यहोशू 12:1 - नेवाः बाइबल

¹ यर्दनया पुर्बय् दच्‍छिनय् अर्नोन खुसिंनिसें उत्तरय् हेर्मोन पर्वत तक अर्थात अराबया पुर्ब पाखेया फुक्‍क लागा इस्राएलीतय्‌सं त्‍याकाकाःगु खः। इस्राएलीतय्‌सं त्‍याकाकाःगु व लागायापिं निम्‍ह जुजुपिं थुपिं खः –

यहोशू 12:1 ပူးပေါင်းရင်းမြစ်များ

१ राजा 4:19

गिलादय् – ऊरीया काय् गेबेर (एमोरीतय् जुजु सीहोन व बाशानया जुजु ओगया देश)। व उगु जिल्‍लायाम्‍ह छम्‍ह हे जक बडा-हाकिम खः।

भजनसंग्रहया सफू 133:3

थ्‍व सियोन पर्वतय् गाःगु हेर्मोनया सुतिलः थें खः, अन हे परमप्रभुं न्‍ह्याबलें जीवनया आशिष प्‍वंकादी।

भजनसंग्रहया सफू 136:21

इमिगु देश वय्‌कलं थः प्रजायात सर्बय कथं बियादिल, वय्‌कःया दया माया सदां दयाच्‍वनी।

भजनसंग्रहया सफू 89:12

उत्तर व दच्‍छिन छिं दय्‌कादीगु खः, तबोर व हेर्मोन पर्वत छिगु नामय् लय्‌लय्‌तातां म्‍ये हाली।

यशैया 16:2

स्‍वँपाखें लिना छ्वया थुखे उखे ब्‍वयाजुयाच्‍वंपिं झंगःत थें मोआबया शहर शहरयापिं मिसात अर्नोन खुसि सिथय् थुखे उखे जुयाः पियाच्‍वंगु दु।

गन्‍ती 21:13

अनं न्‍ह्याः वनाः इमिसं एमोरीतय्‌गु देशं पिहां वःगु मरुभूमिइ दुगु अर्नोन खुसियागु उखेपाखे पाल ग्‍वल। अर्नोन खुसि मोआब व एमोरीतय् दथुइच्‍वंगु सिमाना खः।

गन्‍ती 21:21

इस्राएलीतय्‌सं एमोरीतय् जुजु सीहोनयाथाय् थथे धयाः दूतत छ्वत,

गन्‍ती 21:24

अय्‌सां इस्राएलीतय्‌सं वयात तरवारं स्‍यात, अले अर्नोन खुसिंनिसें यब्‍बोक खुसि तक इमिगु देश त्‍याका काल। अम्‍मोनीतय्‌गु सिमाना तक जक त्‍याका काल, छाय्‌धाःसा इमिगु सिमाना बल्‍लाःगु खः।

गन्‍ती 32:19

जिमिसं यर्दनया उखे छुं नं सर्बय नं काये मखु। बरु जिपिं थन हे पुर्बपाखे थःगु सर्बय‌कथं वःगु थासय् हे च्‍वने।”

गन्‍ती 32:32

जिपिं ल्‍वाभः ज्‍वनाः परमप्रभुया न्‍ह्यःने खुसिया उखेपाखे कनान देशय् वने, अय्‌नं जिमिगु थःगु सर्बय यर्दनया थुखे हे जुइमा।”

गन्‍ती 32:33

अले मोशां गादीत, रूबेनीतय्‌त व योसेफया काय् मनश्‍शेया बच्‍छि कुलयात एमोरीतय् जुजु सीहोनयागु देश व बाशानया जुजु ओगयागु देश इमिगु सिमाना दुने लाःगु शहर नापं फुक्‍क देश बिल।

व्‍यवस्‍था 2:24

“आः न्‍ह्यज्‍या हुँ, अर्नोन खुसिया न्‍हसिकाप पुलाहुँ। जिं हेश्‍बोनया जुजु एमोरी, सीहोन व वयागु देश छिमिगु ल्‍हातय् बियागु दु। अथे जुयाः व देश थःगु अधिकारय् हयेगु शुरु या अले व जुजुलिसें लडाइँ या।

