लूका 10:2 - नेवाः बाइबल

² वय्‌कलं इमित धयादिल – “बाली लयेगु ला यक्‍व हे दु, बाली लइपिं धाःसा कम जक दु। अय्‌जूगुलिं बाली थुवाःयात बाली लइपिं छ्वयाहयादिसँ धकाः प्रार्थना या।

लूका 10:2 ပူးပေါင်းရင်းမြစ်များ

१ राजा 18:22

अले एलियां इमित धाल, “परमप्रभुया अगमवक्तात मध्‍ये जि हे जक ल्‍यनाच्‍वंगु दु। तर बालया ला प्‍यसः व नेय्‌म्‍ह (४५०) अगमवक्तात दु।

भजनसंग्रहया सफू 68:11

परमप्रभुं आज्ञा बियादिल, तःम्‍ह हे मिसातय्‌सं थ्‍व खँयात न्‍यंका जुल।

यर्मिया 3:15

अले जिं थःगु मननापं मिलय् जूपिं जवाःत छिमित बी। इमिसं छिमित ज्ञान व बुद्धिं लँ क्‍यनी।

जकरिया 11:17

बथां त्‍वःतावंपिं ज्‍यालगय् मजूपिं जवाःतय्‌त धिक्‍कार! वयागु ल्‍हाः व जव मिखाय् तरवार लाइ। वयागु ल्‍हाः गनावनी अले वयागु जव मिखा कां जुइ।

जकरिया 11:5

न्‍यानायंकीपिन्‍सं फैयात स्‍याइ, अय्‌नं इमित सजाँय जुइ मखु। इमित म्‍यूपिन्‍सं थथे धाइ, ‘परमप्रभुयात तःधंकि, जिपिं तःमि जुल।’ फैजवाःतय्‌सं थः बथांयात दया मया।

गन्‍ती 11:17

जिं कुहां वयाः छनापं खँ ल्‍हाये। छंके दुगु छुं छुं आत्‍मा कयाः इमिके तयाबी। अले इमिसं नं मनूतय्‌गु कु क्‍वबी, छ याकःचां जक क्‍वबी माली मखु।

गन्‍ती 11:29

मोशां वयात धाल, “जिगु लागि छ नुगः मुइकीम्‍ह जुइ धुनागु ला? परमप्रभुया फुक्‍क मनूत अमगवक्ता जूगु जूसा अले परमप्रभुं इपिं फुक्‍कसिके थःगु आत्‍मा तयादीगु जूसा गुलि बांलाइगु खः।”

मत्ती 20:1

“स्‍वर्गयागु राज्‍य थथे च्‍वं – छन्‍हु छम्‍ह मनू सुथ न्‍हापां थःगु दाखक्‍यबय् ज्‍या याकेत ज्‍यामि माः वन।

मर्कूस 13:34

“थ्‍व खँ ला परदेशय् वनेत्‍यंम्‍ह मनू थें खः। वं थः च्‍यःतय्‌त ‘छेँयागु ज्‍या बांलाक या,’ अले लुखाय् पाः च्‍वनीम्‍हय्‌सित ‘छेँय् बांलाक स्‍व’ धकाः धाइ।

मर्कूस 16:15

अले इमित धयादिल – “सारा संसारय् वनाः छिमिसं फुक्‍क मनूतय्‌त भिंगु खँ न्‍यंकि।

मर्कूस 16:20

लिपा चेलातय्‌सं फुक्‍कभनं वनाः भिंगु खँ न्‍यंकाजुल। प्रभु थः नं इपिं नाप जुयाः इमिगु ज्‍याय् ग्‍वाहालि यानादिल। अजू चायापुगु चिं क्‍यनाः इमिसं न्‍यंकाजूगु खँयागु दसि बियादिल। आमेन।

लूका 9:1

छन्‍हु येशूं झिंनिम्‍ह चेलातय्‌त थःथाय् सःताः इमित भूततय्‌त ख्‍यानाः छ्वयेगु व उसाँय् मदुपिन्‍त लाय्‌काबीगु शक्ति व अधिकार बियादिल।

