नहेम्‍याह 8:1 - नेवाः बाइबल

¹ अबलय् इपिं सकल मनूत छप्‍पँ जुयाः लः ध्‍वाखाया न्‍ह्यःनेया चुकय् मुन। अले इमिसं परमप्रभुं इस्राएलीतय्‌त बियादीगु मोशाया व्‍यवस्‍थायागु सफू हयेत शास्‍त्री पुजाहारी एज्रायात इनाप यात।

नहेम्‍याह 8:1 ပူးပေါင်းရင်းမြစ်များ

२ राजा 23:2

अले जुजु परमप्रभुया देगलय् वन। वनापं यहूदायापिं मनूत, यरूशलेमयापिं मनूत, पुजाहारीत व अगमवक्तात, चिधंपिंनिसें तःधंपिं फुक्‍क मनूत दु। अले वं परमप्रभुया देगलय् लुयावःगु सफुलिइ च्‍वयातःगु फुक्‍क खँ इमित ब्‍वना न्‍यंकल।

२ इतिहास 34:15

हिल्‍कियाहं छ्यान्‍जे शापानयात धाल, “जिं परमप्रभुया देगलय् व्‍यवस्‍थाया सफू लुइकागु दु।” अले हिल्‍कियाहं व सफू शापानयात बिल।

२ इतिहास 34:30

व यहूदायापिं मनूत, यरूशलेमयापिं मनूत, पुजाहारीत व लेवीत अले चिधंपिं व तःधंपिं फुक्‍क मनूतनापं परमप्रभुया देगलय् थाहां वन। परमप्रभुया देगलय् लुइकूगु बाचाया सफूया फुक्‍क वचन इमिसं ताय्‌कः वं ब्‍वन।

एज्रा 7:1

यक्‍व दँ लिपा, फारसयाम्‍ह जुजु अर्तासास्‍तया पालय् एज्रा नांयाम्‍ह छम्‍ह मनू दु। एज्रा सरायाहया काय् खः। सरायाह अजर्याहया काय् खः। अजर्याह हिल्‍कियाहया काय् खः।

एज्रा 7:10

छाय्‌धाःसा एज्रां थःत परमप्रभुयागु व्‍यवस्‍था ब्‍वनेत व पालन यायेत अले थुकियागु विधि व नियम इस्राएलय् स्‍यनेत देछाःगु खः।

एज्रा 7:11

परमप्रभुं इस्राएलयात बियादीगु व्‍यवस्‍था व उजं बांलाक स्‍यूम्‍ह पुजाहारी व शास्‍त्री एज्रायात जुजु अर्तासास्‍तं थथे च्‍वयातःगु अधिकार पौ बिल –

एज्रा 7:6

एज्रा परमप्रभु इस्राएलयाम्‍ह परमेश्‍वरं मोशायात ब्‍यूगु व्‍यवस्‍था बांलाक स्‍यनेसःम्‍ह शास्‍त्री खः। वयात परमप्रभु परमेश्‍वरया सुवाः दुगुलिं वं फ्‍वंगु फुक्‍क खँ जुजुं वयात बिल। थथे जूगुलिं एज्रा बेबिलोनं यरूशलेमय् वल।

नहेम्‍याह 12:26

येशूअया काय् योसादाकया छय् योयाकीमया पालय् व राज्‍यपाल नहेम्‍याह व पुजाहारी एज्राया पालय् इमिसं सेवा याःगु खः।

नहेम्‍याह 12:37

इपिं फोहरा ध्‍वाखा जुयाः सिधा दाऊदया शहरया त्‍वाथलय् पखाःया सिथय् गल। अले दाऊदया छेँ दुगु थाय् च्‍वय् जुयाः पुर्बपाखे लः ध्‍वाखा तक वन।

नहेम्‍याह 3:26

व ओफेल त्‍वालय् च्‍वनिपिं देगलय् सेवा याइपिन्‍सं पुर्बपाखेयागु लःध्‍वाखाया चुलिंचू व धरहरा खने दइगु थाय् तक दय्‌कल।

