Jẅide 1:20 - Nouveau Testament en Ngienboum

²⁰ Tá ńgʉa ná pi, mbà meshǔ pɔ́ɔn pe tʉ̀ nzẅìŋ, pi kẅi’i ńtʉte tʉte, ńne ńkú’te mmó gie pi la záb ntʉ́m gẅi mǒ. Yɛ̌ zɔ̌ cÿó gie gẅi leńnéŋe tyé mǒ. Pi tóŋo Zẅìge Ndʉalʉ̌a, à lɔg metʉ̀ mé ńkẅéte gẅí lésẅíŋte Ssé.

Jẅide 1:20 ပူးပေါင်းရင်းမြစ်များ

Megàŋ ntúm 15:9

E Ssé la té gÿo tsɔ́ lǎga metuŋ tsetsɛ̀ɛ pega pɔ̌ wɔ́. À la cʉa ná pá’ pɔ́ zǎb ntʉ́m ná Yěsô, ésɔg ntʉ́m wɔ́b.

Megàŋ ntúm 26:18

Mèŋ n túmo gú pú’u, ɔ̀ gʉa ńnyɛ́’ nÿɔ́g mɔ́b, ńgÿo pɔ́ fó tsɛ̀ɛ nzěm ńkẅɛ, ńkúu nà jʉ’ gie á ne fɔ́gɔ. Á lɔgɔ ńgwɔ́ ngie ɔ̀ ge gÿo gÿo pɔ́ fó nà mbwó Sátà ńkẅɛ, ḿbiŋe nà mbwó Ssé, é záb ntʉ́m wɔ́b ná mèŋ, e Ssé lege menò tepòŋ mɔ́b ńnáa mbwó pɔ́b, é piŋ náa yɔ́b jʉ’ á tsetsɛ̀ɛ pʉ̀a pé.

Megàŋ ntúm 6:7

Ashwóŋè Ssé la ne ńkẅi’i saa pɔ́ jʉ’. Anùɔ pàzáb ntʉ́m ná Yěsô ně ńkẅi’i ńgyɔ́ɔn Yerósalem. Pànuŋe pwɔ́’ tà ńgyɔ́ɔn záb ntʉ́m nà Yěsô.

Megàŋ ntúm 9:31

Á gwɔ́ fʉ̀’ó, à cú’tè pʉ̀a Kristo ńnéŋe tsɛ̀ɛ sẅéte. Mé té gíŋe ńgege wɔ́b nà pàga ngwòŋ Jẅidea wɔ́. Tà mbɔɔ tsɛ̀ɛ pàga ngwòŋ Galilea tà mbɔɔ Samalîɛ. Pɔ́b metsèm ne ńtóonte mennɛ́ mɔ́b, ńkẅi’i ńtʉte, ńne ńjú’u ncwò Cʉ̀apʉ̀a. A Zẅìge Ssé piŋ ně ńkẅéte wɔ́b, ḿbiŋe ńgÿo e nùɔ wɔ́b kẅi’i ńgyɔ́ɔn.

Roma 15:2

Á zɛ́te ngie wɔ̌wɔ́ɔ tsetsɛ̀ɛ pege fa’ pá’ à ge gÿo mmó gie á poŋ petsɔ́ pʉ̀a, pú’u ńdɔgɔ ńtsɔ́ɔn nò mbòŋo ná pɔ́b, é lɔg kẅéte wɔ́b pɔ́ kẅi’i ńzáb ntʉ́m nà Ssé.

Roma 8:15

A Zẅìge gie mé la ńnéŋe ná pi, zɔɔn tè Zẅìge gie á ge gÿo pi gíŋe ńgwɔ́ pɔ́ menkwɔɔn pie pɔ́ ge ne cÿɔ’ɔ cÿɔ’ wɔ́. Á gwɔ́ pɔ́ Zẅìge gie á ge gÿo pi cʉ́’ púɔ Ssé. Pege piŋ ńzẅɛ́’ɛ yɛ̌ Zẅìge, ńtóŋo yé lê Abba; á gwɔ́ ngie Tɔ̌ɔnmé.

1 Korento 1:8

Yé Yěsô Kristo ge gÿo pi tʉte tʉte tà ndá’ ńcʉ́me, à lá’a lyɛ’ gie yé Cʉ̀apʉ̀a wege, ge lá’ gíŋe tó mé le ne ńda’a gẅi nà tsɔ́ mmó wɔ́.

1 Korento 10:23

Tsɔ́ pʉ̀a ée tsetsɛ̀ɛ pi, ńne ńgɔɔn ngie ńgwɔ́ nyìŋ gÿo kɔ̀ɔkɔ́ɔ wɔ́ té pɔ́g *lepʉ̌. Áa nò tá’, eshúm ntsèm té kẅéte. Áa nò ngie ńgwɔ́ nyìŋ gÿo kɔ̀ɔkɔ́ɔ wɔ́ té pɔ́g *lepʉ̌, tá’ shúm ntsèm sie mé gÿo é té kẅéte pʉ̀a lékẅi’i ńzáb ntʉ́m nà Ssé wɔ́.

