यूहन्‍ना 14:9 - नेवाः बाइबल

⁹ वय्‌कलं धयादिल – “फिलिप, थुलिमछि दये धुंकल छ जि नाप जूगु, आः तक नं छं जितः म्‍हसीके मफुनि ला? सुनां जितः खन, वं बाःयात नं खने धुंकल धासेंलि हानं ‘जिमित बाः छकः क्‍यँ’ धकाः धायेमानि ला?

यूहन्‍ना 14:9 ပူးပေါင်းရင်းမြစ်များ

उत्‍पत्ति 26:9

अबीमेलेकं इसहाकयात दुने सःताः धाल, “रिबेका छंम्‍ह कलाः खः, छाय् वयात केहेँ धकाः धयागु?” इसहाकं धाल, “वयागु लागि थनच्‍वंपिं मनूतय्‌सं जितः स्‍याइ धकाः।”

भजनसंग्रहया सफू 11:1

जि परमप्रभुया शरणय् वने, उकिं छिमिसं जितः गथे धाये फइ, “झंगः थें ब्‍वयाः गुँच्‍वकाय् हुँ!”

यर्मिया 2:23

“जिं थःत अशुद्ध यानागु मदु, बालद्यःयात पुजा यानागु मदु धकाः छं गय् यानाः धाये फुगु? छं बेसीइ गज्‍याःगु वेश्‍याया व्‍यवहार यात? अन छं छु यात व बिचाः या। छ येचाःम्‍ह ऊँट थें थुखे उखे तसकं ब्‍वाँय् जुइगु!

मर्कूस 9:19

अले वय्‌कलं धयादिल – “छिमिसं गथे जक विश्‍वास याये मफुगु? जि छिपिंनाप गुलि हे च्‍वनीतिनि धकाः? जिं छिमिगु निंतिं गुलि जक दुःख सह यानाच्‍वनेगु? मचायात थन हजि।”

लूका 12:56

धात्‍थें हे, छिपिं निपाः ख्‍वाःपाः दुपिं खः। आकाशय् व पृथ्‍वीइ जुइगु खँ ला छिमिसं सीके फु धासेंलि थ्‍व ईयात जक गय् म्‍हसीके मफुगु?

यूहन्‍ना 1:14

वचन मनू जुयाः झीपिं नाप च्‍वं झाल। वय्‌कः दया माया, अले सत्‍यं जाःम्‍ह खः। जिमिसं वय्‌कःया महिमा खना, गुगु महिमा बाःया याकः काय्‌या थें च्‍वं।

यूहन्‍ना 10:30

जि व जिम्‍ह बाः छम्‍ह हे खः।”

यूहन्‍ना 12:45

अथे हे जितः खंम्‍हय्‌सिनं जितः खंगु मखु, बरु जितः छ्वया हयादीम्‍हय्‌सित खंगु खः।

यूहन्‍ना 14:20

उबलय् हे जक जि बाःयाके, छिपिं जिके, अले जि छिमिके दु धकाः छिमिसं सी।

यूहन्‍ना 14:7

छिमिसं जितः म्‍हस्‍यूगु जूसा जिमि बाःयात नं म्‍हसी। आवंलि छिमिसं वय्‌कःयात म्‍हसी अले खंगु नं दु।”

यूहन्‍ना 8:19

अय्‌जूगुलिं इमिसं वय्‌कःयात थथे धाल – “छिमि बाः गन दु लय्?” वय्‌कलं लिसः बियादिल – “छिकपिन्‍सं न जितः म्‍हस्‍यू, न जिमि बाःयात म्‍हस्‍यू। छिकपिन्‍सं जितः म्‍हस्‍यूगु जूसा जिमि बाःयात नं म्‍हसी।”

१ कोरिन्‍थी 15:12

जिमिसं छिमित “सी धुंकूम्‍ह ख्रीष्‍ट हानं म्‍वानावल” धकाः न्‍यंका जुया धाःसा हानं छिपिं मध्‍ये गुम्‍हं गुम्‍हय्‌सिनं सीम्‍ह म्‍वाना वइ मखु धकाः गथे धायेफत?

फिलिप्‍पी 2:6

ख्रीष्‍ट येशू परमेश्‍वर हे जुयाः नं वय्‌कलं थःत परमेश्‍वर भाःपिया मदी।

कलस्‍सी 1:15

येशू ख्रीष्‍ट हे खने मदुम्‍ह परमेश्‍वरयागु खनेदुगु रूप खः। वय्‌कः थ्‍व संसार हे सृष्‍टि मयाःनिबलय् निसें दुम्‍ह खः।

हिब्रू 1:3

वय्‌कलं नवानादीगु खँय् हे थ्‍व संसार न्‍ह्यानाच्‍वंगु दु। परमेश्‍वरयागु महिमाया जः वय्‌कःयाके दु। वय्‌कः व परमेश्‍वर उतिग्‍यं। वय्‌कःया शक्ति दुगु वचनं हे थ्‍व संसार न्‍ह्यानाच्‍वंगु दु। मनूतय्‌त पापं छुतय् यानादी धुंकाः वय्‌कः दक्‍वसिबय् तःधंम्‍ह परमेश्‍वरयागु जवय् च्‍वनादीगु दु।

१ यूहन्‍ना 5:20

परमेश्‍वरया काय् झायाः झीत धात्‍थेंयाम्‍ह परमेश्‍वर म्‍हसीकादिल। थ्‍व खँ झीसं स्‍यू। धात्‍थेंयाम्‍ह परमेश्‍वरया काय् येशू ख्रीष्‍टनाप झीगु जीवन नं प्‍यपुनाच्‍वंगु दु। थ्‍व हे सत्‍य परमेश्‍वर खः, अले हानं थ्‍व हे परमेश्‍वर अनन्‍त जीवन नं खः।