विलाप 2:9 - नेवाः बाइबल

⁹ वयागु मू ध्‍वाखात बँय् तुनावन। वय्‌कलं वयागु गजबारत कुचा कुचा यानाः नाश यानादिल। वया जुजु व राजकुमारतय्‌त मेपिं जातितय्‌गु दथुइ पितिनाछ्वःगु दु, आः ला व्‍यवस्‍था मन्‍त। अले वया अगमवक्तातय्‌सं नं परमप्रभुपाखें छुं हे दर्शन कायेखनी मखु।

विलाप 2:9 ပူးပေါင်းရင်းမြစ်များ

२ राजा 25:7

इमिसं सिदकियाहया काय्‌पिन्‍त वयागु हे न्‍ह्यःने हेस्‍यात। अनंलि इमिसं वयागु मिखा ल्‍ह्वकाबिल। वयात कँय्‌या सिखलं चिनाः बेबिलोनय् यंकल।

२ इतिहास 15:3

ताःई तक इस्राएलं सत्‍य परमेश्‍वर मदय्‌कं जीवन हनाच्‍वंगु खः। इमित स्‍यनेत पुजाहारीत मदु, व्‍यवस्‍था मदु।

नहेम्‍याह 1:3

इमिसं जितः धाल, “लिहांवःपिं यहूदीतय्‌त थाकुयाच्‍वंगु दु। जःखः च्‍वंपि बिदेशीतय्‌सं इमित हेपय् याइगु, यरूशलेमया पखाः आः तक नं दुनाच्‍वंगु दु अले उकिया ध्‍वाखा मिं नयाः नाश जुइ धुंकल।”

भजनसंग्रहया सफू 74:9

आः अजू चायापुगु चिं नं खने मन्‍त अगमवक्तात नं छम्‍ह हे मन्‍त। थथे गुबलय् तक जुयाच्‍वनी जिपिं सुनानं मस्‍यू।

यशैया 24:12

शहर नाश जूगु दु, उकिया मू ध्‍वाखात दुना वनाः नाश जूगु दु।

यर्मिया 14:14

अले परमप्रभुं जितः धयादिल, “उपिं अगमवक्तातय्‌सं जिगु नामय् फताहा अगमवाणी ल्‍हानाच्‍वंगु दु। जिं इमित छ्वयागु मखु वा ल्‍ययागु मखु वा इपिंलिसें नवानागु मदु। इमिसं ला मखुगु दर्शन, अगमवाणी, ज्‍वखना, मूर्ति पुजा व धोखाया खँया अगमवाणी ल्‍हानाच्‍वंगु दु।

यर्मिया 23:16

दक्‍व शक्ति दुम्‍ह परमप्रभुं थथे धयादी, “अगमवाणी ल्‍हानाः छिपिंलिसें नवाइपिं अगमवक्तातय्‌गु खँ छिमिसं न्‍यने मते। इमिसं छिमित मखुगु आस क्‍यनी। इमिसं थःगु हे मनयागु दर्शन कनी, जि परमप्रभुपाखेंयागु मखु।

यर्मिया 39:2

सिदकियाह जुजुं राज्‍य यानाच्‍वंगु झिंछगूगु दँया प्‍यंगूगु लाया गुंगूगु दिनय् उगु शहरया पःखाः तछ्यात।

यर्मिया 39:8

बेबिलोनीतय्‌सं दरबार व मनूतय्‌गु छेँ छ्वय्‌काबिल, इमिसं यरूशलेमया पःखाः थुनाबिल।

यर्मिया 51:30

बेबिलोनया सिपाइँतय्‌सं लडाइँ यायेगु त्‍वःतूगु दु। इपिं ला थथःगु किल्‍ला दुने हे च्‍वनीगु। इमिगु बल कम जुइ धुंकल। इपिं मिस्‍त थें जूगु दु। इमिगु च्‍वनीगु थाय् मिं नकाबी धुंकल, उकिया ध्‍वाखाया गजबारत त्‍वथुलाबी धुंकल।

यर्मिया 52:14

जुजुया सेनापतिया अधीनय् दुपिं फुक्‍क सेनां यरूशलेमया छचाःखेरं दुगु पःखाः थुनाबिल।

