तीतस 3:5 - नेवाः बाइबल

⁵ वय्‌कलं झीत मुक्ति बियादिल। झीसं भिंगु भिंगु जक ज्‍या यानागुलिं झीत मुक्ति बियादीगु मखु, बरु वय्‌कलं दया यानाः झीत झीगु पाप सिलाः न्‍हूपिं यानाः व पवित्र आत्‍मायागु शक्तिं मुक्ति बियादीगु खः।

तीतस 3:5 ပူးပေါင်းရင်းမြစ်များ

अय्‍यूब 15:14

मनू छु खः धकाः व निर्दोष जुइत? अथवा सुं मनू धर्मी जुइ फइ ला?

अय्‍यूब 25:4

परमेश्‍वरया मिखाय् मनू गय् यानाः धर्मी जुइ फइ? अथवा मिसापाखें बूम्‍ह मनू गय् यानाः दोष मदुम्‍ह जुइ फइ?

अय्‍यूब 9:20

जि छुं दोष मदुम्‍ह खःसां जिगु हे म्‍हुतुं जितः दोषी ठहरय् याइ। जि अपराधी मखुसां थ्‍वं जितः दोषी खः धकाः धाइ।

भजनसंग्रहया सफू 130:7

हे इस्राएल, परमप्रभुयाके थःगु आशा तया च्‍वँ, छाय्‌धाःसा परमप्रभु सदां दयाच्‍वनीगु दया माया दुम्‍ह व उद्धार यानादीम्‍ह खः।

भजनसंग्रहया सफू 143:2

थः दासयात इन्‍साफय् हयादी मते, छिगु न्‍ह्यःने सुं नं धर्मी मदु।

भजनसंग्रहया सफू 51:10

हे परमेश्‍वर, जिगु नुगःयात शुद्ध यानादिसँ। अले जिके हाकनं न्‍हूगु यानाः क्‍वातूगु आत्‍मा दय्‌कादिसँ।

भजनसंग्रहया सफू 62:12

सदां दयाच्‍वनीगु माया नं जिगु हे खः।” हे परमप्रभु छिं मनूतय्‌गु ज्‍या स्‍वयाः सिरपाः बियादी।

भजनसंग्रहया सफू 86:15

तर परमप्रभु, छि दयादुम्‍ह, माया यानादीम्‍ह परमेश्‍वर खः। छि तंचायेत लिबाकादीम्‍ह, सदां दया माया यानादीम्‍ह व तसकं विश्‍वास याये बहःम्‍ह खः।

भजनसंग्रहया सफू 86:5

हे परमप्रभु, छि भिंम्‍ह व क्षमा बियादीम्‍ह खः। अले गुलिसिनं ग्‍वाहालिया लागि छितः इनाप याइ, इपिं सकसितं छिं सदां दया माया यानादी।

यशैया 57:12

जिमिसं छु यानाः व धार्मिकता खः धकाः बिचाः याइ, तर जिं छिमिगु चाला क्‍यनाबी। अले उकिं छिमित छुं नं फाइदा दइ मखु।

इजकिएल 36:25

जिं छिमिके शुद्ध लः छ्वाके, अले छिपिं शुद्ध जुइ। छिमिगु फुक्‍क अशुद्धतापाखें अले छिमिगु फुक्‍क मूर्तितपाखें जिं छिमित शुद्ध यानाबी।

मीका 7:18

छि थें ज्‍याःम्‍ह परमेश्‍वर सु दु? गुम्‍हय्‌सिनं अधर्म क्षमा यानादी, अले ल्‍यंदुपिं थःमनूतय्‌गु पाप क्षमा यानादी? छि सदां तंचायादी मखु, तर दयामाया यायेत छितः यः।

मत्ती 3:11

“जिं ला छिमित पश्‍चातापया निंतिं लखं बप्‍तिस्‍मा बियाच्‍वना। जिगु लिपा जि सिबय् तसकं तःधंम्‍ह झायाच्‍वंगु दु। जि ला वय्‌कःयागु लाकां ज्‍वनाजुइत तक नं मल्‍वः। वय्‌कलं हे छिमित पवित्र आत्‍मां व मिं बप्‍तिस्‍मा बियादी।

