Heber 3:1 - Nouveau Testament en Ngienboum

¹ Pú’u la, mbà mefɛ́ pɔ́ɔn pʉ̀a kristo, e Ssé yé máŋwɛ́ zɔ ka tóŋo gẅi nà nò yé, àwɔ̌ɔwɔɔ tóo ná yé mmó. Pi sáŋa nò ná nyìŋ gẅie Yěsô aa wɛ̌, aa yé gẅie e Ssé la túmo yé ngie à gwɔ́ wege *nùŋe pwɔ́’ we lÿò ná nò Ssé gie pege tyé mǒ.

Heber 3:1 ပူးပေါင်းရင်းမြစ်များ

Ŋwà’ne Jâŋ 17:3

Legwɔ́ tèmì wéwɛ̌, á gwɔ́ pá’ pɔ́ ge zsé gú, gù gẅie ɔɔ kwà’ ndà’ Ssé ye nénʉ́ gílé gù, é gíŋe zsé nyìŋ gẅie ɔ̀ la túmo yé, á gwɔ́ Yěsô Kristo.

Ŋwà’ne Jâŋ 20:21

Yěsô gíŋe ńgɔɔn né pɔ́b ngie: Mbʉ́lè gwɔ́ né pi. Pá’ Tá wɔ̀ɔn la túmo wɔ̀ɔn la, mèŋ n tumó gẅi yɔ́ɔn.

Ŋwà’ne Jâŋ 20:27

Ńdeen ńké ńgɔɔn né Tomáse ngie: Tsíŋe múɔ tepwó gù jʉ’ɔɔn. Líe mbwó mɔ́ɔn. Tsíŋe pwó jú, éshÿɔ́gɔ nà gwoŋó nnɛ́ yɔ́ɔn. Tè gíŋe ḿmʉ́’te, zẅíŋ ngie aa kwà’ mèŋ.

Megàŋ ntúm 1:15

Á gÿo ńgwɔ́ tsɔ̌ lyɛ̌’, mefɛ́ mefɛ́ cú’te ssé, (tà ńgwɔ́ mmó pʉ̀a nkÿo lemóm mbʉ́a). Piɛ lu ssé, ńtyé tsetsɛ̀ɛ pɔ́b ńgɔɔn ngie:

Roma 11:17

Alá’a pà Israel áa pá’ tÿǒ mèvɛ olive nyìŋ, mbà ngàŋ ka kɔ́’ tsɔ́ mbwó mǒ ńgwá’. Gù gẅie ɔ̀ tè nyìŋ Yuda wɔ́, ɔ̀ gwɔ́ pá’ pwó tÿǒ mèvɛ olive gie á gwɔ́ pɔ́ mbím, mbà mé ka lɔgɔ gú ńtó ńdaa nùɔ mbwó mie é ka nyě ńgwɔ́ nà tÿǒ ŋwɛ́. Ɔ̀ɔ nà fʉ̀’ɔɔn ńne ńzẅɛ́’ɛ metse tÿǒ mie é ne fóo ná menŋàŋ ńkúu ná pia pɔ̌ métsèm.

Roma 15:27

Pɔ́ zɔ ka pʉlé ńgyá pú’u tá’, é zɔɔn ńgwɔ́ pɔ́ njǔ gie pɔ́ gẅiin létoŋo mbwo pɔ́b. Á nue á lɔɔn ńgwɔ́ gie pʉ̀a pie é té pà Yuda wɔ́ kéen ńgẅiin yɔ́b mmó nà shúm sie Ssé la pu’ ssé ńná pɔ́ né pà Yuda, mbà pɛ̌ pʉ̀a gẅiin pá’ pɔ́ ge gʉa ná shúm sie ée sɔ́b, é pi tsɔ́ é ná mé lɔg ńkẅéte pà Yuda.

Roma 15:8

Áa mmó gie á la gÿo Kristo tó fa’a mbwo pà Yuda, légÿo menò mie e Ssé la ka’a mbwo pà mangʉa njʉ’ pɔ́b pumte. Ndʉŋ ndʉŋ pá’ kɔ̀ɔkɔ́ɔ gie e Ssé gɔɔn wɔ́ ké ḿbumte pumte.

