नहेम्‍याह 9:30 - नेवाः बाइबल

³⁰ दँय्‌दसं छिं इमित थाकु मचासें ख्‍याच्‍वः बियादिल, छिं थः अगमवक्तातय्‌त न्‍ववाइगु आत्‍मा बियादिल, अय्‌नं छिकपिनि प्रजातय्‌सं छिगु खँ मन्‍यन। उकिं इमित मेगु जातियापिं मनूतय्‌गु ल्‍हातय् लाकादिल।

नहेम्‍याह 9:30 ပူးပေါင်းရင်းမြစ်များ

२ राजा 18:11

अश्‍शूरयाम्‍ह जुजुं इस्राएलीतय्‌त ज्‍वनाः अश्‍शूरय् यंकल। वं इमित हलहय्, हाबोर खुसिया सिथय् च्‍वंगु गोजानय् व मादीतय्‌गु शहरय् तल।

२ राजा 21:10

परमप्रभुं थः दास अगमवक्तातपाखें थथे धयादिल,

२ इतिहास 24:19

तर इमित थःथाय् हे लित हयेत परमप्रभुं अगमवक्तात छ्वयादिल। उपिं अगमवक्तातय्‌सं इमिगु दोष क्‍यनाबिल अय्‌नं इमिसं अगमवक्तातय्‌गु खँ मन्‍यं।

एज्रा 9:10

“आः हे, जिमि परमेश्‍वर, थुलि जुइ धुंकाः जिमिसं छु धायेगु? छिं बियादीगु आज्ञा जिमिसं मानय् यानागु मदु।

नहेम्‍याह 9:20

इमित छिं स्‍यनेकने यायेत थःगु भिंगु आत्‍मा बियादिल, छिं इमिगु म्‍हुतुं छिगु मन्‍न चीका मदी व इपिं प्‍याचाःबलय् छिं इमित लः बियादिल।

नहेम्‍याह 9:26

“अय्‌नं छिकपिनि प्रजातय्‌सं विद्रोह यात। अले इमिसं खँ मन्‍यन। छिगु व्‍यवस्‍थापाखें ख्‍वाः फस्‍वय्‌कल। छिपाखे लिहां वयेत ख्‍याच्‍वः बीपिं अगमवक्तातय्‌त इमिसं स्‍यानाबिल। इमिसं छितः गज्‍याःगु अपमान यात।

नहेम्‍याह 9:29

“छिं इमित थःगु व्‍यवस्‍थापाखे लिहां वयेत ख्‍याच्‍वः बियादिल। अय्‌नं तःधंछु जुयाः इमिसं छिगु नियमया विरोधय् पापयात। थ्‍व मानय् याइपिन्‍त जीवन दु। अय्‌नं इपिं जिराहा जुयाः छिपाखें फस्‍वल, अत्तेरी जुयाः इमिसं छिगु खँ मन्‍यन।

भजनसंग्रहया सफू 86:15

तर परमप्रभु, छि दयादुम्‍ह, माया यानादीम्‍ह परमेश्‍वर खः। छि तंचायेत लिबाकादीम्‍ह, सदां दया माया यानादीम्‍ह व तसकं विश्‍वास याये बहःम्‍ह खः।

भजनसंग्रहया सफू 95:10

पिइदँ तक जि इपिं खनाः तंचाया, अले जिं धया, “थुपिं जिपाखें फहिला वनीगु मनदुपिं खः, इमिसं जिगु लँ म्‍हसीके मफु।

यशैया 28:10

छाय्‌धाःसा थथे भतिचा थन, भतिचा अन हे स्‍यनेगु, अले हानं हानं कनेगु, अले हानं हानं धायेगु।”

यशैया 42:24

सुनां याकूबयात लुतय्‌ याकेत अले इस्राएलयात लुतय् याइपिनिगु ल्‍हातय् तयाबिल? वय्‌कः व हे परमप्रभु खः सुया विरोधय् झीसं पाप यानागु खः। वय्‌कःया इच्‍छा कथं मनूतय्‌सं थःगु जीवन हनेगु इच्‍छा मयाः। वय्‌कलं बियादीगु नियम मानय् मयाः।

यशैया 48:9

जिगु थःगु हे नांया कारणं जिं थःगु तंयात प्‍वंकेगु लिबाका च्‍वनागु खः, अले जिगु महिमाया निंतिं छन्‍त त्‍वःतामछ्वयेत जिं व पना तयागु दु।

यशैया 63:10

अय्‌नं इपिं विद्रोही जुल, अले वय्‌कःया पवित्र आत्‍मायात दुःख बी। अथे जुयाः वय्‌कः इमि शत्रु जुयादिल, अले वय्‌कः थः हे इमिगु विरोधय् ल्‍वानादिल।

यर्मिया 25:4

“परमप्रभुं थः दास अगमवक्तातय्‌त तःकः मछि छिमिथाय् छ्वयाहयादीगु जूसां छिमिसं ध्‍यान नं मब्‍यू, न्‍यनेत न्‍हाय्‌पं नं मब्‍यू।

यर्मिया 44:22

छिमिसं याःगु मभिंगु ज्‍या व घच्‍चाइपुगु ज्‍या परमप्रभुं यक्‍व अप्‍वः सह यानादी मफुत। अले छिमिगु देश झिजांमिजां दंगु, मनू मदुगु सुनसान थाय् जुल। अले मनूतय्‌सं छिमिगु नां कयाः सराः बियेगु यानावयाच्‍वंगु दु, थौं नं अथे जुयाच्‍वंगु दु।

