1 Jâŋ 1:3 - Nouveau Testament en Ngienboum

³ Ammó gie peg la gyá ḿbiŋ ńjú’, áa yɛ̌ gie peg shwóŋó gẅi gí, ńzsé ngie pi ge temte ná peg, pege metsèm pú ńtemte ná Tá mbɔɔ ná Míŋ we Yěsô Kristo.

1 Jâŋ 1:3 ပူးပေါင်းရင်းမြစ်များ

Ŋwà’ne Jâŋ 17:11

Áa nà fʉ̀’ɔɔn, á cʉ́’ʉ méjʉ’, ń de gíŋe ńgwɔ́ tsɛ̀ɛ njÿó wɔ́, á nue mèŋ n ge piŋ ne lejʉ́ŋ gù. Tá ńgʉa ná pɔ́b, mbà pɔ́ ké ńnyé ńgwɔ́ pɔ́ tsɛ̀ɛ njÿó. Tá wɔ̀ɔn ée ndà’ gú ńgwɔ́ Ssé, lɔg metʉ̀ mú, é metʉ̀ mie ɔ̀ la náa mbwo mèŋ la, ḿbyɛ́bɛ wɔ́b, ńzsé ngie pɔ́ ge gwɔ́ tà’ nyìŋ ndʉŋ ndʉŋ pá’ pɔgɔ ée tà’ nyìŋ la.

Ŋwà’ne Jâŋ 17:21

Mèŋ sẅíŋte gú ngie ɔ̀ gÿo pɔ́b metsèm gwɔ́ tà’ nyìŋ, pá’ gù Tá wɔ̀ɔn ɔ̀ temte ná mèŋ, mèŋ n temte ná gù. Tsétsɔ’, gÿo peg lâ pɔ̌ pú ńgwɔ́ tà’. Tá pʉ̀a tsɛ̀ɛ njÿó zẅíŋ ngie ɔ̀ la túmo wɔ̀ɔn.

Ŋwà’ne Jâŋ 17:25

Tá wɔ̀ɔn, ɔ́ɔ nénʉ́, tá pʉ̀a tsɛ̀ɛ njÿó ka tè gú zsé, mèŋ n kě ńne ńzsé gú, pɔɔn pʉ̀a kéen ńzsé ngie gù zɔ la túmo wɔ̀ɔn.

Ŋwà’ne Jâŋ 17:3

Legwɔ́ tèmì wéwɛ̌, á gwɔ́ pá’ pɔ́ ge zsé gú, gù gẅie ɔɔ kwà’ ndà’ Ssé ye nénʉ́ gílé gù, é gíŋe zsé nyìŋ gẅie ɔ̀ la túmo yé, á gwɔ́ Yěsô Kristo.

Ŋwà’ne Jâŋ 19:35

Nyìŋ gẅie à shwóŋó gẅi aa njÿò ńgyá nà kɔ̀ɔkɔ́ɔ gie á la cʉa. Á gwɔ́ kwà’ pá’ á la cʉa. Kwà’ yé lê twó yé ne ńnyɛte ńzsé ngie à gɔɔn nò nénʉ́, ńgɔɔn pá’ɔɔn légwɔ́ gie pi gí ge záb ntʉ́m ná yɔɔn nò.

Megàŋ ntúm 13:32

Peg yég, peg tyě pá’ɔɔn, ńne ḿbÿé gẅi á yɛ̌ nò mbòŋo. Á gwɔ́ nò gie e Ssé la lá’ ńka’a mbwo pàmangʉa njʉ’ pà Israel.

Megàŋ ntúm 13:41

Pi pàgwága wɔ̀ɔn, pi líe tá ńgyá. Anò ge kʉ’ʉ gẅi tà pi syeente! Pi ge zɔɔn nyé gwɔ́ pɔ́ ndùmo ssé tsetsá’, mèŋ n gÿo tsɔ̌ máa nò, tà ńgwɔ́ gie mé gwɔ́ pé’e shwóŋó gẅi shwóŋ, mbà à lɔɔn ńgwɔ́ pi le zẅíŋ.

Megàŋ ntúm 2:42

Pɔ́ lɔ́ɔn ńtóo fʉ̀’ ntsèm té tsó, megàŋ ntúm zí’i wɔ́b nò Ssé, ńně ńtemte ńnéŋe pá’ pùɔ memá la, ḿbúte ḿpfɛ́ɛ mmó, ḿbiŋe ńcú’te sẅíŋte Ssé.

Megàŋ ntúm 20:27

Á zɔɔn ńgwaa gwɔ́, mbà mèŋ n ka shwóŋó gẅi kɔ̀ɔkɔ́ɔ wɔ́ gie e Ssé la ka’a légÿo. Tà mèŋ n te tsɔ́ mmó lÿoon.

Megàŋ ntúm 4:20

Á gʉa nà peg, mbà à lɔɔn ńgwɔ́ peg léláŋte nà nò gie peg la jú’ ḿbiŋ ńgyá wɔ́.