प्रेरित 11:19

स्‍तिफनसयात स्‍यायेधुंकाः सास्‍ती फये मफयाः विश्‍वासीतय्‌सं फोनिके, साइप्रस व एन्‍टिओखियाय् बिस्‍युं वनाः अन इमिसं यहूदीतय्‌त जक भिंगु खँ न्‍यंकाजुल।

प्रेरित 13:2

थुपिं अपसं च्‍वनाः प्रभुया आराधना यानाच्‍वंबलय् पवित्र आत्‍मां थथे धयादिल – “बारनाबास व शाऊलयात जिं सःतागु ज्‍याय् छ्व।”

प्रेरित 13:4

थथे इपिं पवित्र आत्‍मां छ्वःगु ज्‍याय् वन। इपिं सिलुकिया जुयाः साइप्रस टापुपाखे लःजहाजं वन।

प्रेरित 20:28

“अथे जूगुलिं होश यानादिसँ, अले पवित्र आत्‍मां धाःथें छिकपिन्‍सं विश्‍वासीतय्‌गु हेरबिचार यानादिसँ, छाय्‌धाःसा प्रभुं थःगु हि हाय्‌काः इमित न्‍यानादीगु खः, अले छिकपिं इमि जवाः खः।

प्रेरित 22:21

“प्रभुं जितः थथे धयादिल – ‘छ वने हे माः, जिं छन्‍त तातापाक यहूदीमखुपिन्‍थाय् छ्वयेत्‍यना।’”

प्रेरित 8:4

उखेंथुखें जूपिं विश्‍वासीतय्‌सं भिंगु खँ न्‍यंकाजुल।

१ कोरिन्‍थी 12:28

अय्‌जूगुलिं परमेश्‍वरं मण्‍डलीइ सुयात गन गन तयेमाः अन अन हे तयादीगु दु। दकलय् च्‍वय् प्रेरितत, वयां ल्‍यू अगमवक्तात, वयां ल्‍यू गुरुत, अले अजू चायापुगु ज्‍या याइपिं, ल्‍वय् लाय्‌केगु वरदान दुपिं, मेपिन्‍त ग्‍वाहालि याइपिं, मेपिन्‍त सल्‍लाह बीपिं, अले हानं थीथी भाषां नवाये फुपिं तयादीगु दु।

१ कोरिन्‍थी 15:10

अथेसां परमेश्‍वरं जितः दया माया यानादीगुलिं जि थथे जुइ खन। वय्‌कलं जितः दया माया यानादीगु नं ला जिं सितिं मछ्वया। फुक्‍क प्रेरिततय्‌सं स्‍वयाः नं जिं यक्‍व दुःख सियाः ज्‍या यानाच्‍वनागु दु। जिं हे जक ला थथे ज्‍या यानाच्‍वनागु मखु, बरु जितः ज्‍या याकातःगु ला परमेश्‍वरयागु दया मायां खः।

२ कोरिन्‍थी 6:1

परमेश्‍वर नाप जिमिसं थथे ज्‍या यानाच्‍वनागुलिं वय्‌कःयागु दया माया छिमिसं सितिं छ्वयेगु स्‍वये मते धकाः जिमिसं इनाप यानाच्‍वनागु खः।

फिलिप्‍पी 2:21

येशू ख्रीष्‍टयागु च्‍यूताः हे मतसे मेपिं फुक्‍कं थथःगु स्‍वार्थया ज्‍याय् जक जुयाच्‍वंगु दु।

फिलिप्‍पी 2:25

जितः ग्‍वाहालि याके छ्वयाहःम्‍ह किजा इपाफ्रोडिटसयात छिमिथाय् हे लिछ्वया हयेमाः थें जिं ताय्‌का। जिपिं निम्‍हय्‌सिनं नं नापं ज्‍या याना, अले भिंगु खँ न्‍यंकेगु ज्‍याय् नं जिपिंनापं हे जुया।

