यर्मिया 25:30 - नेवाः बाइबल

³⁰ “आः छं इमिगु विरोधय् थ्‍व फुक्‍क खँ अगमवाणी ल्‍हानाः इमित धा, “‘परमप्रभु स्‍वर्गं थ्‍वयेक हालादी। वय्‌कः थः च्‍वनादीगु पवित्र थासं थ्‍वयेक हालादी, अले थःगु देशया विरोधय् वय्‌कः तःसलं हालादी। पृथ्‍वीइ च्‍वंपिं सकसिगु विरोधय्, दाखमद्य न्‍हुइपिं थें वय्‌कः हालादी।

यर्मिया 25:30 ပူးပေါင်းရင်းမြစ်များ

२ शमूएल 15:25

अनंलि जुजुं सादोकयात धाल, “परमेश्‍वरया बाचाया सनू शहर दुने तुं लित यंकि। परमप्रभुं जितः दया यानादीसा वय्‌कलं जितः लित ब्‍वनाहयादी अले जिं वय्‌कःया बाचाया सनू व नापलायेगु पालयात हाकनं स्‍वये दइ।

१ राजा 9:3

परमप्रभुं वयात धयादिल, “जिं छंगु प्रार्थना व जिगु न्‍ह्यःने याःगु बिन्‍ति न्‍यनागु दु। छं दय्‌कूगु थ्‍व देगलय् जिं थःगु नां न्‍ह्याबलेंया निंतिं तयाः उकियात पवित्र यानागु दु। जिगु मिखा व मन न्‍ह्याबलें अन वनाच्‍वनी।

२ इतिहास 30:27

अले पुजाहारीत व लेवीत दनाः मनूतय्‌त सुवाः बिल, परमेश्‍वरं इमिगु खँ न्‍यनादिल छाय्‌धाःसा इमिगु प्रार्थना स्‍वर्गय् वय्‌कः च्‍वनादीगु पवित्र थासय् थ्‍यन।

भजनसंग्रहया सफू 11:4

परमप्रभु थःगु पवित्र देगलय् दी, परमप्रभु स्‍वर्गया थःगु सिंहासनय् च्‍वनादीगु दु, वय्‌कलं मनूतय्‌सं याःगु ज्‍या फुक्‍कं स्‍यू, छाय्‌धाःसा वय्‌कलं फुक्‍कं स्‍वयाच्‍वनादीगु दु।

भजनसंग्रहया सफू 132:14

वय्‌कलं धयादिल, “थ्‍व ला न्‍ह्याबलेंया लागि झासु लनेगु थाय् खः, जि थन सिंहासनय् च्‍वने, छाय्‌धाःसा जितः थ्‍व हे यः।

भजनसंग्रहया सफू 46:6

जाति जातियापिं मनूतय् दथुइ तसकं हल्‍लाखल्‍ला जुल, राज्‍य-राज्‍य लिगिलिगि सनाः क्‍वःदल वय्‌कलं थःगु सः पिकयादिल, पृथ्‍वी नायावन।

भजनसंग्रहया सफू 58:5

उकिं जादु क्‍यनीम्‍हय्‌सिगु सःयात नं इमिसं वास्‍ता याइ मखु। न्‍ह्याक्‍व हे तन्‍त्रमन्‍त्र सःम्‍हय्‌सीगु मन्‍त्रयात नं इमिसं वास्‍ता याइ मखु।

भजनसंग्रहया सफू 78:65

अले परमप्रभु न्‍ह्यलं दंम्‍ह थें दनादिल। वय्‌कः दाखमद्यं काःम्‍ह मनू थें दनादिल।

यशैया 16:9

अथे जुयाः जि सिब्‍माया दाखमाया निंतिं याजेर ख्‍व थें ख्‍वये। हे हेश्‍बोन, हे एलाले, जिगु ख्‍वबिं छन्‍त प्‍याकाबी। छंगु पाकय् जूगु फलत व बालीया लसताया सः मवये धुंकल।

यशैया 33:3

छि तसकं हाःगु सः तायाः मनूत बिस्‍युं वनी। छि दनादीबलय् जाति जातित छ्यालब्‍याल जुइ।