Roma 15:27

Pɔ́ zɔ ka pʉlé ńgyá pú’u tá’, é zɔɔn ńgwɔ́ pɔ́ njǔ gie pɔ́ gẅiin létoŋo mbwo pɔ́b. Á nue á lɔɔn ńgwɔ́ gie pʉ̀a pie é té pà Yuda wɔ́ kéen ńgẅiin yɔ́b mmó nà shúm sie Ssé la pu’ ssé ńná pɔ́ né pà Yuda, mbà pɛ̌ pʉ̀a gẅiin pá’ pɔ́ ge gʉa ná shúm sie ée sɔ́b, é pi tsɔ́ é ná mé lɔg ńkẅéte pà Yuda.

1 Korento 1:30

Yé Ssé zɔ la temte gẅia Yěsô Kristo, ńdɔgɔ yé ńgÿo yégè zsé nò. E Ssé fó ná ye ńgyá wégè pá’ pà tè fʉa, ńdɔgɔ wégè ńgÿo pʉ̀a pé, ńzá’ nkÿo pù’ nò tepòŋ ná pege.

1 Korento 1:9

Yé Ssé gẅie à la tsɔ́’ɔ gẅi pá’ pi ge ńnéŋe fʉ̀’ ntsèm é la nnɛ́ nà Míŋ we Yěsô Kristo gẅie aa Cʉ̀apʉ̀a wege, aa ntě ńka’a mmó gie à ge gÿo ḿbiŋe ńkúbe wɔ́.

1 Korento 15:1

Mefɛ́ pɔ́ɔn, tà mèŋ n kímte gẅi nkʉ̀ mbòŋo gẅie mèŋ n da tsẅi mbwo pi, é nkʉ̀ gẅie pi la jú’ ńzẅíŋ, pi ee ńké ńzába ntʉ́m mǒ záb tà ńkú lyɛ̌’ɔɔn.

Efeso 3:6

Ntsèm ŋwɛ́ e yɔɔn, á fó ná nkʉ̀ mbòŋo, epʉ̀a pie é té pà Yuda wɔ́, gẅiin yɔ́b mmó nà shúm sie e Ssé la ka’a mbwo pʉ̀a pé pà Yuda. Pɔ́ ée mekèm tà’ mbùm nnɛ́, ńgíŋe ńgẅiin yɔ́b nò ná mmó gie e Ssé la fó ná Yěso Kristo ńka’a mbwo pʉ̀a mesoŋ.

Filipo 1:7

Mèŋ n gẅiin lé ne ńkwaŋa pɔ́ pú’u ná pi, mélà’mie m bǔ ńkwoŋo gẅi tà ḿmag ntʉ́m wɔ̀ɔn. Pi metsèm zɔɔn ne ńkẅéte wɔ̀ɔn nà fà’ gie e Ssé la lɔg ńcÿó gʉm yɔ́ɔn pɔ́ lê pòŋo ntʉ́m yé, tà mbɔɔ fʉ̀’ɔɔn gie n gee ndá tsǎŋ lɔɔn, mbɔɔ fʉ̀’ gie mèŋ n ne ńnyɛɛ ngie nkʉ̀ mbòŋo ée nénʉ́, mbɔɔ fʉ̀’ gie mèŋ n ne ńgÿo pʉ̀a nyɛte ńzẅíŋe.

Filipo 2:1

Tà légwɔ́ gie pi laa Kristo léen ńtemte zɔ tè ne ńgÿo pi kẅi’i shÿɔgɔ wɔ́? Tà ntí gie Kristo lɔg ńkwoŋo gẅi zɔ tè ne ńkẅiŋte gẅi wɔ́? Tà pia Zẅìge Ndʉalʉ̌a zɔ tè nùɔ wɔ́? Tà pi tè gẅiin nkwòŋe laa tsɔ́ɔn mezìŋe á tsetsɛ̀ɛ pi wɔ́?

Filipo 3:10

Mèŋ n ne ńtsɔ́ɔn pɔ́ tà’a nò wémɔ’ɔ́. Á gwɔ́ ngie n zsé yé Kristo, ńzsé metʉ̀ mie é la gÿo á zíme ná legwé, ńgyá ngɔ́’ pá’ à la gyá yé, ńzẅíŋe lénáa twó yɔ́ɔn ńkwé pá’ à la náa yé,

Kolosia 1:13

À la sa’a wégè mbwo metʉ̀ nzěm, ńtsege wégè ńnéŋe tsɛ̀ɛ nò lefùɔ Míŋ we, à kwoŋo míŋ we ŋwɛ́ tɛ’.

1 Tesalonika 1:10

Pú’u, ńcʉ́’ʉ ńzẅí’te pɔ́ ngie Míŋ we fó tÿǒ lepwó ńtó, Míŋ we ŋwɛ́ aa Yěsô, mbà Ssé la zíme yé nà legwé. Yé zɔ ne ḿbe’e wégè nà ngʉ̀ngʉ̀ gie e ne ńtóo.

