यर्मिया 31:25 - नेवाः बाइबल

²⁵ छाय्‌धाःसा जिं त्‍यानुचाःपिन्‍त आराम बी, अले दुःख जुयाच्‍वंपिन्‍त सुख बी।”

यर्मिया 31:25 ပူးပေါင်းရင်းမြစ်များ

भजनसंग्रहया सफू 107:9

छाय्‌धाःसा वय्‌कलं प्‍याःचाःपिन्‍त चित्त बुझे यानादी, अले नये पित्‍यापिन्‍त भिंगु भिंगु चिजं लुधंकादी।

भजनसंग्रहया सफू 23:3

वय्‌कलं जितः न्‍हूगु जीवन बियादी, वय्‌कलं थःगु नांया निंतिं जितः धार्मिकताया लँय् यंकादी।

यशैया 32:2

थुपिं मनूत फय्‌पाखें शरण कायेगु थाय् अले ग्‍वःफय्‌पाखें सुपिलिगु थाय्, मरुभूमिइ लः दुगु खुसित व गंगु मरुभूमिइ तग्‍वःगु ल्‍वहंया किचः थें जुइ।

यशैया 40:29

वय्‌कलं त्‍यानु चायाच्‍वंपिन्‍त व बल मदुपिन्‍त बल बियादी।

यशैया 41:17

“गरीबतय्‌सं व मगाःमचाःपिन्‍सं लः माली, तर लः गनं नं लुइके फइ मखु, इमिगु मे प्‍याःचायाः गनी। तर जि परमप्रभुं इमित लिसः बी। जि इस्राएलया परमेश्‍वरं इमित त्‍वःते मखु।

यशैया 50:4

त्‍यानुचाःपिन्‍त हपाः बीत परमेश्‍वरं जितः स्‍यनामिं थें न्‍ववायेगु स्‍यनादीगु दु। वय्‌कलं जितः सुथ पत्तिकं थनादीगु दु। ब्‍वनामिं थें ध्‍यान बियाः न्‍यनेत वय्‌कलं जिगु न्‍हाय्‌पं चाय्‌कादीगु दु।

यर्मिया 31:12

इपिं वयाः सियोनया तज्‍जाःगु थासय् म्‍ये हाली। अले परमप्रभुया दयाया कारणं इपिं लय्‌ताइ। अन्‍न, न्‍हूगु दाखमद्य व चिकं, फैच्‍वलय्‌या मस्‍त व सा द्वहंया मस्‍तय्‌गु कारणं इपिं तसकं लय्‌ताइ। इमिगु जीवन लखं प्‍याःगु क्‍यब थें जुइ। इमित हाकनं गुबलें दुःख जुइ मखु।

यर्मिया 31:14

पुजाहारीतय्‌त जिं भिंगु भिंगु नसां प्‍वाः जाय्‌काबी। जि प्रजा जिगु भिंगु ज्‍यां लुधनी,” परमप्रभुं धयादी।

इजकिएल 34:14

जिं इमित बांलाःगु घाँय्‌ख्‍यलय् ज्‍वये। इस्राएलया ततःजाःगु पहाडत इमिगु ज्‍वयेगु थाय् जुइ। अन इपिं भिंगु ख्‍यलय् ग्‍वार्तुलाच्‍वनी। इस्राएलया पहाड पहाडय् भिंगु ख्‍यलय् इपिं ज्‍वये खनी।

मत्ती 11:28

“कु क्‍वबिया त्‍यानुचाःपिं फुक्‍कं जिथाय् झासु लंकः वा, जिं छिमित आराम बी।

मत्ती 5:6

परमेश्‍वरया न्‍ह्यःने धर्मी ठहरय् जुइत पित्‍याकाः प्‍याय्‌चाय्‌का जुइपिं मनूत धन्‍यपिं खः, परमेश्‍वरं इमित लुधंकादी।

लूका 1:53

वय्‌कलं नये मखंपिन्‍त साःसाःगु लुधंक नकादिल। तःमिपिन्‍त खालि ल्‍हातं लिछ्वयादिल।

यूहन्‍ना 4:14

तर जिं बियागु लः त्‍वनीपिं मनूतय्‌त गुबलें हे प्‍याः चाइ मखु। जिं बियागु लः हे व मनूयाके बुंगाःचा थें जुयाः अनन्‍त जीवन तक बुयावया च्‍वनी।”

२ कोरिन्‍थी 7:6

अय्‌नं नुगः ख्‍वःपिन्‍त सान्‍त्‍वना बियादीम्‍ह परमेश्‍वरं तीतसयात छ्वयाहयाः जिमित लय्‌ताय्‌कादिल।