यहोशू 10:12 - नेवाः बाइबल

¹² परमप्रभुं एमोरीतय्‌त इस्राएलीतय्‌गु ल्‍हातय् बियादीखुन्‍हु यहोशूं इस्राएलीतय्‌गु न्‍ह्यःने परमप्रभुयात प्रार्थना यानाः धाल, “हे सूर्य, छ गिबोनया च्‍वय्, हे तिमिला, छ धाःसा अय्‌यालोनया ब्‍यासिया च्‍वय् दिना च्‍वँ।”

यहोशू 10:12 ပူးပေါင်းရင်းမြစ်များ

२ शमूएल 2:12

नेरया काय् अबनेरं शाऊलया काय् ईश्‍बोशेतया पुचः ज्‍वनाः महनोमपाखें गिबोनय् वन।

२ राजा 20:10

हिजकियां लिसः बिल, “किचः झिपलाः न्‍ह्यःज्‍याइगु ला अपू। उकिं किचः झिपलाः लिज्‍या वनेमा।”

२ राजा 20:11

यशैयां परमप्रभुयात प्रार्थना यात अले आहाज जुजुं दय्‌कूगु स्‍वानय् लाःगु किचःयात वय्‌कलं झिपलाः लितछ्वयादिल।

२ राजा 20:9

यशैयां लिसः बिल, “परमप्रभुं छु बचं बियादी व पूवंकादी। परमप्रभुयापाखें उकिया चिं छन्‍त थ्‍व जुइ। छन्‍त किचः झिपलाः न्‍ह्यःने वंगु यः कि ल्‍युने वंगु यः?”

१ इतिहास 8:13

बरीआ व शेमा नं एल्‍पालया काय्‌पिं खः। इपिं अय्‌यालोनय् च्‍वंपिनिगु परिवार परिवारया नायःत खः। इमिसं गातय् च्‍वंपिं मनूतय्‌त ख्‍यानाछ्वःगु खः।

२ इतिहास 11:10

सोरा, अय्‌यालोन व हेब्रोन।

अय्‍यूब 9:7

वय्‌कःया आज्ञां सूर्यं नं जः बी मखु। नगुतय्‌गु जःयात दिकाबी।

भजनसंग्रहया सफू 148:3

हे सूर्य व तिमिला, वय्‌कःया प्रशंसा या! हे प्‍वालप्‍वाल थीगु नगु, वय्‌कःया प्रशंसा या!

भजनसंग्रहया सफू 19:4

इमिगु सुचं संसार न्‍यंक न्‍यनाच्‍वंगु दु, अले संसारया कुंकुलामय् थ्‍यंक ताये दयाच्‍वंगु दु। परमेश्‍वरं सूर्यया लागि आकाशय् च्‍वनेत थाय् दय्‌कादीगु दु।

भजनसंग्रहया सफू 74:16

छिं न्‍हि व चा सृष्‍टि यानादिल छिं सूर्य व तिमिलायात दय्‌काः इमिगु थासय् तयादिल।

यशैया 28:21

वय्‌कःया ज्‍या, थःगु गज्‍जबगु ज्‍या पूवंकादीत परमप्रभु पराजीम पर्वतय् दनादी थें दनादी, गिबोनया ब्‍यासि वय्‌कः झायादी थें झाइ।

यशैया 38:8

आहाजया त्‍वाथलय् निभाःया किचः गुगु क्‍वय्‌पाखे वने धुंकूगु दु, जिं झिपलाः ल्‍युने लित छ्वयाबी।’” अथे जुयाः निभाःया किचः क्‍वय् क्‍वहां वनाच्‍वंगु जूसां झिपलाः लिज्‍यावन।

यशैया 60:20

छंगु सूर्य गुबलें बिनावनी मखु, छंगु तिमिला गुबलें मदयावनी मखु। परमप्रभु हे छंगु निंतिं सदांया जः जुयादी, अले छंगु दुःखया दिं मदयावनी।

