यर्मिया 2:30 - नेवाः बाइबल

³⁰ “छिमि मनूतय्‌त मफतय् जिं सजाँय बिया, भिंकेगु जिगु शिक्षायात इमिसं नाला मका। क्‍वाप्‍प नइम्‍ह सिंहं थें छिमि अगमवक्तातय्‌त छिमिसं स्‍याःगु दु।

यर्मिया 2:30 ပူးပေါင်းရင်းမြစ်များ

१ राजा 19:10

वं लिसः बिल, “दक्‍व शक्ति दुम्‍ह परमप्रभु परमेश्‍वरया निंतिं जिके यक्‍व जोश दु, इस्राएलीतय्‌सं छिगु बाचायात त्‍वःतूगु दु, छिगु वेदीत थुनाब्‍यूगु दु अले छिकपिनि अगमवक्तातय्‌त तरवारं स्‍याःगु दु। जि जक ल्‍यंदनि, इमिसं जितः नं स्‍यायेत स्‍वयाच्‍वंगु दु।”

१ राजा 19:14

वं लिसः बिल, “दक्‍व शक्ति दुम्‍ह परमप्रभु परमेश्‍वरया निंतिं जिके यक्‍व जोश दु, इस्राएलीतय्‌सं छिगु बाचायात त्‍वःतूगु दु, छिगु वेदीयात थुनाब्‍यूगु दु अले छिकपिनि अगमवक्तातय्‌त तरवारं स्‍याःगु दु। जि जक ल्‍यंदनि, इमिसं जितः नं स्‍यायेत स्‍वयाच्‍वंगु दु।”

२ इतिहास 24:21

तर इमिसं जकरियाया विरोधय् ग्‍वसाः ग्‍वल, अले जुजुया आज्ञा कथं इमिसं परमप्रभुया देगःया चुकय् ल्‍वहँतं कय्‌काः वयात स्‍यात।

२ इतिहास 28:22

थ्‍व हे जुजु आहाज थःगु दुःखया इलय् परमप्रभु प्रति अज्‍ज अप्‍वः अविश्‍वासी जुल।

२ इतिहास 36:16

तर इमिसं परमेश्‍वरया दूततय्‌त हिस्‍यात, वय्‌कःया वचनयात च्‍यूताः मतः। वय्‌कःया अगमवक्तातय्‌त हिस्‍यायेगु त्‍वःमतू। लिपतय्, परमप्रभु थः मनूत खनाः तसकं तंचायादिल। उकिं बचय् जुइगु छुं हे लँ मन्‍त।

नहेम्‍याह 9:26

“अय्‌नं छिकपिनि प्रजातय्‌सं विद्रोह यात। अले इमिसं खँ मन्‍यन। छिगु व्‍यवस्‍थापाखें ख्‍वाः फस्‍वय्‌कल। छिपाखे लिहां वयेत ख्‍याच्‍वः बीपिं अगमवक्तातय्‌त इमिसं स्‍यानाबिल। इमिसं छितः गज्‍याःगु अपमान यात।

यशैया 1:5

छाय् छिमिसं अप्‍वः ल्‍हाः नयेमाःगु? छाय् छिपिं विद्रोही जुयाच्‍वनागु? छिमिगु छ्यं छगलं घालं जाःगु दु अले नुगः दुःखं जाःगु दु।

यशैया 59:3

छाय्‌धाःसा छिमिगु ल्‍हाः हिं त्‍वपूगु दु व छिमिगु पतिंचाय् दोष कीगु दु अले छिमिगु म्‍हुतुं मखुगु खँ ल्‍हाःगु दु अले छिमिगु मेचां मभिंगु खँ ल्‍हाःगु दु।

यशैया 9:13

तर मनूत इमित कय्‌कूम्‍ह मनूपाखे लिहां वःगु मदुनि, न इमिसं दक्‍व शक्ति दुम्‍ह परमप्रभुयात माःगु दु।

यर्मिया 31:18

“जिं धात्‍थें एफ्राइम ख्‍वःगु सः न्‍यना, ‘छम्‍ह हारांम्‍ह द्वहंचायात थें छिं जितः आज्ञा पालन यायेगु स्‍यनादिल। जितः लितहयादिसँ, जि लिहां वये, छाय्‌धाःसा छि परमप्रभु जिम्‍ह परमेश्‍वर खः।

यर्मिया 46:14

“मिश्र देशय् सुचं ब्‍यु! मिग्‍दोलय् घोषणा या, नोप व तहपनेसय् नं घोषणा या, ‘तयार जुयाः थथःगु थाय् कयाः दँ, छाय्‌धाःसा तरवारं छिमिगु प्‍यखेरं क्‍वापक्‍वाप नयाच्‍वंगु दु।’

