यर्मिया 49:36 - नेवाः बाइबल

³⁶ जिं एलामया विरोधय् आकाशया प्‍यखेंपाखें प्‍यंगू फय् हयाबी। जिं इमित छ्यालब्‍याल यानाबी अले एलामं बिस्‍युं वंपिं मथ्‍यंगु जाति छुं नं दइ मखु।

यर्मिया 49:36 ပူးပေါင်းရင်းမြစ်များ

भजनसंग्रहया सफू 147:2

वय्‌कलं यरूशलेमयात हानं दय्‌कादी, ज्‍वनाः परदेशय् यंकूपिन्‍त वय्‌कलं यरूशलेमय् लित हयादी।

यशैया 11:12

वय्‌कलं जाति-जातितय्‌गु निंतिं छगू चिंया झण्‍डा धस्‍वाकादी अले त्‍वःतकाहःपिं इस्राएलया मनूत व छ्यालब्‍याल जुयाच्‍वंपिं यहूदाया मनूतय्‌त पृथ्‍वीया कूंकुलामं मुंकाः छथाय् हयादी।

यशैया 27:13

व दिंखुन्‍हु छगू तःधंगु तुरही पुइ। अश्‍शूरय् नाश जूपिं व मिश्र देशय् ज्‍वनायंकूपिं वयाः यरूशलेमया पवित्र पर्वतय् परमप्रभुया आराधना याइ।

यशैया 56:8

ज्‍वनायंकूपिं त्‍वःतकाः हःम्‍ह परमप्रभु परमेश्‍वरं थथे घोषणा यानादी, “छथाय् मुनाच्‍वंपिं बाहेक जिं मेपिन्‍त नं इपिंनापं हे छथाय् मुंके हये।”

यर्मिया 30:17

परमप्रभुं धयादी, ‘जिं छन्‍त वासः यानाः छंगु घाः लाय्‌काबी, छाय्‌धाःसा छन्‍त सकसिनं अलग यानातःम्‍ह सुनां वास्‍ता मयाःम्‍ह सियोन धकाः धाइगु।’

यर्मिया 49:32

इमि ऊँटत, यक्‍व सा द्वहं व फैच्‍वलय्‌त लुतय् यानाः यंकी। ताताःपाःगु थासय् च्‍वंपिन्‍त जिं प्‍यखेंपाखे छ्यालब्‍याल यानाबी। अले इमिगु प्‍यखेंपाखें इमिके विपत्ति हये,” परमप्रभुं धयादी।

इजकिएल 5:10

उकिं छंगु दथुइ मांबौनं थः मस्‍तय्‌त व मस्‍तय्‌सं थः मां बौयात नइ। छाय्‌धाःसा जिं छन्‍त सजाँय बी, अले छिमि म्‍वानाच्‍वंपिन्‍त फसय् छ्यालब्‍याल यानाबी।

इजकिएल 5:12

छिमि स्‍वब्‍वय् छब्‍व मनूत महामारी वा अनिकालं सी, अले स्‍वब्‍वय् छब्‍व छंगु पःखाःया पिने तरवारं सी, अले स्‍वब्‍वय् छब्‍वयात जिं प्‍यखेरं छ्यालब्‍याल यानाबी। अले नांगा तरवार ज्‍वनाः जिं इमित ली।

दानिएल 11:4

अय्‌नं व बल्‍लायेवं वयागु देश कुचा कुचा जुयाः उत्तर, दच्‍छिन, पुर्ब व पच्‍छिमय् ब्‍वथली। व देश वया सन्‍तानतय्‌त दइ मखु, मेपिन्‍सं वयागु पलेसा शासन याइ। अय्‌नं इपिं व थें बल्‍लाइ मखु छाय्‌धाःसा वयागु साम्राज्‍य लाकाकयाः मेपिन्‍त बीगु जुइ।”

दानिएल 8:22

व त्‍वधूगु नेकूया थासय् बुयावःगु प्‍यंगू नेकूया अर्थ थथे खः – व हे देशं प्‍यंगू देश पिहां वइ, तर इमिके उलि बल दइ मखु।

दानिएल 8:8

अले दुगु झन तःधंछु जुल, व तसकं बल्‍लाःबलय् वयागु नेकू त्‍वधुल। उगु थासय् प्‍यखेपाखे स्‍वःगु प्‍यपु अजू चाइपुगु नेकू बुयावल।

आमोस 9:9

“जिं आज्ञा बी, इस्राएलया घरानायात दक्‍व जातितय्‌गु दथुइ हासाय् अन्‍न हाःगु थें जिं हाये, छग्‍वः चिग्‍वःगु ल्‍वहं नं बँय् कुतुं वनी मखु।

जकरिया 6:5

स्‍वर्गदूतं जितः धाल, “थुपिं स्‍वर्गया प्‍यंगू आत्‍मा खः। थुपिं दक्‍व पृथ्‍वीयाम्‍ह परमप्रभुया न्‍ह्यःने दना च्‍वनीपिं खः, अय्‌नं आः पिहां वःगु दु।

व्‍यवस्‍था 28:25

परमप्रभुं छिमित शत्रुतय्‌गु न्‍ह्यःने बुकेबी। इपिंलिसें ल्‍वायेत छिपिं छपु लँ जुयाः वइ अय्‌नं न्‍हय्‌पु लँ जुयाः बिस्‍युं वनी। छिपिं पृथ्‍वी न्‍यंकंया निंतिं भयया खँ जुइ।

व्‍यवस्‍था 28:64

अले पृथ्‍वीयागु छगू कुन्‍चांनिसें मेगु कुन्‍चा तक थीथी जातिया दथुइ परमप्रभुं छिमित छ्यालब्‍याल यानादी। अले अन च्‍वनाः छिमिसं थःपिन्‍सं व थः पुर्खां म्‍हमस्‍यूपिं सिँ व ल्‍वहंयापिं मेपिं द्यःतय्‌त पुजा याइ।

प्रकाश 7:1

अनं लिपा सिमा, समुद्र व पृथ्‍वीइ फय् वने मजीक प्‍यम्‍ह स्‍वर्गदूतत पृथ्‍वीयागु प्‍यंगू कुन्‍चाय् च्‍वनाः फय् प्‍वाः तिनाच्‍वंगु जिं खना।