जकरिया 1:16 - नेवाः बाइबल

¹⁶ “उकिं जिगु दया क्‍यनेत जि यरूशलेमय् लिहां वयागु दु। जिगु देगः हाकनं दय्‌की, यरूशलेमय् नापय् यायेगु खिपः तंके याइ, अले शहरयात हाकनं दय्‌की” दक्‍व शक्ति दुम्‍ह परमप्रभुं धयादी।

जकरिया 1:16 ပူးပေါင်းရင်းမြစ်များ

अय्‍यूब 38:5

सुनां थुकिया नाप क्‍वःछित? छं ला सी हे माःगु। सुनां थुकी नापय् यायेगु खिपः यख्‍खात?

यशैया 12:1

व दिंखुन्‍हु छिमिसं थथे धाइ, “हे परमप्रभु, जिं छिगु प्रशंसा याये! छि जिनापं तंचायादीगु दु, अय्‌नं आः छिगु तं क्‍वलाय् धुंकूगु दु अले छिं जितः सान्‍त्‍वना बियादीगु दु।

यशैया 34:11

तर व छगू मरुभूमिया न्‍हिकांझंगःत च्‍वनेगु थाय् जुइ अले ततःसलं हालीपिं न्‍हिकांझंगःत व सँक्‍वःतय्‌सं अनं स्‍वँ दय्‌की। अनंलि परमेश्‍वरं एदोमयात ध्‍वः सालाः बांलाक नापय् यानादी, वय्‌कलं उकियात गोलमाल व नाशया लागिं नापय् यानादी।

यर्मिया 30:18

“परमप्रभुं थथे धयादी, “‘जिं थःम्‍हं हे थः प्रजायात इमिगु देशय् लित हये अले फुक्‍क परिवारयात दयामाया याये। शहरयात व नाश जूगु थासय् हे हाकनं दय्‌की। जुजुया दरबार नं हाकनं थःगु थासय् दय्‌की।

इजकिएल 40:3

वय्‌कलं जितः अन यंकादिल, जिं छम्‍ह मनूयात अन खना, वयागु ख्‍वाःपाः कँय्‌यागु थें च्‍वं। वयागु ल्‍हातय् छगू सुतिया खिपः व नापे यायेगु कथि दु, व मू ध्‍वाखाय् दनाच्‍वंगु जिं खना।

इजकिएल 47:3

व नापय् याइगु खिपः ल्‍हातय् ज्‍वनाः पुर्बपाखे वन, अले वं ५३० मिटर नापय् यात। वं जितः खुसिया उखेपाखे ब्‍वना यंकल, लः गौचा तक वः।

इजकिएल 48:35

“शहरयागु प्‍यखें पाखेयागु घेरा ९.६ किलोमिटर दइ। “उखुन्‍हुंनिसें शहरया नां ‘परमप्रभु अन दी’ जुइ।”

हाग्‍गै 1:14

उकिं परमप्रभुं शालतिएलया काय् यहूदायाम्‍ह राज्‍यपाल यरूबाबेल व यहोसादाकया काय्, दकलय् तःधंम्‍ह पुजाहारी यहोशू व बेबिलोनं लिहांवःपिं मनूतय्‌त ग्‍वाकादिल। अले इमिसं वयाः दक्‍व शक्ति दुम्‍ह परमप्रभु थः परमेश्‍वरयागु देगः दय्‌केगु ज्‍या न्‍ह्याकल।

जकरिया 10:6

“जिं यहूदाया घरानायात बल्‍लाकाबी अले योसेफया घरानायात बचय् याये। जिं इमित हाकनं लित ब्‍वनाहय्। छाय्‌धाःसा जितः इपिं प्रति दया दु। जिं इमित गुबलें नं मत्‍वःतागु थें च्‍वंक इपिं न्‍हापा गथे खः अथे हे यानाबी। छाय्‌धाःसा जि इमि परमप्रभु परमेश्‍वर खः, अले जिं इमिगु प्रार्थनाया लिसः बी।

जकरिया 2:4

वं धाल, “ब्‍वाँय् वनाः उम्‍ह ल्‍याय्‌म्‍हम्‍ह मनूयात धा, ‘मनूतय्‌गु व पशुतय्‌गु ल्‍याः यक्‍व अप्‍वः जूगुलिं यरूशलेम पःखाः मदुगु शहर जुइ।

जकरिया 2:5

जि थः हे शहरया प्‍यखेरं मिया पःखाः जुइ। जि हे उकी दुनेया महिमा जुइ,’” धकाः परमप्रभुं धयादी।

जकरिया 2:6

“वा, वा, उत्तरयागु देशं बिस्‍युं वा! छाय्‌धाःसा जिं छिमित आकाशया प्‍यंगू फय् थें छ्यालब्‍याल यानाबियागु दु,” परमप्रभुं धयादी।

जकरिया 4:9

“यरूबाबेलया ल्‍हातं थ्‍व देगःया जग तःगु दु, वं हे थःगु ल्‍हातं देगः दय्‌केगु ज्‍या सिधय्‌की।” अले दक्‍व शक्ति दुम्‍ह परमप्रभुं हे जितः छन्‍थाय् छ्वयाहयादीगु खः धकाः छं सी।

जकरिया 8:3

परमप्रभुं थथे धयादी, “जि सियोनय् लिहां वये अले यरूशलेमय् बाय् च्‍वने। अबलय् यरूशलेमयात ‘विश्‍वास याये बहःगु शहर’ धकाः धाइ, अले दक्‍व शक्ति दुम्‍ह परमप्रभुया पहाडयात धाःसा ‘पवित्र पर्वत’ धाइ।”