जकरिया 13:9 - नेवाः बाइबल

⁹ थ्‍व हे स्‍वब्‍वय् छब्‍व मनूतय्‌त जाँचय् यायेत मिं वहः यचुकीगु थें जिं इमित यचुके। लुँयात जाँचय् यानागु थें जिं इमित जाँचय् याये, अबलय् इमिसं जिगु नामं बिन्‍ति याइ। अले जिं इमित लिसः बी, ‘इपिं जि प्रजा खः’ धकाः जिं इमित धाये। अले इमिसं धाइ, ‘परमप्रभु जिमि परमेश्‍वर खः।’”

जकरिया 13:9 ပူးပေါင်းရင်းမြစ်များ

२ शमूएल 7:24

छिं थः प्रजा इस्राएलयात न्‍ह्याबलेंया लागि थःगु दय्‌कादीगु दु। अले छि हे परमप्रभु, इमि जुयादीगु दु।

अय्‍यूब 23:10

तर वय्‌कलं जिगु फुक्‍क पहःचहः स्‍यू। वय्‌कलं जितः जाँचय् यानादीबलय् जि लुँ थें जुयाः पिहां वये।

अय्‍यूब 28:1

धात्‍थें वहः पिहांवइगु थाय् दइ, लुँ यचुकीगु थाय् दइ।

भजनसंग्रहया सफू 144:15

धन्‍य खः थुकथं आशिष काइपिं मनूत, धन्‍य खः परमप्रभु परमेश्‍वरयात आराधना याइपिं मनूत।

भजनसंग्रहया सफू 43:4

अले हे परमेश्‍वर, जि छिगु वेदीइ वने। छि जिगु लसताया मुहान खः। जिं वीणा थानाः छिगु प्रशंसा याये। हे परमेश्‍वर, जिमि परमेश्‍वर!

भजनसंग्रहया सफू 50:15

दुःखया इलय् जितः प्रार्थना या! जिं छन्‍त बचय् याये, अले छं जितः तःधंकी।”

भजनसंग्रहया सफू 91:15

इमिसं जितः सःतीबलय् जिं इमित लिसः बी, इमित दुःख जुइबलय् जि इपिंनापं च्‍वने, जिं इमित बचय् याये, अले इज्‍जत याये।

हितोपदेश 17:3

लुँ व वहः मिइ तयाः जाँचय् याइ। तर झीगु नुगः परमप्रभुं जाँचय् यानादी।

श्रेष्‍ठगीत 2:16

जिमि यःम्‍ह प्रिय जिम्‍ह हे खः, जि वय्‌कःयाम्‍ह खः। व लिली स्‍वांया दथुइ चाचाःहिला जुइ।

यशैया 43:2

छ तःजाःगु लखं जुयाः वनीबलय् जि छनापं हे दइ। छ खुसि जुयाः वनीबलय् उकिं छन्‍त त्‍वपुइ मखु। छ मिं जुयाः वनीबलय् उकिं छन्‍त थिइ मखु। उकिया मि जलं छन्‍त छ्वय्‌की मखु।

यशैया 48:10

स्‍व! जिं छन्‍त शुद्ध ला यानागु दु तर वहःयात थें मखु। जिं छंगु दुःखकष्‍टया भट्टीइ जाँचय् यानागु दु।

यशैया 58:9

अले छिमिसं प्रार्थना याइ, परमप्रभुं लिसः बियादी। छिमिसं ग्‍वाहालिया निंतिं बिन्‍ति याइ अले वय्‌कलं धयादी, ‘जि थन हे दु’। “छुं जुयाः छिमिसं थःपिनिगु दथुं मेपिन्‍त क्‍वत्‍यलेगु त्‍वःतल, मेपिन्‍त पतिंचां सुया क्‍यनेगु व मभिंगु खँ ल्‍हायेगु त्‍वःतल,

यर्मिया 24:5

“परमप्रभु इस्राएलया परमेश्‍वरं थथे धयादी, ‘थ्‍व बांबांलाःगु यःमरि थें जिं यहूदां बेबिलोनय् ज्‍वनायंकूपिन्‍त उलि हे बांलाः ताय्‌के।

यर्मिया 30:22

‘थुकथं छिपिं जिम्‍ह मनूत जुइ, जि छिमि परमेश्‍वर जुये।’”