Roma 9:24

Pɛ̌ pʉ̀a lɔgɔ ńgwɔ́ pɔ́ wégè wɔɔn, á wégè gẅie à tsɔ’ɔ́ nùɔ pà Yuda mbɔɔ nùɔ pʉ̀a pie é té pà Yuda wɔ́.

1 Korento 1:2

Mèŋ n ŋwe’e ńnáa mbwo cú’tè pʉ̀a Ssé á tÿǒsoŋo Korento, á wɔ́b pie e Ssé la laa wɔ́b nà Yěsô Kristo ńdɔgɔ wɔ́b ńgÿo pʉ̀a pé, ńzɛ́te mbwo pɔ́b ngie pɔ́ gwɔ́ kwà’ pʉ̀a pé. N náa yɔɔn ŋwà’ne mbɔɔ mbwo mânyìŋ ntsèm gẅie aa nzɔ̌ nzɔ̌ wɔ́, ńtóŋo lezíŋ Cʉ̀apʉ̀a wege Yěsô Kristo. À lɔgɔ pú’u, ńgíŋe ńgwɔ́ Cʉ̀apʉ̀a wɔ́b yɔ́b.

1 Korento 10:17

Pá’ tà’ mbelég wémɔ’ɔ́ zɔɔ ssé la, pege metsèm púte ḿpfɛ́ɛ wɛ̌ tà’ mbelég á lɔgɔ ńnyɛɛ ngie pege puté ńgwɔ́ pɔ́ tà’ mbùm nnɛ́ yémɔ’ɔ́.

1 Korento 9:23

Mèŋ n gÿo wɛ̌ ngwòŋo nò ntsèm pɔ́ pá’ nkʉ̀ mbòŋo ge sa jʉ’, mbɔɔ pá’ mèŋ n ne ńzẅí’te sɔ́ɔn shúm mbòŋo sie é fóo ná nkʉ̀ mbòŋo.

2 Korento 1:7

Á gʉa fʉ̀’ gie peg ne ńkwaŋte gẅi peg kwà’ ńzsé ngie à lɔɔn ńgwɔ́ peg é le gẅi pɔ́g, anue peg ne ńzsé ngie, ndʉŋ ndʉŋ pá’ pi ne ńgyá gi ngɔ́’ la, e Ssé giŋé ne ńtóonte gẅi gí pá’ peg.

2 Korento 9:13

Pɔ́ ge zsé nzẅìŋ yɔɔn fà’, é gu’te Ssé ná pá’ pi ne ńtÿɔ́gɔ kwò ná nò gie nkʉ̀ mbòŋo Kristo ne ńgɔɔn. Pɔ́ ge gíŋe gu’te Ssé ná pá’ pi lɔgɔ́ pòŋo ntʉ́m, ńnáa mmó né pɔ́b tà mbɔɔ petsɔ́ pʉ̀a.

Efeso 3:6

Ntsèm ŋwɛ́ e yɔɔn, á fó ná nkʉ̀ mbòŋo, epʉ̀a pie é té pà Yuda wɔ́, gẅiin yɔ́b mmó nà shúm sie e Ssé la ka’a mbwo pʉ̀a pé pà Yuda. Pɔ́ ée mekèm tà’ mbùm nnɛ́, ńgíŋe ńgẅiin yɔ́b nò ná mmó gie e Ssé la fó ná Yěso Kristo ńka’a mbwo pʉ̀a mesoŋ.

Efeso 4:1

Mèŋ gẅie mèŋ n gee ndá tsǎŋ ńtí nò Cʉ̀apʉ̀a Yěsô Kristo, n ge fó ná menò mie mèŋ shwoŋó gẅí, é zɛ́te ngie pi gwɔ́ gÿo kɔ̀ɔkɔ́ɔ gí wɔ́, ńkímte ngie e Ssé ka tóŋo gẅi ngie pi gwɔ́ pʉ̀a pé.

Efeso 4:4

Mbùm nnɛ́ Kristo ee yémɔ’ɔ́, a Zẅìge ndʉalʉ̌a gwɔ́ yémɔ’ɔ́ ndʉŋ ndʉŋ pá’ mmó gie e Ssé la tóŋo gẅí, pi ne ńzẅí’te á gwɔ́ pɔ́ yémɔ’ɔ́.

