प्रकाश 9:21 - नेवाः बाइबल

²¹ अले इमिसं मनू स्‍यायेगु, जादु क्‍यनेगु, व्‍यभिचार यायेगु व खुइगु ज्‍याया पश्‍चाताप मयाः।

प्रकाश 9:21 ပူးပေါင်းရင်းမြစ်များ

यशैया 47:12

“छं थः मचाबलय् निसें यक्‍व दुःखसिया यानावयाच्‍वंगु जादुत व यक्‍व तन्‍त्रमन्‍त्र छ्यला च्‍वँ! सके छ ताःलाइ ला, वा छं भय पिकयाः शत्रुतय्‌त ख्‍याये फइ ला।

यशैया 47:9

थुपिं निगू खँ छन्‍थाय् छक्‍वलं छन्‍हुं हे वइ, काय्‌म्‍ह्याय्‌पिं त्‍वःताच्‍वने मालीगु अले भाःत मदय्‌काच्‍वने मालीगु। छंगु जीवनय् यक्‍व जादु यायेगु शक्ति दःसां अले तसकं जाःगु तन्‍त्रमन्‍त्र यायेगु शक्ति दःसां उपिं फुक्‍क छंगु जीवनय् व हे वइ।

यशैया 57:3

“हे झाँक्रीतय्‌गु लँय् वनीपिं व व्‍यभिचारीत व वेश्‍यात थें ज्‍या याइपिं, थन वा!

दानिएल 11:33

“बुद्धि दुपिं नायःतय्‌सं यक्‍व मनूतय्‌त स्‍यनेगु ज्‍या याइ। तर छुं ईया निंतिं इमित तरवारं स्‍याइ, मिं भस्‍म याइ, छुं मनूतय्‌त लुतय् याइ वा ज्‍वनाः यंकी।

मलाकी 3:5

दक्‍व शक्ति दुम्‍ह परमप्रभुं धयादी, “अबलय् जि न्‍याय यायेत छिमिथाय् वये। अले तन्‍त्रमन्‍त्र याइपिं, व्‍यभिचारीत, मखुगु साक्षी बीपिं, ज्‍यामितय्‌त ज्‍यालाय् स्‍याइपिं अले भाःत मदुपिं मिस्‍त, मां-बौ मदुपिं मस्‍तय्‌त क्‍वत्‍यलातःपिं, परदेशीतय्‌गु न्‍याय लाका काइपिं, जि खनाः मग्‍याइपिं थुपिं सकसिगु विरोधय् जिं हथासं साक्षी बी।”

मत्ती 15:19

छाय्‌धाःसा मनूतय्‌गु नुगलं हे थज्‍याःगु मभिंगु बिचाः पिहां वइ – स्‍यायेगु, व्‍यभिचार यायेगु, खुइगु, मखुगु साक्षी बीगु, मेपिन्‍त मभिंकाः खँ ल्‍हायेगु।

२ कोरिन्‍थी 12:21

जि छिमिथाय् हानं वय्‌बलय् परमेश्‍वरं जितः छिमिगु न्‍ह्यःने लज्‍या चाये माय्‌कादी धकाः जि ग्‍यानाच्‍वना। अले जितः न्‍हापा पाप यानाः मह्यूपिं, न्‍हापा मभिंगु ज्‍या यानाः व्‍यभिचार यानाः व लाः लाः थें सनाः पश्‍चाताप मयाःपिं खनाः ख्‍वये वइ।

गलाती 5:20

मूर्ति पुजा यायेगु, झाँक्री ज्‍या यायेगु, ल्‍वाना जुइगु, मेपिन्‍त मभिंकेगु, नुगः मुइकेगु, तंम्‍वयेगु, थःगु जक भिं स्‍वयेगु, मेपिन्‍त ल्‍वाका जुइगु, अले पुचः पुचः मुनाः बाया जुइगु,

प्रकाश 13:13

थ्‍व मनूतय्‌सं खंक खंक हे आकाशं पृथ्‍वीइ मि गाय्‌केगु थें ज्‍याःगु तसकं हे अजू चायापुगु चिं यानाक्‍यन।

प्रकाश 13:15

न्‍हापांयाम्‍ह पशुयागु मूर्तियात नवाकेत सास तयाबीगु व वयात पुजा मयाःपिन्‍त स्‍यायेगु अधिकार व पशुयात बियातःगु दु।

