यहोशू 2:11 - नेवाः बाइबल

¹¹ थ्‍व खँ न्‍यनेवं जिमिगु नुगः क्‍वतुन, छिमिसं यानाः साहस हे मन्‍त, छाय्‌धाःसा छिकपिनि परमप्रभु च्‍वय् आकाशय् व क्‍वय् पृथ्‍वीइ परमेश्‍वर खः।

यहोशू 2:11 ပူးပေါင်းရင်းမြစ်များ

१ राजा 8:60

अले पृथ्‍वीया फुक्‍क जातितय्‌सं परमप्रभु हे परमेश्‍वर खः वय्‌कः बाहेक मेम्‍ह सुं ईश्‍वर मदु धकाः सीमा।

२ राजा 5:15

थः सकलें च्‍यःतनापं परमेश्‍वरया मनूयाथाय् वयाः वं थथे धाल, “आः जिं इस्राएलय् बाहेक संसारय् गन नं परमेश्‍वर मदु धकाः सिल। उकिं आः थः दासपाखें छगू कोस्‍यलि कयादिसँ।”

नहेम्‍याह 6:16

जिमि शत्रुतय्‌सं थ्‍व खँ न्‍यंबलय् अले जःखः च्‍वंपिं फुक्‍क मेगु जातियापिन्‍सं थ्‍व खंबलय् इपिं तसकं लज्‍या चाल। अले थ्‍व ज्‍या जिमि परमेश्‍वरया ग्‍वाहालिं पूवंगु खः धकाः इमिसं सिल।

एस्‍तर 8:17

जुजुया उजं पौ थ्‍यंगु फुक्‍क प्रान्‍तय् व फुक्‍क शहरय् यहूदीतय्‌गु निंतिं लसता व नखःया दिं जुल। अले मेगु जातिया यक्‍व मनूत नं यहूदी जुल। छाय्‌धाःसा इमिके यहूदीतय्‌गु भय दुगुलिं खः।

भजनसंग्रहया सफू 102:15

जाति जातियापिं मनूतय्‌सं परमप्रभुया नांयात च्‍वछाइ, अले पृथ्‍वीयापिं सकलें जुजुपिन्‍सं वय्‌कःया महिमायात तःधंकी।

भजनसंग्रहया सफू 22:14

जिगु तागत लः थें ज्‍वयावने धुंकल। जिगु क्‍वँय्‌या फुक्‍क साहा साहा ब्‍यनावने धुंकल। सी थें जिगु नुगः नायावने धुंकल।

भजनसंग्रहया सफू 58:7

खुसिबाः वनीगु लः थें इपिं तनावनेमा इमिगु ल्‍वाभः इमिगु ल्‍हातिइ हे ज्‍याख्‍यलय् मदयेमा।

भजनसंग्रहया सफू 83:18

छिगु नां परमप्रभु खः, इमिसं पृथ्‍वी न्‍यंकंयाम्‍ह दक्‍वसिबय् तःधंम्‍ह शासक खः धकाः म्‍हसीमा।

प्रस्‍थान 15:14

थ्‍व खँ न्‍यनाः जातित थुरथुर खात। पलिश्‍तीत देशय् च्‍वंपिनिगु नुगः हीसे च्‍वन।

प्रस्‍थान 15:15

एदोमयापिं नायःत तसकं ग्‍याइ, मोआबयापिं थकालित थुरथुर खाइ। कनानयापिं फुक्‍क मनूतय् नुगलय् ध्‍यांग्रा थाइ,

यशैया 13:7

अथे जुयाः फुक्‍क ल्‍हाःत बमलाना वनी, फुक्‍क मनूतय्‌गु नुगः भारा-भारा मिनाः तसकं ग्‍याइ।

यशैया 19:1

मिश्रया बारे परमप्रभुया अगमवाणी– स्‍व, परमप्रभु तसकं ब्‍वयावनीगु सुपाँचय् च्‍वनाः याकनं हे मिश्रय् झायेत्‍यंगु दु। वय्‌कःया न्‍ह्यःने मिश्रया मूर्तित थरथर खाइ, अले मनूतय्‌गु हंसं थाय् त्‍वःति।

