1 Piɛ 2:24 - Nouveau Testament en Ngienboum

²⁴ Kwà’ yé Kristo la kaa menò tepòŋ mégè ńnéŋe soŋ nnɛ́ yé, á fʉ̀’ gie mé la kime yé nà tÿǒ nkǐ. À la gÿo pú’u, légwɔ́ gie pege ge cʉ́’ gwɔ́ mbwo nò tepòŋ, é gwɔ́ pɔ́ mepfó, é lêen ké ku’u légÿo mmó gie áa ndʉŋ ndʉŋ mvfò Ssé. Pi la zẅɛ́’ pɔ́ mefʉ̌ŋ mé tá ńzeŋe.

1 Piɛ 2:24 ပူးပေါင်းရင်းမြစ်များ

Matio 27:26

*Pilato leen ńké ńkẅile Panepâse ndá tsǎŋ, ńgÿo mé lɔg ngwɔɔn ńcúɔ Yěsô, ḿbiŋ ńná yé ngie mé lɔgɔ yé ńgʉa, ńkime yé nà tÿǒ nkǐ.

Matio 5:20

!Áa yɛ̌ tá mèŋ n gɔɔn né pi ngie: Pi lɔɔn té kú’te *lepʉ̌ mbòŋo ńtɔ́g *pàkyagte lepʉ̌ Mǒsê lâ pà *farisay wɔ́, mbà pi tě ńdá’a ńkúu ná nò *lefùɔ Ssé wɔ́.

Matio 8:17

Á lɔgɔ pú’u, ḿbumte ná nò gie à *ntsẅì nkʉ̀ Ssé Esǎya la gɔɔn ngie: «Yé zɔ la kaa *melɔ̌’ mégè ḿbi’, ńgíŋe fó nà pège ńkẅile meguɔ mégè ḿbi’».

Malékuse 15:15

*Pilato gyá ngie à ge gÿo mmó gie á poŋó lá’, ńtsɔ́’ɔ Panepâse ndá tsǎŋ ńnyé, ḿbiŋ ńgÿo mé lɔg ngwɔ̀ɔn ńcúa Yěsô. Á náa yé ngie mé lɔgɔ yé ńgʉa ńkime nà tÿǒ nkǐ.

Lukase 4:18

À Zẅìge Cʉ̀apʉ̀a áa ná mèŋ, mélà’mie à la zɔ́’ɔ wɔ̀ɔn, ńtúmo wɔ̀ɔn ngie n gʉa, ńtsẅi Nkʉ̀ Mbòŋo á mbwo megàŋ ngɔ́’, ńtúmo wɔ̀ɔn ngie n gʉa ńtsẅii mbwo megàŋa tsáŋa ncù ngie: Mé ge kẅile wɔ́b, ńtúmo wɔ̀ɔn ngie n gʉa, ńgÿo mefʉ̀ menÿɔ́g gyá jʉ’, ngie n gʉa, ńtág nzèm pʉ̀a pie mé ne sẅɛ́ɛ wɔ́b,

Ŋwà’ne Jâŋ 1:29

Njÿó gÿo ńdʉ́a, Jâŋ gyá Yěsô ne ńtóo, á gɔɔn ngie: Wɔɔn aa Mûɔ *Njʉ̀njÿò gẅie Ssé lɔgɔ sẅɛ’ɛ ndòon menò mie pʉ̀a la gÿo.

Ŋwà’ne Jâŋ 19:1

*Pilato lêen ńké ńnáa Yěsô ngie mé lɔg ngwɔɔn ńcúa yé.

Megàŋ ntúm 10:35

Nyìŋ lɔɔn ńgÿo mekù’ Ssé, ńgíŋ ńgÿo mmó gie e Ssé ne ńkwoŋo, ńgwɔ́ pɔ́ nyìŋ yɛ̌ lá’ gwɔ́, mbà nò yé ge poŋ Ssé poŋ.

Megàŋ ntúm 10:39

Peg pɔɔn tyě pá’ɔɔn, mbà peg ka lɔg nÿɔ́g még, ḿbú ńgyá kɔ̀ɔkɔ́ɔ gie à ka gÿo tsɛ̀ɛ lá’a pà Yuda mbàa Yerósalem. Mé ka gwɔ zẅé yé, ńkime yé nà tÿǒ nkǐ.

