यूहन्‍ना 17:11 - नेवाः बाइबल

¹¹ जि आः छिथाय् वयेत्‍यनागुलिं थ्‍व संसारय् दइ मखुत, थुपिं धाःसा थ्‍व संसारय् च्‍वनाच्‍वनी। पवित्रम्‍ह बाः, छिं जितः बियादीपिन्‍त छिगु हे नांयागु निंतिं बचय् यानातयादिसँ। झीपिं थें तुं इपिं नं छप्‍पँ जुयाच्‍वनेमा।

यूहन्‍ना 17:11 ပူးပေါင်းရင်းမြစ်များ

भजनसंग्रहया सफू 79:9

हे परमेश्‍वर, जिमित ग्‍वाहालि यानाः बचय् यानादिसँ। थःगु नांया महिमाया निंतिं जिमिगु पापयात क्षमा यानादिसँ।

हितोपदेश 18:10

परमप्रभुयागु नां बल्‍लाःगु किल्‍ला थें खः। धर्मी मनूत थन वनाः थःगु रक्षा याये फइ।

यशैया 27:3

जि परमप्रभु, वयात सुसाःकुसाः याये। जिं उकी लः बियाच्‍वने। जिं चान्‍हि वयागु वास्‍ता याये, मखुसा वयात सुनानं स्‍यंकाबीफु।

यशैया 64:2

मिं झाःत च्‍या थें अले लः ग्‍वाराग्‍वारां दाय्‌कू थें, थः शत्रुतय्‌त थःगु शक्ति क्‍यनेत अले जाति– जातितय्‌त थरथर खाकेत छि क्‍वहां झासँ।

यर्मिया 14:21

छिगु नां तःधंकेत जिमित हेला यानादी मते। छिगु नांजाःगु सिंहासनयात क्‍वह्यंकादी मते। जिपिंलिसें चिनादियागु बाचायात लुमंकादिसँ, अले उकियात त्‍वाथुलादी मते।

यर्मिया 14:7

जिमिसं यानागु मभिंगु ज्‍यां जिमिगु विरोधय् साक्षी ब्‍यूसां हे परमप्रभु, छिगु नां तःधंकेत छुं ज्‍या यानादिसँ। जिमिसं तःकः मछि हे छितः त्‍वःतागु दु। जिमिसं छिगु विरोधय् पाप यानागु दु।

इजकिएल 20:22

तर जिं इमित पित हयागु खंपिं जातितय्‌गु न्‍ह्यःने जिगु नां बदनाम मजुइमा धकाः जिं थःगु ल्‍हाःयात पना, जिं जिगु नांया इज्‍जतयात रक्षा यायेगु ज्‍या याना।

इजकिएल 20:44

हे इस्राएलया घराना, छिमिगु मभिंगु पहःचहः व स्‍यंगु ज्‍याकथं मखु, तर जिं जिगु नांया इज्‍जतयात रक्षा यायेत जिं छिपिंलिसे व्‍यवहार यायेबलय् छिमिसं जि हे परमप्रभु खः धकाः सी। परमप्रभु परमेश्‍वरं धयादी।’”

इजकिएल 20:9

तर जिं अथे मयाना, छाय्‌धाःसा जिं जिगु नांया इज्‍जतयात रक्षा यायेगु ज्‍या याना। जिं इस्राएलीतय्‌त मिश्र देशं पितहःगु खंपिं जःखः च्‍वंगु जातितय्‌गु दथुइ जिं थःगु नांयात बदनाम जुइके मबिया।

मत्ती 10:16

“न्‍यँ, गुँखिचातय्‌गु हुलय् जिं छिमित फैचा थें यानाः छ्वयाच्‍वनागु दु। उकिं छिपिं सर्प थें चंख जुइमाः, अले सुकुभतु थें स्‍वजा जुइमाः।

मत्ती 5:48

अय्‌जूगुलिं स्‍वर्गय् दीम्‍ह छिमि बाः सिद्धम्‍ह खः, उकिं छिपिं नं अथे हे सिद्ध जु।

मत्ती 6:9

छिमिसं थथे प्रार्थना या – “‘हे झीम्‍ह स्‍वर्गय् च्‍वनादीम्‍ह परमेश्‍वर बाः, छिगु नां पवित्र जुइमा।

यूहन्‍ना 13:1

छुत्‍काराया नखः न्‍ह्यः येशूं थ्‍व संसारं बाःयाथाय् वनेगु ई वल धकाः सीकाः संसारय् च्‍वंपिं थः चेलातय्‌त माया यानादिल। वय्‌कलं अन्‍ततक हे इमित माया यानादिल।