इजकिएल 21:15

मनूतय्‌गु नुगः ग्‍यानाः नाया वनेमा, अले यक्‍व मनूत क्‍वःदयेमा धकाः इमिगु फुक्‍क मू ध्‍वाखाय् स्‍याये पालेत जिं तरवार तयागु दु। हाबलासा थें थीत उकियात दय्‌कूगु दु, उकियात स्‍याये पालेत ज्‍वनी।

नहूम 2:10

निनवे शहरयात लुतय् याःगु दु, अन झिजांमिजां दंगु दु व तहसनहस जूगु दु। मनूतय्‌गु नुगः ग्‍यानाः न्‍यले धुंकल, इमिगु तुति थुरथुर खानाच्‍वंगु दु, म्‍ह छम्‍हं खानाच्‍वंगु दु, इमिगु ख्‍वाः ग्‍यानाः म्‍हासुइ धुंकल।

व्‍यवस्‍था 1:28

झीपिं गन वनेगु? झीसं छ्वयापिं मनूतय्‌सं ‘अनयापिं मनूत झीपिं स्‍वयाः बल्‍ला व तःधिकः, अनयागु शहरत ततःधं अले आकाश थ्‍यंक हे पःखाः ग्‍वयातःगु दु, अले जिमिसं अन अनाकीत नं खना’ धकाः धयाः जिमित ख्‍यात।”

व्‍यवस्‍था 20:8

अले कप्‍तानतय्‌सं मनूतय्‌त थथे नं धा “थन सुं ग्‍याफ्रा व धन्‍दा काइम्‍ह दुसा थःगु छेँय् लिहां वनेमा। छाय्‌धाःसा वं यानाः मेपिं सेनातय्‌गु नुगः क्‍वतुनी।”

व्‍यवस्‍था 4:39

परमप्रभु हे च्‍वय् स्‍वर्गय् व क्‍वय् पृथ्‍वीइ परमेश्‍वर खः अले वय्‌कः बाहेक मेम्‍ह सुं मदु धकाः छिमिसं थौं सीका का, अले नुगलय् ति।

यहोशू 14:8

तर जिनापं वंपिं इस्राएलीतय्‌सं मनूतय्‌त ख्‍यात। जिं धाःसा दुनुगलंनिसें परमप्रभु परमेश्‍वरयागु आज्ञा मानय् याना।

यहोशू 2:24

इमिसं यहोशूयात धाल, “धात्‍थें हे परमप्रभुं व फुक्‍क देश झीगु ल्‍हातय् बियादीगु दु। व देशयापिं सकलें मनूत झीपिं खनाः थुरथुर खानाच्‍वंगु दु।”

यहोशू 5:1

इस्राएलीतय्‌सं खुसि मछीतले परमप्रभुं यर्दनयात गंगु बँ यानादीगु खँ यर्दनया पच्‍छिमय् च्‍वंपिं एमोरी जुजुपिन्‍सं व समुद्रया सिथय् च्‍वंपिं कनानी फुक्‍क जुजुपिन्‍सं न्‍यन। इस्राएलीतय्‌सं यानाः इमिगु नुगः भाराभारा मिनाः साहस मन्‍त।

यहोशू 7:5

ऐयापिं मनूतय्‌सं इमि स्‍विखुम्‍ह ति मनूतय्‌त स्‍यात। इमिसं शहरया मू ध्‍वाखांनिसें ल्‍वहं लिकाय्‌गु थाय् तक लिनाः तँचाय् इस्राएलीतय्‌त स्‍यात। अनंलि ग्‍यानाः इस्राएलीतय्‌गु नुगः भाराभारा मिन।

यहोशू 9:24

अले इमिसं यहोशूयात लिसः बिल, “परमप्रभु छिकपिनि परमेश्‍वरं थः दास मोशायात थ्‍व देश फुक्‍क छिकपिन्‍त बीगु व थ्‍व देशयापिं फुक्‍क मनूतय्‌त नाश यायेगु उजं बियादीगु खँ जिमित धाःगु दु। छिकपिं खनाः जिपिं तसकं ग्‍यात। उकिं जिमिसं थथे यानागु खः।

प्रकाश 6:16

इमिसं पहाड व तःग्‍वःगु ल्‍वहंयात थथे धाल – “सिंहासनय् फ्‍यतुना च्‍वंम्‍हय्‌सिगु मिखां सुचुकाः व चीधिकःम्‍ह भ्‍याःचायागु तं फये म्‍वायेक जिमित ल्‍हाका छ्वयाब्‍यु।