यर्मिया 14:14 - नेवाः बाइबल

¹⁴ अले परमप्रभुं जितः धयादिल, “उपिं अगमवक्तातय्‌सं जिगु नामय् फताहा अगमवाणी ल्‍हानाच्‍वंगु दु। जिं इमित छ्वयागु मखु वा ल्‍ययागु मखु वा इपिंलिसें नवानागु मदु। इमिसं ला मखुगु दर्शन, अगमवाणी, ज्‍वखना, मूर्ति पुजा व धोखाया खँया अगमवाणी ल्‍हानाच्‍वंगु दु।

यर्मिया 14:14 ပူးပေါင်းရင်းမြစ်များ

यशैया 56:10

इस्राएलया फुक्‍क पिवाःत कांपिं खः। इपिं फुक्‍कं ज्ञां मदुपिं खः। इपिं उइ मफुपिं खाखः खिचात थें खः। इपिं ग्‍वारातुली अले म्‍हगस खनी। इपिं द्येने जक मास्‍तिवय्‌काच्‍वनी।

यशैया 9:15

थकालिपिं व हनेबहःपिं मनूत छ्यं खः, अले मखुगु खँ स्‍यनीपिं अगमवक्तात न्‍हिप्‍यं खः।

यर्मिया 20:6

अले हे पशहूर, छ व छंगु छेँय् च्‍वंपिं सकसितं ज्‍वनाः बेबिलोनय् यंकी। छ व छिमि सकलें पासापिं, गुपिन्‍त छं मखुगु अगमवाणी याःगु खः, सकलें बेबिलोनय् सी। अले छिमित अन हे थुनी।’”

यर्मिया 28:11

हनन्‍याहं फुक्‍क मनूतय् न्‍ह्यःने थथे धाल, “परमप्रभुं थथे धयादी, ‘थथे हे निदँया दुने फुक्‍क जातिया ककुं बेबिलोनयाम्‍ह जुजु नबूकदनेसरया जुवा त्‍वथुलाबी।’” अनंलि यर्मिया अगमवक्ता थःगु लँय् वन।

यर्मिया 28:13

“वनाः हनन्‍याहयात थथे धा, ‘परमप्रभुं थथे धयादी – छं सिँयागु जुवा ला त्‍वथुलाबिल तर जिं उकिया पलेसा नँयागु जुवा हये।

यर्मिया 28:15

अले यर्मिया अगमवक्तां हनन्‍याह अगमवक्तायात धाल, “अय् हनन्‍याह, न्‍यँ, छन्‍त परमप्रभुं छ्वयाहयादीगु मखु। अय्‌नं छं थुपिं मनूतय्‌त मखुगु खँय् विश्‍वास याकेब्‍यूगु दु।

यर्मिया 29:21

जिगु नामं छिमित मखुगु अगमवाणी ल्‍हानाच्‍वंपिं कोलायाहया काय् आहाब व मासेयाहया काय् सिदकियाहया बारे दक्‍व शक्ति दुम्‍ह परमप्रभु, इस्राएलयाम्‍ह परमेश्‍वरं थथे धयादी, “जिं थःम्‍हं हे इमित बेबिलोनयाम्‍ह जुजु नबूकदनेसरया ल्‍हातय् बी, वं छिमिगु न्‍ह्यःने हे इमित स्‍याइ।

यर्मिया 29:31

“ज्‍वनाः यरूशलेमं बेबिलोनय् यंकूपिं फुक्‍कसित थ्‍व खबर छ्व, ‘नेहेलामय् च्‍वंम्‍ह शमायाहया बारे परमप्रभुं थथे धयादी – जिं शमायाहयात छ्वयाहयागु मखुसां वं अगमवाणी ल्‍हानाः छिमित मखुगु आस क्‍यंगु दु,

यर्मिया 37:19

‘छितः व थ्‍व देशयात हमला यायेत बेबिलोनयाम्‍ह जुजु वइ मखु’ धकाः छितः अगमवाणी ल्‍हाःपिं छिकपिनि अगमवक्तात गन दु?

यर्मिया 5:31

अगमवक्तातय्‌सं मखुगु अगमवाणी यानाच्‍वंगु दु, पुजाहारीतय्‌सं इमिगु थःगु हे अधिकारं शासन यानाच्‍वंगु दु, जिमि मनूतय्‌सं थथे जुइगु हे यय्‌की। तर लिपतय् छिमिसं छु यायेगु?”

