wɔ́b, áa pú’u wɔ́.

2 Korento 9:10

E Ssé gẅie aa náa mbyè mmó mbwo nyìŋ gẅie à pye, ńnáa mmó léjÿó á pfɛ́ɛ, à ge gÿo ké ne kẅi’i shúm sí kẅi’i, é gÿo e shʉ́a, légwɔ́ gie pi ge lɔgɔ pòŋo ntʉ́m é kẅi’i náa mmó né pʉ̀a.

Filipo 1:11

Yěsô ge gÿo pi ké ne fa’a pɔ́ mefà’ mbòŋo, ńzsé ngie pʉ̀a ge ne gyá, é gu’te Ssé, é gé’e lezíŋ sé.

Filipo 4:17

N gɔɔn pá’ɔɔn, á té gwɔ́ pɔ́ ngie, n ne fa’a pɔ́ shúm sie mé ge túm ná né mèŋ wɔ́. Mèŋ n ne ńtsɔ́ɔn pɔ́ ngie e Ssé fó mǒ ńnéŋ mbʉ́lè ná pi.

Kolosia 1:10

Pú’u, pi ku’u léńnéŋe ná ntí gie Cʉ̀apʉ̀a ne ńkwoŋo, ńne ńgÿo pɔ́ mmó gie á poŋo yé, éfa’ mefà’ mbòŋo mentí mentí, ńkẅi’i ńzsé yé Ssé.

Kolosia 1:6

Nkʉ̀ Mbòŋo ne saa jʉ’ tsɛ̀ɛ njÿó té vʉ’ʉ tsɔ́, ńgwɔ́ pá’ tÿǒ gie á ne ńzéme ntɔ̌ɔn, ńgíŋe ne ńgú’u la, ée tsetsɛ̀ɛ pi, ńgíŋe ńne ńgee ne mvfò pɔ́ pú’u, tà fó ndùŋ mvfò lyɛ̌’ gie pi la jú’ mé zye lékím pá’ e Ssé lɔgɔ menò mbòŋo mé ńcÿó gʉm pʉ̀a, pi kéen ńgyá yɛ̌ nò, ayɛ̌ nò gwɔ́ gie áa nénʉ́.

1 Tesalonika 4:1

Mefɛ́ mefɛ́, anò gie peg ge lɔg cʉ́me á gwɔ́ pɔ́ ngie peg ka shwóŋó gẅi ntí gie à lɔɔn ńgwɔ́ pi lɔg ńnéŋe pú’u, anò gí poŋ Ssé. Á ge gǎ wɔ́ pi ne ńnéŋe pɔ́ pú’u. Tá’ peg giŋé ne sẅíŋte gẅí, tà ḿbú’u pɔ́ mbwo nà lezíŋ Cʉ̀apʉ̀a Yěsô ngie, pi gÿo pɔ́ pú’u, ńdɔg ńgee mvfò.

2 Tesalonika 2:10

À ge lá’ lɔg menò mie é té nò wɔ́ mentí mentí, éfʉte pʉ̀a pie é ge lá’ pyé. Pɔ́ pyé pú’u, mélà’mie pɔ́ lʉ’ʉ lékwoŋo nò gie áa nénʉ́ gie á kě gÿo pɔ́ tsẅɛ́.

Heber 4:2

Pege ka zɔɔn ńgíŋe ńjú’ yégè nkʉ̀ mbòŋo ŋwɛ́ pɔ́ pá’ pʉ̀a pie pɔ́ laa nkwòŋo tsẅɛ la jú’ yɔ́b. Tá pɔ́ la ké ńjú’ yɔ́b é té wɔ́b kẅétè, á nue pɔ́ la tè záb ntʉ́m wɔ́b mǒ wɔ̌.

Heber 6:7

Pege zɔɔn ńzsé ngie, mbʉ̀ŋ lɔɔn ńdúu nà tsetsá’ kwà’ mboŋó, eshúm sie é ge kẅéte pʉ̀a pie pɔ́ gÿǒ mé jʉ́’ʉ yɛ̌ tsetsá’ é kwɔ́’, mbà Ssé ge néŋ mbʉ́lè ná yɛ̌ jʉ’e tsetsá’.

Heber 8:10

Tá *akʉ̀a gie mèŋ n ge gwaa tsetsɛ̀ɛ pega pʉ̀a Israel á yɔɔn. Yɛ̌ fʉ̀’ ge gÿo gwɔ́ tà tɔ́g, mèŋ Cʉ̀apʉ̀a zɔ gɔɔn Mèŋ n gÿo legyè sɔ́b ńnéŋe ńtyé pɔ́ nà mbʉ̌ mɔ́ɔn mbɔɔ ntʉ́m wɔ́b tyé pɔ́ mǒ Mèŋ n gwɔ́ Ssé yɔb pɔ́ gwɔ́ pʉ̀a pɔ́ɔn

2 Piɛ 3:18

Pi lɔg pɔ́ pá’ pi ne ńzsé Yěsô Kristo, Cʉ̀apʉ̀a wege, ńgwɔ́ nyìŋ gẅie à gÿo pege tsẅɛ́ɛ, ńdɔg ńgʉa né mvfò, ńzsé ngie à ge kẅi’i cÿó gʉm gí, é ne ńgwɔ́ɔ né pi. Legú’ à gwɔ́ mbwo yé tà fó fʉ̀’ɔɔn, à lá’a ńgwɔ́ɔ pɔ́ pú’u! *Amen.

1 Jâŋ 5:20

Pege ne ńzsé ngie Míŋ Ssé la tó ńnáa wégè legyè pá’ pege ge lɔg zsé kwà’ Ssé ye nénʉ́, peg la zẅɛ́’ pɔ́ yé Yěsô Kristo tá pega Ssé ye nénʉ́ cʉ́’ ńnéŋe, mbà pega pɔ́ léen ńtemte.