यर्मिया 44:4

अय्‌नं जिं जिम्‍ह दास अगमवक्तातय्‌त बारम्‍बार इमिथाय् थथे धाय्‌के छ्वया, ‘जितः तसकं मयःगु थज्‍याःगु घच्‍चाइपुगु ज्‍या याये मते।’

यर्मिया 44:5

तर इमिसं जिगु खँ मन्‍यं, उकी ध्‍यान हे मब्‍यू। इमिसं मभिंगु ज्‍या यायेगु मत्‍वःतू व इमिसं मेपिं द्यःतय्‌त धुपाँय् च्‍याकेगु ज्‍या मत्‍वःतू।

यर्मिया 7:25

छिमि पुर्खातय्‌सं मिश्र त्‍वःतूबलय् निसें थौं तक, न्‍हियान्‍हिथं जिं जिम्‍ह दास अगमवक्तातय्‌त छिमिथाय् छ्वयाहयाच्‍वनागु दु।

विलाप 2:17

परमप्रभुं छु योजना यानादीगु खः। यक्‍व दँ न्‍हापा वय्‌कलं छु घोषणा यानादीगु खः, व हे वचन वय्‌कलं पूवंकादिल। छुं हे दयामाया मदय्‌क वय्‌कलं छन्‍त नाश यानादिल। वय्‌कलं शत्रुयात छंगुपाखें लय्‌ताय्‌कादिल, अले छंगु शत्रुतय्‌गु शक्ति अप्‍वय्‌कादीगु दु।

दानिएल 9:6

जिमि जुजुपिं, शासकत, पुर्खा व देशयापिं सकल प्रजालिसें छिगु नामय् न्‍ववाइपिं छि सेवक अगमवक्तातय्‌गु खँ जिमिसं मन्‍यना।

जकरिया 7:12

दक्‍व शक्ति दुम्‍ह परमप्रभुं थःगु आत्‍मां न्‍हापा न्‍हापायापिं अगमवक्तापाखें बियादीगु व्‍यवस्‍था व वचन न्‍यनेमाली धकाः इमिसं थःगु नुगःयात ल्‍वहं थें छाय्‌कल। उकिं दक्‍व शक्ति दुम्‍ह परमप्रभु तसकं तम्‍वयादिल।

जकरिया 7:13

“‘गथे जिं सःताबलय् इमिसं मन्‍यन अथे हे इमिसं सःतिबलय् जिं इमिगु बिन्‍ति न्‍यने मखु,’ दक्‍व शक्ति दुम्‍ह परमप्रभुं धयादी।

गन्‍ती 11:26

एल्‍दाद व मेदाद नांयापिं निम्‍ह मनूत थकालितय्‌गु धलखय् दुथ्‍यानाः नं मेपिं थकालित मुनाच्‍वंगु पालय् मवंसें छाउनीइ हे च्‍वनाच्‍वंगु जुयाच्‍वन। अथे जूसां आत्‍मा इमिके जूवयाः इमिसं छाउनीइ हे अगमवाणी यात।

प्रेरित 13:18

पिइदँ तक मरुभूमिइ च्‍वंबलय् इमिगु मभिंगु ज्‍याखँयात सह यानादिल।

प्रेरित 28:25

थःथवय् खँ मिलय् मजूगुलिं इपिं अनं वनेत्‍यन। इपिं वने न्‍ह्यः पावलं थथे धाल – “यशैया अगमवक्तायागु म्‍हुतुं पवित्र आत्‍मां छिकपिनि तापाःबाज्‍यापिन्‍त थथे धयादीगु खःगु हे खँ खः –

प्रेरित 7:51

“छिकपिं तसकं हे अतेरि, अले छिकपिनिगु नुगः तसकं छाः। छिकपिन्‍सं न्‍ह्याबलें पवित्र आत्‍मायागु खँ मन्‍यंसे थः तापाःबाज्‍यापिन्‍सं याःथें जक यानाच्‍वंगु दु।

रोमी 2:4

परमेश्‍वरया दया मायां छिमिसं पश्‍चाताप याकी धकाः थुइके मफया, छु छिमिसं वय्‌कःया दया, सह यायेगु शक्ति व पिया च्‍वनादी फुम्‍हय्‌सित हे हेपय् याये ज्‍यू ला?

१ पत्रुस 1:11

ख्रीष्‍टयागु आत्‍मां इमित ख्रीष्‍टं दुःखकष्‍ट फयेमाली, अले हानं तसकं तःधनी धकाः धाःगु खँ अगमवक्तातय्‌सं गुबलय् व गुकथं जुइ धकाः सीकेत स्‍वःगु खः।

२ पत्रुस 1:21

अगमवक्तातय्‌सं धाःगु खँ मनूतय्‌सं यसें धाःगु मखु। इपिं परमेश्‍वरया मनूत खः। अय्‌जूगुलिं पवित्र आत्‍मां इमित धयादीगु खँ जक इमिसं धयावंगु खः।

२ पत्रुस 3:9

गुम्‍ह गुम्‍हय्‌सिनं मतिइ तः थें प्रभुं थःम्‍हं धयादी थें यायेत लिपा लाकादी मखु। अथेसां छिपिं सुं नं नाश मजुइमा, अले फुक्‍कसिनं पश्‍चाताप यायेमा धकाः वय्‌कः पियाच्‍वनादीगु खः।