यर्मिया 8:2 - नेवाः बाइबल

² मनूतय्‌सं माया यानाः सेवा याःगु, सल्‍लाह काःगु व पुजा याःगु सूर्य, तिमिला व आकाशया नगुतय्‌गु न्‍ह्यःने उपिं क्‍वँय्‌त ब्‍वइ। मुनाः चिहानय् थुनीगु पलेसा उपिं क्‍वँय् बँय् साः थें लानाच्‍वनी।

यर्मिया 8:2 ပူးပေါင်းရင်းမြစ်များ

२ राजा 17:16

इमिसं परमप्रभु इमि परमेश्‍वरया फुक्‍क आज्ञा त्‍वःतल, अले पुजा यायेत धातुया निम्‍ह द्वहं दय्‌कल। इमिसं अशेरा द्यःमय्‌जुया छगू थां दय्‌कल। इमिसं आकाशया नगुयात भागि यात, बालद्यःयागु सेवा यात।

२ राजा 21:3

वं थः बौ हिजकिया जुजुं नाश यानाब्‍यूगु पुजा याइगु थाय्‌त हाकनं दय्‌कल। अले इस्राएलयाम्‍ह जुजु आहाबं याःथें हे वं बालद्यःयात पुजा याइगु वेदीत व अशेरा द्यःमय्‌जुयागु थां दय्‌कल। वं आकाशय् दुगु नगुतय्‌त नं भागियानाः पुजायात।

२ राजा 21:5

उलि जक मखु वं परमप्रभुया देगःया निगुलिं चुकय् नं आकाशया नगुत पुजा याइगु वेदीत दय्‌कल।

२ राजा 23:5

अले वं यहूदाया जुजुपिन्‍सं यहूदाया शहर शहरय् व यरूशलेमया लिक्‍क लाःगु पुजा याइगु थासय् बालद्यः, सूर्य, तिमिला, नगुतय्‌गु लागि धुपाँय् च्‍याकेत यहूदायापिं जुजुपिन्‍सं ल्‍ययातःपिं द्यःपालातय्‌त लिकाल।

भजनसंग्रहया सफू 53:5

थन इमित गुबलें हे मजूकथं ग्‍याःचिकुं भुनी। छाय्‌धाःसा परमेश्‍वरं थःमनूतय्‌गु विरोधय् घेराबियाच्‍वंपिनिगु क्‍वँय् उखेंथुखें ह्वलाबी। वय्‌कलं इमित मछालापुकाबी, छाय्‌धाःसा वय्‌कलं इमित त्‍वःतादी।

भजनसंग्रहया सफू 83:10

इपिं एन्‍दोरय् नाश जुल, अले जमिनया लागि साः जुल।

भजनसंग्रहया सफू 83:11

इमि भारदारतय्‌त ओरेब व जएब थें यानादिसँ। इमि सकलें राजकुमारतय्‌त जेबह व सल्‍मुन्‍ना थें यानादिसँ।

उपदेशक 6:3

छम्‍ह मनूया सछिम्‍ह काय्‌पिं दयाः यक्‍व दँ तक म्‍वात, तर व यक्‍व दँ तक म्‍वानाः नं थःगु बांलाःगु अवस्‍थापाखें वयागु आत्‍मा लय्‌मताःसा अले वयात सीबलय् खःकथं मथुन धाःसा अज्‍याःम्‍ह मनू स्‍वयाः ला बूबलय् सीम्‍ह मचा हे बांलाः।

यर्मिया 14:16

अले अगमवाणी ल्‍हानाच्‍वंपिं मनूतय्‌त अनिकाल व तरवारं सीधुंकाः यरूशलेमया लँय् वांछ्वइ। इमित व इमि कलाःपिन्‍त वा काय् म्‍ह्याय्‌पिन्‍त थुनीपिं सुं दइ मखु। जिं इमिके इमित ल्‍वःगु विपत्तित प्‍वंकाबी।

यर्मिया 16:11

अबलय् छं इमित थथे धा, ‘छिमि तापाःबाज्‍यापिन्‍सं जितः त्‍वःताः मेपिं द्यःतय्‌त पुजा यात अले सेवा यात,’ परमप्रभुं धयादी। ‘इमिसं जिगु व्‍यवस्‍था पालन मयाः।

यर्मिया 16:4

“इपिं ग्‍यानापुगु ल्‍वचं सी। इमिगु लागिं सुं नं ख्‍वइ मखु वा सुनानं इमित थुनी मखु। इपिं बँय् फोहर थें लानाच्‍वनी। इपिं तरवार व अनिकालं नाश जुइ, इमिगु सीम्‍ह आकाशयापिं झंगःपन्छित व पृथ्‍वीयापिं पशुतय्‌गु नयेगु नसा जुइ।”

यर्मिया 16:6

“अथे जुयाः तःधंपिं व चिधंपिं निखलः हे थ्‍व देशय् सी। इमित सुनानं थुनी मखु। सुं नं इमिगु निंतिं ख्‍वइ मखु, सुनानं थःगु म्‍हय् घाः याइ मखु, सुनानं छ्यंयागु सँ खाइ मखु।

यर्मिया 19:13

यरूशलेमया छेँत व यहूदाया जुजुपिनिगु दरबार, गुकियागु कःसिइ कःसिइ आकाशया फुक्‍क नगुया लागि धुपाँय् च्‍याकल, अले मेपिं द्यःतय्‌गु निंतिं त्‍वँसाबलि छाल, उपिं फुक्‍क तोपेत थें अशुद्ध जुइ।’”

यर्मिया 22:19

बरु वयात गधायात थें थुनी, वयात साला यंकाः यरूशलेमया ध्‍वाखाया पिने वांछ्वयाबी।”

