नहेम्‍याह 8:9 - नेवाः बाइबल

⁹ थथे व्‍यवस्‍थाया वचन न्‍यनाः सकलें मनूत ख्‍वयाच्‍वंगुलिं राज्‍यपाल नहेम्‍याह, शास्‍त्री पुजाहारी एज्रा व मनूतय्‌त स्‍यनाच्‍वंपिं लेवीतय्‌सं इपिं सकसितं धाल, “थौंया दिं परमप्रभु छिमि परमेश्‍वरया निंतिं पवित्र जू। उकिं ख्‍वये मते, हाले मते।”

नहेम्‍याह 8:9 ပူးပေါင်းရင်းမြစ်များ

२ राजा 22:11

व्‍यवस्‍थाया सफुलिइ च्‍वयातःगु खँ न्‍यनाः जुजुं थःगु जामालं खुत।

२ राजा 22:19

थ्‍व शहर व थनच्‍वंपिं मनूतय्‌त सराः लाइ अले उजाड जुइ धकाः देश व व थनच्‍वंपिं मनूतय्‌गु विरोधय् जिं धयागु खँ न्‍यनाः परमप्रभुया न्‍ह्यःने छ नुगः मछिंकाः क्‍वमिलु जुल। अले छं परमप्रभुया न्‍ह्यःने पस्‍ताय् चायाः ख्‍वख्‍वं, थःगु जामालं खुल। अथे जुयाः जिं छंगु प्रार्थना न्‍यनागु दु धकाः परमप्रभुं धयादी।

२ इतिहास 15:3

ताःई तक इस्राएलं सत्‍य परमेश्‍वर मदय्‌कं जीवन हनाच्‍वंगु खः। इमित स्‍यनेत पुजाहारीत मदु, व्‍यवस्‍था मदु।

२ इतिहास 30:22

परमप्रभुया सेवा गथे यानाः यायेगु धकाः थुइके धुकूपिं लेवीतय्‌त हिजकियां प्रशंसा यात। थुकथं इमिसं मेलबलि छाछां परमप्रभु इमि पुर्खातय् परमेश्‍वरया प्रशंसा यायां न्‍हय्‌न्‍हु तक इमिसं नया हे च्‍वन।

२ इतिहास 34:19

व्‍यवस्‍थाया सफुलिइ च्‍वयातःगु खँ न्‍यनाः जुजुं नुगः मछिंकाः थःगु वसः खुत।

२ इतिहास 34:21

“अन वनाः परमप्रभुयाके बिन्‍ति यायां जुजु, इस्राएल व यहूदाय् च्‍वनाच्‍वंपिनिगु निंतिं उगु सफुलिइ छु छु च्‍वयातःगु दु न्‍यनादिसँ। छाय्‌धाःसा झी पुर्खातय्‌सं परमप्रभुया खँ मन्‍यंगुलिं व थ्‍व सफुलिइ च्‍वयातःगु फुक्‍क खँ मानय् मयाःगुलिं झीसं परमप्रभुया तःधंगु तं फयेमाःगु दु।”

२ इतिहास 35:3

वं फुक्‍क इस्राएलयात स्‍यनीपिं व परमप्रभुयात शुद्ध यानातःपिं लेवीतय्‌त आज्ञा बिल, “इस्राएलया जुजु दाऊदया काय् सोलोमनं दय्‌कूगु देगलय् बाचा चिनादीगु सनू ति। छिमिसं हानं सनू क्‍वबिया जुइ म्‍वाल। अथे जुयाः थः परमप्रभु परमेश्‍वर व वय्‌कःया प्रजा इस्राएलया सेवा या।

एज्रा 2:63

अले राज्‍यपालं दकलय् तःधंम्‍ह पुजाहारीं “ऊरीम” व “तुम्‍मीम” छ्यलाः परमप्रभुयाके छु यायेगु धकाः मन्‍यंतले इमित तसकं पवित्र नसां छुं नं नये मते धकाः धाल।

एज्रा 7:11

परमप्रभुं इस्राएलयात बियादीगु व्‍यवस्‍था व उजं बांलाक स्‍यूम्‍ह पुजाहारी व शास्‍त्री एज्रायात जुजु अर्तासास्‍तं थथे च्‍वयातःगु अधिकार पौ बिल –

नहेम्‍याह 10:1

बचं भ्‍वँतय् सही याःपिं थुपिं हे खः – हकल्‍याहया काय् राज्‍यपाल नहेम्‍याह, सिदकियाह,

नहेम्‍याह 12:26

येशूअया काय् योसादाकया छय् योयाकीमया पालय् व राज्‍यपाल नहेम्‍याह व पुजाहारी एज्राया पालय् इमिसं सेवा याःगु खः।

नहेम्‍याह 7:65

उकिं राज्‍यपालं दकलय् तःधंम्‍ह पुजाहारीं “ऊरीम” व “तुम्‍मीम” छ्यलाः परमप्रभुयाके छु यायेगु धकाः मन्‍यंतले इमित तसकं पवित्र नसा छुं नं नये मते धकाः धाल।