Megàŋ ntúm 13:29

Pɔ́ kéen ńgwɔ́ tà ḿbú ńgÿo kɔ̀ɔkɔ́ɔ gie mé la ŋwe’e tsɛ̀ɛ ŋwà’ne Ssé ńtí yé Yěsô, pɔ́ gÿo mé fó nà tÿǒ nkǐ ésẅé’e yé, ńnéŋe tsɛ̀ɛ lesyè.

Megàŋ ntúm 5:30

E Ssé pàmangʉa njʉ’ pégè, ka gÿo Yěsô gẅie pi ka kime yé nà tÿǒ nkǐ la, zíme nà legwé.

Roma 6:11

Mbɔɔ pi gí, pi líe twó mbùm gí pá’ pʉ̀a pie pɔ́ ée nà nò tepòŋ, ńcʉ́’ pɔ́ mepfó. Pi cʉ́’ ńgwɔ́ pɔ́ pʉ̀a pie é lɔg pá’ pɔ́ la nnɛ́ ná Kristo, ńcʉ́’ ńgẅiin pɔ́ ntí ye sẅé pá’ pɔ́ ge fa’a fà’ Ssé.

Roma 6:13

Tà pi gíŋe ńdɔg mekèm mbùm mí ńgÿo nò tepòŋ pá’ mé lɔgɔ shúm ncù ńgÿo menò tepòŋ. Tà ńcʉ́’ pú’u, pi pú ńnyé mbùm gi mbwo Ssé ńgwɔ́ kwà’ pʉ̀a pie é ka kwě ḿbiŋ ńzím. Pi lɔg mekèm mbùm mí ńgÿo shúm sie pi ge lɔg gÿo mmó gie áa ndʉŋ ndʉŋ.

Roma 6:16

Tà pi ké ńdege ngie nyìŋ lɔɔn ńzẅíŋ nkwɔɔn nyìŋ pá’ à ge ne jú’u ncwò ngàŋ, mbà à cʉ̌’ nkwɔɔn ngàŋ. Á lɔgɔ ńgwɔ́ ngie pi lɔɔn ne ńjú’u ncwò nò tepòŋ, mbà pi cʉ̌’ nkwɔɔn nò tepòŋ, á gÿo pi kwé, ńké ńgwɔ́ gie pi lɔɔn ne ńjú’u ncwò Ssé, mbà pi ge cʉ́’ nkwɔɔn Ssé, à gÿo pi gÿo mmó gie áa ndʉŋ ndʉŋ mvfò yé.

Roma 6:2

Ngǎŋ! Ńgwɔ́ pege é le pú’u, gÿo. Pá’ á zɔɔn ńgwɔ́ nà légÿo nò tepòŋ, mbà pege léen ńkwé lá, ńgwɔ́ pege gǎ tá ńgíŋe ne ńgÿo pɔ́ nò tepòŋ?

Roma 6:22

Tá’ pá’ á ké ḿbiŋ ńgwɔ́ fʉ̀’ɔɔn, mbà Ssé kéen ńkyɛ́’ nkÿo nò tepòŋ ná pi, pi cʉ́’ nkwɔɔn ye la, apì gie á ne ńkẅɛɛ áa pá’ Ssé ne ńkẅéte gẅi pi ne ńgẅiin tsẅé pʉ̀a pé, á ge gÿo cʉ́’ʉ lécʉ́me pi gẅiin le gwɔ́ tèmì,

Roma 6:7

Nyìŋ zɔɔn ńgwɔ́ tà ńkwé, à tè gíŋe ńku’u légÿo tsɔ́ mmó wɔ́, nkÿo nò tepòŋ fó ná yé ńkyɛ́’ɛ.

