विलाप 2:17 - नेवाः बाइबल

¹⁷ परमप्रभुं छु योजना यानादीगु खः। यक्‍व दँ न्‍हापा वय्‌कलं छु घोषणा यानादीगु खः, व हे वचन वय्‌कलं पूवंकादिल। छुं हे दयामाया मदय्‌क वय्‌कलं छन्‍त नाश यानादिल। वय्‌कलं शत्रुयात छंगुपाखें लय्‌ताय्‌कादिल, अले छंगु शत्रुतय्‌गु शक्ति अप्‍वय्‌कादीगु दु।

विलाप 2:17 ပူးပေါင်းရင်းမြစ်များ

१ राजा 9:7

जिं इस्राएलयात बियागु देशं इमित लिनाछ्वये अले जिं जिगु नांया इज्‍जतया निंतिं पवित्र यानागु थ्‍व देगः नं त्‍वःताबी। अले इस्राएलीत खनाः फुक्‍क मनूत न्‍हिली, अले फुक्‍क मनूतय्‌गु दथुइ इमित हेस्‍याइ अले क्‍वह्यंकी।

भजनसंग्रहया सफू 35:24

हे परमप्रभु, छि धर्मीम्‍ह खः, जि दोष मदुम्‍ह खः धकाः क्‍यनादिसँ। जिमि शत्रुतय्‌सं जितः लाय्‌बुइ मफयेमा।

भजनसंग्रहया सफू 35:26

जितः दुःख जूबलय् लाय्‌बुयाजूपिं फुक्‍कं आशां द्यायेमा, थःपिन्‍त जि स्‍वयाः तःधं धकाः जूपिं फुक्‍कं न्‍हाय् वंकाः मछाला जुइमालेमा।

भजनसंग्रहया सफू 38:16

जिमि शत्रुतय्‌त जिगु दुःखय् लाय्‌बुइके बियादी मते, जि बमलाःगुलिइ इमित लय्‌ताय्‌के बियादी मते।

भजनसंग्रहया सफू 89:42

छिं वया शत्रुतय्‌त बल्‍लाकादिल, वया फुक्‍क शत्रुतय्‌त लय्‌ताय्‌कादीगु दु।

भजनसंग्रहया सफू 89:43

हानं छिं वयागु तरवारया धाःयात हीकादीगु दु, अले छिं लडाइँलय् वयात ग्‍वाहालि यानादीगु मदु।

यशैया 14:29

हे फुक्‍क पलिश्‍तीत, छिमित दाइगु कथि त्‍वधूल धकाः लय्‌ताये मते, छाय्‌धाःसा छम्‍ह सर्प सी सा वया थासय् मेम्‍ह बिष दुम्‍ह सर्प वइ। वया खेँचं अप्‍वः बिष दुम्‍ह सर्प पिहां वइ।

यर्मिया 18:11

“उकिं आः छं यहूदायापिं मनूत व यरूशलेमयापिं मनूतय्‌त थथे धा, ‘परमप्रभुं थथे धयादी – स्‍व, जिं छिमिगु विरोधय् विपत्तिया योजना दय्‌का च्‍वनागु दु। उकिं छिपिं सकसिनं थःपिन्‍सं यानाच्‍वनागु मभिंगु ज्‍यायात त्‍वःति, थःगु पहःचहः व थःगु ज्‍या भिंकि।’

यर्मिया 4:28

अथे जुयाः पृथ्‍वी ह्वाँय्‌ह्वाँय् ख्‍वइ। आकाश खिउँसे च्‍वनी। जिं धायेधुन अले जिं थःगु मन हीके मखु। जिं क्‍वःछीधुन, जिं थःगु बिचाः हिले मखु।”

यर्मिया 40:3

आः वय्‌कलं थ्‍व विपत्ति हयाः थःम्‍हं धयादीगु थें यानादिल। छिमिसं परमप्रभुया विरोधय् पापयात, वय्‌कःया आज्ञा पालन मयात, उकिं थ्‍व फुक्‍क जुल।

