यर्मिया 14:9 - नेवाः बाइबल

⁹ छाय् छि अजू चाःम्‍ह मनू थें जुयादीयागु? छाय् बचय् याये मफइम्‍ह बल मदुम्‍ह सिपाइँ थें जुयादियागु? हे परमप्रभु छि जिपिंनापं दी। जिमित छिकपिनि हे मनूत धाइ, जिमित त्‍वःतादी मते!

यर्मिया 14:9 ပူးပေါင်းရင်းမြစ်များ

२ इतिहास 7:14

जिगु थःगु नां बियातःपिं जिमि मनूतय्‌सं जितः प्रार्थना यात अले जितः मालाः थःम्‍हं यानाच्‍वंगु मभिंगु ज्‍या त्‍वःतल धाःसा जिं इमिगु बिन्‍ति न्‍यने, जिं इमिगु पाप क्षमा यानाबी अले हाकनं इमिगु देशयात च्‍वन्‍ह्याकाबी।

भजनसंग्रहया सफू 10:1

हे परमप्रभु, छि छाय् तापाक च्‍वनादियागु? जिमिगु दुःखया इलय् छि छाय् फहिलादियागु?

भजनसंग्रहया सफू 27:9

जिपाखें थःगु ख्‍वाः फहिकादी मते, परमप्रभु। तमय् थः दासयात थःपाखें तापाकादी मते, छि जितः ग्‍वाहालि यानादीम्‍ह खः। जितः मुक्ति बियादीम्‍ह प्रभु, जितः त्‍वःतादी मते! जितः गुबलें त्‍यागय् यानादी मते!

भजनसंग्रहया सफू 46:5

परमेश्‍वर व शहरय् च्‍वनादीगु दु व गुबलें नाश जुइ फइ मखु। सुथ न्‍हापां हे परमेश्‍वरं उकियात ग्‍वाहालि बियादी।

यशैया 12:6

सियोनय् च्‍वंपिं सकसिनं तःसलं म्‍ये हालेमा! इस्राएलया पवित्र परमेश्‍वर तःधंम्‍ह खः, अले वय्‌कः थः मनूतय् दथुइ च्‍वनादी।”

यशैया 43:7

सु सु जिगु नामं सःतूगु दु, सुयात जिं जिगु महिमाया निंतिं सृष्‍टि यानागु दु, सुयात बां लुइका अले सुयात जिं दय्‌का।”

यशैया 51:9

छुं यानादिसँ! हे परमप्रभु, जिमित ग्‍वाहालि यानादिसँ, अले थःगु शक्ति छ्यलाः जिमित बचय् यानादिसँ, पुलांगु इलय् थें अले न्‍हापाया पुस्‍तातय्‌गु इलय् थें छुं यानादिसँ। छु छि व हे मखु ला, गुम्‍हय्‌सिनं समुद्रया अजिङ्‌गर राहाबयात कुचा कुचा थलादिल अले व अजिङ्‌गरयात सुयाबिल।

यशैया 59:1

धात्‍थें हे परमप्रभुया ल्‍हाः बचय् याये मफय्‌क चिहाकः जूगु मदु, अले वय्‌कःया न्‍हाय्‌पं नं तायेमदय्‌क ख्‍वातुसे च्‍वंगु मदु।

यशैया 63:19

न्‍हापा न्‍हापांनिसें जिपिं ला छिकपिनिम्‍ह हे खः, तर जिपिं छिं गुबलें शासन यानामदीपिं प्रजा थें च्‍वं, जिपिं छिगु नां ज्‍वनाः मजुइपिं प्रजा थें च्‍वं।

यर्मिया 15:16

छिगु वचन वःबलय् जिं उपिं वचन नया। छिगु वचनं यानाः जितः न्‍ह्यइपुल, अले जिगु नुगलय् लसतां भय्‌बिल। हे दक्‍व शक्ति दुम्‍ह परमप्रभु परमेश्‍वर, मनूतय्‌सं जितः छिकपिनि मनू धाइगु।

यर्मिया 51:5

इस्राएल व यहूदायात इमि परमेश्‍वर, दक्‍व शक्ति दुम्‍ह परमप्रभुपाखें त्‍वःतूगु मदु, खः ला इस्राएलया पवित्र परमेश्‍वरया न्‍ह्यःने इमिगु देश दोषं जाःगु दु।

यर्मिया 8:19

ध्‍यान बियाः न्‍यँ! तापाःगु देशं जिमि मनूत ख्‍वयाच्‍वंगु सः ताये दयाच्‍वंगु दु। “छु परमप्रभु सियोनय् मदी ला? छु आः अन जुजु मदी ला?” “इमिसं छाय् जितः थःगु मूर्तितपाखें व ज्‍यालगे मजूगु विदेशी मूर्तितपाखें तंचायेकूगु?”