फिलिप्‍पी 2:30

ख्रीष्‍टयागु ज्‍याया निंतिं जितः ग्‍वाहालि बीत वं थःगु ज्‍यान तकं पात। छिमिसं जिगु निंतिं पूवंके मफुगु ज्‍या वं पूवंकल।

कलस्‍सी 1:29

ख्रीष्‍ट येशूं बियादीगु तःधंगु शक्तिं हे जिं थथे दुःख सियाः थ्‍व ज्‍या यानाच्‍वना।

कलस्‍सी 4:12

छिमिथाय् हे च्‍वंम्‍ह ख्रीष्‍ट येशूया मेम्‍ह दास इपाफ्रासं नं छिमित ज्‍वजलपा धयाहःगु दु। छिमिसं क्‍वात्तुक विश्‍वास यानाः परमेश्‍वरयात यःकथं जक यानाच्‍वने फयेमा धकाः वं छिमिगु निंतिं न्‍ह्याबलें प्रार्थना यानाच्‍वंगु दु।

१ थेसलोनिकी 2:9

दाजुकिजापिं, जिमिसं यक्‍व दुःखकष्‍ट सियाः ज्‍या यानागु ला छिमि लुमं हे जुइ। भिंगु खँ न्‍यंकः वयाबलय् जिमिसं छिपिं सुयातं थाकु मजुइमा धकाः चान्‍हि मद्यंसे ज्‍या याना।

१ थेसलोनिकी 5:12

दाजुकिजापिं, छिमित जिगु बिन्‍ति दु – छिमिथाय् ज्‍या यानाच्‍वंपिं, छिमित स्‍यनेकने याइपिं थकालिपिन्‍त हनाबना तयेगु या।

२ थेसलोनिकी 3:1

दाजुकिजापिं, प्रभुयागु भिंगु खँ न्‍यंकभनं न्‍यनावनेमा, अले छिमिसं थें फुक्‍कसिनं न्‍यनाः विश्‍वास यायेमा धकाः जिमिगु निंतिं प्रार्थना याना च्‍वँ।

१ तिमोथी 4:10

अय्‌जूगुलिं हे झीसं म्‍वाःम्‍ह परमेश्‍वरयाके आशा यानाः थथे दुःखकष्‍ट सियाः ज्‍या यानाच्‍वनागु खः। फुक्‍क मनूतय्‌त मुक्ति बीम्‍ह, अप्‍वः यानाः वय्‌कःयात विश्‍वास याःपिन्‍त मुक्ति बीम्‍ह थ्‍व हे परमेश्‍वर खः।

२ तिमोथी 4:5

छं जक न्‍ह्यागु जूसां नुगः क्‍वात्तुकाः च्‍वँ। दुःख सी माःसां स्‍यू। भिंगु खँ न्‍यंकेगु याना च्‍वँ। थःत बियातःगु ज्‍या पूवंकि।

फिलेमोन 1:1

ख्रीष्‍ट येशूया निंतिं कैदी जुया च्‍वनाम्‍ह पावल व झी विश्‍वासी किजा तिमोथीयापाखें जिमि यःम्‍ह पासा व छगू हे ज्‍या यानाच्‍वंम्‍ह फिलेमोन,

हिब्रू 3:6

ख्रीष्‍ट धाःसा परमेश्‍वरयागु छेँय् अधिकार दुम्‍ह काय् थें विश्‍वास याये बहःम्‍ह जुयादिल। झीसं आशा याना थें उत्‍थें साहस व भरोसा तयाच्‍वन धाःसा झीपिं हे परमेश्‍वरया छेँ जुइ।

प्रकाश 2:1

“एफिससय् च्‍वंगु मण्‍डलीयाम्‍ह दूतयात थथे धकाः च्‍वया छ्व – जव ल्‍हातय् न्‍हय्‌गः नगु ज्‍वना जूम्‍हय्‌सिगु व न्‍हय्‌गू लुँयागु त्‍वाःदेवायागु दथुइ जुया च्‍वंम्‍हय्‌सिनं थथे धयादीगु दु –