यर्मिया 30:10 - नेवाः बाइबल

¹⁰ “‘उकिं परमप्रभुं धयादी, हे जिम्‍ह दास, याकूबया सन्‍तान, ग्‍याये मते। हे इस्राएलयापिं मनूत, नुगः क्‍वतुंके मते। जिं थम्‍हं हे छिमित तापाःगु देशं व छिमि सन्‍तानयात ज्‍वनायंकातःगु देशं बचय् यानाः हये। याकूबयात हाकनं शान्‍ति व सुरक्षा दइ। सुनानं वयात ख्‍याये फइ मखु।’

यर्मिया 30:10 ပူးပေါင်းရင်းမြစ်များ

उत्‍पत्ति 15:1

थथे जूगुयां छुं ई लिपा परमप्रभुं अब्रामयात दर्शन बियाः थथे धयादिल, “ग्‍याये मते अब्राम। जिं छन्‍त बचय् याये। जिं छन्‍त तःधंगु सिरपाः बी।”

यशैया 14:3

परमप्रभुं छिमिगु दुःखकष्‍ट व छिमिसं यानावःगु थाकुगु थाकुगु ज्‍यापाखें छिमित छुत्‍कारा बियादीबलय्

यशैया 35:9

अन सुं सिंह दइ मखु, न सुं स्‍याइपिं पशु अनं जुयाः वनी। अन मेगु छुं नं खतरा दइ मखु। तर उद्धार जुइ धुंकूपिं जक व लँपुं वनेखनी।

यशैया 43:5

ग्‍याये मते, छाय्‌धाःसा जि छनापं हे दु। जिं छिमि सन्‍तातय्‌त पुर्बंनिसें हये, पच्‍छिमंनिसें छिमित छथाय् मुंके।

यशैया 44:1

“तर आः हे जिमि दास याकूब, जिं ल्‍ययाम्‍ह इस्राएल न्‍यँ,

यशैया 44:2

छन्‍त दय्‌कूम्‍ह, छन्‍त गर्भय् दय्‌कूम्‍ह छन्‍त ग्‍वाहालि याइम्‍ह, परमप्रभुं थथे धयादी – हे जिमि दास याकूब, जिं ल्‍ययाम्‍ह यशूरून, छ ग्‍याये मते।

यशैया 46:11

पुर्बं हमला याइम्‍ह पंक्षी सःते अले ताताःपाःगु देशं जिगु इच्‍छा पूवंकेगु निंतिं जिं छम्‍ह मनूयात सःते। जिं छु धयागु दु व जिं पूवंके। जिं छु योजना दय्‌कागु दु व जिं पूवंके।

यशैया 46:13

जिं थःगु धार्मिकता लिक्‍क हयाच्‍वनागु दु। व तामपाः, छिमिगु लिक्‍क हे दु। जिगु उद्धारं लिबाकी मखु। जिं सियोनयात उद्धार बी, अले इस्राएलयात जिगु महिमा क्‍यने।

यशैया 49:12

स्‍व, इपिं तापाक्‍कंनिसें वइ, गुलिं उत्तरपाखें, गुलिं पच्‍छिमपाखें व गुलिं दच्‍छिनय् आश्‍वानया देशं वइ।”

यशैया 49:25

तर परमप्रभुं थथे धयादी, “खः, सिपाइँतय्‌पाखें ज्‍वनायंकूपिं व छाःगु नुगः दुपिंपाखें लाकाः यंकूगु माल लित काये फइ। छनापं ल्‍वाइपिंनापं जि ल्‍वाये अले छिमि मस्‍तय्‌त जिं बचय् याये।

यशैया 54:4

“ग्‍याये मते, छ लाजय् लाइ मखु। मेपिन्‍सं बेइज्‍जत याइ धकाः ग्‍याये मते। छन्‍त क्‍वह्यंके फइ मखु। छं थःगु ल्‍याय्‌म्‍हबलय्‌या लज्‍या ल्‍वःमंकी, अले छन्‍त भाःत मदुबलय्‌या याःगु हेला गुबलें लुमंकी मखु।

यर्मिया 23:3

“जिगु बथांया ल्‍यनाच्‍वंपिन्‍त जिं इमित लिनाछ्वयागु फुक्‍क देशं मुंकाः जिं थःम्‍हं हे इमित इमिगु थःगु हे ख्‍यलय् लित हये। अले हानं इपिं च्‍वन्‍ह्याइ अले इमिगु ल्‍याः अप्‍वयावनी।

यर्मिया 23:4

जिं इमिगु लागि फैजवाःत तये। इमिसं इमित बिचाःसंचाः याइ। जिमि मनूत गुबलें ग्‍याइ मखु। इपिं मध्‍ये सुं नं तनी मखु,” परमप्रभुं धयादी।

यर्मिया 23:6

वयागु इलय् यहूदाया मनूतय्‌त बचय् याइ। अले इस्राएल सुरक्षित जुयाच्‍वनी। परमप्रभुं वयागु नां ‘परमप्रभु जिमिगु धार्मिकता’ तयादी।”

यर्मिया 23:8

तर इमिसं धाइ, ‘इस्राएलीतय् वंशयात उत्तरया देश व मेगु फुक्‍क देशं गन गन वय्‌कलं इमित पितिना छ्वयादीगु खः, उपिं फुक्‍क देशं पित हयादीम्‍ह म्‍वाःम्‍ह परमप्रभुया नामय्।’ अनंलि इपिं थःगु हे देशय् च्‍वनी।”

