गन्‍ती 27:18 - नेवाः बाइबल

¹⁸ परमप्रभुं मोशायात धयादिल, “थज्‍याःगु आत्‍मा दुम्‍ह नूनया काय् यहोशूयात कयाः छं वयागु छेनय् थःगु ल्‍हाः ति।

गन्‍ती 27:18 ပူးပေါင်းရင်းမြစ်များ

उत्‍पत्ति 41:38

वय्‌कलं इमित धाल, “थ्‍व थें ज्‍याःम्‍ह परमेश्‍वरया आत्‍मा दुम्‍ह मनू झीसं गनं लुइके फइ ला?”

१ इतिहास 7:27

नून एलीशामाया काय् खः। यहोशू नूनया काय् खः।

प्रस्‍थान 17:9

मोशां यहोशूयात धाल, “कन्‍हय् वनाः अमालेकीतलिसें ल्‍वायेत छं मनूत ल्‍य। परमप्रभुं जितः बियादीगु कथि ज्‍वनाः जि गुँच्‍वकाय् दने।”

दानिएल 5:14

छंके द्यःतय्‌गु आत्‍मालिसें दुग्‍यां, अक्‍कल व तसकं बुद्धि दु धयागु खँ जिं न्‍यनागु दु।

गन्‍ती 11:17

जिं कुहां वयाः छनापं खँ ल्‍हाये। छंके दुगु छुं छुं आत्‍मा कयाः इमिके तयाबी। अले इमिसं नं मनूतय्‌गु कु क्‍वबी, छ याकःचां जक क्‍वबी माली मखु।

गन्‍ती 13:16

मोशां देशया चिवा कायेत छ्वःपिं मनूत थुपिं हे खः। नूनया काय् होशियायागु नां मोशां यहोशू छुनाबिल।

गन्‍ती 13:8

एफ्राइमया कुलपाखें नूनया काय् होशिया,

गन्‍ती 27:23

परमप्रभुं मोशायात उजं बियादी थें वं थःगु ल्‍हाः यहोशूया छेनय् तल अले वयात मनूतय् नायः जुइगु जिम्‍मा बिल।

यूहन्‍ना 3:34

परमेश्‍वरं छ्वया हःम्‍हय्‌सिनं हे जक परमेश्‍वरयागु वचन नवाइ, छाय्‌धाःसा वय्‌कःयात पवित्र आत्‍मां जाय्‌कादीगु दु।

प्रेरित 13:3

अले इमिसं अपसं च्‍वनाः प्रार्थना यानाः छेनय् ल्‍हाः तयाः इमित ज्‍याय् छ्वयाबिल।

प्रेरित 19:6

वं इमिगु छेनय् ल्‍हाः तयेवं इपिं पवित्र आत्‍मां जाल। अले इमिसं थीथी भाषां नवात वनापं अगमवाणी नं धाल।

प्रेरित 6:3

अय्‌जूगुलिं दाजुकिजापिन्‍सं, छिपिं मध्‍ये नांजाःपिं, आत्‍मां जाःपिं व बुद्धिं जाःपिं न्‍हय्‌म्‍ह मनूयात ल्‍ययादिसँ। अले इमित नयेत्‍वनेगु ज्‍याय् तयाबी।

प्रेरित 6:6

इमित प्रेरिततय्‌थाय् न्‍ह्यःने हल। अले इमिसं प्रार्थना यानाः इमिगु छेनय् ल्‍हाः तल।

व्‍यवस्‍था 1:37

छिमिसं यानाः परमप्रभु जि खनाः नं तंचायाः थथे धयादिल, “छ नं अन दुहां वने दइ मखु।

व्‍यवस्‍था 3:21

उबलय् जिं यहोशूयात थ्‍व आज्ञा बिया, “परमप्रभु छिमि परमेश्‍वरं थुपिं निम्‍ह जुजुयात छु यानादिल व फुक्‍क छं थःगु हे मिखां खंगु दु। छिपिं खुसिया पच्‍छिमय् वनीबलय् उपिं फुक्‍क देशतय्‌त नं परमप्रभुं अथे हे यानादी।

व्‍यवस्‍था 3:28

अय्‌नं यहोशूयात आज्ञा ब्‍यु, वयात हःपाः बियाः बल्‍लाकि, छाय्‌धाःसा वं हे छं खंगु देश अधिकारय् हयेत थुपिं मनूतय्‌त यर्दन खुसिया उखे यंकी।”