व्‍यवस्‍था 2:32

सीहोनं थः सकलें सेना ज्‍वनाः जिपिंलिसें ल्‍वायेत यहसाय् वःबलय्

व्‍यवस्‍था 3:1

अनंलि झीपिं फहिलाः बाशानपाखे वना। एद्रईलय् बाशानया जुजु ओग व वया सेना झीपिंलिसें ल्‍वायेत वल।

व्‍यवस्‍था 4:44

मोशां इस्राएलीतय्‌त ब्‍यूगु नियम थ्‍व हे खः।

व्‍यवस्‍था 4:46

यर्दनया पुर्बय् बेथ-पोर न्‍ह्यःनेया ब्‍यासिइ मोशा व इस्राएलीतय्‌सं मिश्रं पिहां वये धुंकाः स्‍यानाब्‍यूम्‍ह हेश्‍बोनय् च्‍वनीम्‍ह एमोरीतय् जुजु सीहोनयागु देशय् थुपिं विधि, आज्ञा व नियम ब्‍यूगु खः।

व्‍यवस्‍था 4:48

इमिगु देशय् अर्नोन खुसियागु न्‍हसिकापया च्‍वसं दुगु अरोएर शहरंनिसें सियोन पर्वत तक लाःगु दु। (थुकियात हेर्मोन पर्वत नं धाः)

यहोशू 1:15

परमप्रभु छिमि परमेश्‍वरं बियादीगु यर्दनया पच्‍छिम पाखेया देश त्‍याकाः मकातले छिपिं न्‍ह्यः न्‍ह्यः वनेमाः। परमप्रभुं छिमित थें इमित आराम बियादी धुंकाः छिपिं लिहां वयाः परमप्रभुया दास मोशां यर्दनया पुर्बय् छिमित ब्‍यूगु देशय् च्‍वने फइ।’”

यहोशू 11:17

दच्‍छिनय् सेइर पाखेयागु हालाक डाँडांनिसें हेर्मोन पर्वत क्‍वय्‌यागु लेबनानय् दुगु ब्‍यासियागु बाल-गाद तक त्‍याका काल। वं इमि सकल जुजुपिन्‍त ज्‍वनाः स्‍यात।

यहोशू 11:3

पुर्ब व पच्‍छिमयापिं कनानीतय् जुजुपिन्‍त, एमोरीतय्‌त, हित्तीतय्‌त, परिज्‍जीतय्‌त व पहाडी देशय् च्‍वंपिं यबूसीतय्‌त अले मिस्‍पा देशया हेर्मोन पर्वतयागु क्‍वय्‌ पाखेयापिं हिव्‍वीतय्‌त सःतके छ्वल।

यहोशू 13:8

मनश्‍शेया बच्‍छि कुल, रूबेनीत, व गादीतय्‌सं धाःसा यर्दन पुर्बयागु देश परमप्रभुया दास मोशापाखें थथःगु सर्बयकथं काये धुंकूगु खः।

यहोशू 22:4

आः छिमि परमप्रभु परमेश्‍वरं छिमि मेपिं इस्राएलीतय्‌त नं थःगु बचंकथं आराम बियादी धुंकूगु दु। उकिं परमप्रभुया दास मोशां यर्दन पारि छिमित ब्‍यूगु थःगु जमिन दुगु थथःगु छेँय् लिहां हुँ।

न्‍यायकर्ता 11:18

“अनं लिपा इपिं मरुभूमि जुयाः वन अले एदोम व मोआबया सिथं सिथं जुयाः मोआबया पुर्ब वनाः अर्नोनया मेखेपाखे छाउनी तल। अर्नोन खुसि मोआबया सिमाना जूगुलिं इपिं मोआब देशय्‌ दुहां मवं।”