Filipo 3:14

Mèŋ n gee mánzsè ńtsaa pɔ́ ndʉ̌ lékúu jʉ’ gie n gee wó ńkẅé ntsɔ’ɔ́ fà’ gẅie e Ssé la ka’ lénáa mbwo pege á tÿǒ lepwó ńtí nò gie Kristo la kwé nà twó ségè.

Kolosia 1:12

Pi lɔgɔ lekág ésíe Ssé gẅie aa Tá wege, yé gẅie à la gÿo pi ku’u légẅiin gí mmó nà tÿɔgɔ́ gẅie à la ka’a mbwo pʉ̀a pé. Wɛ̌ tÿɔgɔ́ ée nà jʉ’e kyɛ̀’.

Kolosia 1:22

Tá á ké ḿbiŋ ńgwɔ́ fʉ̀’ɔɔn, mbà á ka fó ná pá’ Míŋ we ka cʉ́’ʉ nyìŋ mesoŋ, ńkwé, éshwoŋte gẅi ńgíŋe ńnéŋe lejʉ́ŋ ye, éshwoŋte gẅi pú’u, légwɔ́ gie pi ge gwɔ́ ndʉalʉ̌a, é gwɔ́ pà tèfʉa, é gwɔ́ pà tè *lɔ̌’.

Kolosia 3:12

E Ssé la kwoŋo gẅí, ńtsɔ́’ɔ gẅí, ńdɔg ńgÿo pʉ̀a pé. Pú’u la, pi píi tsẅé sẅé ḿma’, ńtsɔ́ɔn mezìŋe petsɔ́ pʉ̀a tɛ’, ńgẅiin pòŋo ntʉ́m, ńná nnɛ́ ssé, ńgwɔ́ ngàŋ mbʉ́lè, ńgẅiin shÿɔ̀gɔ ntʉ́m.

1 Tesalonika 2:12

Peg la kẅiŋte gẅí, ńnéŋ ntʉ́m gẅí, ńcwoŋo ńgɔɔn né pi ngie pi giŋe ná mánzsè gẅie Ssé ne ńkwoŋo. Yé gẅie à ne ńtóŋo gẅi tsɛ̀ɛ lefùɔ sé, á tsɛ̀ɛ legú’ we.

1 Tesalonika 5:27

Á nà lezíŋ Cʉ̀apʉ̀a, n gɔɔn né pi ngie pi tóŋo yɔɔn ŋwà’ne á mvfò pʉ̀a Ssé métsèm.

2 Tesalonika 1:11

Áa mmó gie á gÿo tá peg ne sẅíŋte Ssé fʉ̀’ ntsèm ná twó sí, ńgie à gÿo pi gwɔ́ pʉ̀a pie pi ku’u létsẅɛ́ pá’ à la ká’a mbwo pi. Peg giŋé ne sẅíŋte yé, ngie à lɔg metʉ̀ mé ńkẅéte gẅi pi gÿo kɔ̀ɔkɔ́ɔ nò mbòŋo wɔ́ gie pi ne ńkwoŋo légÿo, mbɔɔ fà’ gie pi ne ńgÿo ńtí pá’ pi záb ntʉ́m ná yé.

2 Tesalonika 2:14

Mɔɔn ée menò mie é la gÿo e Ssé lɔg Nkʉ̀ Mbòŋo gẅie peg la tsẅii mbwo pi, ńtóŋo gẅí, légwɔ́ gie pi ge kúu tsɛ̀ɛ legú’ Cʉ̀apʉ̀a wege Yěsô Kristo.

1 Timote 6:12

Ké ne ḿma’a jú pɔ́ ncù mbòŋo we pàzáb ntʉ́m nà Ssé. Kú’te le gwɔ́ tèmì mboŋó, mélà’mie e Ssé la tóŋo gú, ntí pɔ́ wɛ̌. Ɔ̀ piŋ ńtyé mvfò pʉ̀a tà ńgyɔ́ɔn ńzẅíŋe nò mbòŋo gie ɔ̀ zába ntʉ́m gú mǒ.

