विलाप 4:11 - नेवाः बाइबल

¹¹ तर आः परमप्रभुया तं क्‍वलात, वय्‌कलं थःगु च्‍याःगु तं प्‍वंकादिल। वय्‌कलं सियोनय् मि च्‍याकादिल, अथे जुयाः वयागु जगत दक्‍वं भज्‍यंक नाश जुल।

विलाप 4:11 ပူးပေါင်းရင်းမြစ်များ

यशैया 51:20

छिमि काय्‌पिं मूर्च्‍छा जूगु दु। चल्‍ला जालय् क्‍यं थें इपिं नं बल मदयाः लँय् क्‍वदःगु दु। इमिके परमप्रभुया तं व छिमि परमेश्‍वरया ख्‍याच्‍वलं जाःगु दु।

यर्मिया 13:14

अले जिं इमित छम्‍हय्‌सित मेम्‍हनापं ल्‍वाकाबी, अर्थात बौम्‍हय्‌सित काय्‌म्‍हलिसें, काय्‌म्‍हसित बौम्‍हलिसें, जिं इमित दयामाया याये मखु। दया यानाः इमित नाश जुइगुपाखें बचय् नं याये मखु,’” परमप्रभुं धयादी।

यर्मिया 17:27

तर विश्रामबारयात पवित्र मानय् या! अले विश्रामबार खुन्‍हु कु क्‍वबियाः यरूशलेमया ध्‍वाखा ध्‍वाखाय्‌ जुयाः दुहां वये मते धइगु जिगु खँ छिमिसं ध्‍यान बियाः मन्‍यन धाःसा जिं उकिया ध्‍वाखात मि तयाबी। अले थुकिं यरूशलेमया किल्‍लात भज्‍यंक नाश याइ।’”

यर्मिया 21:14

जि, परमप्रभुं धाये, जिं छिमिगु ज्‍या स्‍वयाः छिमित सजाँय बी, जिं छिमिगु गुँइ मि तयाबी, उकिं छिमिगु प्‍यखें दुगु फुक्‍क भस्‍म याइ।’”

यर्मिया 36:7

सके इमिसं परमप्रभुयात प्रार्थना याइ ला। सकसिनं थथःगु मभिंगु पहःचहः त्‍वःती ला, छाय्‌धाःसा परमप्रभुं थ्‍व जातिया विरोधय् हये धयादीगु तं तःधं।”

यर्मिया 7:20

उकिं परमप्रभु परमेश्‍वरं धयादी, “थ्‍व थासय् जिं जिगु तं प्‍वंकाबी। मनू व पशु, ख्‍यलय् च्‍वंगु सिमा व बुँया बाली प्‍वंकाबी। जिगु तं मि थें च्‍यानाच्‍वनी, सुनानं उकियात क्‍वलाके फइ मखु।”

विलाप 2:1

परमप्रभुं थःगु तम्‍वय् म्‍ह्याय् सियोनयात गय् यानाः तसकं खिउँगुलिं त्‍वपुयादीगु दु। वय्‌कलं इस्राएलया गौरवयात आकाशं पृथ्‍वीइ वांछ्वयादिल। थःगु तंया दिनय् वय्‌कलं थःगु पाउदानयात नं लुमंका मदी।

विलाप 2:17

परमप्रभुं छु योजना यानादीगु खः। यक्‍व दँ न्‍हापा वय्‌कलं छु घोषणा यानादीगु खः, व हे वचन वय्‌कलं पूवंकादिल। छुं हे दयामाया मदय्‌क वय्‌कलं छन्‍त नाश यानादिल। वय्‌कलं शत्रुयात छंगुपाखें लय्‌ताय्‌कादिल, अले छंगु शत्रुतय्‌गु शक्ति अप्‍वय्‌कादीगु दु।

विलाप 2:3

थःगु तसकं तःधंगु तमय् वय्‌कलं इस्राएलया दक्‍व शक्तियात नाश यानादिल। शत्रुतय्‌गु न्‍ह्यःने हे वय्‌कलं थःगु सुरक्षाया जःपा ल्‍हाः लिकयादिल। वय्‌कःयागु तं याकूबयाके प्‍यखेरं भस्‍म याइगु मि थें च्‍यात।