लूका 1:50

वय्‌कःयात मानय् याइपिन्‍त वय्‌कलं पुस्‍ता पुस्‍तां तकं दया यानादी।

लूका 1:54

वय्‌कलं थःम्‍हं यानादीगु बाचा लुमंकाः थः च्‍यःत इस्राएलीतय्‌त ग्‍वाहालि यानादिल।

लूका 1:72

वय्‌कलं झी तापाःबाज्‍यापिन्‍त दया यानादीगु व वय्‌कःपिं नाप चिनादीगु बाचा लुमंकादी।

लूका 1:78

झी परमेश्‍वर तसकं भिंम्‍ह व दया माया दुम्‍ह खः। अय्‌जूगुलिं वय्‌कलं तसकं थीगु मुक्तियागु निभाः जः झीत खय्‌कादी।

रोमी 11:14

थुकथं जिमि यहूदी दाजुकिजापिं मध्‍ये गुम्‍हं गुम्‍हय्‌सित बचय् यायेत जिं इमित नुगः मुइके बी।

रोमी 11:6

थथे दया मायां जूगु खः, ज्‍यां मखु, मखुसा दया माया दया माया हे जुइ मखु।

रोमी 12:2

आवंनिसें थ्‍व संसारयापिं मनूतय्‌सं याना जू थें छिमिसं याना जुइ मते, बरु मनयात हीकाः न्‍हूपिं मनूत जुयाच्‍वँ। थुकथं याना जूसा परमेश्‍वरयागु इच्‍छा छु खः, अले भिंगु, वय्‌कःयात यःगु, व छु खँ ठीक जू छिमिसं बांलाक सीके थुइके फइ।

रोमी 3:20

व्‍यवस्‍थाय् च्‍वयातःगु नियम पालन यानाः सुं हे मनू धर्मी जुइ फइ मखु। व्‍यवस्‍थां ला पाप छु खः धकाः क्‍यनाबी।

रोमी 3:28

व्‍यवस्‍था मानय् मयासें हे ख्रीष्‍टयात विश्‍वास याःम्‍ह मनूयात परमेश्‍वरं धर्मी ठहरय् यानादी।

रोमी 4:5

अय्‌नं ज्‍या यानाः कमय् मयासें पापीतय्‌त धर्मी ठहरय् यानादीम्‍ह परमेश्‍वरयात विश्‍वास याइम्‍हय्‌सिगु विश्‍वासं हे वयात धर्मी ठहरय् याइ।

रोमी 9:11

अले निम्‍हं काय् बुइ न्‍ह्यः हे, अले भिंगु मभिंगु ज्‍याखँ मयाःनिबलय् हे थःत यःथें परमेश्‍वरं ल्‍ययादिल।

रोमी 9:16

थुकिं सीदत, थ्‍व खँ फुक्‍कं परमेश्‍वरयागु दयां यानाः जक जूगु खः, मनूया कुतलं व मनूयात यःथें यानाः जूगु मखु।

रोमी 9:30

थज्‍याःगु खँय् झीसं छु धायेगु लय्? धर्मी जुइत मस्‍वःपिं यहूदीमखुपिं मनूत इमिगु विश्‍वासं यानाः धर्मी जुल।

१ कोरिन्‍थी 6:11

छिपिं मध्‍ये नं गुम्‍हं गुम्‍हं न्‍हापा थथे हे याना जुइ धुंकूपिं खः। आः ला छिमिगु पाप सिले धुंकूगु दु। छिपिं परमेश्‍वरयात देछाये धुंकूपिं मनूत खः। झी परमेश्‍वरया आत्‍मां प्रभु येशू ख्रीष्‍टयागु नामं छिमित परमेश्‍वर नाप मिलय् यानादीगु दु।

गलाती 2:16

अथेसां येशू ख्रीष्‍टयात विश्‍वास याःसा जक परमेश्‍वरं मुक्ति बियादी धकाः झीसं स्‍यू। व्‍यवस्‍था मानय् यानाः जक धर्मी ठहरय् जुइ फइ मखु, येशू ख्रीष्‍टयात विश्‍वास याःसा जक धर्मी ठहरय् जुइ धकाः झीसं नं येशू ख्रीष्‍टयात विश्‍वास यानागु खः। व्‍यवस्‍था मानय् यानाः जक ला सुं नं धर्मी जुइ फइ मखु।