विलाप 5:20

छाय् छिं जिमित ल्‍वमंकाः च्‍वनादियागु? छाय् छिं थुलिमछि ई तक जिमित त्‍वतादियागु?

इजकिएल 48:35

“शहरयागु प्‍यखें पाखेयागु घेरा ९.६ किलोमिटर दइ। “उखुन्‍हुंनिसें शहरया नां ‘परमप्रभु अन दी’ जुइ।”

हबकूक 1:2

हे परमप्रभु, गुबलय् तक जिं छितः ग्‍वाहालि फ्‍वनाच्‍वनेगु अले छिं न्‍यनामदीगु? “न्‍ह्याथाय् नं स्‍याय् पाले जक जुयाच्‍वंगु” धकाः जि गुलि हालाच्‍वनेगु, अले छिं थः मनूतय्‌त बचय् यानामदीगु?

जकरिया 2:5

जि थः हे शहरया प्‍यखेरं मिया पःखाः जुइ। जि हे उकी दुनेया महिमा जुइ,’” धकाः परमप्रभुं धयादी।

जकरिया 8:3

परमप्रभुं थथे धयादी, “जि सियोनय् लिहां वये अले यरूशलेमय् बाय् च्‍वने। अबलय् यरूशलेमयात ‘विश्‍वास याये बहःगु शहर’ धकाः धाइ, अले दक्‍व शक्ति दुम्‍ह परमप्रभुया पहाडयात धाःसा ‘पवित्र पर्वत’ धाइ।”

गन्‍ती 11:23

परमप्रभुं मोशायात लिसः बियादिल, “छु जिगु शक्ति कम जूगु दु ला? छं आः थत्‍थें हे जिं धयागु खँ जुइ कि मजुइ धकाः स्‍वये खनी।”

प्रेरित 15:17

अले मेपिं फुक्‍क मनूत, अज्‍ज ला जिं थः मनूत यायेत सःतापिं यहूदीमखुपिं मनूतय्‌सं तक नं परमेश्‍वरयात माली।

२ कोरिन्‍थी 6:16

परमेश्‍वरयागु देगःलिसे मूर्तियागु छु स्‍वापु? झीपिं हे म्‍वाःम्‍ह परमेश्‍वर च्‍वनीगु देगः खः। थथे ला परमेश्‍वरं हे धयादीगु दु – “जि इपिंनापं च्‍वने, अले इपिंनापं जुइ। जि इमि परमेश्‍वर जुइ अले इपिं जिमि मनूत जुइ।”

व्‍यवस्‍था 23:14

परमप्रभु छिमि परमेश्‍वर छिमित बचय् यायेत अले छिमिगु निंतिं छिमि शत्रुतय्‌त बुकेत छिमिगु छाउनीइ चाःहिलादी। अथे जुयाः छिमिगु छाउनी पवित्र जुइमाः। वय्‌कलं छिमिगु दथुइ घच्‍चाइपुगु छुं नं मखनेमा, मखुसा वय्‌कलं छिमित त्‍वःतादी।

व्‍यवस्‍था 28:10

अले पृथ्‍वीयापिं सकलें मनूतय्‌सं छिमित परमप्रभुयापिं मनूत खः धकाः सियाः छिपिं खनाः ग्‍याइ।

हिब्रू 13:5

छिमिगु जीवनय् धिबायागु लोभं तापाक च्‍वँ। थःके गुलि दु उलिं हे लुधंका च्‍वँ। परमेश्‍वरं धयादीगु दु – “जिं छिमित गुबलें त्‍वःते मखु, जिं छिमित गुबलें त्‍यागय् याये नं मखु।”

प्रकाश 21:3

सिंहासनं तःसलं थथे धकाः धयाहःगु सः जिं ताल – “स्‍व, आः परमेश्‍वर मनूतलिसे दी। वय्‌कः इपिं नाप हे च्‍वनादी। इपिं वय्‌कःया मनूत जुइ। परमेश्‍वर थः हे इमि परमेश्‍वर जुयाः इपिं लिसे च्‍वनादी।

१ शमूएल 12:22

थःगु तःधंगु नांया कारणं परमप्रभुं छिमित त्‍वःतादी मखु, छाय्‌धाःसा वय्‌कलं छिमित थः प्रजा यायेगु क्‍वःछिनादीगु दु।