विलाप 2:4

शत्रुं थें वय्‌कलं थःगु धनुष वाणं झीत ताकय् याःगु दु। विरोधी थें वय्‌कः दनादीगु दु। स्‍वय्‌बलय् यइपुस्‍से च्‍वंपिं सकसित वय्‌कलं स्‍यानादीगु दु। म्‍ह्याय् सियोनयागु पालय् वय्‌कलं थःगु तं मि थें प्‍वंकादीगु दु।

विलाप 2:8

परमप्रभुं म्‍ह्याय् सियोनयागु पःखाःयात नाश यायेगु क्‍वछिनादिल। वय्‌कलं नापे याइगु खिपतं व नापय् यानादिल। वयात नाश यायेगुपाखें वय्‌कलं थःगु ल्‍हाः पनामदी। वय्‌कलं धरहरा व पःखाः निगुलिंयात ख्‍वय्‌कादिल, उपिं निगुलिं छकलं दुन।

विलाप 4:22

हे म्‍ह्याय् सियोन, छंगु अधर्मया सजाँय सिधल, हाकनं गुबलें छन्‍त देशं पितिना छ्वयादी मखु। तर हे म्‍ह्याय् एदोम, वय्‌कलं छंगु अधर्मया दण्‍डया सजाँय छन्‍त बियादी, अले छंगु पाप क्‍यनादी।

इजकिएल 22:31

उकिं जिं इमिके जिगु तंया मि प्‍वंकाः इमित भस्‍म याये। इमिसं याःगु फुक्‍क ज्‍या इमिगु हे छेनय् हयाबी, परमप्रभु परमेश्‍वरं धयादी।”

इजकिएल 36:18

इमिसं देशय् हि बाः वय्‌कूगु व थःगु मूर्तितपाखें उकियात अशुद्ध याःगुलिं जिं थःगु तं इमिके प्‍वंका।

इजकिएल 6:12

तापाक दुपिं महामारीं सी। सतिक दुपिं तरवारं सी अले ल्‍यनाच्‍वंपिं व घेराय् लाःपिं धाःसा नये मखना सी। थुकथं जिं थःगु तं इमिके प्‍वंके।

दानिएल 9:12

जिमिथाय् तःधंगु विपत्ति हयाः जिमिगु व जिमि शासकतय्‌गु बारे न्‍ववानादीगु बचं छिं पूवंकादीगु दु। यरूशलेमय् वःगु विपत्ति थें ज्‍याःगु विपत्ति संसारय् गन नं मवःनि।

लेवी 26:28

जि तंचायाः छिमिगु विरोधय् वने, अले छिमिगु पापया लागिं जिं छिमित हानं न्‍हय्‌दुगं अप्‍वः सजाँय बी।

सपन्‍याह 2:2

न्‍याय शुरु जुइ न्‍ह्यः, छिपिं पस्‍ताय् चायेगु ई छ्वसः थें ब्‍वय्‌का यंके न्‍ह्यः, परमप्रभुयागु ग्‍यानपुस्‍से च्‍वंगु तं छिमिथाय् वये न्‍ह्यः, अले वय्‌कःयागु तंया दिं छिमिथाय् वये न्‍ह्यः।

जकरिया 1:6

अय्‌नं जिं थः दास अगमवक्तातय्‌पाखें छिमि पुर्खातय्‌त बियागु वचन व ख्‍याच्‍वः इमिके पूरा जुल। “अले इमिसं पस्‍ताय् चायाः धाल, ‘दक्‍व शक्ति दुम्‍ह परमप्रभुं झीगु पहःचहः व ज्‍याकथं झीलिसें छु यायेगु क्‍वःछिनादीगु खः व वय्‌कलं झीपिंलिसे यानादिल।’”

लूका 21:22

छाय्‌धाःसा थ्‍व धर्मशास्‍त्रय् च्‍वयातःगु फुक्‍कं पूवंकेत पलेसा काइगु दिं खः।