यर्मिया 8:10

छाय्‌धाःसा जिं इमि कलाःपिं मेपिं मनूतय्‌त व इमिगु बुँ न्‍हूपिं मालिकतय्‌त बी। दक्‍कलय् चिधंम्‍हंनिसें दक्‍कलय् तःधंम्‍ह तक फुक्‍कं लोभी जूगु दु। अगमवक्तात व पुजाहारीत सकसिनं ध्‍वंलायेगु ज्‍या याइगु।

यर्मिया 8:11

जि प्रजाया घालय् इमिसं तच्‍वःगु घाः मखु थें यानाः पट्टी चिनाब्‍यूगु दु। शान्‍ति ला द हे मदुसां इमिसं “शान्‍ति, शान्‍ति” धाइगु।

विलाप 2:14

छंगु अगमवक्तातय्‌सं खंगु दर्शनत सत्‍य मखुगु व छुं हे मूं मवंगु खः। इमिसं छंगु अधर्म क्‍यना मब्‍यू, मखुसा छन्‍त ज्‍वनाः बेबिलोनय् मयंकीगु। इमिसं छंगु निंतिं खंगु दर्शन सत्‍य मखुगु व अलमल यायेत जक खः।

विलाप 2:9

वयागु मू ध्‍वाखात बँय् तुनावन। वय्‌कलं वयागु गजबारत कुचा कुचा यानाः नाश यानादिल। वया जुजु व राजकुमारतय्‌त मेपिं जातितय्‌गु दथुइ पितिनाछ्वःगु दु, आः ला व्‍यवस्‍था मन्‍त। अले वया अगमवक्तातय्‌सं नं परमप्रभुपाखें छुं हे दर्शन कायेखनी मखु।

इजकिएल 12:24

छाय्‌धाःसा आवंलि गुबलें इस्राएलयापिं मनूतय्‌गु दथुइ मखुगु दर्शन व साइत स्‍वइगु जुइ मखु।

इजकिएल 13:2

“अय् सीमानिम्‍ह मनू, आः अगमवाणी ल्‍हानाच्‍वंपिं इस्राएलया अगमवक्तातय्‌गु विरोधय् अगमवाणी ल्‍हा, थःगु हे मनं अगमवाणी ल्‍हाइपिन्‍त धा, ‘परमप्रभुया वचन न्‍यँ।

इजकिएल 13:23

उकिं आवंलि छिमिसं मखुगु दर्शन खनी मखु, अले ज्‍वखना स्‍वइ मखु। जिं छिमिगु ल्‍हातं थः मनूतय्‌त त्‍वःतके। अले छिमिसं जि परमप्रभु खः धकाः सी।’”

इजकिएल 21:29

छंगु बारे मखुगु दर्शन खंसां तबि, छंगु लागि मखुगु ज्‍वखना स्‍वःसां तबि उपिं स्‍याये हे माःपिं दुष्‍टत, गुपिनिगु दिं वये धुंकल, गुपिनिगु लिपांगु सजाँयया ई वये धुंकल, इमिगु ककुइ पालेत व तरवारयात छ्यलीगु जुइ।

मीका 3:11

अनच्‍वंपिं नायःतय्‌सं घुस कयाः न्‍याय याइ। अन च्‍वंपिं पुजाहारीतय्‌सं ज्‍याला कयाः स्‍यनी। अले अगमवक्तातय्‌सं धिबाया लागि अगमवाणी याइ। अथे जूसां इमिसं परमप्रभुयाके भलसा कयाः थथे धाइ “परमप्रभु झीगु दथुइ च्‍वनादीगु दु, झीत मभिं जुइ मखु।”

जकरिया 10:2

मूर्तितय्‌सं ध्‍वंलाइगु खँ ल्‍हाइ, तन्‍त्रमन्‍त्र याइपिन्‍सं मखुगु दर्शन खनी। म्‍हगसया अर्थ कनीपिन्‍सं सान्‍त्‍वना मबीगु मखुगु खँ ल्‍हाइ। उकिं जिमि मनूत तंपिं फैत थें उखेलाः थुखेलाः मदइ। जवाः मदयाः इमिसं दुःख सी।

जकरिया 13:3

अले सुनां हाकनं अगमवाणी यात धाःसा वया मां बौपिन्‍सं वयात धाइ, ‘छं परमप्रभुया नामय् मखुगु खँ ल्‍हाना च्‍वंगुलिं छ सि हे माः।’ वं अगमवाणी धाइबलय् वया मां-बौनं वयात पिचायेक सुयाः स्‍यानाबी।

व्‍यवस्‍था 18:20

अय्‌नं जिं आज्ञा मबियागु वचन जिगु नामय् न्‍ववाइम्‍ह वा मेपिं द्यःतय्‌गु नामय् न्‍ववाइम्‍ह अगमवक्तायात स्‍याना छ्वयेमाः।”

१ तिमोथी 4:2

धर्मयागु ख्‍वाःपालं पुयाः मखुगु खँ ल्‍हाना जुइपिन्‍सं थथे याना जुइ। थुमिगु मतिइ मिइ छुयातःगु नँयागु नालुं पुकातये धुंकल।

१ यूहन्‍ना 4:1

यःपिं दाजुकिजापिं, आत्‍मा दु धकाः धयाजुइपिं न्‍ह्याम्‍हय्‌सित नं विश्‍वास याये मते। न्‍हापां परमेश्‍वरयागु आत्‍मा खः मखु धकाः निं जाँचय् याना स्‍व, छाय्‌धाःसा यक्‍व हे फताहा अगमवक्तात खने दया वयाच्‍वंगु दु।