Roma 7:6

Tá á ké ńgwɔ́ fʉ̀’ɔɔn pege cʉ́’ʉ ńgiŋe ná mánzsè *lepʉ̌ tà ńtsɔ́ɔn légwɔ́ ndʉŋ ndʉŋ wɔ́, á nue pege ee ná wɛ̌ mánzsè gẅie à kɔ̌ɔn ńdɔgɔ wégè ńgÿo megàŋa tsǎŋ, ńcʉ́’ pɔ́ mepfó. Tà peg ee fʉ̀’ɔɔn ńcʉ́’ʉ fa’a mbwo Ssé pɔ́ nà ntí ye sẅé, ńdɔgɔ metʉ̀ Zẅìge Ndʉalʉ̌a éfa’a, tà peg tè gíŋe fa’a ná ntí ye fʉ̀’e mvfò, á fʉ̀’ gie peg kɔ̌ɔn ńjú’u pɔ́ ncwò *lepʉ̌ sie mé la ŋwe’e wɔ́.

1 Korento 15:3

N da cʉ́me nò gie mé la cʉ́me pɔ́ mbwo mèŋ á mbwo pi, á gwɔ́ ná nkʉ̀ mbòŋo ńgwɔ́ kwòŋ. Yɛ̌ nò gwɔ́ ngie: Kristo la kwé nà menò tepòŋ mégè, á gwɔ́ pá’ ŋwà’ne Ssé la tʉ́ njÿó ńgɔɔn.

2 Korento 6:17

Áa mmó gie á gÿo yé Cʉ̀apʉ̀a gɔɔn ngie: Pi fó tsetsɛ̀ɛ pɔ́b ńkẅɛ, éfag gi nnɛ́, Tà pi kíbe mmó gie *lɔ̌’ áa mǒ, Mèŋ n deen ńké ńkúe gẅí.

Galatia 3:13

Tá’, pá’ mánzsè we *lepʉ̌ gÿo pege kaa pɔ́ ndòon la, Kristo la tó ńgÿo pege tsẅɛ́ ndòon ŋwɛ́. À la zyɛ́b ńkaa ḿbi’, ńcʉ́’ʉ ngàŋ ndòon ńtí wégè. Mé gɔɔn nue mé la ŋwe’e ngie: Ndòon ee twó nyìŋ gẅie mé kimé yé nà tÿǒ.

Efeso 5:9

Mèŋ n gɔɔn pú’u, mélà’mie, apì légwɔ́ jʉ’e fɔ̌g aa legÿo menò mbòŋo, ńgÿo menò mie ée mvfò Ssé ńgwɔ́ ndʉŋ ndʉŋ, ńnéŋe tsɛ̀ɛ nò nénʉ́.

Filipo 1:11

Yěsô ge gÿo pi ké ne fa’a pɔ́ mefà’ mbòŋo, ńzsé ngie pʉ̀a ge ne gyá, é gu’te Ssé, é gé’e lezíŋ sé.

Kolosia 2:14

À la véle ŋwà’ne njǔ yega pɔ̌, mbà *lepʉ̌ laa tsɛ̀ɛ yɛ̌ ŋwà’ne ńne sẅiŋe wégè ná menò mie pege fʉaté, ńgwɔ́ mé gɔɔn ngie à la pú wɔ́b Yěsô ńkime nà tÿǒ nkǐ, ńdɔgɔ pú’u, ńcʉŋte ŋwà’ne.

Kolosia 2:20

Pia Kristo la pú ńkwé, á lɔgɔ pú’u, ńkẅé gẅi mbwo metʉ̀ nzěm mie é sá’a njÿó. Mélà’a kɔ́ mé gíŋe shwóŋó gẅi ngie tsɔ́ shúm ée shúm sie nzse ée mǒ tà pi zẅí’te pá’ fʉ̀’ gie pi gwɔ̌ pɔ́ pʉ̀a yɔɔn njÿó?

Kolosia 3:3

Pi zsé ngie áa nà menò njÿó, mbà pi léen ńkwé. Agẅi le gwɔ́, aa mbwo Kristo á lejʉ́ŋ Ssé, mé té ne ńgyá pá’ à gwɔ̌ wɔ́.

Heber 10:10

Kristo la gÿo mmó gie e Ssé ne ńkwoŋo. À la náa twó mbùm yé tà’ legʉ̀a á ku’. Á lɔg pú’u, ńgÿo peg ku’ pʉ̀a Ssé.

