यर्मिया 50:3 - नेवाः बाइबल

³ छाय्‌धाःसा उत्तरपाखें छगू जातिं वयात हमला याइ, अले वयागु देशयात झिजांमिजां दंगुथाय् यानाबी। अन सुं च्‍वनी मखु, मनूत व पशुत निथिं बिस्‍युं वनी।”

यर्मिया 50:3 ပူးပေါင်းရင်းမြစ်များ

उत्‍पत्ति 6:7

अले परमप्रभुं धयादिल, “जिं सृष्‍टि यानापिं फुक्‍क मनूतय्‌त पृथ्‍वीं न्‍हंकाछ्वयाबी। अज्‍ज ला फुक्‍क पशु, बँय्‌ घिसय् जुयाजुइपिं जन्‍तुत व आकाशय् च्‍वंपिं पंक्षीतय्‌त तकं न्‍हंकाछ्वयाबी। छाय्‌धाःसा थुमित सृष्‍टि यानाः जि पस्‍ताय् चाये धुन।”

प्रस्‍थान 12:12

“उखुन्‍हु हे चान्‍हय् जि मिश्र जुयाः वने। अले मिश्रया न्‍हापां बूपिं मनूत व पशुत फुक्‍कं स्‍यानाबी। मिश्रया फुक्‍क द्यःतय्‌त सजाँय बी। जि परमप्रभु खः।

यशैया 41:25

“जिं सुं छम्‍हय्‌सित उत्तरपाखें ल्‍ययागु दु अले व वइ। पुर्बं वयाः वं जिगु नां काइ। भ्‍यातनाःयात न्‍हुतुन्‍हू थें अले कुमालं चा न्‍हुतुन्‍हू थें वं शासकतय्‌त न्‍हुइ।

यशैया 45:1

“परमप्रभुं थम्‍हं अभिषेक यानादीम्‍ह कोरेसयात धयादी, जात जातितय्‌त त्‍याकेत, जुजुतय्‌गु ल्‍हातं अधिकार लाकाकायेत, शहर शहरया मू ध्‍वाखात चाय्‌केत व ध्‍वाखात वयागु विरोधय् गुबलें तीमफय्‌मा धकाः जिं वयात शक्ति बियागु दु, जि परमप्रभुं जुजु कोरेसयात थथे धाये,

यर्मिया 21:6

जिं थ्‍व शहरय् दुपिं मनूत व पशुत निखलःसित हे स्‍यानाबी। इपिं महामारीं सी।

यर्मिया 50:9

छाय्‌धाःसा स्‍व! जिं उत्तरयागु देशं ततःधंगु जातियात ग्‍वाकाः इमिगु पुचःयात बेबिलोनया विरोधय् हये। इमिसं बेबिलोनया विरोधय् लडाइँया लागि तयारी याइ, अले वयात उत्तरपाखें कब्‍जा याइ। इमिगु वाण बहादुर सिपाइँतय्‌गु थें जुइ, गुगु अथें लिहांवनी मखु।

यर्मिया 51:11

“वाण च्‍वामुकि! ढालत का! परमप्रभुं मादीतय् जुजुपिन्‍त ग्‍वाकादीगु दु, छाय्‌धाःसा बेबिलोनयात नाश यायेगु हे वय्‌कःया बिचाः खः। परमप्रभुं बदला कयादी, थःगु देगःया निंतिं बदला।

यर्मिया 51:48

अबलय् स्‍वर्ग व पृथ्‍वी अले उकी दुपिं फुक्‍क बेबिलोन बूगुलिं लय्‌तायाः चिल्‍लाय् दनाः हाली, छाय्‌धाःसा उत्तरपाखें नाश याइपिन्‍सं वयात हमला याइ,” परमप्रभुं धयादी।

यर्मिया 51:62

अनंलि धा, ‘हे परमप्रभु, छिं थ्‍व थाय्‌यात नाश याये धयादीगु दु, अले थुकी न मनू च्‍वनी न पशु च्‍वनी, थ्‍व सदांया निंतिं झिजांमिजां दंगुथाय् जुइ।’

यर्मिया 7:20

उकिं परमप्रभु परमेश्‍वरं धयादी, “थ्‍व थासय् जिं जिगु तं प्‍वंकाबी। मनू व पशु, ख्‍यलय् च्‍वंगु सिमा व बुँया बाली प्‍वंकाबी। जिगु तं मि थें च्‍यानाच्‍वनी, सुनानं उकियात क्‍वलाके फइ मखु।”

यर्मिया 9:10

जिं धया– जि पहाडतय्‌गु लागि ख्‍वये, जि मरुभूमिइ दुगु घाँय्‌ख्‍यःया निंतिं ख्‍वये, छाय्‌धाःसा व गने धुंकल। सुं नं अनं यात्रा याइ मखु। अन सा द्वहं मन्‍त। पशुत व झंगःत बिस्‍युं वने धुंकल।

यर्मिया 9:11

परमप्रभुं धयादी, “जिं यरूशलेमयात नाश यानाः ध्‍वंचात च्‍वनीगु नाशया द्वँ दय्‌काबी, यहूदाया शहरतय्‌त झिजांमिजां दंगुथाय् यानाबी। अन सुं नं च्‍वने फइ मखु।”

सपन्‍याह 1:3

“जिं दक्‍व मनूत व पशुत निथिंयात भज्‍यंक नाश यानाबी। जिं आकाशय् ब्‍वइपिं झंगःत व समुद्रय् च्‍वंपिं न्‍यातय्‌त भज्‍यंक नाश यानाबी। जिं फुक्‍क मनूजातियात पृथ्‍वीं मदय्‌का छ्वयेबलय् दुष्‍टतय्‌गु निंतिं ल्‍वहंया कुचाकाचाया द्वँ जक दइ,” परमप्रभुं धयादी।