यर्मिया 31:33

“उबलय् जिं इस्राएलया घरानानापं चीत्‍यनागु बाचा थुकथं खः, जिं थःगु नियम इमिगु मनय् तयाबी अले इमिगु नुगलय् च्‍वयाबी। जि इमि परमेश्‍वर जुइ अले इपिं जिम्‍ह मनूत जुइ।

यर्मिया 32:38

इपिं जिम्‍ह प्रजा जुइ, जि इमि परमेश्‍वर जुइ।

यर्मिया 9:6

छ धोखाया दथुइ च्‍वनाच्‍वंगु दु। धोखां यानाः हे इमिसं जितः म्‍हसीकेत इन्‍कार याःगु दु,” परमप्रभुं धयादी।

इजकिएल 11:20

अले इपिं जिगु विधिकथं जुइ, जिगु नियम पालन यायेत होसियार जुइ। अले इपिं जिम्‍ह प्रजा जुइ, जि इमि परमेश्‍वर जुइ।

इजकिएल 14:11

अले इस्राएलया मनूत जिपाखें गुबलें थुखे उखे वनी मखु, इमिसं थःगु फुक्‍क पापं थःत अशुद्ध याइ मखु। इपिं जिम्‍ह प्रजा जुइ, अले जि इमि परमेश्‍वर जुये, परमप्रभु परमेश्‍वरं धयादी।’”

इजकिएल 20:38

जिं छिपिं मध्‍ये जिगु विरोधय् अपराध याइपिं फुक्‍क विद्रोहीतय्‌त पितछ्वयाः छिमित शुद्ध याये। इपिं च्‍वनाच्‍वंगु देशं इमित जिं हयेगु जूसां इपिं इस्राएल देशय् दुहां वने दइ मखु। अले जि हे परमप्रभु खः धकाः छिमिसं म्‍हसी।

इजकिएल 36:28

जिं छिमि पुर्खातय्‌त बियागु देशय् छिपिं च्‍वनी। छिपिं जिगु प्रजा जुइ अले जि छिमि परमेश्‍वर जुइ।

इजकिएल 37:27

जि च्‍वनेगु थाय् नं इमिगु हे दथुइ दइ। जि इमि परमेश्‍वर जुये, इपिं जिम्‍ह प्रजा जुइ।

दानिएल 11:35

अन्‍तया ई तक शुद्ध जुइमा, यचुसे च्‍वनेमा अले ख्‍वं मदुपिं जुइमा धकाः छुं बुद्धि दुपिं नायःतय्‌सं दुःख सी। परमेश्‍वरं क्‍वःछिनादीगु अन्‍तया ई मवतले थुपिं खँ जुया हे च्‍वनी।

दानिएल 12:10

यक्‍वसित शुद्ध याइ, ख्‍वं मदुम्‍ह याइ अले यचुकी। मभिंपिं मनूतय्‌सं धाःसा मभिंगु ज्‍या याना हे च्‍वनी। उपिं मध्‍ये सुनानं छुं थुइ मखु तर बुद्धि दुपिन्‍सं थुइ।

योएल 2:32

अबलय् परमप्रभुयागु नां काइपिनिगु उद्धार जुइ।”

लेवी 26:12

जि छिपिंनापं हे च्‍वनाच्‍वने, अले छिमि परमेश्‍वर जुयाच्‍वने, छिपिं धाःसा जिमि मनूत जुइ।

जकरिया 10:6

“जिं यहूदाया घरानायात बल्‍लाकाबी अले योसेफया घरानायात बचय् याये। जिं इमित हाकनं लित ब्‍वनाहय्। छाय्‌धाःसा जितः इपिं प्रति दया दु। जिं इमित गुबलें नं मत्‍वःतागु थें च्‍वंक इपिं न्‍हापा गथे खः अथे हे यानाबी। छाय्‌धाःसा जि इमि परमप्रभु परमेश्‍वर खः, अले जिं इमिगु प्रार्थनाया लिसः बी।

जकरिया 12:10

“दाऊदया घराना व यरूशलेमयापिं मनूतय्‌त दया व प्रार्थनाया आत्‍मां जाय्‌काबी। इमिसं थःपिन्‍सं सुयाब्‍यूम्‍ह मनू, जितः स्‍वइ। अले मनूत याक काय्‌या निंतिं शोक याःगु थें वयागु निंतिं इपिं दुखं च्‍वनी। दकलय् न्‍हापा बूम्‍ह काय्‌या निंतिं थें दुखं च्‍वनी।