Heber 10:5

Áa mmó gie á la gÿo Kristo gwaa tóo tsɛ̀ɛ njÿó, ńgɔɔn mbwo Ssé ngie: Ɔ̀ la tè shúm pwɔ́’ kwoŋ, ńké tè menɔ̀ɔn pie mé zẅé ńdɔgɔ ńgu’te gú kwoŋ. Tá ńké ńná mbùm nnɛ́ né mèŋ

Heber 12:13

Pi giŋe ná mánzsè gẅie à tyé ndʉŋ ndʉŋ, légwɔ́ gie lejÿɔgɔ́ kwò nyìŋ gẅie à ne ńnyí’i té mege pwɔ́’ɔ wɔ́, tà ńcʉ́’ pú’u, ésẅéte sẅeté.

Heber 7:26

À lɔgɔ ńgwɔ́ *nùŋe pwɔ́’ we lÿò gẅie á la ne ńzɛ́te mbwo pege. Àa kwà’ Míŋ Ssé, ńgwɔ́ mbú’ nà kɔ̀ɔkɔ́ɔ, ńgwɔ́ té tsɔ́ nò tepòŋ ná ye, pâ pàgÿo menò tepòŋ té tsɔ́ nò tem, mbà Ssé la ńnéŋe yé tàa tÿǒ tà tsɔ́ mmó té gíŋe ńtɔ́gɔ yé ńgwɔ́ tÿǒ wɔ́.

Heber 9:28

áa ndʉŋ ndʉŋ pá’ à la gÿo Kristo lɔgɔ twó mbùm ye, ńnuŋe pwɔ́’ pɔ́ tà’ legʉ̀a, lélɔg ńzyɛ́b menò tepòŋ pʉ̀a tà ńgyɔ́ɔn. À ge gÿo gíŋe kẅɛɛ ná mbɔ́ɔntè yépʉ́a. Á le gíŋe ńtóo fʉ̀’ó lézyɛ́b menò tepòŋ pʉ̀a mesoŋ wɔ́. À tóo pú’u, légÿo pʉ̀a pie pɔ́ ne ńzẅí’te yé tsẅɛ́.

Ŋwà’ne Jâg 5:16

Pú’u la, pi zẅíŋ mefʉa tsetsɛ̀ɛ pi. Nyìŋ zẅíŋ mefʉa mbwo fɛ́ we, afɛ̌ we zẅíŋe mbwo yé. Nyìŋ gẅi sẅíŋte Ssé nà twó fɛ́ we. À cʉ́a pú’u, pi zeŋe. Asẅíŋte nyìŋ gẅie áa ndʉŋ ndʉŋ mvfò Ssé, á giŋ tɛ’.

1 Jâŋ 2:29

Pi ne ńzsé ngie Kristo gÿo mmó gie áa ndʉŋ ndʉŋ mvfò Ssé, pú’u la pi gíŋe ńzsé ngie nyìŋ lɔɔn ńgÿo mmó gie áa ndʉŋ ndʉŋ mvfò Ssé, mbà à ge cʉ́’ʉ míŋ Ssé.

1 Jâŋ 3:7

Penkʉ́ pɔ́ɔn, ḿbɔ́ɔn nyìŋ légÿo pi fʉa mánzsè. Nyìŋ lɔɔn ńgÿo mmó gie áa ndʉŋ ndʉŋ mvfò Ssé, mbà ngàŋ lɔgɔ ńgÿo yé pá’ Yěsô Kristo. À gÿo mmó gie áa ndʉŋ ndʉŋ mvfò Ssé.

Ŋwà’ne Ngyà jʉ’ 22:2

Metÿǒ mie é gÿo mé gwɔ́ wó é gwɔ́ soŋ lǎŋa lÿò gie áa tÿǒsoŋ, á nà mengʉ̀ŋe ntse mémbʉ́a, ńne ńzéme ngʉ̀a ntsɔ̀b pʉ́a, ngwòŋ mesaŋ ntsèm, mentɔ̌ɔn gwɔ́ pɔ́ tÿó. Mé piŋe ńdɔgɔ meffo mé ńzoŋo meguɔ ná pʉ̀a mesoŋ pie ée metúmo metúm.