1 Timote 6:2

Á gʉa nà menkwɔɔn pie pʉ̀a pie é gẅiin wɔ́b ée pʉ̀a Kristo pɔ́ pɔ́ɔn lézẅɛ́’ pá’ pâ pɔ̌ ée mefɛ́ mefɛ́ ńgwága wɔ́b. Tà ńcʉ́’ pú’u, pɔ́ fa’a fà’a yɔ́b á poŋ ńcʉa pá’ pɔ́ ka zɔɔn ńne fa’a, mélà’mie pʉ̀a pie pɔ́ fa’a mbwo pɔ́b kéen ńzáb ntʉ́m ná Kristo tà pɔ́b menkwɔɔn cʉ́’ʉ ńkwoŋo wɔ́b kwoŋ. Ammó gie ɔ̀ ge ne zí’i pʉ̀a, é piŋ ne ńkẅiŋte wɔ́b légÿo pú’u, à yɔɔn:

2 Timote 1:9

À la gÿo pege tsẅɛ́, éfaga wégè ńdɔg ńgÿo pʉ̀a pé. À lɔ̌ɔn těen ńgÿo pú’u, éfóo pɔ́ nà mefà’ mbòŋo mie pege fǎ’ wɔ́, à la cÿó pɔ́ gʉme yégè. Pú’u, mbà njÿó la nyé pɔ́ tè gwɔ̌ wó, kwà’ yé zɔ̌ záb ngie à ge gÿo lɔgɔ Yěsô Kristo, é gÿo pú’u, ná pege.

2 Timote 2:7

Sáŋa nò ná menò mie mèŋ n gɔɔn lɔɔn, Cʉ̀apʉ̀a ge zɔɔn náa gú legyè lélɔg ḿbú ńjú’ ntsèm.

Heber 10:19

Mefɛ́ pɔ́ɔn, pá’ áa pú’u la, pege ee fʉ̀’ɔɔn, ńkwa’ ne ńzsé mboŋó ngie atsɔ́ mmó cʉ́’ʉ ńne ńtáte wégè lécʉa ńkúu ná kwà’ jʉ’e Ssé wɔ́, pú’u, ńzẅɛ́’ɛ pá’ Yěsô la pfɛte metse mé.

Heber 10:21

Pege lɔgɔ pú’u, ńgẅiin *nùŋe pwɔ́’ we lÿò gẅie aa kwà’ wɛ̌, yé zɔ̌ líe pʉ̀a Ssé.

Heber 10:23

E Ssé ka ka’a mmó mbwo pege. Aa ḿbiŋe ńka’a mmó, ńdá’a ńgÿo pɔ́ yɛ̌. Pú’u la, pege ké ńne ńkẅi’i shʉa shʉa ńgɔɔn ngie, pege ne ńzẅí’te mmó gie à la ka’ tà pege é le ne mʉ́’te wɔ́.

Heber 13:22

Mefɛ́ pɔ́ɔn pe mbàŋa mbɔɔ pe pànzwě, mèŋ n ne sẅíŋte gẅi ngie pi lɔgɔ kwɔ́gɔ nnɛ́, ńzẅí’te yɔɔn shwóŋè gie mèŋ n nǎ mbwo pi, ńdɔg ńkẅiŋte gẅí. N zɔ̌ɔn ńké kaa ŋwe’e á sag wɔ́.

Heber 2:11

Yěsô gẅie à zɔɔn ńgÿo pʉ̀a ku’u pʉ̀a Ssé mbɔɔ pʉ̀a pie à kéen ńgÿo pɔ́ ku’, pâ pɔ̌ pú ńgwɔ́ pɔ́ pʉ̀a tà’ nyìŋ. Áa mmó gie á gÿo eshʉ́ té kúu yé létóŋo wɔ́b lê mefɛ́ pé wɔ́.

Heber 2:17

Á laa pú’u, ńne ńzɛ́te ngie à gʉa nà kɔ̀ɔkɔ́ɔ ḿbú ńgwɔ́ yé pɔ́ pá’ mefɛ́ pé, à cʉa pú’u, à gwɔ́ *nùŋe pwɔ́’ we lÿò gẅie à neŋé ńtsɔ́ɔn mezìŋe pʉ̀a, ńzsé yé pɔ́ ndà’ léfa’a mbwo Ssé, légwɔ́ gie à ge gÿo e Ssé lege mefʉa pʉ̀a mesoŋ.

Heber 3:12

Pú’u la, mbà mefɛ́ pɔ́ɔn, pi laga twó gí, tà ntʉ́m tsɔ̌ nyìŋ gẅi é le tiŋ ndʉ̀’ á fó ná Ssé gẅie aa ńgwɔ́ pɔ́ wó ńzyɛ́b ntʉ́m wé wɔ́.

