नहेम्‍याह 2:10 - नेवाः बाइबल

¹⁰ इस्राएलयापिं मनूतय्‌गु भिं यायेत छम्‍ह मनू वःगु दु धयागु खँ न्‍यनाः होरेनी सन्‍बलत व अम्‍मोनी हाकिम तोबियाया ख्‍वाः खिउँल।

नहेम्‍याह 2:10 ပူးပေါင်းရင်းမြစ်များ

नहेम्‍याह 13:1

उखुन्‍हु हे मनूतय्‌त मोशाया सफू ब्‍वना न्‍यंकल। उकी सुं नं अम्‍मोनी वा मोआबी परमेश्‍वरयागु सभाय् गुबलें दुहां वने दइ मखु धकाः च्‍वयातःगु लुइकल।

नहेम्‍याह 13:28

दकलय् तःधंम्‍ह पुजाहारी एल्‍यासीबया काय् योयादाया छम्‍ह काय् होरोनी सन्‍बलतया जिलाजं खः, उकिं जिं वयात जिथासं तापाक्‍क लिना छ्वया।

नहेम्‍याह 13:4

थ्‍व जुइ न्‍ह्यः, जिमि परमेश्‍वरया देगःया धुकू स्‍वइम्‍ह पुजाहारी एल्‍यासीबयागु तोबियालिसें यक्‍व हे बांलाःगु स्‍वापु दुगु जुयाच्‍वन।

नहेम्‍याह 2:19

थ्‍व खँ न्‍यनाः होरोनी सन्‍बलत, अम्‍मोनी हाकिम तोबिया व अरबी गेशेमं जिमित गिजय् यात, अले जिमित क्‍वह्यंकाः थथे धाल, “थ्‍व छिमिसं छु यानाच्‍वनागु? छु छिमिसं जुजुलिसें विद्रोह यायेगु ला?”

नहेम्‍याह 4:7

अय्‌नं सन्‍बलत, तोबिया, अरबीत, अम्‍मोनीत व अश्‍दोदीतय्‌सं यरूशलेमया पखाः दय्‌काः व पखाःया फुक्‍क खालि थाय् तिनाच्‍वंगु दु धयागु खँ न्‍यनाः इपिं तसक्‍कं तंचाल।

नहेम्‍याह 6:1

जिं पखाः दय्‌के धुंकूगु व उकी छगू नं खालि थाय् मदुगु खँ सन्‍बलत, तोबिया व अरबी गेशेम व जिमि मेपिं शत्रुतय्‌गु न्‍हाय्‌पनय् थ्‍यन। खः ला उबलय्‌ तक जिं ध्‍वाखातय् खापा धाःसा तयागु मदुनि।

नहेम्‍याह 6:16

जिमि शत्रुतय्‌सं थ्‍व खँ न्‍यंबलय् अले जःखः च्‍वंपिं फुक्‍क मेगु जातियापिन्‍सं थ्‍व खंबलय् इपिं तसकं लज्‍या चाल। अले थ्‍व ज्‍या जिमि परमेश्‍वरया ग्‍वाहालिं पूवंगु खः धकाः इमिसं सिल।

एस्‍तर 10:3

जुजुया क्‍वय्‌या दर्जायाम्‍ह यहूदी मोर्दकै छम्‍ह हे जक खः। व यहूदीत मध्‍ये छम्‍ह हे जक तसकं तःधंम्‍ह व नांजाःम्‍ह खः। अले व थःगु देशय् थः यहूदी दाजुकिजापिनि दथुइ तसकं भिंम्‍ह जुल छाय्‌धाःसा वं थःमनूतय्‌गु भिं यानाः सकल यहूदीतय्‌त बचय् यात।

भजनसंग्रहया सफू 112:10

थ्‍व खनाः दुष्‍टत तंचाइ, इमिसं वाकु छी अले नाश जुइ, दुष्‍टतय्‌गु इच्‍छा पूवनी मखु।

हितोपदेश 27:4

तं धयागु तसकं छाः, अले ग्‍यानापु, तर नुगः मुइकेगु धयागु थ्‍व स्‍वयां ग्‍यानापु।

हितोपदेश 30:22

दास जुजु जूगु, मूर्ख मनुखं प्‍वाः जायेक नये खंगु,

उपदेशक 10:7

जिं दासत सल गयावःगु व राजकुमार दास थें न्‍यासि वयाच्‍वंगु खनागु दु।

यशैया 15:5

जिगु नुगः मोआबया निंतिं ख्‍वइ। अन च्‍वंपिं बिस्‍युं वनाः सोअर तक अले एग्‍लत-शलीशियाय् तक थ्‍यंकः वन। गुलिं ख्‍वख्‍वं लूहीतपाखे थाहां वनीगु लँय् वन। होरानैमया लँय् इमिसं थःपिनिगु नाश जूगुया निंतिं बिलाप यात।

यर्मिया 41:10

इश्‍माएलं मिस्‍पाय् ल्‍यंदुपिं सकलें मनूत अर्थात जुजुया सेनापति नबूजरदानं अहीकामया काय् गदल्‍याहया जिम्‍माय् बियाः अन त्‍वःताथकुपिं सकलें मनूत व जुजुया म्‍ह्याय्‌पिन्‍त ज्‍वनाः कुनाबिल। थुकथं नतन्‍याहया काय् इश्‍माएल थुपिं कैदीतय्‌त ज्‍वनाः पारि अम्‍मोनीतय्‌थाय् वनेत पिहां वन।

यर्मिया 48:34

“हेश्‍बोनं इपिं ख्‍वःगु सः एलाले व यहश तक हे थ्‍यंगु दु, सोअरंनिसें होरोनैम व एग्‍लत-शलीशियाह तक हे, छाय्‌धाःसा निम्रीमया लः नं सुनावने धुंकल।

यर्मिया 48:5

इपिं लूहीत थाहां वनीगु लँय् ख्‍वख्‍वं थाहां वनी। होरोनैमपाखे क्‍वहां वनीगु लँय् चिल्‍लाय् दनाः ख्‍वःगु सः न्‍यंगु दु।

प्रेरित 4:2

पत्रुस व यूहन्‍नां मनूतय्‌त येशू सिनाः हानं म्‍वाना वः थें तुं मेपिं मनूत नं सिनाः म्‍वाना वइतिनि धकाः स्‍यनाच्‍वंगु न्‍यनाः इपिं तसकं तंम्‍वय्‌का च्‍वन।

प्रेरित 5:24

थ्‍व खँ न्‍यनाः देगःयाम्‍ह कप्‍तान व तःधंपिं पुजाहारीत आः इमिसं छु छु जक याइगु जुइ धकाः आछु-आछु कन।