यर्मिया 29:11

छाय्‌धाःसा जिं छिमिगु निंतिं गुगु योजना दय्‌कागु दु, व जिं स्‍यू,” परमप्रभुं धयादी। “व छिमिगु भिंया लागि खः, छिमित स्‍यंकेत मखु, छिमित बांलाःगु भविष्‍य व आशा बीत।

यर्मिया 29:14

छिमिसं जितः लुइकी,” परमप्रभुं धयादी, “अले छिमित कैदं लित हये। जिं छिमित ज्‍वंकाछ्वयागु फुक्‍क जाति व फुक्‍क थासं जिं छिमित मुंके,” परमप्रभुं धयादी। “गुगु थासं जिं छिमित ज्‍वंकाछ्वयागु खः जिं छिमित व हे थासय् लित हये।”

यर्मिया 3:18

अबलय् इस्राएलया मनूत यहूदाया मनूतलिसें मिलय् जुइ, इपिं छकलं उत्तरय् च्‍वंगु देशं लिहां वयाः जिं इमि पुर्खातय्‌त न्‍ह्याबलेंया निंतिं बियागु देशय् वइ।

यर्मिया 30:3

जिं जिमि प्रजा इस्राएल व यहूदायात बेबिलोनं लित हयेगु दिं वयेत्‍यंगु दु। जिं इमि पुर्खातय्‌त बियागु देशय् जिं इमित लित हये। इमिसं हाकनं उगु देशय् अधिकार याइ,’” परमप्रभुं धयादी।

यर्मिया 30:7

हाय! व दिं गुलि ग्‍यानापुसे च्‍वंगु दिं जुइ। व थें ज्‍याःगु मेगु दिं दइ मखु। जिमि मनूत याकूबया सन्‍तानया निंतिं व दुःखया दिं जुइ तर व वपाखें बचय् जुयाः वइ।’”

यर्मिया 33:16

अबलय् यहूदायात बचय् याइ, अले यरूशलेम याउँक च्‍वनाच्‍वनी। वयागु नां थ्‍व तइ, परमप्रभु जिमि धार्मिकता।’

इजकिएल 16:52

छं थःगु बेइज्‍जत भोगय् या, छाय्‌धाःसा छं छिमि तताकेहेँपिनिगु न्‍याय यात। इमिसं स्‍वयाः छं क्‍वह्यंगु पाप याःगुलिं इपिं छ स्‍वयाः धर्मी खने दु। उकिं लज्‍या चा, अले थःगु बेइज्‍जत भोगय् या, छाय्‌धाःसा छं थः तताकेहेँपिन्‍त धर्मी खने दय्‌काब्‍यूगु दु।

इजकिएल 38:11

छं थथे धाइ, “पःखाः मदुगु गांत दुगु देशयात जिं हमला याये। पःखाःत, मू ध्‍वाखा व गजबार मदय्‌क शहरय् याउँक च्‍वनाच्‍वंपिं व शंका मयाइपिं जातियात जिं हमला याये।

दानिएल 12:1

सुतियागु वसः फिनातःम्‍ह स्‍वर्गदूतं हानं जितः धाल, “उबलय् छिमि मनूतय्‌त रक्षा याइम्‍ह तःधंम्‍ह स्‍वर्गदूत मिखाएल दनी। अले जाति जाति शुरु जूगु इलंनिसें गुबलें मवःगु विपत्तिया ई वइ। व ई वइबलय् परमेश्‍वरया सफुलिइ नां च्‍वयातःपिं छिमि सकलें मनूत बचय् जुइ।

होशे 2:18

व दिं हे जिं इमिगु निंतिं गुँपशुत, आकाशया झंगःत व बँय् घिसय् जुइपिं पशुतनापं बाचा ची। सकलें याउँक च्‍वने फयेमा धकाः जिं धनुष वाण, तरवार व लडाइँ देशं तापाकाबी।

होशे 2:20

जिं छन्‍त जिगु विश्‍वास बहःगुलीं थः कलाः यानातये, अले छं जितः परमप्रभु धकाः म्‍हसी।”

होशे 6:11

“अय् यहूदा, जिमि मनूतय्‌गु भिंगु दिं लित हयेबलय्, “छंगु निंतिं नं सजाँयया ई क्‍वःछिनातःगु दु।”

योएल 2:21

अय् यहूदा देश, ग्‍याये मते! लय्‌ताया च्‍वँ अले न्‍ह्यइपुकि! छाय्‌धाःसा परमप्रभुं ततःधंगु ज्‍या यानादीगु दु।

मीका 4:9

हे यरूशलेम! आ छ छाय् ख्‍वयाच्‍वनागु? छंगु जुजु मदु ला? छन्‍त सल्‍लाह बीम्‍ह नाश जुल ला? छन्‍त मचाबू ब्‍यथा जूम्‍ह मिसायात थें दुःख जूगु दु ला?

जकरिया 3:10

“‘उखुन्‍हु हे छिपिं सकसिनं थः जलाःखलाःयात थः दाखमा व यःमरिमाया क्‍वय् च्‍वनेत सःती,’ दक्‍व शक्ति दुम्‍ह परमप्रभुं धयादी।”

यूहन्‍ना 12:15

“हे सियोनया शहरय् च्‍वपिं, ग्‍याये मते, छिमि जुजु गधाया मचा गयाः झायाच्‍वंगु दु।”