यर्मिया 23:3 - नेवाः बाइबल

³ “जिगु बथांया ल्‍यनाच्‍वंपिन्‍त जिं इमित लिनाछ्वयागु फुक्‍क देशं मुंकाः जिं थःम्‍हं हे इमित इमिगु थःगु हे ख्‍यलय् लित हये। अले हानं इपिं च्‍वन्‍ह्याइ अले इमिगु ल्‍याः अप्‍वयावनी।

यर्मिया 23:3 ပူးပေါင်းရင်းမြစ်များ

भजनसंग्रहया सफू 106:47

हे परमप्रभु जिमि परमेश्‍वर, जिमित बचय् यानादिसँ, जाति जातिया दथुं जिमित लितहयादिसँ, जिमिसं छितः सुभाय् बी, अले छिगु पवित्र नांया प्रशंसा याये।

यर्मिया 16:15

तर इमिसं धाइ, ‘इस्राएलीतय्‌त उत्तरयागु देश व मेगु फुक्‍क देशं गन गन वय्‌कलं इमित पितिना छ्वयादीगु खः, व फुक्‍क देशं पित हयादीम्‍ह गथे परमप्रभु धात्‍थें म्‍वाःम्‍ह खः।’ छाय्‌धाःसा जिं इमि तापाःबाज्‍यापिन्‍त बियागु देशय् जिं इमित हाकनं हये।

यर्मिया 29:14

छिमिसं जितः लुइकी,” परमप्रभुं धयादी, “अले छिमित कैदं लित हये। जिं छिमित ज्‍वंकाछ्वयागु फुक्‍क जाति व फुक्‍क थासं जिं छिमित मुंके,” परमप्रभुं धयादी। “गुगु थासं जिं छिमित ज्‍वंकाछ्वयागु खः जिं छिमित व हे थासय् लित हये।”

यर्मिया 30:10

“‘उकिं परमप्रभुं धयादी, हे जिम्‍ह दास, याकूबया सन्‍तान, ग्‍याये मते। हे इस्राएलयापिं मनूत, नुगः क्‍वतुंके मते। जिं थम्‍हं हे छिमित तापाःगु देशं व छिमि सन्‍तानयात ज्‍वनायंकातःगु देशं बचय् यानाः हये। याकूबयात हाकनं शान्‍ति व सुरक्षा दइ। सुनानं वयात ख्‍याये फइ मखु।’

यर्मिया 30:3

जिं जिमि प्रजा इस्राएल व यहूदायात बेबिलोनं लित हयेगु दिं वयेत्‍यंगु दु। जिं इमि पुर्खातय्‌त बियागु देशय् जिं इमित लित हये। इमिसं हाकनं उगु देशय् अधिकार याइ,’” परमप्रभुं धयादी।

यर्मिया 31:7

परमप्रभुं थथे धयादी, “लय्‌तातां याकूबया मनूतय्‌गु निंतिं म्‍ये हा! ततःधंगु जातिया निंतिं तःसलं हा! तःसलं प्रशंसा यानाः धा, ‘हे परमप्रभु, थः प्रजा, इस्राएलया ल्‍यनाच्‍वंपिन्‍त उद्धार यानादिसँ।’

यर्मिया 31:8

स्‍व! जिं थःम्‍हं हे इमित उत्तरयागु देशं हयेत्‍यनागु दु। जिं इमित पृथ्‍वीयागु ताताःपाःगु थासं मुंके। इमिगु दथुइ कांपिं, लंग्रात, प्‍वाथय् दुपिं व मचा बुइकूपिं मिस्‍त नं दइ। इमिगु छगू तःधंगु पुचः थन लिहां वइ।

यर्मिया 32:37

स्‍व! जिं थःम्‍हं हे इमित छु छु देशय् तंमय्‌ जबरजस्‍ती पित छ्वयागु खः अनं इमित लित हयाः थ्‍व हे शहरय् मुंके। जिं इमित याउँक च्‍वनेबी।

यर्मिया 46:27

“हे जिम्‍ह दास याकूब, छ ग्‍याये मते। हे इस्राएलयापिं मनूत, नुगः क्‍वतुंके मते। जिं थःम्‍हं हे छिमित तापाःगु देशं व छिमि सन्‍तानयात ज्‍वनाः यंकातःगु देशं त्‍वःतकाहये। याकूबया सन्‍तानतय्‌त हाकनं शान्‍ति व सुरक्षा दइ। सुनानं वयात ख्‍याये फइ मखु।

यर्मिया 50:19

तर जिं इस्राएलयात वयागु थःगु हे ख्‍यलय् लित हये अले व कर्मेल व बाशानय् जइ। वयागु नये पित्‍याःगु एफ्राइम व गिलादया डाँडाय् लुधनी।”

यर्मिया 8:3

जिं थ्‍व मभिंगु जातियापिं म्‍वानाच्‍वंपिं मनूतय्‌त पितिनाः गन गन छ्वये अन अन इमिसं म्‍वायेगु स्‍वयाः सीगु यय्‌की।” दक्‍व शक्ति दुम्‍ह परमप्रभुं धयादी।

इजकिएल 11:17

“उकिं धा, ‘परमप्रभु परमेश्‍वरं थथे धयादी – जिं छिमित जाति जातितपाखें मुंके। गन गन छिपिं छ्यालब्‍याल जूगु दु, उपिं देशं जिं छिमित लित हये, अले हाकनं छिमित इस्राएल देश लितबी।’

इजकिएल 36:11

जिं छिमि मनूतय्‌गु व पशुतय्‌गु ल्‍याः अप्‍वय्‌काबी। इमिगु ल्‍याः न्‍हापा स्‍वयाः यक्‍व दइ। यक्‍व काय्‌म्‍ह्याय्‌पिं बुइकी। हे इस्राएलया पहाडत, न्‍हापा थें छिमिके जिं मनूत तये, न्‍हापा स्‍वयाः अप्‍वः जिं छिमित च्‍वन्‍ह्याके। अले छिमिसं जि हे परमप्रभु खः धकाः सी।

इजकिएल 36:24

“‘जिं जाति जातितपाखें छिमित पित हये। फुक्‍क देशं छिमित मुंके, अले छिमित छिमिगु थःगु हे देशय् लित हये।

इजकिएल 36:37

“परमप्रभु परमेश्‍वरं थथे धयादी – इस्राएलया घरानाया बिन्‍ति जिं स्‍वीकार याये, अले इमिगु निंतिं जिं थ्‍व ज्‍या यानाबी। जिं इमि मनूतय्‌त फैत थें अल्‍याख यानाबी।

लेवी 26:9

“‘जिं थःगु ख्‍वाः छिपिं पाखे स्‍वय्‌के, अले छिमित बांलाक ब्‍वलंकाः छिमिगु ल्‍याः अप्‍वय्‌काबी अले छिपिंनापं चिनातयागु बाचा पूवंकाबी।

मीका 2:12

“हे याकूब, धात्‍थें हे जिं छिपिं फुक्‍कसित मुंके। इस्राएलयापिं ल्‍यंदुपिन्‍त जिं धात्‍थें हे मुंके। जिं इमित फैगालय् फैतय्‌त थें छथाय् हे मुंके। व थासय् ग्‍वाः ग्‍वाः मनूत दइ।

मीका 7:12

उगु दिनय् अश्‍शूर देशं, अले मिश्रया शहर शहरंनिसें कयाः यूफ्रेटिस खुसि तकयापिं व तातापाःगु समुद्रंनिसें व पहाडंनिसें मनूत छिमिथाय् वइ।