यर्मिया 5:3

हे परमप्रभु, छिगु मिखां सत्‍य ममाली ला? छिं इमित कय्‌कादिल, अय्‌नं इमि नुगः मछिं मजू, छिं इमित क्‍वत्‍यलादिल, अय्‌नं इमिसं थःत भिंकेगु वास्‍ता मयाः। इमिसं थःगु ख्‍वाःयात ल्‍वहं स्‍वयाः छाकल। अले पस्‍ताय् चायेत मानय् मजू।

यर्मिया 7:28

अथे जूगुलिं छं इमित धा, परमप्रभु थः परमेश्‍वरया आज्ञा पालन मयाःगु व वय्‌कलं स्‍यनातःगु खँयात नालामकाःगु जाति थ्‍व हे खः। सत्‍य नाश जूगु दु, थ्‍व इमिगु म्‍हुतुं तापाःगु दु।

विलाप 4:13

अय्‌सां थ्‍व धाःसा वया अगमवक्तातय्‌गु पाप व वया पुजाहारीतय्‌गु अधर्मया कारणं जूगु खः। इमिसं शहर दुने धर्मी मनूतय्‌गु हि बाः वय्‌कल।

इजकिएल 22:24

“अय् सीमानिम्‍ह मनू, इस्राएल देशयात धा, ‘छ अशुद्धगु देश खः, जि छ खनाः थुलि तं चायागु दु कि जिं छन्‍त सजाँय बीबलय् भचा नं वा वइ मखु।’

इजकिएल 24:13

“‘हे यरूशलेम, छं याःगु याये मत्‍यःगु ज्‍याखं छन्‍त अशुद्ध याःगु दु। जितः ला छन्‍त शुद्ध याये मास्‍ति वःगु खः, तर छ शुद्ध मजू। अथे जुयाः छंगु विरोधय् जिगु तं क्‍वमलाःतले छ हाकनं शुद्ध जुइ मखु।

दानिएल 9:13

परमप्रभु जिमि परमेश्‍वरं जिमित माया यायेगु त्‍वःतूगु दु। थथे मोशाया व्‍यवस्‍थाय् च्‍वया तः थें थुपिं फुक्‍क विपत्ति जिमित लाःगु दु। अथे जूसां थःगु पाप त्‍वःताः वा छिगु सत्‍यया ल्‍यू वनाः जिमिसं परमप्रभु जिमि परमेश्‍वरया ग्‍वाहालि मालेत अस्‍वीकार यानागु दु।

सपन्‍याह 3:2

वं आज्ञा मानय् याइ मखु, वं न्‍वाखँ नाला काइ मखु। वं परमप्रभुयाके नं भलसा मतः व थः परमेश्‍वरया न्‍ह्यःने वनी मखु।

मत्ती 23:29

“शास्‍त्री व फरिसीत, छिमित धिक्‍कार दु। छिपिं निपाः ख्‍वाःपाः दुपिं खः, छाय्‌धाःसा छिमिसं अगमवक्तातय्‌गु चिहान बाबांलाक दय्‌की। अले धर्मी मनूतय्‌गु चिहानयात समाः याना तइ।

प्रेरित 7:52

छिकपिनि तापाःबाज्‍यापिन्‍सं अगमवक्ता सुयात जक दुःख मब्‍यूगु दु? धर्मीम्‍ह मनू झायादी तिनि धकाः धाःपिन्‍त नं इमिसं स्‍याना छ्वल। आः व हे धर्मीम्‍ह मनूयात नं छिकपिन्‍सं दुःख जक बियाः मगानाः धोखा बियाः स्‍यानाबिल।

१ थेसलोनिकी 2:15

व हे यहूदीतय्‌सं प्रभु येशू व न्‍हापायापिं अगमवक्तातय्‌त स्‍यानाबिल। अले जिमित नं ख्‍यानाः हल। परमेश्‍वरयात मयःगु ज्‍या यानाः इपिं न्‍ह्याम्‍हय्‌सियां विरोधी जुयाच्‍वन।

प्रकाश 16:9

तसकं तांन्‍वयाः मनूतय्‌त पुत। थथे दुःखकष्‍ट छ्वयाहयेगु अधिकार दुम्‍ह परमेश्‍वरयागु नां कयाः इमिसं सराः बिल। अय्‌नं इमिसं पश्‍चाताप मयाः अले परमेश्‍वरयात नं तःमधंकू।