यर्मिया 25:33

उबलय् परमप्रभुं स्‍यानादीपिनिगु सीम्‍ह पृथ्‍वीया छगू कुन्‍चांनिसें मेगु कुन्‍चा तक लानाच्‍वनी। इमिगु लागि ख्‍वइपिं सुं नं दइ मखु। इमिगु सीम्‍ह सुनां मुनी नं मखु थुनी नं मखु। सीम्‍हत जमिनय् सौ थें लानाच्‍वनी।

यर्मिया 31:40

सीम्‍ह व नौ वांछ्वइगु फुक्‍क गाः, पुर्बपाखे किद्रोन खुसि तकयागु फुक्‍क बुँ व सल ध्‍वाखाया कुन्‍चा तक परमप्रभुया निंतिं पवित्र जुइ। व शहरयात आवंलि कब्‍जा याइ मखु वा भज्‍यंक नाश याइ मखु।”

यर्मिया 36:30

उकिं यहूदाया जुजु यहोयाकीमया बारे परमप्रभुं थथे धयादी – दाऊदया गद्दीइ च्‍वनीम्‍ह वया सुं सन्‍तान दइ मखु। वयागु सीम्‍ह पिने वांछ्वइ अले न्‍हिनय् निभालय् व चान्‍हय् सुतिलखय् लानाच्‍वनी।

यर्मिया 9:20

हे मिस्‍त, परमप्रभुया थ्‍व वचन न्‍यँ, वय्‌कःया वचन ध्‍यान बियाः न्‍यँ! थः म्‍ह्याय्‌पिन्‍त ख्‍वयेगु स्‍यँ, छम्‍हय्‌सिनं मेम्‍हय्‌सित विलापया म्‍ये स्‍यँ!

यर्मिया 9:21

छाय्‌धाःसा लँय् लँय् काय् म्‍ह्याय्‌पिन्‍त नाश यायेत व चुक चुकय् ल्‍याय्‌म्‍हपिन्‍त नाश यायेत मृत्‍यु झीगु झ्‍यालं, झीगु किल्‍लाय् दुने दुहां वःगु दु।

यर्मिया 9:22

छं थथे धा, “परमप्रभुं थथे धयादी, “‘मनूतय्‌गु सीम्‍ह बुँइ साः थें, छ्व लइपिन्‍सं त्‍वःताः थकूगु अन्‍नया दं थें लानाच्‍वनी, उकियात मुनीपिं सुं नं दइ मखु।’”

इजकिएल 29:5

छ व छंगु खुसिचायापिं फुक्‍क न्‍यातय्‌त जिं मरुभूमिइ त्‍वःताबी। छ चक्‍कंगु ख्‍यलय् क्‍वःदली। छन्‍त सुनानं मुंकी मखु वा लानाकाइ मखु। जिं छन्‍त पृथ्‍वीयापिं पशुत व आकाशयापिं झंगःपन्छितय्‌गु आहारा यानाबी।

इजकिएल 39:5

छ चक्‍कंगु मैदानय् हे ग्‍वतुली, छाय्‌धाःसा जि, परमप्रभु परमेश्‍वरं थ्‍व घोषणा यानागु खः।

इजकिएल 6:5

जिं इस्राएलीतय्‌गु सीम्‍हत इमिगु मूर्तितय्‌गु न्‍ह्यःने तयाबी। जिं छिमिगु क्‍वँय् छिमिगु हे वेदीया प्‍यखें ह्वलाबी।

इजकिएल 8:16

अले वय्‌कलं जितः परमप्रभुया देगःयागु दुनेया चुकय् हयादिल। अन वेदी व दलानया दथुइ देगःया ध्‍वाखाय् नीन्‍याम्‍ह ति मनू दु। थःगु जँधू परमप्रभुया देगःपाखे व ख्‍वाः धाःसा पुर्बपाखे स्‍वय्‌काः इमिसं पुर्बपाखे दुगु सूर्ययात भागि यानाच्‍वंगु दु।

सपन्‍याह 1:17

“जिं मनूतय्‌त दुःखकष्‍ट हयाबी, उबलय् इपिं कांपिं थें न्‍यासि वनी, छाय्‌धाःसा इमिसं परमप्रभुयागु विरोधय् पाप याःगु दु। इमिगु हि धू थें व इमिगु ला सउ थें वांछ्वइ।

सपन्‍याह 1:5

छेँयागु कःसि च्‍वनाः नगुत पुज्‍याइपिन्‍त, क्‍वछुनाः परमप्रभुया नामं पाफया नं मोलोखया नामं नं पाफइपिन्‍त,

प्रेरित 7:42

अय्‌जूगुलिं परमेश्‍वरं इमित त्‍वःतादिल, अले इमित आकाशय् च्‍वंगु नगुतय्‌त हे पुजा याकेबियादिल। थ्‍व हे खँ अगमवक्तातय्‌सं थथे च्‍वया थकूगु दु – “‘हे इस्राएलीत, पिइदँ तक मरुभूमिइ च्‍वनाबलय् छिमिसं जितः बलि बियागु दु ला?

व्‍यवस्‍था 17:3

जिगु उजं मानय् मयासें द्यःत वा सूर्य, तिमिला वा आकाशया नगुतय्‌गु पुजा याःगु दुसा वा इमित भागि याःगु दुसा,

व्‍यवस्‍था 4:19

छिमिसं आकाशपाखे थस्‍वइबलय् अन दुगु सूर्य, तिमिला, नगुत व फुक्‍क ग्रह नक्षत्रतय्‌त खनाः उमित भागियाये मते, पुजा नं याये मते। उपिं परमप्रभुं पृथ्‍वीया फुक्‍क जातितय्‌गु निंतिं बियादीगु खः।