प्रकाश 13:7

वयात विश्‍वासीतनाप ल्‍वायेगु व इमित बुकेगु अधिकार बिल। फुक्‍क कुलयापिं मनूतय्‌त, देश देशयापिं मनूतय्‌त, थीथी भाषां नवाइपिं मनूतय्‌त व जात जातियापिं मनूतय्‌त नं व पशुयात अधिकार याकेबिल।

प्रकाश 14:8

वयागु ल्‍यूल्‍यू वःम्‍ह मेम्‍ह स्‍वर्गदूतं थथे धाल – “नाश जुल, तःधंगु शहर बेबिलोन नाश जुल। थःम्‍हं याःगु बांमलाःगु ज्‍या मेमेगु देशयापिं मनूतय्‌त नं याकेब्‍यूम्‍ह थ्‍व हे शहर खः।”

प्रकाश 16:6

छाय्‌धाःसा छितः विश्‍वास याःपिं मनूतय्‌त व अगमवक्तातय्‌त स्‍याःपिं थुपिं हे खः। उकिं छिं थुमित हि त्‍वंकादिल। इपिं थथे हे यायेमाःपिं खः।”

प्रकाश 17:2

व हे नाप संसारयापिं जुजुपिन्‍सं व्‍यभिचार याना जूगु खः। सारा पृथ्‍वीइ च्‍वंपिं मनूतय्‌सं व नाप भाःपी हे मफय्‌क व्‍यभिचार याना जुल।”

प्रकाश 17:4

व मिसां तसकं थिकेगु ह्याउँसे, वँचुसे च्‍वंगु वसतं पुनातःगु दु। वं लुँ, हिरा, मोतीया तिसां म्‍ह छम्‍हं तिया तःगु दु। वयागु व्‍यभिचार याःगु घच्‍चायापुसे च्‍वंगु व मभिंगु खं जाःगु छगः लुँयागु ख्‍वल्‍चा वं ल्‍हातय् कयातःगु दु।

प्रकाश 17:5

वयागु कपालय् गुप्‍त अर्थ दुगु नां च्‍वयातःगु दु – “तःधंगु बेबिलोन, वेश्‍यातय् मां, अले पृथ्‍वीइ घच्‍चायापुसे च्‍वंगु ज्‍याखँ यानाजुइपिनि मां।”

प्रकाश 18:3

छाय्‌धाःसा वयागु व्‍यभिचारयागु ख्‍वल्‍चां त्‍वंगुलिं फुक्‍क जात जातियापिं मनूत नाश जुइ धुंकल। पृथ्‍वीयापिं जुजुपिन्‍सं व नाप व्‍यभिचार यात। वयागु गुबलें हे पूमवनीगु इच्‍छां यानाः संसारयापिं व्‍यापारीत तसकं हे धनी जुल।”

प्रकाश 19:2

वय्‌कलं बांलाक व खःकथं न्‍याय यानादी। पृथ्‍वीयापिं फुक्‍क मनूतय्‌त थःनाप व्‍यभिचार याकाः स्‍यंकूम्‍ह व तःधंम्‍ह वेश्‍यायात वय्‌कलं सजाँय बियादीगु दु। वय्‌कलं थः दासतय्‌गु हियागु पलेसा कयादीगु दु।”

प्रकाश 21:8

“भुस्‍याःत, विश्‍वास त्‍वःतूपिं, घच्‍चायापुगु ज्‍या याइपिं, मनू स्‍याइपिं, व्‍यभिचार याइपिं, धामी झाँक्री ज्‍या याइपिं, मूर्ति पुजा याइपिं व मखुगु खँ ल्‍हाइपिं फुक्‍कसितं गन्‍धकयागु मि गालय् वांछ्वइ। निकः सीगु धाःगु थ्‍व हे खः।”

प्रकाश 22:15

शहरं पिने धाःसा घच्‍चायापुगु ज्‍या याइपिं, जादु क्‍यनिपिं, व्‍यभिचार याइपिं, ज्‍यानमारात, मूर्ति पुजा याइपिं, मखुगु ज्‍याखँ यायेगु यय्‌कीपिं व मखुगु ज्‍याखँ जक यानाजुइपिं दइ।

प्रकाश 9:20

थुकिं मस्‍याःपिं मनूतय्‌सं अझ नं थःगु ल्‍हातिं याःगु ज्‍यायागु पश्‍चाताप मयाः। इमिसं भूतयात पुजा यायेगु व लुँ, वहः, सिजः, ल्‍वहं व सिँयागु मूर्तियात पुजा यायेगु मत्‍वःतू। थ्‍व द्यःतय्‌सं मखं, मताः, अले न्‍यासि जुइ मफु।