यशैया 66:5 - नेवाः बाइबल

⁵ छिपिं मध्‍ये सुनां परमप्रभुया वचनया भय काइ, वय्‌कःया वचन न्‍यँ, “छिकपिनि थः मनूत, सुनां छिमित यय्‌की मखु, सुनां छिमित जिगु नांया निंतिं हेला याइ, इमिसं छिमित थथे धाइ, ‘परमप्रभुया महिमा जुइमा, अले जिमिसं छिमिगु आनन्‍द स्‍वये।’ अय्‌नं इपिं लाजय् लाइ।

यशैया 66:5 ပူးပေါင်းရင်းမြစ်များ

१ राजा 21:29

“आहाब जिगु न्‍ह्यःने क्‍वमिलु जूगु छु छं खं ला? वं थःत क्‍वमिलु याःगुलिं जिं व म्‍वानाच्‍वंतले वया परिवारयात सजाँय बी मखु। वया काय्‌या पालय् जिं आहाबया परिवारयात सजाँय बी।”

२ राजा 22:10

अनंलि छ्यान्‍जे शापानं जुजुयात थथे नं धाल, “दकलय् तःधंम्‍ह पुजाहारी हिल्‍कियाहं जितः छगू सफू ब्‍यूगु दु।” अले शापानं व जुजुया न्‍ह्यःने ब्‍वना न्‍यंकल।

२ इतिहास 34:27

छं जिगु खँ न्‍यनाः पश्‍चाताप यात अले थ्‍व थाय् व थनयापिं मनूतय्‌गु बारे जिं धयागु खँ न्‍यनाः परमेश्‍वरया न्‍ह्यःने छ क्‍वमिलु जुल, छं थःगु वसः खुत अले जिगु न्‍ह्यःने ख्‍वल। उकिं जिं छंगु प्रार्थना न्‍यनागु दु, परमप्रभुं धयादी,

एज्रा 9:4

अले ज्‍वनायंकाः लित छ्वयाहःपिन्‍सं याःगु अपराधया कारणं इस्राएलया परमेश्‍वरयागु वचनपाखें ग्‍याःपिं सकल मनूत जिथाय् मुंवल। सन्‍ध्‍याया बां बीगु इलय् तक जि अथे हे वातां जुयाः च्‍वनाच्‍वना।

भजनसंग्रहया सफू 119:120

छिगु भयं यानाः जिगु म्‍ह खाइ, अले छिगु विधि खनाः जि ग्‍याना।

भजनसंग्रहया सफू 38:20

इमिसं जिगु भिंगु ज्‍याया पलेसा जितः मभिं यानाच्‍वंगु दु। अले जिं भिंगु ज्‍या यानागुया विरोधय् जुयाच्‍वंगु दु।

हितोपदेश 13:13

भिंगु सल्‍लाह मन्‍यंम्‍हय्‌सिनं दुःख सी माली, अले न्‍यंम्‍हय्‌सिनं सिरपाः कायेखनी।

श्रेष्‍ठगीत 1:6

जि हाकुसे च्‍वं धकाः अजू चायाः जितः मस्‍वये मते, छाय्‌धाःसा छाःगु निभालं जितः हाकुसे च्‍वंकूगु खः। जिमि मांया काय्‌पिं जिनापं तम्‍वःगुलिं जितः दाखक्‍यब स्‍वइम्‍ह यानाबिल। थःगु हे दाखक्‍यबया धाःसा जिं वास्‍ता यानागु मदु।

यशैया 26:11

हे परमप्रभु, इमिसं छिं ल्‍ह्वनादीगु ल्‍हापाखे ध्‍यान मब्‍यू। छिके थः प्रजाया निंतिं गुलि जोश दु इमित क्‍यनादिसँ। अले इपिं लाजय् लाइ। छिं तयार यानादीगु सजाँय इमित प्‍वंकादिसँ।

यशैया 5:19

धिक्‍कार दु इमित, गुपिन्‍सं परमप्रभुयात चुनौती बियाः थथे धाइ, “वय्‌कः छाय् हथाय् चायामदीगु अले वय्‌कलं यानादीगु ज्‍या छाय् याकनं झीत मक्‍यंगु छाय् इस्राएलया पवित्र परमेश्‍वरं झायाः थःगु योजना पूवंकामदीगु? अले झीसं व फुक्‍क सीगु।”

