मर्कूस 10:1 - नेवाः बाइबल

¹ गालील त्‍वःताः येशू यहूदिया जिल्‍लाय् झायाः अनं यर्दन खुसिया पारिइ झाल। अन नं वय्‌कःयाथाय् ग्‍वाः ग्‍वाः मनूत मुंवःगुलिं न्‍ह्याबलें थें वय्‌कलं इमित स्‍यनेकने यानादिल।

मर्कूस 10:1 ပူးပေါင်းရင်းမြစ်များ

उपदेशक 12:9

उपदेशक बुद्धि दुम्‍ह जक मखु, तर वं मनूतय्‌त ज्ञानया खँ नं स्‍यनेगु यात। वं बांलाक बिचाः यात अले जाँचय् यानाः उखानयात झ्‍वःलाक तयाबिल।

यर्मिया 32:33

इमिसं जिगुपाखे थःगु ख्‍वाः मखु, जँन्‍हुफाः स्‍वय्‌कूगु दु। जिं इमित तःकः मछि स्‍यंसां इमिसं जिगु खँ मन्‍यन अले इपिं जिगु न्‍वानाखँकथं मजुल।

मत्ती 26:55

अले वय्‌कलं ज्‍वंवःपिं मनूतय्‌त धयादिल – “जि छम्‍हय्‌सित ज्‍वनेत थथे तरवार व कथि ज्‍वनावये माःगु छाय्? छु जि दाखुँ खः ला? जिं देगलय् च्‍वनाः न्‍हियान्‍हिथं स्‍यनेकने याना जुयाबलय् छिमिसं जितः छाय् मज्‍वनागु?

मत्ती 4:23

येशू गालील फुक्‍कभनं चाःहिलादिल। धर्मशास्‍त्र स्‍यनीगु छेँय् झायाः मनूतय्‌त स्‍यनेकने यानाः परमेश्‍वरयागु राज्‍ययागु भिंगु खँ न्‍यंकादिल। अले तःतामछि ल्‍वय् दुपिं मनूतय्‌त नं लाय्‌कादिल।

मर्कूस 1:21

अले वय्‌कःपिं कफर्नहुमय् झाल। अन वय्‌कलं विश्रामबार खुन्‍हु धर्मशास्‍त्र स्‍यनीगु छेँय् झायाः स्‍यनेकने यानादिल।

मर्कूस 10:2

अन नं फरिसीत वयाः वय्‌कःयागु मन स्‍वयेत थथे धकाः न्‍यन – “मनूतय्‌सं थः कलाःयात त्‍वःते ज्‍यू ला कि मज्‍यू?”

मर्कूस 12:35

येशूं देगलय् स्‍यनेकने यानादीबलय् थथे न्‍यनादिल – “शास्‍त्रीतय्‌सं गथे यानाः मुक्ति बीम्‍ह ख्रीष्‍ट दाऊदया काय् खः धकाः धाये फइ?

मर्कूस 14:49

देगलय् च्‍वनाः न्‍हियान्‍हिथं स्‍यनेकने याना जुयाबलय् छिमिसं जितः छाय् मज्‍वनागु? धर्मशास्‍त्रय् च्‍वयातःगु पूवनेमा धकाः हे थथे जूगु खः।”

मर्कूस 2:13

वय्‌कः हानं गालील समुद्र सिथय् झायादिल। थन नं मनूत ग्‍वाः ग्‍वाः मुंवःगुलिं वय्‌कलं इमित स्‍यनादिल।

मर्कूस 4:2

वय्‌कलं इमित उखान कँकं यक्‍व खँ स्‍यनादिल –

मर्कूस 6:2

छन्‍हु विश्रामबार खुन्‍हु धर्मशास्‍त्र स्‍यनीगु छेँय् झायाः स्‍यनेकने यानादिल। वय्‌कःयागु खँ न्‍यनाः मनूतय्‌सं अजू चायाः थथे धाल – “थ्‍वयाके थज्‍याःगु बुद्धि व अजू चायापुगु ज्‍यायागु शक्ति गनं वल?

मर्कूस 6:34

वय्‌कः नांचां कुहां झाःबलय् यक्‍व मनूत मुनाच्‍वंगु खनाः वय्‌कःयात तसकं माया वन, छाय्‌धाःसा इपिं जवाः मदुपिं फैचात थें च्‍वं। अले वय्‌कलं इमित तःता खँय् स्‍यनेकने यानादिल।

मर्कूस 6:6

इमिसं वय्‌कःयात विश्‍वास याये मफुगुलिं थुपिं खनाः वय्‌कः छक्‍क जुल। थथे जूगुलिं वय्‌कलं गामय् गामय् झायाः स्‍यनेकने यानादिल।

यूहन्‍ना 10:40

वय्‌कः हानं यर्दन पारिइ यूहन्‍नां न्‍हापा बप्‍तिस्‍मा बिया च्‍वंथाय् झाल, अले अन हे च्‍वनादिल।

यूहन्‍ना 11:7

निन्‍हु लिपा वय्‌कलं चेलातय्‌त थथे धयादिल – “झी हानं यहूदियाय् लिहां वनेनु।”

यूहन्‍ना 18:20

वय्‌कलं लिसः बियादिल – “संसारया न्‍ह्यःने जिं धयागु दु, जिं न्‍ह्याबलें धर्मशास्‍त्र स्‍यनीगु थाय् थासय् व देगलय् च्‍वनाः स्‍यनेकने यानागु दु। जिं सुयातं गुप्‍त खँ ल्‍हाः मजुया।