यर्मिया 49:3 - नेवाः बाइबल

³ “हे हेश्‍बोन, ख्‍व! छाय्‌धाःसा ऐ शहर नाश जुल। हे रब्‍बायापिं मनूत, चिल्‍लाय् दनाः ख्‍व! भांग्रा हिनाः दुखं च्‍वँ अले ख्‍वख्‍वं पःखाःया दुने थुखे उखे ब्‍वाँय् हुँ! छाय्‌धाःसा छिमि द्यः मोलोखयात, वया पुजाहारीत व हाकिमतनापं मेगु देशय् यंकी।

यर्मिया 49:3 ပူးပေါင်းရင်းမြစ်များ

२ शमूएल 11:1

बसन्‍तया इलय् जुजुपिं लडाइँ यायेत पिहां वनेगु इलय् दाऊदं योआब व थः मेपिं कप्‍तानत व फुक्‍क इस्राएली सिपाइँतय्‌त लडाइँ यायेत छ्वल। इमिसं अम्‍मोनीतय्‌त नाश यानाबिल, अले रब्‍बा शहरयात घेरय् यात। दाऊद धाःसा यरूशलेमय् हे च्‍वन।

१ राजा 11:33

जिं थथे याये, छाय्‌धाःसा इमिसं जितः त्‍वःताः सीदोनीतय् अश्‍तोरेत द्यःमय्‌जु, मोआबीतय् द्यः कमोश व अम्‍मोनीतय् द्यः मोलोखयात पुजा यात। इपिं जिगु लँपुइ जूगु मदु, जितः यःगु ज्‍या याःगु मदु, सोलोमनया अबु दाऊदं मानय् याःथें जिगु विधि व नियम इमिसं मानय् याःगु मदु।

१ राजा 11:5

वं सीदोनीतय् अश्‍तोरेत द्यःमय्‌जु व अम्‍मोनीतय् घच्‍चाइपूम्‍ह द्यः मोलोखयात पुजायात।

२ राजा 23:13

वं सोलोमन जुजुं यरूशलेमया पुर्बपाखे, बिनाशया डाँडाया दच्‍छिन कुन्‍चाय् सीदोनीतय् घच्‍चाइपूम्‍ह द्यःमय्‌जु अश्‍तोरेत, मोआबीतय् घच्‍चाइपूम्‍ह द्यः कमोश व अम्‍मोनीतय् घच्‍चाइपूम्‍ह द्यः मोलेखया निंतिं दय्‌कूगु पुजा याइगु थाय्‌त अशुद्ध यानाबिल।

एज्रा 2:28

बेथेल व ऐयापिं मनूत २२३ म्‍ह

यशैया 13:6

ततःसलं हालाः ख्‍व! परमप्रभुया दिं लिक्‍क हे वःगु दु। व दिनय् दक्‍व शक्ति दुम्‍ह परमप्रभुं नाश यानादी।

यशैया 14:31

हे शहरया मू ध्‍वाखात तःसलं ख्‍व! छिपिं सकलें पलिश्‍तीतय्‌सं भय का! उत्तरपाखें कुँया सुपाँय् वयाच्‍वंगु दु, वया सिपाइँतय् झ्‍वलय् छम्‍ह नं ग्‍याइ मखु।

यशैया 15:2

दीबोन ख्‍वयेत देगलय् अले अन च्‍वंगु पुजा यायेगु थासय् थाहां वन। नेबो व मेदबाया निंतिं मोआब ह्वाँय्‌ह्वाँय् ख्‍वल। फुक्‍क सँ खाःगु दु, अले फुक्‍क दाह्री खाःगु दु।

यशैया 16:7

अथे जुयाः मोआबीत थःपिनिगु दुःखकष्‍टया कारणं ख्‍वयेमाली। इपिं सकलें मोआबया निंतिं विलाप याइ अले कीर-हरेशेतया किसमिसया ज्‍वाँय्‌या निंतिं छिमिसं ख्‍वख्‍वं बिलाप या।

यशैया 23:1

टुरोसयाबारे अगमवाणी – अय् तर्शीशया जहाज, विलाप या, छाय्‌धाःसा टुरोसयात नाश याये धुंकूगु दु अले अन न छखा छेँ दु, न जहाजत दिकेगु थाय् दु। साइप्रसं छगू खँ इमिथाय् वःगु दु।

यशैया 23:6

तर्शीशपाखे हुँ! अय् समुद्रया सिथय्‌यापिं मनूत विलाप या!