यशैया 60:15

“छ त्‍वःतातःम्‍ह व हेला यानातःम्‍ह खः, छपाखें जुयाः सुं नं मवंसां नं जिं छन्‍त सदांया निंतिं गौरव व फुक्‍क पुस्‍ताया लसता यानाबी।

यशैया 65:13

अथे जुयाः परमप्रभु परमेश्‍वरं थथे धयादी, “स्‍व, जिमि दासतय्‌सं नयेखनी। छिपिं धाःसा नये मास्‍ति वय्‌का च्‍वनेमाली। जिमि दासतय्‌सं लः त्‍वनी, छिपिं धाःसा प्‍याः चाय्‌का च्‍वनेमाली। जिमि दासतय्‌सं लसतां हनी, छिपिं धाःसा लाजय् लाइ।

यशैया 66:2

छु थःगु हे ल्‍हातं जिं आकाश व पृथ्‍वी दय्‌कागु मखु ला? अले फुक्‍कं थथे जू वःगु मखु ला? परमप्रभुं घोषणा यानादी। “आत्‍माय् चीमि खनीपिं व नुगः ख्‍वःपिन्‍त अले जिगु वचनय् थरथर खाइपिन्‍त जिं दयां स्‍वये।

यर्मिया 36:16

वं व ब्‍वने धुंकाः इमिसं ग्‍यानाः छम्‍हय्‌सिनं मेम्‍हय्‌सित स्‍वल अले बारूकयात धाल, “थ्‍व खँ झीसं जुजुयात कने हे माः।”

होशे 11:10

इपिं परमप्रभुया ल्‍यूल्‍यू वनी अले वय्‌कः सिंह थें हालादी। गुबलय् वय्‌कः हाली, वय्‌कःया मस्‍त थरथर खाखां पच्‍छिमं वइ।

मत्ती 10:22

थथे जिगु नामं यानाः छिमित फुक्‍कसिनं हेला याइ। दकलय् लिपा तकं क्‍वात्तुक विश्‍वास यानाः सह यानाच्‍वंम्‍ह बचय् जुइ।

लूका 13:17

थथे धयादीगुलिं वय्‌कःया विरोधीत मछालाः सुम्‍क च्‍वन। अले अजू चायापुगु ततःधंगु ज्‍या यानादीगुलिं ग्‍वाः ग्‍वाः मनूत वय्‌कः खनाः लय्‌लय्‌ताल।

यूहन्‍ना 16:2

इमिसं छिमित धर्मशास्‍त्र स्‍यनीगु छेँनं पितिनाहइ। अले मनूतय्‌सं छिमित स्‍यानाः परमेश्‍वरयागु सेवा याना धकाः मतिइ तया जुइगु ई नं वइतिनि।

यूहन्‍ना 9:34

इमिसं वयात धाल – “पापय् बुयाः पापय् हे ब्‍वलंम्‍ह छं जिमित स्‍यं वयागु ला?” थथे धयाः इमिसं वयात पितिनाछ्वल।

२ थेसलोनिकी 1:12

थथे छिमिगुपाखें झी प्रभु येशूयागु नां तःधं जुइ, अथे हे झी परमेश्‍वर व प्रभु येशू ख्रीष्‍टयागु दया मायां यानाः छिपिं नं तःधं जुइ।

तीतस 2:13

झीत मुक्ति बियादीम्‍ह, झीम्‍ह तःधंम्‍ह परमेश्‍वर येशू ख्रीष्‍ट हानं झाइतिनि। झीपिं थ्‍व हे तःधंगु आशायागु लँ स्‍वयाच्‍वने।

हिब्रू 9:28

अथे हे तःम्‍हय्‌सिगु पाप हुया छ्वयेत ख्रीष्‍ट नं छकः सिनादिल। वय्‌कः निक्‍वः खुसि नं झाइतिनि। उबलय् वय्‌कः पाप हुया छ्वयेत मखु, बरु वय्‌कःयागु लँ स्‍वयाच्‍वंपिन्‍त बचय् यायेत झाइ।

१ यूहन्‍ना 3:13

यःपिं दाजुकिजापिं, उकिं थ्‍व संसारयापिं मनूतय्‌सं छिमित हेला यात धकाः छिपिं अजू चायेमाःगु मदु।