1 Timote 6:2

Á gʉa nà menkwɔɔn pie pʉ̀a pie é gẅiin wɔ́b ée pʉ̀a Kristo pɔ́ pɔ́ɔn lézẅɛ́’ pá’ pâ pɔ̌ ée mefɛ́ mefɛ́ ńgwága wɔ́b. Tà ńcʉ́’ pú’u, pɔ́ fa’a fà’a yɔ́b á poŋ ńcʉa pá’ pɔ́ ka zɔɔn ńne fa’a, mélà’mie pʉ̀a pie pɔ́ fa’a mbwo pɔ́b kéen ńzáb ntʉ́m ná Kristo tà pɔ́b menkwɔɔn cʉ́’ʉ ńkwoŋo wɔ́b kwoŋ. Ammó gie ɔ̀ ge ne zí’i pʉ̀a, é piŋ ne ńkẅiŋte wɔ́b légÿo pú’u, à yɔɔn:

Heber 2:12

À la zɔɔn ńgɔɔn mbwo Ssé ngie: Mèŋ n ge gÿo shwóŋ mefɛ́ pɔ́ɔn nyìŋ gẅie ɔ́ɔ wɛ̌. Mèŋ n ge gÿo tyé tsɛ̀ɛ cú’tè é gu’te gú.

Heber 3:1

Pú’u la, mbà mefɛ́ pɔ́ɔn pʉ̀a kristo, e Ssé yé máŋwɛ́ zɔ ka tóŋo gẅi nà nò yé, àwɔ̌ɔwɔɔ tóo ná yé mmó. Pi sáŋa nò ná nyìŋ gẅie Yěsô aa wɛ̌, aa yé gẅie e Ssé la túmo yé ngie à gwɔ́ wege *nùŋe pwɔ́’ we lÿò ná nò Ssé gie pege tyé mǒ.

Heber 3:14

Pega Kristo zɔɔn ńcʉ́’ ḿbú ńgwɔ́ pɔ́ ná tà’a nò, tá’ á ne ńzɛ́te tà’a mmó wémɔ’ɔ́, á gwɔ́ lékú’te mmó gie mé la shwóŋó wégè tá pege záb ntʉ́m nà Ssé, ńkú’te kú’te tà ńdá’ ńkúu nà lyɛ’ɛ́ nzsoté.

1 Piɛ 5:1

Mèŋ n gɔɔn yɔɔn nò fʉ̀’ɔɔn lélɔg ńtÿɔ́gte pàkẅé mvfò pie ée tsɛ̀ɛ cú’tè gí, ńgwɔ́ yɔ́ɔn kẅè mvfò pá’ pɔ́b, mbà Kristo la gwɔ ne gyá ngɔ́’, mèŋ n tyé jʉ’ó. Mèŋ n ge gÿo gẅiin yɔ́ɔn jʉ’ tsɛ̀ɛ legú’ gẅie e Ssé ge gÿo gÿo à kẅɛ́.

2 Piɛ 1:16

Peg ka tè gwɔ shwóŋó gẅi pá’ Yěsô Kristo, Ndè wege ge gÿo tó, lê shʉ́shÿɔ́g, éfó pɔ́ ná menò pú’kwɔ́b mie peg neŋé ssé ńdɔg legyè ńdʉ’te wɔ́. Peg ka fó ná pá’ peg lɔ̌g nÿɔ́g még ńgyá legú’ we.

1 Jâŋ 1:1

Peg ŋwe’e yɔɔn ŋwà’ne ńnáa né pi ńdɔgɔ shwóŋó gẅi nò ná shwóŋè gie á gÿo mé gwɔ́ wó, á gie aa ńgwɔ́ pɔ́ wó tà fó nzyète shúm ntsèm, peg la lɔg metuŋó még ńjú’, ńdɔg nÿɔ́g még ńgyá, ńnyɛte ńdíe ńdɔg mbwó még ńkíbe.

1 Jâŋ 1:5

Anò gie Yěsô Kristo la shwóŋó wég, à yɔɔn gie peg ge shwǒŋ pi lɔɔn. À la gɔɔn ngie: E Ssé gwɔ́ pɔ́ kyɛ̀’, mbɔɔ méjʉ’ʉ nzěm à tè ná ngÿǒ menò me wɔ́.

1 Jâŋ 1:7

Tá ńké ńgwɔ́ gie pege lɔɔn ne ńgiŋe ná jʉ’e fɔ̌g pá’ yé lê twó yé aa nà jʉ’ʉ fɔ̌g la, mbà pege ge pú gẅiin tà’ ncwò tsetsɛ̀ɛ pege, metse Míŋ we Yěsô leen ńké sɔgɔ wégè ná nò tepòŋ ntsèm.