जकरिया 8:8

जिं इमित यरूशलेमय् च्‍वनेत ब्‍वनाहये। इपिं जि मनूत जुइ। अले जि इमिपाखे विश्‍वास याये बहःम्‍ह व धर्मी जुयाः इमि परमेश्‍वर जुये।”

प्रेरित 2:21

अबलय् परमप्रभुयागु नां काइपिनिगु उद्धार जुइ।’”

हिब्रू 8:10

जिं इस्राएलीतलिसे चीत्‍यनागु बाचा थुकथं खः – ‘जिं थःगु नियम इमिगु मनय् थ्‍यंक तयाबी, अले इमिगु नुगलय् नं च्‍वयाबी। अले जि इमि परमेश्‍वर जुइ व इपिं जिम्‍ह मनूत जुइ।’

याकूब 1:12

दुःखकष्‍ट जुयाच्‍वंबलय् नं परमेश्‍वरयाके भरोसा तयाच्‍वंम्‍ह मनू धन्‍यम्‍ह खः। अथे दुःखकष्‍ट सीधुंकाः वयात परमेश्‍वरं वय्‌कःयात माया याःपिन्‍त बी धकाः धयादीगु जीवनयागु श्रीपेच बियादी।

१ पत्रुस 4:12

यःपिं दाजुकिजापिं, गुबलें मजूनिगु दुःखकष्‍ट जूवल धकाः छिपिं अजू चाये मते। छिमिगु विश्‍वास स्‍वयेत थथे दुःखकष्‍ट जूवःगु खः।

प्रकाश 21:7

त्‍याकावइपिन्‍त थ्‍व हे अंश दइ। जि वया परमेश्‍वर जुइ, अले व जिम्‍ह काय् जुइ।

प्रकाश 8:10

हानं स्‍वम्‍हम्‍ह स्‍वर्गदूतं थःगु तुरही पुल। अले ला मिप्‍वाः थें च्‍यानाः तःग्‍वःगु नगु छगः आकाशं कुतुं वयाः स्‍वब्‍वय् छब्‍व खुसि व बुंगाःचाय् लात।

प्रकाश 8:11

थ्‍व नगुयागु नां “खायु” खः। अले थुकिं यानाः स्‍वब्‍वय् छब्‍व लः खाइसे च्‍वना वन। थथे लः खाइसे च्‍वना वंगुलिं व लखं यानाः यक्‍व हे मनूत सित।

प्रकाश 8:12

अले प्‍यम्‍हम्‍ह स्‍वर्गदूतं थःगु तुरही पुल। स्‍वब्‍वय् छब्‍व सूर्य व स्‍वब्‍वय् छब्‍व तिमिला व स्‍वब्‍वय् छब्‍व नगुयात स्‍यंका ब्‍यूगुलिं स्‍वब्‍वय् छब्‍व न्‍हि खिउँसे च्‍वना वन, स्‍वब्‍वय् छब्‍व चा नं अथे हे जुल।

प्रकाश 8:7

न्‍हापांम्‍ह स्‍वर्गदूतं तुरही पूबलय् हि ल्‍वाकज्‍याःगु प्‍वँ व मि पृथ्‍वीइ वान्‍छ्वया हल। अले स्‍वब्‍वय् छब्‍व पृथ्‍वी च्‍यात, स्‍वब्‍वय् छब्‍व सिमा नं च्‍यात, अले वाउँगु घाँय् नं फुक्‍क च्‍यानाः वन।

प्रकाश 8:8

निम्‍हम्‍ह स्‍वर्गदूतं थःगु तुरही पुल। अले दनदन मि च्‍यानाच्‍वंगु पहाड थें ज्‍याःगु छुं छगू समुद्रय् वान्‍छ्वया हल। स्‍वब्‍वय् छब्‍व समुद्र हि जुल।

प्रकाश 8:9

अले समुद्रय् च्‍वंपिं स्‍वब्‍वय् छब्‍व जीवजन्‍तुत नं सित। स्‍वब्‍वय् छब्‍व लःजहाज नं स्‍यन।