यहोशू 9:18 - नेवाः बाइबल

¹⁸ अय्‌नं इस्राएलीतय्‌सं इमित मस्‍या, छाय्‌धाःसा खलःयापिं नायःतय्‌सं इपिंलिसें परमप्रभु इस्राएलया परमेश्‍वरयागु नामय् पाफःगु खः। फुक्‍क खलकं थ्‍व खँयात कयाः नायःतलिसें कचकच यात।

यहोशू 9:18 ပူးပေါင်းရင်းမြစ်များ

२ शमूएल 21:7

जुजुं दाऊद व शाऊलया काय् जोनाथनं परमप्रभुया न्‍ह्यःने पाफःगुलिं शाऊलया छय्, जोनाथनया काय् मपीबोशेतयात बचय् याना तल।

भजनसंग्रहया सफू 15:4

गुम्‍हय्‌सिनं मभिंपिं मनूतय्‌त इज्‍जत याइ मखु, परमप्रभुया ग्‍याःभय काइपिन्‍त धाःसा हनाबना तइ, थःत न्‍ह्याक्‍व हे थाकुसां थःगु बचं पूवंकी।

उपदेशक 5:2

नवायेत हथाय् चाये मते, परमेश्‍वरया न्‍ह्यःने नवायेत छं थःगु मनय् हथाय् चाये मते। परमेश्‍वर स्‍वर्गय् च्‍वनादी अले छ थ्‍व संसारय् दु। अथे जुयाः छं नवायेगु खँ कम जुइमा।

उपदेशक 5:6

छं नवाःगु खं छन्‍त पाप मलाकेमा, अले देगःया दूतयात, “जिं यानागु भाकल भूल जुल,” धकाः धाये म्‍वालेमा। छं नवाःगु कारण परमेश्‍वर तंम्‍वयाः छाय् छंगु ल्‍हाःया ज्‍यायात नाश याके बीगु?

उपदेशक 9:2

धर्मी व दुष्‍ट, भिंम्‍ह व मभिंम्‍ह, शुद्ध व अशुद्ध, बलि छाइपिं व बलि मछाइपिं फुक्‍कसिया अन्‍त्‍य छगूकथं हे जुइ। भिंपिं मनूतय्‌त थें पापी मनूतय्‌त नं अथे हे जुइ। पाफइपिं मनूतय्‌त थें पाफय्‌त ग्‍याइपिं मनूतय्‌त नं अथे हे जुइ।

गन्‍ती 30:3

“थः बौया छेँय् च्‍वनाच्‍वंबलय् हे सुं ल्‍यासेम्‍ह मिसां परमप्रभुलिसें भाकल यात वा बचं बियाः पाफल धाःसा,

व्‍यवस्‍था 23:22

छिमिसं भाकल याःगु मदुसा छिमित पाप लाइ मखु।

व्‍यवस्‍था 23:23

छिमिगु म्‍हुतुं छु पिहां वइ व छिमिसं पूवंके हे माः, छाय्‌धाःसा परमप्रभु छिमि परमेश्‍वरयात छिमिसं थःगु इच्‍छाकथं थःगु हे म्‍हुतुं भाकल याःगु खः।

व्‍यवस्‍था 23:24

छिमि जःलाखःलाया दाखक्‍यबय् जुयाः वन धाःसा नये यःक्‍व दाख छिमिसं नयेफु, अय्‌नं थःगु दालाय् तये मते।

यहोशू 9:17

उकिं इस्राएलीत न्‍ह्याः वनाः स्‍वन्‍हु दुखुन्‍हु इमिगु शहर गिबोन, कपीरा, बेरोत व किर्यत-यारीमय् थ्‍यंकवल।

यहोशू 9:19

तर सकल नायःतय्‌सं लिसः बिल, “जिमिसं हे इपिंलिसें परमप्रभु इस्राएलयाम्‍ह परमेश्‍वरया नामय् पाफयागु दु। उकिं आः झीसं इमित थी फइ मखु।