1 Korento 14:15

Tà áa pú’u, pá’ɔɔn ńgwɔ́ mèŋ n gÿo lêkɔ́? N gyǎ ngie n ge sẅíŋte Ssé nà ntí gie Zẅìge ne ńtsóte wɔ̀ɔn ngie mèŋ sẅíŋte pú’u, tá’ é gíŋe sẅíŋte nà ntí gie ńgwɔ́ nyìŋ jú’u nò gie n gɔ̌ɔn. Mèŋ n ge zɔb ntse nà ntí gie Zẅìge ne ńtsóte wɔ̀ɔn ngie mèŋ n zɔb pú’u, tá’ é gíŋe zɔb á nà ntí gie ńgwɔ́ nyìŋ jú’u mmó gie azɔ́b gɔɔn yɛ̌,

1 Korento 14:26

Mefɛ́ pɔ́ɔn pá’ áa pá’ɔɔn lɔɔn pege gÿo lêkɔ́? Pi lɔɔn ńgwɔ́ tà ńcú’te nyìŋ gẅi gẅiin zɔ́bɔ ntse á zɔb, nyìŋ gẅiin mmó gie à ge zí’i petsɔ́ pʉ̀a á zí’i, nyìŋ gẅiin mmó gie e Ssé ne ńnyɛɛ yé, á shwóŋ, nyìŋ gẅiin nò gie à ge gɔɔn lê shwóŋè gie mé té ne ńzsé wɔ́ á gɔɔn, nyìŋ gẅiin lékyagte á kyagte. Tá’ á ne ńzɛ́te ngie sɛ̌ shúm ntsèm e kẅéte lélɔg ńgÿo à cú’tè pʉ̀a Kristo ntsèm kẅi’i ńzáb ntʉ́m nà Ssé.

Galatia 4:6

Áa nénʉ́ pi ee kwa’ púɔ Ssé. Aliŋé áa pá’ Ssé la ńnéŋe Zẅìge Míŋ we tsɛ̀ɛ mentʉ́m mégè, á Zẅìge gie á gÿo pege tóŋo Ssé le Abba. Á lɔgɔ ńgɔɔn ngie Tá wɔɔn.

Efeso 4:12

À la záb pɛ̌ pʉ̀a légwɔ́ gie pɔ́ ge kẅéte pʉ̀a Kristo léfa’a fà’a Ssé, acú’tè pʉ̀a Kristo gie áa mbùm nnɛ́ ye, à kẅi’i ńgʉa nê mvfò.

Efeso 4:16

Yé zɔ gÿo mejʉ’ nnɛ́ cú’te ńtemte ńgwɔ́ tà’a mmó. Menŋàŋ nnɛ́ tà ńgyɔ́ɔn kẅéte légÿo mejʉ’ mbùm temte, yɛ̌ jʉ’e nnɛ́ wɔ́ piŋ ńgwɔ́ tà ne fa’a yé fà’, mbùm nnɛ́ ntsèm pú ńgú’, ńtʉte ńcʉa pɔ́ nà nkwòŋe gie ee tsetsɛ̀ɛ pɔ́b.

Efeso 4:29

ḿbɔ́ɔn mbɔɔ tà’a shwóŋè tepòŋ lékẅɛɛ ncwò pi. Pi gɔɔn pɔ́ nò gie á ge kẅéte ná yɛ̌ fʉ̀’, à gwɔ́ pɔ́ shwóŋè mbòŋo gie á ge kẅéte tsɔ́ pʉ̀a pɔ́ kẅi’i ńzáb ntʉ́m nà Ssé. Pi gɔɔn pɔ́ nò gie á ge kẅéte wɔ̌wɔ́ɔ ná pʉ̀a pie é ne ńzẅí’te.

Efeso 6:18

Pi gwɔ́ fʉ̀’ ntsèm ńne ńtsyɛ’te Ssé, ńgíŋe ne sẅíŋte yé nà mentí ntsèm, pá’ Zẅìge ge ne nyɛɛ gẅi ngie pi gÿo pú’u. Tà pi gwá’a lÿɔ̀g, pi sẅíŋte Ssé nà twó pʉ̀a Ssé métsèm.

Kolosia 2:7

Pi nyɛte ńcʉŋ leŋàŋ sí pɔ́ ná ye, ńtÿɔ́gɔ gẅi le gwɔ́ pɔ́ ná ye pá’ mé tÿɔ́gɔ ndá nà cÿǒ la, ńne ńkẅi’i ńkú’te pɔ́ nò yé mboŋó, yɛ̌ nò ké ńgwɔ́ pɔ́ pá’ mé la zí’i gẅí. Pi ne ńnáa ndǎg mbwo Ssé tɛ’.

1 Tesalonika 5:11

Pú’u la, pi kẅiŋte mennɛ́ mí pi né pi, nyìŋ tóonte nyìŋ, nyìŋ tóonte nyìŋ, pá’ pi ne ńgÿo pú’u lɛ.