नहेम्‍याह 7:70

अले छुं परिवारयापिं नायःतय्‌सं ज्‍याया निंतिं देछा बिल। राज्‍यपालं धुकुतिइ ८.५ किलोग्राम ति लुँ, ५० गः ख्‍वल्‍चा व पुजाहारीतय्‌सं फीगु ५३० ज्‍वः वसः बिल।

नहेम्‍याह 8:2

उकिं न्‍हय्‌गूगु लाया न्‍हापांगु दिंखुन्‍हु एज्रां मनूत मुंगु थासय् व्‍यवस्‍थाया सफू हल। अन मिसा मिजं व न्‍यनाः थुइके फुगु उमेर जुइ धुंकूपिं सकल मनूत दु।

उपदेशक 3:4

ख्‍वयेगु छगू ई दु, न्‍हिलीगु छगू ई दु। दुखं च्‍वनेगु छगू ई दु, प्‍याखं हुलेगु छगू ई दु।

यशैया 61:3

व सियोनय् दुखं च्‍वनाच्‍वंपिन्‍त नौया पलेसा तसकं बांलाःगु श्रीपेच, व दुखं पलेसा लसताया चिकं बीत, ख्‍वःगु नुगःया पलेसा प्रशंसाया वसः पुंकाबीत, वय्‌कःया गौरव खनेदयेमा धकाः इमित परमप्रभुं हे पिनादीगु धार्मिकताया स्‍वसिमात धकाः धाइ।

होशे 4:6

जिमि प्रजा जिगु ज्ञान मदुगुलिं नाश जुल। “छिमिसं ज्ञानयात हेला याःगुलिं जिं नं छिमित थः पुजाहारीया ज्‍याय् तये मखु। छिमिसं थः परमेश्‍वरया ब्‍यवस्‍थायात त्‍वःतूगुलिं, जिं नं छिमि काय् म्‍ह्याय्‌पिन्‍त त्‍वःताबी।

लेवी 23:24

“इस्राएलीतय्‌त धा, ‘न्‍हय्‌गूगु लाया न्‍हापांगु दिं फुक्‍कं झासु लनेगु दिं जुइमाः। उखुन्‍हु फैया नेकूया तुरही पुयाः परमेश्‍वरया छगू पवित्र मुंज्‍या जुइमाः।

मलाकी 2:13

हानं छिमिसं थथे नं याइ – परमप्रभुयागु वेदीइ छिमिसं ख्‍वबि बाः वय्‌की, छिपिं ख्‍वइगु अले विलाप याइगु, छाय्‌धाःसा छिमिसं छाये हःगुयात वय्‌कलं वास्‍ता यानादी मखु अले उकियात लय्‌तायाः कयादी नं मखु।

रोमी 3:20

व्‍यवस्‍थाय् च्‍वयातःगु नियम पालन यानाः सुं हे मनू धर्मी जुइ फइ मखु। व्‍यवस्‍थां ला पाप छु खः धकाः क्‍यनाबी।

रोमी 7:9

जि छकः ला व्‍यवस्‍था मसीकं म्‍वानाच्‍वने धुंकूम्‍ह मनू खः। गुबलय् आज्ञा सिल अबलय् पाप म्‍वात।

व्‍यवस्‍था 12:12

अन हे छिमि काय् म्‍ह्याय्‌पिन्‍सं, च्‍यःभ्‍वातिंत व छिमि शहरय् च्‍वनाच्‍वंपिं थःगु ब्‍व व सर्बय मदुपिं लेवीया सन्‍तानतय्‌सं परमप्रभु छिमि परमेश्‍वरयागु न्‍ह्यःने लसता हँ।

व्‍यवस्‍था 12:7

अले अन हे छिमिसं व छिमि छेँजःपिन्‍सं परमप्रभु छिमि परमेश्‍वरया न्‍ह्यःने नयेत्‍वनेगु याइ। छिमिसं यायेगु फुक्‍क ज्‍याय् लसता हनी, छाय्‌धाःसा परमप्रभु छिमि परमेश्‍वरं छिमित सुवाः बियादीगु दु।

व्‍यवस्‍था 16:11

परमप्रभु छिमि परमेश्‍वरं थःगु नांया लागिं च्‍वनेगु ल्‍ययादीगु थासय् छिपिं, छिमि काय्‌म्‍ह्याय्‌पिं, दास दासी, शहरय् च्‍वंपिं लेवीया सन्‍तानत, परदेशीत, मांबौ मदुपिं मस्‍त व भाःत सी धुंकूपिं मिस्‍त, फुक्‍कसिनं थः परमेश्‍वरया न्‍ह्यःने लसता हँ।

व्‍यवस्‍था 26:14

दुखं च्‍वनाबलय् जिं पवित्र ब्‍वतिं छुं नयागु मदु। अले अशुद्ध जूबलय् उकिं छुं लिकयागु मदु, अले उकिं छुं सिनावंपिन्‍त छायागु मदु। छिं आज्ञा बियादीगु फुक्‍क खँ जिं यानागु दु।

याकूब 4:9

छिपिं नुगः मछिंकाः ख्‍व, पिच्‍याना हा। छिमिगु न्‍हिगु सः ख्‍वःसलय् हिलावनेमा, अले छिमिगु लसता दुःखय् हिलावनेमा।