यूहन्‍ना 13:3

बाःनं फुक्‍कं वय्‌कःयागु ल्‍हातय् बियादीगु दु, अले वय्‌कः परमेश्‍वरयाथासं झाःगु खः, अले परमेश्‍वरयाथाय् तुं वने त्‍यइन धकाः वय्‌कलं स्‍यू।

यूहन्‍ना 14:20

उबलय् हे जक जि बाःयाके, छिपिं जिके, अले जि छिमिके दु धकाः छिमिसं सी।

यूहन्‍ना 16:28

बाःया थासं जि थ्‍व संसारय् वयागु खः। आः थ्‍व संसारयात त्‍वःताः जि हानं बाःयाथाय् तुं लिहां वनेत्‍यना।”

यूहन्‍ना 16:33

जिगुपाखें छिमित शान्‍ति दयेमा धकाः जिं थथे धयाच्‍वनागु खः। थ्‍व संसारय् छिमित दुःख जुइ, अय्‌नं साहस या, जिं संसारयात त्‍याके धुन।”

यूहन्‍ना 17:23

छि जिके, अले जि इमिके दुगुलिं इपिं नं फुक्‍क छप्‍पँ जुइमा। थुकिं यानाः संसारं छिं जितः छ्वयाहयादीगु खः धकाः सी, अले जितः थें इमित नं छिं माया यानादी धकाः नं सी।”

यूहन्‍ना 17:25

“सत्‍यम्‍ह बाः, संसारं छितः म्‍हसीके मफुनि। तर जिं छितः म्‍हस्‍यू। छिं हे जितः छ्वयाहयादीगु खः धकाः थुमिसं स्‍यू।

यूहन्‍ना 17:6

“छिं जितः बियादीपिं संसारय् च्‍वंपिं मनूतय्‌त छिगु नां जिं म्‍हसीका बिया। इपिं छिकपिनि हे मनूत खः, अले इपिं छिं जितः बियादिल। इमिसं नं छिगु वचन मानय् यानाच्‍वंगु दु।

यूहन्‍ना 7:33

येशूं इमित धयादिल – “छुं ई तक जक जि छिमिथाय् दइतिनि, अले लिपा जि जितः छ्वया हयादीम्‍हय्‌सिथाय् तुं वने।

प्रेरित 3:21

फुक्‍कं न्‍हूकथं मिलय् मजुतले वय्‌कः स्‍वर्गय् हे च्‍वनादी। थ्‍व खँ परमेश्‍वरं न्‍हापांनिसें हे अगमवक्तातय्‌त धाय्‌कादीगु खः।

रोमी 12:5

थथे हे झीपिं नं यक्‍व दसां ख्रीष्‍टयागु म्‍हय् ला छम्‍ह हे जक खः। अले थीथी म्‍हब्‍वत छगू छगू यानाः मिलय् यानातःपिं खः।

रोमी 9:17

धर्मशास्‍त्रय् परमेश्‍वरं फारोयात थथे धयादीगु दु – “अय्‌नं जिगु शक्ति क्‍यनेत व पृथ्‍वीइ न्‍यंक जिगु नां कायेमा धकाः हे जिं छन्‍त म्‍वाकातयागु खः।”

१ कोरिन्‍थी 1:10

यःपिं दाजुकिजापिं, झी प्रभु येशू ख्रीष्‍टया नामय् छिमित जिगु बिन्‍ति दु – छिपिं सकसिनं छगू हे खँ ल्‍हायेगु या। छिमिगु दथुइ ल्‍वापु मजुइमा बरु छिपिं फुक्‍कं मिलय् जुयाः छगू हे बिचाः व छगू हे मन जुयाच्‍वनेगु त्‍वःते मते।

गलाती 3:28

अय्‌जूगुलिं आः यहूदीत व यहूदीमखुपिं छु हे मपात। दास व दासमखुपिं, अले मिजं व मिसा नं मपात। येशू ख्रीष्‍टयात विश्‍वास याःगुलिं छिपिं फुक्‍कं छम्‍ह हे जुल।

एफिसी 4:4

गथे परमेश्‍वरं छिमित छगू हे आशाया निंतिं सःतादीगु खः, अथे हे छिमिगु म्‍ह नं छगू हे, आत्‍मा नं छगू हे खः।

फिलिप्‍पी 2:9

अय्‌जूगुलिं परमेश्‍वरं वय्‌कःयात फुक्‍क स्‍वयाः नं तःधंकादिल, अले दक्‍वसिबय् तःधंगु नां नं छुनादिल।