1 Timote 1:4

Gɔɔn né pɔ́b ngie pɔ́ nyé menò pú’nkwɔb, lâ menò pà mangʉa njʉ’ pɔ́b pie pɔ́ tʉ́ é té mag. Yɛ̌ ntí menò gÿo mé zoŋo nò pɔ́ sẅɛ̀ɛ sẅɛ̀ɛ, é té kẅéte lézsé mmó gie Ssé la kwaŋa légÿo nyìŋ mesoŋ tsẅɛ́ wɔ́. Mé lɔg pɔ́ lézáb ntʉ́m nà Ssé tá ńzsé yɛ̌ mmó.

2 Timote 1:5

N daa lege ngie ɔ̀ záb ntʉ́m ná Yěsô Kristo tà shwóŋó nò wɔ́, n te lege ngie má gù we ndÿò Lowas tà mbɔɔ má gù Eunis lɔ̌ɔn ńgÿo pɔ́ pú’u wɔ́. N zsě ngie mbàa gù jú ɔ̀ giŋé ńzáb ntʉ́m ná Yěsô pɔ́ pá’ pɔ́b.

Titus 1:1

Yɔɔn ŋwà’ne áa ńŋwe’e mèŋ Pɔl, mèŋ fa’a fà’ Ssé, ńgíŋ ńgwɔ́ ngàŋ ntúm Yěsô Kristo. E Ssé la zába wɔ̀ɔn lékẅíŋte pʉ̀a pie yé Ssé la tsɔ́’ ńdɔg ńgÿo pʉ̀a pé. Á lékẅíŋte wɔ́b pɔ́ ké ńzáb ntʉ́m ná yé záb, ḿbiŋ ńgÿo pɔ́ zsé nò nénʉ́ gie mé cʉa mǒ ńzsé legìŋ gẅie à póŋ Ssé.

Ŋwà’ne Jâg 2:22

Ɔ̀ lɔgɔ ńgyá ngie we lezáb ntʉ́m nà Ssé pâ mefà’ mé la púte ńgiŋe kwò. Á la fó nà mefà’ mé we lezáb ntʉ́m nà Ssé gwɔ́ wó tà ńku’.

2 Piɛ 1:1

Aa mèŋ Símo Piɛ, nyìŋ gẅie à fa’a fà’ Yěsô Kristo, ńgíŋ ńgwɔ́ ngàŋ ntúm we. Mèŋ n náa yɔɔn ŋwà’ne mbwo pi pie pi la záb ntʉ́m ná Yěsô Kristo pá’ peg yég. Lezǎb ntʉ́m ná Yěsô Kristo áa mmó tʉ̀ nzẅìŋ mbwo pi mbɔɔ mbwo peg yég. Yěsô Kristo yé maŋwɛ́ zɔ la gÿo pú’u, né pege, á nue à gÿo mmó nà wɔ̌ɔwɔɔ pɔ́ ndʉŋ ndʉŋ. Aa Ssé yege, ńgwɔ́ nyìŋ gẅie á gÿo pege tsẅɛ́ɛ.

1 Jâŋ 5:4

Á nue wɔ̌wɔ́ɔ gẅie aa míŋ Ssé, à tʉ̌ ńcʉa kɔ̀ɔkɔ́ɔ gie á táte yé tsɛ̀ɛ njÿó. Ammó gie á gÿo pege tʉ ńcʉa njÿó, áa pá’ pege záb ntʉ́m ná Yěsô Kristo.

Jẅide 1:3

Meshǔ pɔ́ɔn pe tʉ̀ nzẅìŋ, n kɔ̌ɔn ńzɔ́gɔ ńtsɔ́ɔn tsɔ̌ɔn léŋwe’e ŋwà’ne ńnáa mbwo pi á nà nò pá’ e Ssé ka gÿo pege metsèm pú ńtsẅɛ́, tá’ n ka neŋé tà ḿbú ńgyá fʉ̀’ɔɔn ngie á zɛ́te ngie mèŋ n ŋwe’e ńdɔg ńkẅiŋte gẅi léma’ ncù ńdɔg ḿbɔ́ɔnte nò Yěsô Kristo gie e Ssé la cʉ́me mbwo pege pʉ̀a Ssé. Yɛ̌ nò gwɔ́ pɔ́ yémɔ’ɔ́ ndà’, atsɔ́ té ńdá’a ńgíŋe ńgwɔ́ wó wɔ́.

Ŋwà’ne Ngyà jʉ’ 13:10

Nyìŋ lɔɔn ńgwɔ́ gẅie mé la záb ngie à ge lá’ gwɔ́ pu’u ncù, mbà à ge lá’ gwɔ́ pɔ́ wɛ̌. Nyìŋ gẅie mé la záb ngie mé ge lá’ lɔg nně ncù, é zẅé yé, mé ge lá’ lɔg pɔ́ yɛ̌ zẅé yé. Yɔɔn nò lɔgɔ ńgɔɔn ngie pʉ̀a pie ée pe Ssé gẅiin léshÿɔg, ńké ńne ńzába pɔ́ ntʉ́m nà Ssé.