यर्मिया 10:12 - नेवाः बाइबल

¹² तर परमेश्‍वरं हे थःगु शक्तिं पृथ्‍वीयात दय्‌कादिल। वय्‌कलं हे संसारयात थःगु बुद्धिं थापं यानादिल। अले आकाशयात थःगु दुग्‍यानं चक्‍कंकादिल।

यर्मिया 10:12 ပူးပေါင်းရင်းမြစ်များ

उत्‍पत्ति 1:1

दक्‍वसिबय् न्‍हापां परमेश्‍वरं आकाश व पृथ्‍वी सृष्‍टि यानादिल।

उत्‍पत्ति 2:5

पृथ्‍वीइ घाँय्‌मा छमा नं मदु, सिमा छमा नं मदु। छाय्‌धाःसा उबलय् परमप्रभु परमेश्‍वरं वा वय्‌कामदीनि, अले बुँ ज्‍याइपिं मनूत नं छम्‍ह हे मदुनि।

१ इतिहास 16:26

जाति जाति याःपिं द्यःत ला मूर्ति जक खः, तर परमप्रभुं ला स्‍वर्ग दय्‌कादिल।

अय्‍यूब 26:7

वय्‌कलं खालि थासय् उत्तरयागु आकाशयात चक्‍कंकादी, अले खालिगु थासय् पृथ्‍वीयात यख्‍खानादी।

अय्‍यूब 37:18

छु छिं आकाशयात वय्‌कलं थें न्‍यंकाः दय्‌कूगु धातुया न्‍हाय्‌कं थें छाके फु ला?

अय्‍यूब 9:8

वय्‌कलं याकःचां हे आकाशयात चकंकादिल। वय्‌कः हे समुद्रया लबुया च्‍वय् न्‍यासि झायादी।

भजनसंग्रहया सफू 104:2

छिं थःत जलं त्‍वपुयादीगु दु। अले आकाशयात पाल थें चक्‍कंकादीगु दु।

भजनसंग्रहया सफू 104:24

परमप्रभु, छिं फुक्‍क दय्‌कादीगु दु, गज्‍याःगु तःधंगु बुद्धिं छिं उपिं फुक्‍क दय्‌कादिल, छिगु सृष्‍टिं थ्‍व पृथ्‍वी जाःगु दु।

भजनसंग्रहया सफू 119:90

छिगु विश्‍वास याये बहःसू पुस्‍तां पुस्‍ता तक दयाच्‍वनी। छिं पृथ्‍वीयात थापं यानादीगु दु, अले व दयाच्‍वनी।

भजनसंग्रहया सफू 24:2

वय्‌कलं संसारयात पृथ्‍वीया तःलय् च्‍वंगु लःया च्‍वय् दय्‌कादिल। अले थुकिया जग समुद्रया क्‍वय् स्‍वनादिल।

भजनसंग्रहया सफू 33:6

परमप्रभुं उजं बियाः आकाश दय्‌कादिल, अले सासलं फुक्‍क नगुत।

भजनसंग्रहया सफू 65:7

छिं समुद्रया किसिद्वम्‍बः व मनूतय्‌गु हाःहूयात नं दिकादिल।

भजनसंग्रहया सफू 78:69

वय्‌कलं थःगु पवित्रथाय् स्‍वर्ग थें तःजाय्‌क दय्‌कादिल, अले पृथ्‍वी थें धिसिलाक्‍क व सदांया निंतिं दय्‌कादिल।

भजनसंग्रहया सफू 93:1

परमप्रभु जुजु खः। वय्‌कलं बल व गौरवया वसः फिनादीगु दु। पृथ्‍वीयागु जग बल्‍लाः व गुबलें लिगिलिगि सनी मखु।

हितोपदेश 3:19

परमप्रभुं थ्‍व पृथ्‍वीयात वय्‌कःयागु बुद्धिं दय्‌कादिल। अले वय्‌कलं आकाशयात वय्‌कःयागु ज्ञानं दय्‌कादिल।

हितोपदेश 30:4

स्‍वर्गय् वनाः सु लिहां वःगु दु? सुनां फय्‌यात थःगु ल्‍हातिइ प्‍वःचिनातःगु दु? सुनां समुद्रयात कापतय् च्‍यूगु दु? अले सुनां पृथ्‍वीया लागा कियाब्‍यूगु दु? थ्‍व फुक्‍क सुनां याःगु? छिपिं सुनानं स्‍यूसा व सु खः, वया काय् सु खः जितः धा।

यशैया 37:16

“हे दक्‍व शक्ति दुम्‍ह परमप्रभु, इस्राएलया परमेश्‍वर, करूबतय् दथुइ सिंहासनय् च्‍वनादीम्‍ह, छि हे जक संसारया फुक्‍क राज्‍ययाम्‍ह परमेश्‍वर खः। छिं स्‍वर्ग व पृथ्‍वी दय्‌कादिल।

यशैया 40:22

वय्‌कः पृथ्‍वी च्‍वय् आकाश स्‍वयाः नं च्‍वय् थःगु सिंहासनय् च्‍वनादीम्‍हय्‌सिनं व दय्‌कादीगु खः, क्‍वय् पृथ्‍वीइ मनूत बुइँचा थें जक खः। वय्‌कलं आकाशयात इलां थें चक्‍कंकादीगु दु, अले अन बाय् च्‍वनेत पाल थें चक्‍कंकादीगु दु।