यर्मिया 28:1

हानं उगु हे दँय्, यहूदायाम्‍ह जुजु सिदकियाहं राज्‍य यानाच्‍वंगु प्‍यंगूगु दँया न्‍यागूगु लाय् अज्‍जूरया काय् गिबोनय् च्‍वंम्‍ह अगमवक्ता हनन्‍याहं परमप्रभुया देगलय् पुजाहारीत व मनूतय् न्‍ह्यःने जितः धाल,

आमोस 2:9

“जिं थःम्‍हं हे इमिगु न्‍ह्यःने एमोरीतय्‌त भज्‍यंक नाश यानाबिया, इपिं खयः सिमा ति तःजाः अले स्‍वसिमा थें बल्‍लाः जूसां नं, जिं इमिगु च्‍वय्‌च्‍वंगु फल व इमिगु क्‍वय् च्‍वंगु हा नाश यानाबिया।

आमोस 8:9

परमप्रभु परमेश्‍वरं धयादी, “व दिं” जिं सूर्य न्‍हिनय् बिनावंका बी, न्‍हिनय् हे पृथ्‍वीयात खिउँकाबी।

हबकूक 2:20

तर परमप्रभु ला थः पवित्र देगलय् दी। फुक्‍क पृथ्‍वी वय्‌कःया न्‍ह्यःने सुम्‍क च्‍वनेमा।

हबकूक 3:11

तसकं ब्‍वयावःगु प्‍वालाप्‍वाला थीगु छिगु वाणत व प्‍वालाप्‍वाला थीगु भालां यानाः सूर्य व तिमिला आकाशय् तक्‍क दित।

जकरिया 2:13

हे सकल मनूत, परमप्रभुया न्‍ह्यःने सुम्‍क च्‍वँ। छाय्‌धाःसा वय्‌कः थः च्‍वनीगु पवित्र थासं पिहां झाःगु दु।”

व्‍यवस्‍था 17:3

जिगु उजं मानय् मयासें द्यःत वा सूर्य, तिमिला वा आकाशया नगुतय्‌गु पुजा याःगु दुसा वा इमित भागि याःगु दुसा,

व्‍यवस्‍था 4:19

छिमिसं आकाशपाखे थस्‍वइबलय् अन दुगु सूर्य, तिमिला, नगुत व फुक्‍क ग्रह नक्षत्रतय्‌त खनाः उमित भागियाये मते, पुजा नं याये मते। उपिं परमप्रभुं पृथ्‍वीया फुक्‍क जातितय्‌गु निंतिं बियादीगु खः।

यहोशू 10:13

उगु जातिं शत्रुतय्‌त ब्‍वला मसातले सूर्य व तिमिला दिनाच्‍वन। थ्‍व खँ याशारया सफुलिइ च्‍वयातःगु दु। सूर्य आकाशया दथुइ दिनाच्‍वन, न्‍हिछि हे सूर्य बिना मवं।

यहोशू 19:42

शालवीन, अय्‌यालोन, इत्‍ला,

यहोशू 21:24

अय्‌यालोन, गात-रिम्‍मोन, इमिगु पशु ज्‍वयेगु घाँय्‌ख्‍यःनापं प्‍यंगू शहर बिल।

न्‍यायकर्ता 12:12

अले एलोन सित, वयात जबूलून देशया अय्‌यालोनय् थुनाबिल।

न्‍यायकर्ता 5:20

आकाशं नगुतय्‌सं लडाइँ यात, इमिगु लँपुं इमिसं सीसरालिसें ल्‍वात।

१ शमूएल 12:18

अथे जुयाः शमूएलं परमप्रभुयात इनाप यात, अले उखुन्‍हु हे परमप्रभुं नँ न्‍याःगु सः व वा वय्‌कादिल। अनंलि फुक्‍क मनूत परमप्रभु व शमूएल खनाः तसकं ग्‍यात।

१ शमूएल 14:31

उखुन्‍हु इमिसं पलिश्‍तीतय्‌त मिकमाशंनिसें अय्‌यालोन तक हे हमला यात। अले इपिं नयेपित्‍यानाः तसकं कमजोर जुल।