विलाप 1:5

वया विरोधीत वया मालिक जूगु दु, वया शत्रुत याउँक च्‍वनाच्‍वंगु दु। छाय्‌धाःसा परमप्रभुं वयात वयागु यक्‍व पापं यानाः दुःखय् लाकादीगु दु, वया मस्‍तय्‌त शत्रुतय् न्‍ह्यःने ज्‍वनायंकूगु दु।

विलाप 2:8

परमप्रभुं म्‍ह्याय् सियोनयागु पःखाःयात नाश यायेगु क्‍वछिनादिल। वय्‌कलं नापे याइगु खिपतं व नापय् यानादिल। वयात नाश यायेगुपाखें वय्‌कलं थःगु ल्‍हाः पनामदी। वय्‌कलं धरहरा व पःखाः निगुलिंयात ख्‍वय्‌कादिल, उपिं निगुलिं छकलं दुन।

विलाप 3:43

“छि जिपिं खनाः तम्‍वयादिल, छिं जिमित लिनादिल अले दयामाया हे मयासें जिमित स्‍यानादिल।

विलाप 4:11

तर आः परमप्रभुया तं क्‍वलात, वय्‌कलं थःगु च्‍याःगु तं प्‍वंकादिल। वय्‌कलं सियोनय् मि च्‍याकादिल, अथे जुयाः वयागु जगत दक्‍वं भज्‍यंक नाश जुल।

इजकिएल 5:11

“गथे जि धात्‍थें म्‍वाःम्‍ह खः, जि, परमप्रभु परमेश्‍वरं धाये, छंगु फुक्‍क घच्‍चाइपुगु मूर्तित व छं याःगु घच्‍चाइपुगु व्‍यवहारपाखें जिगु पवित्र थाय्‌यात छं अशुद्ध याःगुलिं जिं धात्‍थें हे छिमित नाश याये, जिं छिमित मायां स्‍वये मखु अले जिं छन्‍त दया नं याये मखु।

इजकिएल 8:18

उकिं जिं नं इपिंलिसें तंमय्‌ ज्‍या याये। जिं इमित भचा नं दया याये मखु, त्‍वःते नं मखु। जिगु न्‍हाय्‌पनय् चिल्‍लाय् दनाः हाःसां जिं इमिगु खँ न्‍यने मखु।”

इजकिएल 9:10

उकिं जिं धाःसा, जिं थःगु मिखा मेखेपाखे स्‍वय्‌के, अले जिं इमित भचा नं दया याये मखु, तर इमिसं छु याःगु दु, इमिगु ज्‍याया लिच्‍वः जिं इमिगु हे छेनय् प्‍वंकाबी।”

दानिएल 9:12

जिमिथाय् तःधंगु विपत्ति हयाः जिमिगु व जिमि शासकतय्‌गु बारे न्‍ववानादीगु बचं छिं पूवंकादीगु दु। यरूशलेमय् वःगु विपत्ति थें ज्‍याःगु विपत्ति संसारय् गन नं मवःनि।

मीका 2:3

अथे जुयाः परमप्रभुं थथे धयादी, “स्‍व, थ्‍व प्रजाया निंतिं जिं तच्‍वःगु विपत्ति छ्वया हयेत्‍यनागु दु, छिपिं उकिं म्‍वाये फइ मखु। छिपि फुँइ क्‍यनाः छ्यं धस्‍वाकाः थुखे उखे जुइ नं फइ मखु। छाय्‌धाःसा व छगू विपत्तियागु ई जुइ।

सपन्‍याह 1:2

“जिं पृथ्‍वीइ दुगु दक्‍व सुचुक न्‍हंकाछ्वये,” परमप्रभुं धयादी।

जकरिया 1:6

अय्‌नं जिं थः दास अगमवक्तातय्‌पाखें छिमि पुर्खातय्‌त बियागु वचन व ख्‍याच्‍वः इमिके पूरा जुल। “अले इमिसं पस्‍ताय् चायाः धाल, ‘दक्‍व शक्ति दुम्‍ह परमप्रभुं झीगु पहःचहः व ज्‍याकथं झीलिसें छु यायेगु क्‍वःछिनादीगु खः व वय्‌कलं झीपिंलिसे यानादिल।’”