यशैया 42:5

परमप्रभु परमेश्‍वरं आकाश दय्‌काः उकियात चकंकादिल, अले पृथ्‍वी व उकी दुगु फुक्‍कयात न्‍यनावंकादिल, अले वय्‌कलं अन दुपिं मनूतय्‌त सासः व थुखे उखे जुइपिन्‍त जीवन बियादी। परमप्रभु परमेश्‍वरं थथे धयादी –

यशैया 44:24

“परमप्रभुं थथे धयादी, छन्‍त उद्धार यानादीम्‍ह अले छन्‍त गर्भय् दय्‌कादीम्‍ह, “जि हे परमप्रभु खः, गुम्‍हय्‌सिनं फुक्‍कं दय्‌कादिल, गुम्‍हय्‌सिनं याकःचां हे आकाशयात चकंकादिल, गुम्‍हय्‌सिनं थम्‍हं हे पृथ्‍वीयात न्‍यनावंकादिल,

यशैया 45:12

पृथ्‍वी जिं हे दय्‌काःगु खः, अले उकी दुपिं मनूत नं जिं हे सृष्‍टि यानागु खः। जिगु हे ल्‍हाःया ज्‍यां आकाशयात चक्‍कंकागु खः। अले उकी दुगु नक्षत्र व नगुत पाय्‌छिकथं मिलय् यानातयागु दु।

यशैया 45:18

परमप्रभुं स्‍वर्ग सृष्‍टि यानादिल। वय्‌कः हे परमेश्‍वर खः। वय्‌कलं पृथ्‍वीयात बां लुइकादिल, वय्‌कलं उकियात थापं यानादिल। वय्‌कलं पृथ्‍वीयात झिजांमिजां जुइत सृष्‍टि यानादीगु मखु, तर मनूत च्‍वनेत दय्‌कादीगु खः। वय्‌कलं थथे धयादी, “जि हे परमप्रभु खः, जि बाहेक मेपिं सुं नं द्यः मदु।

यशैया 48:13

जिं थःगु हे ल्‍हातं पृथ्‍वीया जग स्‍वनागु दु, जिगु जव ल्‍हातं आकाशयात चक्‍कंकागु दु। गुबलय् जिं इमित सःते अले इपिं फुक्‍क छथाय् मुं वइ।

यशैया 49:8

परमप्रभुं थथे धयादी, “जिं दयामाया यायेगु इलय् छन्‍त लिसः बी, अले उद्धारया दिनय् छन्‍त जिं ग्‍वाहालि याये। जिं छन्‍त जिमि मनूतलिसें जिगु बाचा चिनेत, देश हाकनं पलिस्‍था यायेत व उकिया नाश जूगु फुक्‍क सम्‍पत्ति हाकनं छिमिगु अधिकारय् हयेत,

यर्मिया 10:13

वय्‌कलं न्‍ववानादीबलय् आकाशय् लः थ्‍वय्‌क हाली। पृथ्‍वीया कुन्‍चां वय्‌कलं सुपाँय् हयादी। वा वइबलय् वय्‌कलं हाबलासा त्‍वय्‌कादी अले थःगु धुकुतिं फय् वय्‌कादी।

यर्मिया 10:16

याकूबया भाग उपिं थें मखु, वय्‌कः ला फुक्‍क दय्‌कादीम्‍ह खः। अले वय्‌कलं इस्राएलयात थः प्रजा दय्‌केत ल्‍ययादीगु दु। दक्‍व शक्ति दुम्‍ह परमप्रभु वय्‌कःया नां खः।

यर्मिया 14:22

जात जातिया द्यःत मध्‍ये सुनां वा वय्‌के फइ? अथवा आकाशं थःम्‍हं हे वा वय्‌के फइ ला? हे परमप्रभु, जिमि परमेश्‍वर, छिं हे वा वय्‌कादी। उकिं जिमित छिगु हे आशा दु, छाय्‌धाःसा थ्‍व फुक्‍क यानादीम्‍ह छि हे खः।

यर्मिया 27:5

थ्‍व पृथ्‍वी, थ्‍व पृथ्‍वीइ च्‍वंपिं मनूत व पशुतय्‌त जिं थःगु तःधंगु बलं व ल्‍हाःया शक्तिं दय्‌कागु दु, अले जिं थुकियात सुयात बी मास्‍ति वः वयात बी।

यर्मिया 32:17

“हे परमप्रभु परमेश्‍वर, छिं थःगु शक्ति व ताहाकःगु ल्‍हातं आकाश व पृथ्‍वी दय्‌कादिल। छिगु निंतिं छुं नं थाकु मजू।

जकरिया 12:1

छगू अगमवाणी– इस्राएलया बारे परमप्रभुया वचन थ्‍व हे खः। आकाशयात चकंकादीम्‍ह, पृथ्‍वीया जग तयादीम्‍ह अले मनूया आकार दय्‌कादीम्‍ह परमप्रभुं थथे धयादीगु दु,

यूहन्‍ना 1:3

फुक्‍कं सृष्‍टि यानादीगु वय्‌कलं हे खः। फुक्‍क सृष्‍टि परमेश्‍वरं वय्‌कःयापाखें हे यानादीगु खः। सृष्‍टि जूगुलिइ छुं नं वय्‌कः मदय्‌कं जूगु मदु।

कलस्‍सी 1:16

छाय्‌धाःसा परमेश्‍वरं वय्‌कःयापाखें स्‍वर्ग व पृथ्‍वीइ दुगु फुक्‍कं, खनेदुगु, खने मदुगु, अले फुक्‍क शक्ति, राज्‍य व अधिकार दय्‌कादीगु खः। अले थ्‍व फुक्‍कं वय्‌कःया निंतिं हे दय्‌कादीगु खः।