Heber 3:14

Pega Kristo zɔɔn ńcʉ́’ ḿbú ńgwɔ́ pɔ́ ná tà’a nò, tá’ á ne ńzɛ́te tà’a mmó wémɔ’ɔ́, á gwɔ́ lékú’te mmó gie mé la shwóŋó wégè tá pege záb ntʉ́m nà Ssé, ńkú’te kú’te tà ńdá’ ńkúu nà lyɛ’ɛ́ nzsoté.

Heber 6:20

Á nue Yěsô la vɔg ńkúu wó ńtí wégè. À piŋ ńgwɔ́ wó fʉ̀’ɔɔn, ńgwɔ́ nùŋe pwɔ́’ wege we lÿò, á nà ngù’u nkɔ́ɔn nê nkɔ̌ɔn, á nà ntí ye Melekisedeg.

Heber 7:26

À lɔgɔ ńgwɔ́ *nùŋe pwɔ́’ we lÿò gẅie á la ne ńzɛ́te mbwo pege. Àa kwà’ Míŋ Ssé, ńgwɔ́ mbú’ nà kɔ̀ɔkɔ́ɔ, ńgwɔ́ té tsɔ́ nò tepòŋ ná ye, pâ pàgÿo menò tepòŋ té tsɔ́ nò tem, mbà Ssé la ńnéŋe yé tàa tÿǒ tà tsɔ́ mmó té gíŋe ńtɔ́gɔ yé ńgwɔ́ tÿǒ wɔ́.

Heber 7:28

*Lepʉ̌ Mǒsê zɔɔn ńgÿo mé lɔgɔ nyìŋ mesoŋ gẅie à kʉ́a kʉ̌a pá’ petsɔ́ ńgÿo *nùŋe pwɔ́’ we lÿò. Tá anò gie e Ssé la záb *lepʉ̌ Mǒsê ḿbiŋ tâ ńgɔɔn tà ńkʉa, á la gÿo á lɔgɔ Míŋ we gẅie à léen ńdá’ ńku’u nà kɔ̀ɔkɔ́ɔ gie yé Ssé la ne ńzẅí’te yé mǒ, ńdɔg gÿo *nùŋe pwɔ́’ we lÿò ná ngù’ nkɔ́ɔn nê nkɔ̌ɔn.

Heber 9:11

Á ké ńgwɔ́ nà fʉ̀’ɔɔn, mbà Kristo léen ńtó ńgwɔ́ *nùŋe pwɔ́’ we lÿò ná shúm mbòŋo sie é ne ńtóo. À ka gwaa tó, ńzyɛ́’ɛ tsɛ̀ɛ tsɔ́ ntàb, é gwɔ́ gẅie é pú fáŋ ńcʉa wetsɔ́ wɛ̌, atsɔ́ mmó piŋ tè ne ńzága mǒ wɔ́, é té gẅie pʉ̀a la lɔg mbwo mɔ́b ńnyɛte wɔ́, á lɔgɔ ńgwɔ́ ngie wɛ̌ ntàb é té tsɛ̀ɛ yɔɔn njÿó gie mé la nyɛte nyɛte wɔ́.

Heber 9:15

Yɔɔn áa mmó gie á gÿo Kristo gwɔ́ ná nò tsɔ́ *kʉ̀a gie áa ye sẅé, á gie á gíŋe ńdɔgɔ ńgwɔ́ pá’ ŋwà’ne lɔg ńtÿɔ́g legwé, ńgwɔ́ màmekěm. À la kwé á gwɔ́ lélɔg pú’u, éfóo ndá tsǎŋ gie menò tepòŋ pʉ̀a mesoŋ la ńnéŋe wɔ́b wó, á fʉ̀’ gie mé la nyé ńgwɔ́ nà nò ndùŋ mvfò *kʉ̀a, ńkẅile wɔ́b. Á lêen ńké fó pú’u, pʉ̀a pie mé la tsɔ́’ɔ wɔ́b, é ku’u lékẅé shúm mbòŋo sie à la pÿé, é gwɔ́ sie é ge lá’a gwɔ́ pɔ́ wó.