विलाप 1:3

तःधंगु सास्‍ती व कडा दासत्‍वया लिपा यहूदायात ज्‍वनाः जबरजस्‍ती यंकूगु दु। आः व मेगु जातितय्‌गु दथुइ च्‍वनाच्‍वंगु दु। वयात भचा नं आराम मदु। वयात ल्‍यूपिं सकसिनं वयागु दुःखया इलय् वयात ज्‍वन।

विलाप 4:15

मनूतय्‌सं तसलं हालाः इमित धाइ, “हुँ, हे अशुद्धपिं! तापाक हुँ, जिमित थीमत्‍यः!” इपिं बिस्‍युं जूबलय् अले चाचाःहिलाः जूबलय् जात जातियापिं मनूतय्‌सं थथे धाल, “आवंनिसें इपिं झीनापं थन च्‍वने फइ मखुत।”

विलाप 4:20

परमप्रभुया अभिषेक जूम्‍ह जुजु, जिमिगु प्राण इमिगु पन्‍जलय् लात। वय्‌कःयागु सुरक्षाय् जिपिं मेपिं जातितय्‌गु दथुइ सुरक्षित च्‍वने दइ धकाः जिमिसं बिचाः यानागु खः।

इजकिएल 12:13

जिं वयागु निंतिं थःगु जाः ह्वले अले व जिगु जालय् लाइ। जिं वयात कल्‍दीतय्‌गु देश बेबिलोनियाय् हये, तर वं व खनी मखु, व अन हे सी।

इजकिएल 17:20

जिं वयागु विरोधय् थःगु जाः ह्वले, अले व जिगु जालय् लाइ। जिं वयात बेबिलोनय् हये, वं जितः विश्‍वासघात याःगुलिं जिं वयागु इन्‍साफ याये।

इजकिएल 7:26

छगू विपत्तिया ल्‍यू मेगु विपत्ति वइ अले छगू बांमलाःगु खबरया ल्‍यू मेगु बांमलाःगु खबर वइ। इमिसं अगमवक्तातपाखें दर्शन कायेत स्‍वइ। पुजाहारीतपाखें व्‍यवस्‍थाया शिक्षा व धर्म गुरुतपाखें सल्‍लाह तनावनी।

होशे 11:6

इमिगु शहरय् लडाइँ जुइ, इमिगु मू ध्‍वाखात स्‍यंकाबी, अले इमिगु योजनायात नाश यानाबी।

होशे 3:4

थुकथं इस्राएलीत यक्‍व दिं तक राजा वा राजकुमार मदय्‌क बलिदान व पुजा यायेगु ल्‍वहंया थां मदय्‌क व एपोद व छेँया द्यःत मदय्‌काः च्‍वनी।

आमोस 1:5

जिं दमस्‍कसया मू ध्‍वाखात तछ्यानाबी, जिं आवनया ब्‍यासिइ च्‍वंपिन्‍त व बेथ-अदनया शासकयात भज्‍यंक नाश यानाबी। अरामया मनूतय्‌त ज्‍वनाः कीर देशय् यंकी,” परमप्रभुं धयादी।

व्‍यवस्‍था 28:36

परमप्रभुं छिमि जुजुयात छिमिसं व छिमि पुर्खातय्‌सं म्‍हमस्‍यूगु छगू जातिया दथुइ लिना छ्वयादी। अले इमिगु दथुइ च्‍वनाः छिमिसं सिँ व ल्‍वहंयापिं मेपिं द्यःतय्‌त पुजा याइ।

व्‍यवस्‍था 28:63

परमप्रभुं लय्‌ताःतां भिं यानादीगु व ल्‍याः अप्‍वयेकादीगु थें हे छिमित लय्‌ताःतां भज्‍यंक नाश यानादी। अले छिमिसं अधिकार यायेत दुहां वनेत्‍यंगु देशं छिमित लिनाः वांछ्वइ।

१ शमूएल 28:6

अले शाऊलं परमप्रभुयाके न्‍यन, “जिं छु यायेगु?” तर परमप्रभुं वयात नं म्‍हगसपाखें, नं “ऊरीमं” नं अगमवक्तातपाखें छुं नं लिसः बियादिल।