नहेम्‍याह 8:16

उकिं मनूत वनाः सिमाया कचामचा कयाहल। अले इमिसं छेँया कःसिइ, चुकय्, परमेश्‍वरया देगःया चुकय्, लः ध्‍वाखाया चुकय् व एफ्राइम ध्‍वाखाया चुकय् थथःगु लागिं बल्‍चा दय्‌कल।

नहेम्‍याह 8:3

ध्‍वाखाया दुने लाःगु चुकय् सुथंनिसें बहनि तक एज्रां तःसलं व्‍यवस्‍था ब्‍वनाः न्‍यंकल अले मनूतय्‌सं न्‍हाय्‌पं बियाः न्‍यन।

यशैया 8:20

परमेश्‍वरं छिमित स्‍यनातःगु खँ व साक्षीइ ध्‍यान ब्‍यु! इमिसं थ्‍व स्‍यनातःगु खँ कथं न्‍वमवात धाःसा इमिके सुथसिया जः दइ मखु।

लेवी 9:5

मोशां उजं ब्‍यू थें इमिसं फुक्‍क ज्‍वलं नापलायेगु पालया ध्‍वाखाय् हल, अले फुक्‍क मनूत परमप्रभुया न्‍ह्यःने दं वल।

मलाकी 4:4

“जिं होरेब पर्वतय् सकल इस्राएलीतय्‌गु निंतिं जिम्‍ह दास मोशायात बियागु विधि व नियम दुगु व्‍यवस्‍थायात लुमंकी अले उकियात बांलाक मानय् या।

मत्ती 13:52

वय्‌कलं हानं धयादिल – “व्‍यवस्‍था स्‍यनीपिं व थुइकीपिं शास्‍त्रीत स्‍वर्गयागु राज्‍यय् चेला जूवल धाःसा इपिं छेँ थुवाः थें जुइ। छेँ थुवालं थःगु धुकुतिं न्‍हूगु व पुलांगु न्‍ह्यागुं लिकाये फइ।”

मत्ती 23:13

“शास्‍त्रीत व फरिसीत, छिमित धिक्‍कार दु। छिपिं निपाः ख्‍वाःपाः दुपिं खः, छाय्‌धाःसा छिमिसं मनूतय्‌त दुहां वने हे मफय्‌क स्‍वर्गया राज्‍ययागु लुखा तिनाब्‍यूगु दु। छिपिं न थःपिं हे दुहां वनी, न दुहां वनीपिन्‍त हे दुछ्वइ।

मत्ती 23:2

“शास्‍त्रीत व फरिसीत मोशायागु व्‍यवस्‍था थुइका बीपिं मनूत खः।

मत्ती 23:34

“उकिं जिं अगमवक्तात, बुद्धिमानत व शास्‍त्रीतय्‌त छिमिथाय् छ्वयाहये। थुपिं गुलिसितं ला छिमिसं स्‍याइ, गुलिसितं क्रूसय् यख्‍खाइ, गुलिसितं धर्मशास्‍त्र स्‍यनीगु छेँय् यनाः कोर्रां दाइ, गुलिसितं थाय् थासय् वनाः हे दुःखकष्‍ट बी।

व्‍यवस्‍था 31:11

वय्‌कलं ल्‍ययादीगु थासय् परमप्रभु छिमि परमेश्‍वरया न्‍ह्यःने सकल इस्राएलीत मुनीबलय् इपिं फुक्‍कसिनं ताय्‌क छिमिसं थ्‍व व्‍यवस्‍था ब्‍वनेगु या।

न्‍यायकर्ता 20:1

अले उत्तरय् दानंनिसें दच्‍छिनय् बेर्शेबातक व पुर्बय् गिलादंनिसें सकलें इस्राएलीत पिहां वल। इपिं छप्‍पँ जुयाः परमप्रभुया न्‍ह्यःने मिस्‍पाय् मुन।

न्‍यायकर्ता 20:8

सकलें मनूत छम्‍ह मनू थें जुयाः थथे धाधां दन, “झीपिं सुं नं थःगु छेँ वने मखु, झीपिं मध्‍ये सुं नं थःगु छेँ वने मखु।