नहेम्‍याह 9:17 - नेवाः बाइबल

¹⁷ इमिसं आज्ञा पालन यायेत म्‍हाः धाल अले छिं यानादीगु फुक्‍क ज्‍या व अजू चाइपुगु ज्‍या लुममंकू। इमिसं जिराहा जुयाः विरोधी जुल हाकनं दासत्‍वय् लिहां वनेत छम्‍ह नायः ल्‍यल। अय्‌नं छि क्षमा यानादीम्‍ह, दयादुम्‍ह, नुगः क्‍यातुम्‍ह, तंचायेत लिबाकादीम्‍ह व दया मायां जाःम्‍ह परमेश्‍वर खः। छिं इमित त्‍वःतामदी।

नहेम्‍याह 9:17 ပူးပေါင်းရင်းမြစ်များ

१ राजा 6:13

अले जि इस्राएलया दथुइ च्‍वने, जिं जिमि प्रजा इस्राएलयात गुबलें नं त्‍वःते मखु।”

१ राजा 8:57

परमप्रभु झी परमेश्‍वर, झी पुर्खातनापं च्‍वनादीगु थें झीपिंलिसें नं च्‍वनादीमा। वय्‌कलं झीत त्‍वःतामदीमा।

२ इतिहास 36:13

परमेश्‍वरया नामय् वयात पाफय्‌कूम्‍ह जुजु नबूकदनेसरया विरोधय् जुजु सिदकियां विद्रोह यात। व जिद्दी जुयाः व नुगः छाकाः परमप्रभु इस्राएलया परमेश्‍वरयाथाय् लिहां मवः।

एज्रा 9:9

जिपिं दासत जूसां झी परमेश्‍वरं जिमित व हे अवस्‍थाय् त्‍वःतामदी। छिगु कारणं फारसयाम्‍ह जुजुं जिमित ग्‍वाहालि याःगु दु। थ्‍व छिं जिमित न्‍हूगु जीवन बियादीगु थें खः। छिं जिमित छिगु देगः दय्‌केबिल अले जिमित यहूदा व यरूशलेमय् आराम बियादिल।

नहेम्‍याह 9:31

अय्‌नं छि तसकं नुगः क्‍यातुम्‍ह जूगुलिं इमित त्‍वःतामदी, नाश यानामदी। छि दयादुम्‍ह व नुगः क्‍यातुम्‍ह परमेश्‍वर खः।

भजनसंग्रहया सफू 106:13

अय्‌नं वय्‌कलं यानादीगु ज्‍या इमिसं याकनं हे ल्‍वःमंकल। इमिसं वय्‌कःया सल्‍लाह पिया मच्‍वं।

भजनसंग्रहया सफू 106:7

मिश्रय् दुबलय् जिमि पुर्खातय्‌सं छिगु अजू चायापुगु ज्‍याया बिचाः हे मयाः। इमिसं छिगु सदां दयाच्‍वनीगु दयायात ल्‍वःमंकल, अले लाल समुद्रया सिथय् विद्रोह यात।

भजनसंग्रहया सफू 130:4

तर छि क्षमा बियादीम्‍ह खः, अथे जुयाः हे छिगु भय काइ।

भजनसंग्रहया सफू 78:10

इमिसं वय्‌कःलिसे याःगु बाचा पूमवंकल, अले वय्‌कःयागु व्‍यवस्‍था मानय् मयात।

भजनसंग्रहया सफू 78:11

इमिसं वय्‌कलं यानादीगु ज्‍याखँ व वय्‌कलं क्‍यनादीगु अजू चायापुगु ज्‍याखँ ल्‍वःमंकल।

भजनसंग्रहया सफू 78:38

वय्‌कः दयादुम्‍ह जूगुलिं वय्‌कलं इमित क्षमा यानादिल। वय्‌कलं इमित नाश यानामदी। वय्‌कलं तःकः मछि थःगु तं क्‍वलाकादिल। वय्‌कलं थःगु तं प्‍वंकामदी।

भजनसंग्रहया सफू 86:15

तर परमप्रभु, छि दयादुम्‍ह, माया यानादीम्‍ह परमेश्‍वर खः। छि तंचायेत लिबाकादीम्‍ह, सदां दया माया यानादीम्‍ह व तसकं विश्‍वास याये बहःम्‍ह खः।

भजनसंग्रहया सफू 86:5

हे परमप्रभु, छि भिंम्‍ह व क्षमा बियादीम्‍ह खः। अले गुलिसिनं ग्‍वाहालिया लागि छितः इनाप याइ, इपिं सकसितं छिं सदां दया माया यानादी।

प्रस्‍थान 32:9

परमप्रभुं मोशायात धयादिल, “जिं थुपिं मनूतय्‌त खनागु दु, थुपिं जिराहा मनूत खः।

हितोपदेश 1:24

जिं धयागु खँ छिमिसं मन्‍यं, जिं ल्‍हाः ब्‍वय्‌काबलय् छिमिसं वास्‍ता मयाः।

यर्मिया 18:15

अय्‌नं जिम्‍ह मनूतय्‌सं जितः ल्‍वःमंकूगु दु, इमिसं ज्‍यालगय् मजूगु मूर्तितय्‌गु निंतिं धुपाँय् च्‍याकूगु दु, इपिं थः जुइगु लँपुइ लुफिं हाःगु दु। इमिसं थःगु पुलांगु लँ द्वंकूगु दु। इपिं ध्‍याचः दुगु लँपुइ वंगु दु।