1 Piɛ 2:9

Tá ńgʉa ná pi, mbà pi ee ngẅɛ̀ pʉ̀a pie Ssé la kaŋ, ńgwɔ́ pànuŋe pwɔ́’ fùɔ ndÿò, ńgwɔ́ lá’ gie áa yé, ńgwɔ́ pʉ̀a pie à la cwoŋo wɔ́b é gwɔ́ pé, pá’ pɔ́ ge gʉa shwóŋ memáa menò mie à la gÿo, yé gẅie à la fó tsɛ̀ɛ nzěm ńkẅile gẅí, ńnéŋe gẅi nà jʉ’ʉ fɔ̌g gie kyɛ̀’ɛ mbòŋo yé áa wó.

1 Piɛ 3:5

Yɛ̌ zɔɔ ńtí gie pánzwě pe fʉ̀’é mvfò pie pɔ́ lɔ́ɔn ḿbɔ́gɔ Ssé, ńnéŋe ne ńzẅí’te mmó gie Ssé la ka’, lɔ́ɔn ńkẅiŋe mbùm yɔ́b pú’u, ńne sẅí’i mbùm yɔ́b ńnáa ssé á mvfò melúm pɔ́b,

1 Piɛ 5:1

Mèŋ n gɔɔn yɔɔn nò fʉ̀’ɔɔn lélɔg ńtÿɔ́gte pàkẅé mvfò pie ée tsɛ̀ɛ cú’tè gí, ńgwɔ́ yɔ́ɔn kẅè mvfò pá’ pɔ́b, mbà Kristo la gwɔ ne gyá ngɔ́’, mèŋ n tyé jʉ’ó. Mèŋ n ge gÿo gẅiin yɔ́ɔn jʉ’ tsɛ̀ɛ legú’ gẅie e Ssé ge gÿo gÿo à kẅɛ́.

1 Piɛ 5:10

Ngɔ́’ gi ge ná’a ńnéŋe pɔ́ méjʉ’, e Ssé gẅie à kɔ̀ɔkɔ́ɔ nò mbòŋo gwɔ́ fóo pɔ́ mbwo yé, yé gẅie à la cʉa ná Yěsô Kristo ńtóŋo gẅi pá’ pi ge gwɔ́ gí tsɛ̀ɛ legú’ we gẅie à pàa té wó wɔ́, à ge fó pú’u, é gÿo tsɔ́ mmó le gíŋe ńzága ná pi wɔ́, étsẅìŋ ndù gi, pi tʉte, mé le gíŋe ńku’u létsó gẅi tà ḿma’a ssé wɔ́.

1 Jâŋ 1:3

Ammó gie peg la gyá ḿbiŋ ńjú’, áa yɛ̌ gie peg shwóŋó gẅi gí, ńzsé ngie pi ge temte ná peg, pege metsèm pú ńtemte ná Tá mbɔɔ ná Míŋ we Yěsô Kristo.

Jẅide 1:1

Àa mèŋ Jẅide, nyìŋ gẅie à fa’a fà’a Yěsô Kristo, ńgwɔ́ fɛ́ Jâg. N túmo yɔɔn ŋwà’ne ńnáa mbwo pi pie Tá wege Ssé la tóŋo gẅí. À kwoŋo gẅi ńne ńtÿɔ́’te gẅi ńdɔgɔ ńzẅí’te Yěsô Kristo.

Ŋwà’ne Ngyà jʉ’ 17:14

Pɔ́ ge ma’a Mûɔ *Njʉ̀njÿò lê ncù, tá à ké ńcʉa wɔ́b, á nue aa Cʉ̀apʉ̀a mecʉ̀apʉ̀a, ńgwɔ́ Fùɔ mefùɔ. Epʉ̀a pie à la tóŋo wɔ́b, ńtsɔ́’ɔ wɔ́b, pɔ́ zsé pɔ́ ndà’ yé, pâ pɔ̌ pú ńcʉa nɔ̀ɔn ŋwɛ́.

Ŋwà’ne Ngyà jʉ’ 18:20

Mé ne ńdʉa Mbabilonia, tá’, á gʉa ná pi tÿǒ lepwó, pi kág kág ńtí pá’ á gwě ssé. Mbɔɔ pi pʉ̀a Ssé, pia megàŋ ntúm lâ pà *ntsẅì nkʉ̀ Ssé, pi kág gí. Á nue e Ssé ŋagá yé nà nò tepòŋ gie á ka gÿo ná pi.