यूहन्‍ना 19:6 - नेवाः बाइबल

⁶ तःधंपिं पुजाहारीत व देगःया सिपाइँत वय्‌कःयात खनेवं थथे धकाः तस्‍सलं हाला हल – “वयात क्रूसय् यख्‍खायेमाः, वयात क्रूसय् यख्‍खायेमाः।” पिलातसं इमित धाल – “छिमिसं हे यंकाः वयात क्रूसय् यख्‍खा। जिं ला वयागु दोष लुइके मफुत।”

यूहन्‍ना 19:6 ပူးပေါင်းရင်းမြစ်များ

मत्ती 26:58

पत्रुस नं तातापाकं हे ल्‍यूल्‍यू वनाः दकलय् तःधंम्‍ह पुजाहारीया चुकय् थ्‍यंक हे वन। अले वय्‌कःयात छु छु याइ धकाः स्‍वयेत व पालेत नाप च्‍वंवन।

मत्ती 27:22

“अय्‌सा ख्रीष्‍ट धाःम्‍ह येशूयात छु यायेगु लय्?” धकाः पिलातसं इमिके न्‍यन। “वयात क्रूसय् यख्‍खानाः स्‍यानाछ्व” धकाः फुक्‍क मनूत छकलं हाला हल।

मत्ती 27:24

मनूत थथे हाला हःगुलिं पिलातसं छुं हे याये फइ थें मच्‍वनाः सकसिगुं न्‍ह्यःने ल्‍हाः सिलाः थथे धाल – “थ्‍व मनूयात स्‍याःगु दोष छिमित हे लाइ, जितः लाइ मखु।”

लूका 23:4

अले पिलातसं तःधंपिं पुजाहारीतय्‌त व मनूतय्‌गु हुलयात धाल – “जिं ला थ्‍व मनूयाके छुं हे दोष लुइके मफुत।”

यूहन्‍ना 18:3

उकिं यहूदा तःधंपिं पुजाहारीतय्‌थाय् व फरिसीतय्‌थाय् वनाः छथ्‍वः सिपाइँत व हाकिमतय्‌त ब्‍वनाः मिप्‍वाः, लालतिन, व हतियार ज्‍वनाः अन वल।

यूहन्‍ना 18:31

पिलातसं इमित धाल – “छिमिसं हे यंकाः थ्‍वयात छिमिगु व्‍यवस्‍थाकथं छु यायेमाःगु खः, या।” अले यहूदीतय् नायःतय्‌सं वयात लिसः बिल – “जिमित सुयातं स्‍यायेगु अधिकार बियातःगु मदु।”

यूहन्‍ना 18:38

पिलातसं वय्‌कःयात न्‍यन – “सत्‍य धयागु छु?” अले पिलातसं हानं यहूदीतय् नायःतय्‌थाय् वनाः थथे धाल – “जिं ला वयाके छुं हे दोष लुइके मफुत।

यूहन्‍ना 19:15

अले इपिं फुक्‍कं तस्‍सलं हाला हल – “वयात स्‍याये यंकि, वयात स्‍याये यंकि, वयात क्रूसय् यख्‍खानाः स्‍यानाछ्व।” पिलातसं इमित धाल – “छु छिमि जुजुयात जिं क्रूसय् यख्‍खायेगु ला?” अले तःधंपिं पुजाहारीतय्‌सं लिसः बिल – “कैसर स्‍वया जिमि मेम्‍ह जुजु मदु।”

यूहन्‍ना 19:4

पिलातसं हानं पिहां वयाः इमित थथे धाल – “का स्‍व, जिं वयाके छुनं दोष लुइके मफुगु खँ छिमिसं सीमा धकाः वयात छिमिगु हे न्‍ह्यःने छ्वयाहयागु दु।”

प्रेरित 2:23

परमेश्‍वरं थःगु ग्‍वसाः व ज्ञानकथं येशूयात छिकपिनि ल्‍हातय् बियादिल। अले छिकपिन्‍सं वय्‌कःयात अधर्मीतय्‌गु ल्‍हातय् क्रूसय् स्‍याकेत लःल्‍हाना बिल।

प्रेरित 7:52

छिकपिनि तापाःबाज्‍यापिन्‍सं अगमवक्ता सुयात जक दुःख मब्‍यूगु दु? धर्मीम्‍ह मनू झायादी तिनि धकाः धाःपिन्‍त नं इमिसं स्‍याना छ्वल। आः व हे धर्मीम्‍ह मनूयात नं छिकपिन्‍सं दुःख जक बियाः मगानाः धोखा बियाः स्‍यानाबिल।