हिब्रू 1:3

वय्‌कलं नवानादीगु खँय् हे थ्‍व संसार न्‍ह्यानाच्‍वंगु दु। परमेश्‍वरयागु महिमाया जः वय्‌कःयाके दु। वय्‌कः व परमेश्‍वर उतिग्‍यं। वय्‌कःया शक्ति दुगु वचनं हे थ्‍व संसार न्‍ह्यानाच्‍वंगु दु। मनूतय्‌त पापं छुतय् यानादी धुंकाः वय्‌कः दक्‍वसिबय् तःधंम्‍ह परमेश्‍वरयागु जवय् च्‍वनादीगु दु।

हिब्रू 9:24

ख्रीष्‍ट मनूतय्‌सं स्‍वर्गयागु किपालु थें जक यानाः दय्‌कातःगु महा-पवित्रगु थाय् दुने मखु, बरु झीगु निंतिं स्‍वर्गय् हे परमेश्‍वरया न्‍ह्यःने झायादीगु दु।

याकूब 4:4

हे विश्‍वास त्‍वःतूपिं मनूत, संसारयात माया याइपिं परमेश्‍वरया शत्रु खः धकाः छिमिसं मस्‍यू ला? संसार नाप मिलय् जुइपिन्‍सं परमेश्‍वरयात शत्रु याइ।

१ पत्रुस 1:5

परमेश्‍वरयात छिमिसं क्‍वात्तुक विश्‍वास यानाच्‍वंगुलिं वय्‌कःयागु शक्तिं छिमित मुक्ति बियादी। दकलय् लिपा थ्‍व मुक्ति छिमिगु न्‍ह्यःने खनेदः वइ।

१ यूहन्‍ना 3:12

झीपिं कयिन थें जुइ मज्‍यू। कयिन शैतानया मनू जूगुलिं वं थः हे किजा हाबिलयात स्‍यात। कयिनं थः हे किजायात छाय् स्‍यात? कयिन शैतानया मनू जूगुलिं वया किजां भिंगु बांलाःगु याना जूगु स्‍वये मफयाः वं थः किजायात स्‍यात।

१ यूहन्‍ना 5:19

झीपिं परमेश्‍वरया सन्‍तान खः, अले थ्‍व संसारय् च्‍वंपिं मेपिं फुक्‍क मनूत शैतानया मनूत खः धकाः नं झीसं स्‍यू।

यहूदा 1:1

याकूबया किजा व येशू ख्रीष्‍टया दास यहूदापाखें परमेश्‍वरं सःतादीपिन्‍त, परमेश्‍वर बाःनं माया यानातःपिन्‍त, अले येशू ख्रीष्‍टं बचय् यानातःपिन्‍त ज्‍वजलपा।

यहूदा 1:24

छिमित दोष मदय्‌काः परमेश्‍वरया न्‍ह्यःने हयादीम्‍ह झी प्रभुयागु नां सदां तःधना च्‍वनेमा। थ्‍व हे प्रभुं छिमित पाप याकेबी मखु। थ्‍व हे प्रभुं छिमित आनन्‍दं तयादी।

प्रकाश 15:4

हे परमप्रभु, सु जक छि खनाः मग्‍याइ? सुनां जक छिगु नांयात तःधं धकाः मानय् मयाइ? छि हे जक पवित्रम्‍ह खः। छिगु पाय्‌छिगु बिचाः व न्‍याय फुक्‍कसिनं सी धुंकूगुलिं फुक्‍क जातित छिथाय् छितः आराधना यायेत वइ।”

प्रकाश 19:12

वय्‌कःयागु मिखा मित्‍याः थें च्‍वं। वय्‌कःयागु छेनय् यक्‍व हे श्रीपेच दु। वय्‌कःयागु म्‍हय् च्‍वयातःगु नां सुनानं हे मस्‍यू, वय्‌कलं जक स्‍यू।

प्रकाश 4:8

थ्‍व प्‍यम्‍ह जीवात्‍मातय्‌के खुपा खुपा पपू दु, अले दुनेपिने फुक्‍कभनं मिखाया मिखा दु। थुमिसं चच्‍छि न्‍हिच्‍छिं मदिक्‍क थथे म्‍ये हालाच्‍वनी। “पवित्र, पवित्र, पवित्रम्‍ह दक्‍वसिबय् तःधंम्‍ह व शक्ति दुम्‍ह परमप्रभु परमेश्‍वर। वय्‌कः न्‍हापांनिसें दीम्‍ह, आः नं दीम्‍ह, अले लिपा नं दीम्‍ह खः।”