व्‍यवस्‍था 31:14

अले परमप्रभुं मोशायात धयादिल, “स्‍व, छ अप्‍वः म्‍वाइ मखुत। छं यहोशूयात सःति, अले छिपिं निम्‍हं नापलायेगु पालय् वा, अन जिं वयात ज्‍या ब्‍वये।” अथे जुयाः मोशा व यहोशू नापलायेगु पालय् वन।

व्‍यवस्‍था 31:23

परमप्रभुं नूनया काय् यहोशूयात थ्‍व आज्ञा बियादिल, “बल्‍ला व साहसी जु छाय्‌धाःसा जिं बी धकाः पाफयाः बचं बियागु देशय् छं हे इस्राएलीतय्‌त थ्‍यंकी। अले जि छनापं हे दइ।”

व्‍यवस्‍था 31:3

परमप्रभु छिमि परमेश्‍वर थः हे छिमिगु न्‍ह्यःने यर्दनया उखे झाइ। वय्‌कलं छिमिगु न्‍ह्यःने इपिं जातितय्‌त नाश यानादी, अले छिमिसं इमिगु देश त्‍याकाकाइ। परमप्रभुं धयादीकथं यहोशू नं छिमिगु न्‍ह्यःने न्‍ह्यःने यर्दन छिनावनी।

व्‍यवस्‍था 34:9

नूनया काय् यहोशू बुद्धिया आत्‍मां जाःम्‍ह खः, छाय्‌धाःसा मोशां वया छेनय् थःगु ल्‍हाः तःगु खः। अथे जुयाः इस्राएलीतय्‌सं वयागु खँ न्‍यन, अले परमप्रभुं मोशायात बियादीगु आज्ञा मानय् यात।

१ तिमोथी 4:14

थकालिपिन्‍सं छन्‍त छेनय् ल्‍हाः तयाः न्‍हापां हे क्‍वःछिनातःगु वरदानयात सितिं छ्वये मते।

१ तिमोथी 5:22

हथाय् चायाः सुयातं छेनय् ल्‍हाः तयाः मण्‍डलीयागु ज्‍याय् तये मते, छाय्‌धाःसा व मनू मभिंम्‍ह जूसा वयागु पाप छन्‍त नं लाइ। थःत पापपाखें तापाक हे ति।

हिब्रू 6:2

बप्‍तिस्‍मा कायेगु, छेनय् ल्‍हाः तयाः प्रार्थना यायेगु, सीपिं हानं म्‍वाना वइगु, अले दकलय् लिपा याइगु न्‍याययागु खँ जक झीसं लिसा लिसा कयाः स्‍यनाच्‍वने मजिल।

यहोशू 1:17

जिमिसं मोशायागु फुक्‍क खँ न्‍यनागु थें हे छिगु खँ नं न्‍यने। परमप्रभु छिकपिनि परमेश्‍वर मोशानापं दीगु थें छिनापं नं दीमा।

न्‍यायकर्ता 11:29

अले परमप्रभुयागु आत्‍मा यिप्‍तायाके वल, अले व गिलाद व मनश्‍शे जुयाः गिलादया मिस्‍पां दुहां वनाः अम्‍मोनीतलिसें ल्‍वायेत न्‍ह्यज्‍यात।

न्‍यायकर्ता 3:10

वयाके परमप्रभुयागु आत्‍मा दुबिल, अले व इस्राएलीतय् न्‍यायकर्ता जुयाः लडाइँलय् वन। परमप्रभुं अरामया जुजु कूशन-रिशातैमयात ओत्‍निएलया ल्‍हातय् बियादिल। वं कूशन-रिशातैमयात बुकल।

१ शमूएल 16:18

वया च्‍यःत मध्‍ये छम्‍हय्‌सिनं धाल, “बेथलेहेमय् च्‍वंम्‍ह यिशैया काय्‌पिं मध्‍ये छम्‍हय्‌सिनं वीणा थाःगु जिं खनागु दु। व साहसी व वीर मनू खः। व खँ ल्‍हाये सःम्‍ह व स्‍वइबलय् बांलाःम्‍ह खः अले परमप्रभु नं वनापं दी।”