यर्मिया 19:15

“दक्‍व शक्ति दुम्‍ह परमप्रभु इस्राएलया परमेश्‍वरं थथे धयादी, ‘स्‍व, जिं थःम्‍हं हे थ्‍व शहरय् व थुकिया लिक्‍क लाःगु गांगामय् जिं धयागु फुक्‍क विपत्तित हये, छाय्‌धाःसा इमिसं जिराहा जुयाः जिगु वचन मानय् मयाः।’”

यर्मिया 7:26

अय्‌नं इमिसं जिगु खँ मन्‍यं, ध्‍यान मब्‍यू। इपिं जिराहा जुल। इमिसं थः पुर्खातय्‌सं स्‍वयाः अप्‍वः मभिंगु ज्‍या यात।

इजकिएल 5:6

तर थ्‍वं जिगु नियमया विरोधय् ज्‍या यानाः मेगु जातितय्‌सं स्‍वयाः अप्‍वः मभिंगु ज्‍या यात। अले जिगु विधिया विरोधय् ज्‍या यानाः प्‍यखेरं च्‍वंगु जातितय्‌सं स्‍वयाः अप्‍वः बांमलाःगु ज्‍या यात। धात्‍थें इमिसं जिगु नियमयात हेला यात। धात्‍थें इमिसं जिगु नियम पालन याःगु मदु।

दानिएल 9:9

छिगु खँ मन्‍यंसे जिपिं विरोधी जुयागु दु। अथे जूसां परमप्रभु जिमि परमेश्‍वर, छि दयादुम्‍ह व क्षमा यानादीम्‍ह खः।

योएल 2:13

नुगः मछिंकाः थःगु वसः मखु, तर थःगु नुगः खुनाः परमप्रभु थः परमेश्‍वरपाखे लिहां वा, छाय्‌धाःसा वय्‌कः दया व माया क्‍यनादीम्‍ह, तं क्‍यनेत हथाय् मचायादीम्‍ह, अले सदां दयामाया यानादीम्‍ह, अले थःगु सजाँय पनेत न्‍ह्याबलें तयार जुयादीम्‍ह खः।

लेवी 26:44

थुलि जुयाः नं जिं शत्रुतय्‌गु देशय् च्‍वना च्‍वंसां इमित त्‍वःते मखु। अले इपिं नापं चिनातयागु बाचा नं त्‍वथुले मखु। इमित मयय्‌काः नाश याये नं मखु। छाय्‌धाःसा जि इमि परमप्रभु परमेश्‍वर खः।

नहूम 1:3

परमप्रभु तं चाय्‌त लिबाकादीम्‍ह व तसकं शक्ति दुम्‍ह खः। दोषीतय्‌त परमप्रभुं सजाँय मब्‍यूसें त्‍वःती मखु। ग्‍वःफय् व वाफय् वय्‌कःया लँपु खः अले सुपाँय् धाःसा वय्‌कःया तुतिया धू खः।

गन्‍ती 14:11

परमप्रभुं मोशायात धयादिल, “थुमिसं जितः गुबलय् तक हेला यानाच्‍वनी? जिं थुमिगु न्‍ह्यःने उलिमछि अजू चायापुगु ज्‍या याये धुन, अय्‌नं थुमिसं जितः गुबलय् तक विश्‍वास याइ मखु?

गन्‍ती 14:41

तर मोशां धाल, “छिमिसं छाय् परमप्रभुया उजंयात मानय् मयानागु? छिमिसं यायेत्‍यंगु ज्‍या ताःलाइ मखु।

गन्‍ती 16:14

छिं जिमित दुरु व कस्‍ति बाः वयाच्‍वंगु देशय् हयादीगु मदु। अले जिमिगु अधिकारय् बुँ व दाखया क्‍यब नं बियादीगु मदु। छु! छितः थुपिं मनूतय्‌त दासतय्‌त थें व्‍यवहार याये मास्‍ति वः ला? जिपिं वये हे मखु।”

प्रेरित 7:39

“झी तापाःबाज्‍यापिन्‍सं मोशां धाःगु खँ मन्‍यंसे झन जक वयात तुं च्‍वत्‍यंक घ्‍वानाः मिश्र देशय् लिहां वनेगु मतिइ तयाः

रोमी 9:15

वय्‌कलं मोशायात नं थुकथं धयादिल – “जिं सुयात कृपा याये मास्‍ति वइ वयात कृपा याये। जिं सुयात दया याये मास्‍ति वइ वयात दया याये।”

हिब्रू 12:25

होश या, छिपिंलिसे नवानादीम्‍हय्‌सिगु खँ मन्‍यंसे च्‍वने मते। थ्‍व संसारय् च्‍वनाः परमेश्‍वरयागु खँ न्‍यंकीम्‍हय्‌सिगु खँ मन्‍यंपिन्‍त ला मल्‍यंकू धासेंलि स्‍वर्गं हे नवानादीम्‍हपाखे फस्‍वया जुइपिन्‍त जक ल्‍यंकी ला?

१ शमूएल 12:22

थःगु तःधंगु नांया कारणं परमप्रभुं छिमित त्‍वःतादी मखु, छाय्‌धाःसा वय्‌कलं छिमित थः प्रजा यायेगु क्‍वःछिनादीगु दु।