यर्मिया 4:8

अथे जुयाः भांग्राया वसः फ्‍यु। ह्वाँय्‌ह्वाँय् ख्‍व, छाय्‌धाःसा परमप्रभु आः तक नं झीपिं खनाः तंचायाच्‍वनादीगु दु।

यर्मिया 46:25

दक्‍व शक्ति दुम्‍ह परमप्रभु, इस्राएलया परमेश्‍वरं धयादी, “स्‍व, जिं थःम्‍हं हे नो शहरया अमोन द्यः, फारो, मिश्र देश व वया द्यःत अले जुजुपिं धकाः फारोयात भरोसा याइपिन्‍के सजाँय हयेत्‍यनागु दु।

यर्मिया 48:2

मोआबया प्रशंसा हाकनं गुबलें जुइ मखुत, मनूतय्‌सं हेश्‍बोनय् उकियात स्‍यंकेगु ग्‍वसाः ग्‍वइ, ‘वा! झीसं उगु जातियात नाश यानाबीनु।’ हे मदमेन, छ नं सुनसान जुइ, तरवार छंगु ल्‍यूल्‍यू वइ।

यर्मिया 48:20

मोआबया बेइज्‍जत जूगु दु, छाय्‌धाःसा वयात चुंचुं याःगु दु। ‘नुगः मछिंकि, ख्‍व, मोआबयात नाश यात’ धकाः अर्नोन खुसि सिथय् वनाः धा।

यर्मिया 48:37

इपिं सकसिनं सँ खाःगु दु, दारी खाःगु दु। सकसिगु ल्‍हाः चिरिबाःगु दु। सकसिनं भांग्रां जँ त्‍वपूगु दु।

यर्मिया 48:7

छिमिसं थःगु ज्‍याय् व थःगु धन सम्‍पत्तिइ भलसा तःगुलिं छिमित नं ज्‍वना यंकी। अले कमोश द्यःयात नं थः पुजाहारीत व थः शासकतनापं ताताःपाःगु देशय् यंकी।

यर्मिया 49:1

अम्‍मोनीतय्‌गु बारे– परमप्रभुं थथे धयादी, “छु! इस्राएलया काय्‌पिं मदु ला? छु! वया सुं सर्बय काइम्‍ह मदु ला? छाय् मोलोखं गादया लागा कब्‍जा याःगु? छाय् वया थः मनूत गादय् च्‍वंवःगु?”

यर्मिया 51:8

आः बेबिलोन आकाझाकां क्‍वःदली, अले बेबिलोनयात कुचा कुचा याइ। वयागु निंतिं ख्‍व! वयागु स्‍याःचाःया निंतिं मलम हजि! सके व लनी ला?

यर्मिया 6:26

हे जिमि मनूत, भांग्राया वसः फिनाः नउलय् ग्‍वारा ग्‍वारा तु। याकः काय्‌या लागि ख्‍वय् थें हे ह्वाँय्‌ह्वाँय् ख्‍व। छाय्‌धाःसा नाश याइम्‍ह झीथाय् आकाझाकां वइ।

आमोस 1:15

इमि जुजु व भारदारतय्‌त ज्‍वना यंकी,” परमप्रभुं धयादी।

सपन्‍याह 1:5

छेँयागु कःसि च्‍वनाः नगुत पुज्‍याइपिन्‍त, क्‍वछुनाः परमप्रभुया नामं पाफया नं मोलोखया नामं नं पाफइपिन्‍त,

याकूब 5:1

हे तःमिपिं मनूत, जिगु खँ न्‍यँ – छिमित जू वयेत्‍यंगु कष्‍ट खनाः नुगः दायाः ह्वाँय्‌ह्वाँय् ख्‍व।

यहोशू 7:2

यहोशूं बेथेलया पुर्बपाखे व बेथ-आवनया न्‍ह्यःने लाःगु ऐ शहरय् यरीहों थथे धयाः मनूत छ्वल, “अन वनाः उकियागु चिवा का।” उपिं मनूत वन अले ऐ शहरयागु चिवा काल।

यहोशू 8:1

अले परमप्रभुं यहोशूयात धयादिल, “ग्‍याये मते, नुगः क्‍वतुंके मते! फुक्‍क सेना ज्‍वनाः ऐ शहरय् हमला या हुँ। ऐयाम्‍ह जुजु, वया प्रजा, वयागु शहर व वयागु देशयात जिं छंगु ल्‍हातय् बियागु दु।

यहोशू 8:28

थथे यहोशूं ऐ शहरयात मि छ्वय्‌काः भस्‍म यानाबिल। व थौं तक नं झिजांमिजां जुयाच्‍वंगु दु।