एफिसी 2:4

अय्‌नं परमेश्‍वरं झीत तसकं तःधंगु दया माया क्‍यनादीगु दु।

एफिसी 4:23

थुकिया पलेसा पवित्र आत्‍मां छिमिगु बिचाः व पहःयात न्‍हूगु यायेमा।

एफिसी 5:26

ख्रीष्‍ट येशूं मण्‍डलीयात शुद्ध यायेत थःगु वचनं व लखं सिलाः शुद्ध यानादिल।

व्‍यवस्‍था 9:5

छिपिं भिंपिं व नुगः यचुपिं जूगुलिं इमिगु देश त्‍याका कायेत वनेत्‍यंगु मखु। अय्‌नं इमिसं याःगु मभिंगु ज्‍यां यानाः वय्‌कलं छिमि पुर्खा अब्राहाम, इसहाक व याकूबलिसें पाफयादीगु खँ पूवंकादीत परमप्रभु छिमि परमेश्‍वरं इमित छिमिगु न्‍ह्यःनं लिनाछ्वयादी।

कलस्‍सी 3:10

छिपिं आः न्‍हूपिं जुइ धुंकल। आवंलि वय्‌कःयात बांलाक म्‍हसीके फयेमा धकाः परमेश्‍वरं छिमित थःथें हे यानाः न्‍ह्याबलें न्‍हूकथं हिलादी।

२ तिमोथी 1:9

थ्‍व हे परमेश्‍वरं झीत बचय् यानाः वय्‌कःया मनूत यायेत सःतादिल। झीसं यानागु धर्मकर्मं यानाः मखु, बरु वय्‌कलं हे दया माया यानाः झीत बचय् यानादीगु खः। सृष्‍टि जुइ न्‍ह्यः हे ख्रीष्‍ट येशूं झीत थ्‍व दया माया बियादीगु खः।

तीतस 3:4

अय्‌नं झीत मुक्ति बियादीम्‍ह परमेश्‍वरं मनूतय्‌त दया माया क्‍यनादीगुलिं

हिब्रू 10:22

पवित्रगु लखं म्‍ह शुद्ध यानाः बांमलाःगु व मभिंगु खँ मतिइ मतसे, नुगः यचुकाः व विश्‍वासय् बल्‍लानाः झीपिं परमेश्‍वरया न्‍ह्यःने वनेनु।

हिब्रू 4:16

अय्‌जूगुलिं झीपिं भचा हे मग्‍यासे परमेश्‍वरया सिंहासनया न्‍ह्यःने वनेनु। अले वय्‌कलं झीत दया यानाः माःबलय् माःकथं झीत ग्‍वाहालि यानादी।

हिब्रू 6:6

अय्‌नं हे थुमिसं वय्‌कःयात त्‍वःतावन धाःसा थुमित पश्‍चाताप याकाः हानं लित हये फइ मखु। छाय्‌धाःसा थुमिसं हानं छकः फुक्‍कसिया न्‍ह्यःने परमेश्‍वरया काय्‌यात क्रूसय् यख्‍खानाः बेइज्‍जत याइ।

१ पत्रुस 1:3

झी प्रभु येशू ख्रीष्‍टया बाः परमेश्‍वर न्‍ह्याबलें तःधनेमा। वय्‌कलं झीत दया माया यानाः सी धुंकूम्‍ह येशू ख्रीष्‍टयात म्‍वाकाः झीत तसकं तःधंगु व म्‍वानाच्‍वंगु आशाया निंतिं न्‍हूगु जीवन बियादिल।

१ पत्रुस 2:10

न्‍हापा छिपिं परमेश्‍वरया मनूत मखु, आः जुइ धुंकल। न्‍हापा छिमिसं वय्‌कःयागु दया माया काये मखं, आः काये खंगु दु।

१ पत्रुस 3:21

थ्‍व आः छिमित बचय् याइगु लःया बप्‍तिस्‍माया चिं खः। थ्‍व म्‍हया खिति सिला छ्वयेगु थें मखु, बरु यचुगु नुगलं परमेश्‍वरया अधीनय् जुइगु खः। ख्रीष्‍ट सिनाः म्‍वाना वःगुलिं झीपिं बचय् जुइ।