यशैया 42:13

परमप्रभु तसकं बल्‍लाःम्‍ह मनू थें पिहांझाइ। वय्‌कलं लडाइँया निंतिं छम्‍ह बल्‍लाःम्‍ह सिपाइँनं क्‍यंगु थें थःगु जोश क्‍यनादी। वय्‌कः तःसलं हालादी अले तःसलं लडाइँया सः थाहांवनी। वय्‌कलं थः शत्रुतय्‌त बुकी।

यर्मिया 17:12

शुरुंनिसें हे तःजाःगु थासय् थापं याःगु गौरवं जाःगु सिंहासन हे झीगु आराधनाया पवित्रथाय् खः।

यर्मिया 25:38

सिंहं थें वय्‌कलं थःगु गुफा त्‍वःतादी, अले क्‍वत्‍यलिपिनिगु तरवार व परमप्रभुया तच्‍वःगु तमं यानाः इमिगु देश झिजांमिजां दनी।

यर्मिया 48:33

मोआबया यक्‍व सइगु क्‍यबत व बुँनं लसता व खुसि वने धुंकूगु दु। जिं दाख तिसीगु थासं दाखया ति वयेगु दिकाबियागु दु। लय्‌तायाः हा हां सुनानं उकियात न्‍हुइ मखु। इमिगु हाःसः लसताया हाःसः मखु।

होशे 11:10

इपिं परमप्रभुया ल्‍यूल्‍यू वनी अले वय्‌कः सिंह थें हालादी। गुबलय् वय्‌कः हाली, वय्‌कःया मस्‍त थरथर खाखां पच्‍छिमं वइ।

होशे 5:14

छाय्‌धाःसा जि सिंहनं थें इस्राएल व यहूदाया मनूतय्‌त हय्‌काये। इमित कुचा कुचा यानाः जि थःगु लँय् वने, जिं इमित लुया यने, इमित बचय् याइपिं सुं नं दइ मखु।

योएल 3:16

परमप्रभु सियोनं तस्‍सलं हालादी। वय्‌कःया सः यरूशलेमं वःगु नँ न्‍याःगु सः थें च्‍वं। आकाश व पृथ्‍वी थुरथुर खाइ। परमप्रभु धासाः थः प्रजाया निंतिं शरण कायेगु थाय् व इस्राएलया मनूतय्‌गु निंतिं किल्‍ला जुयादी।

आमोस 1:2

वं धाल, “परमप्रभु सियोन पर्वतं सिंह थें गर्जय् जुयादी, अले वय्‌कः यरूशलेमं थ्‍वय्‌क हालादी। फैजवाःतय्‌गु घाँय्‌ख्‍यः व कर्मेल डाँडाया च्‍वकाय् दुगु घाँय् गनावनी।”

आमोस 3:8

सिंह गर्जय् जुइबलय् सु मग्‍याइ? परमेश्‍वरं न्‍ववानादीबलय् सुनां अगमवाणी न्‍वमवासे च्‍वने फइ?

जकरिया 2:13

हे सकल मनूत, परमप्रभुया न्‍ह्यःने सुम्‍क च्‍वँ। छाय्‌धाःसा वय्‌कः थः च्‍वनीगु पवित्र थासं पिहां झाःगु दु।”

व्‍यवस्‍था 26:15

थःगु पवित्रथाय् स्‍वर्गं स्‍वयाः थः मनू इस्राएलयात सुवाः बियादिसँ अले छिं जिमि पुर्खालिसें पाफयाः बचं बियाः जिमित बियादीगु दुरु व कस्‍ति बाः वयाच्‍वंगु देशयात नं सुवाः बियादिसँ।”

प्रकाश 19:15

जात जातियापिं मनूतय्‌त स्‍यायेत वय्‌कःयागु म्‍हुतुं छपु तरवार पिहां वयाच्‍वंगु दु। अले वय्‌कलं इमित नँयागु दण्‍डीं राज्‍य यानादी। दक्‍वसिबय् तःधंम्‍ह व शक्ति दुम्‍ह परमेश्‍वरयागु तमं जायाच्‍वंगु दाख तिस्‍सिगु थासय् वय्‌कलं तुतिं न्‍हुयाः दाखरस पिकयादी।