यशैया 65:4 - नेवाः बाइबल

⁴ इपिं चिहानय् च्‍वनी, अले गुप्‍ति थासय् पियाः चा छ्याइ। इमिसं फाया ला नइ, अले घच्‍चाइपुगु सूप दय्‌काः ख्‍वल्‍चाय् तयाः त्‍वनी।

यशैया 65:4 ပူးပေါင်းရင်းမြစ်များ

प्रस्‍थान 23:19

“छिमिगु बुँइ सःगु दक्‍वसिबय् भिंगु न्‍हापांगु फल परमप्रभु थः परमेश्‍वरया छेँय् हजि। “च्‍वलय्‌चिया मचायात वया मांयागु दुरुइ दय्‌के मते।”

प्रस्‍थान 34:26

“छिमिगु बुँयागु दकलय् भिंगु न्‍हापां सःगु अन्‍न व फल परमप्रभु छिमि परमेश्‍वरयाथाय् हजि। “सुं च्‍वलेचाया मचायात वया मांया दुरुइ दय्‌के मते।”

यशैया 66:17

“उपिं मध्‍ये सुनां थःत पवित्र व शुद्ध यानाः क्‍यबय् वनेत फा व छुँ वा मेमेगु घच्‍चाइपुस्‍य च्‍वंगु चिजत नइपिनिगु ल्‍यू वन धाःसा इपिं फुक्‍कसिगु नापं हे नाश जुइ,” परमप्रभुं घोषणा यानादी।

यशैया 66:3

तर द्वहंया बलि छाइपिं मनूयात स्‍याइपिं थें खः। चिधिकःम्‍ह भ्‍याःचा बलि छाइपिं धाःसा खिचाया ककु त्‍वथुलीगु थें हे खः। अन्‍नबलि छाइपिं फाया हि छाःगु थें हे खः। लुमन्‍ति कथं धुपाँय् च्‍याकीपिं मूर्तियात पुजा याःगु थें हे खः। इमिसं थःगु हे लँ ल्‍यःगु दु, अले इमिगु प्राण थःगु हे घच्‍चाइपुगु ज्‍याय् लय्‌ताइ।

इजकिएल 4:14

अले जिं धया, “हे परमप्रभु परमेश्‍वर थथे मजुइमा, जिं थःत गुबलें अशुद्ध यानागु मदु। जिं ल्‍याय्‌म्‍हबलय्‌निसें थौं तक गुबलें थः हे सीम्‍ह वा पशुतय्‌सं स्‍याःम्‍ह पशुया ला नयागु मदु। जिगु म्‍हुतुया दुने छुं नं अशुद्ध ला दुहां वंगु नं मदुनि।”

लेवी 11:7

अथे हे छिमिसं फा नं नये मज्‍यू। छाय्‌धाःसा वयागु तुतिख्‍वः बाःसां वं लिन्‍ह्ययाः मनः। उकिं व छिमिगु निंतिं अशुद्ध खः।

जकरिया 9:7

जिं इमिगु म्‍हुतुं लानापं हि लिकयाबी व वाया दथुं घच्‍चाइपुस्‍से च्‍वंगु चिज लिकयाबी। अनंलि ल्‍यंदुपिं पलिश्‍तीत परमेश्‍वरया मनूत जुइ, अले यहूदाय् छगू कुल थें जुइ। एक्रोनय् च्‍वंपिं यबूसीत थें जुइ।

गन्‍ती 19:11

“सीम्‍ह थ्‍यूम्‍ह मनू न्‍हय्‌न्‍हु तक अशुद्ध जुइ।

मत्ती 8:28

येशू समुद्र पारिइ गदरिनीतय्‌गु देशय् झायादीबलय् भूत दुबिना च्‍वंपिं निम्‍ह मनूतय्‌सं दिपं पिहां वयाः वय्‌कःयात नापलात। थुपिं तसकं हे ग्‍यानपुसे च्‍वंगुलिं अनं सुं हे मजू।

लूका 8:27

नांचां क्‍वहां वयेवं वय्‌कलं अन भूत दुब्‍यूम्‍ह छम्‍ह मनूयात नापलात। वं लं मफ्‍यूगु ताःई दये धुंकल। व छेँय् मच्‍वँसे दिपय् जक च्‍वनाच्‍वंम्‍ह खः।

व्‍यवस्‍था 14:21

थःगु कालं सीम्‍ह पशुयात छिमिसं नये मते, छिमिसं छिमिगु शहरय् च्‍वंम्‍ह सुं परदेशीयात व नयेत बी ज्‍यू वा सुं मेपिं परदेशीतय्‌गु ल्‍हातय् मी फु। छिपिं धाःसा परमप्रभु छिमि परमेश्‍वरया लागिं छगू पवित्र जाति खः। च्‍वलय्‌या मचायात वया मांया दुरुइ दय्‌के मते।

व्‍यवस्‍था 14:3

छिमिसं घच्‍चाइपुगु छुं नये मते।

व्‍यवस्‍था 14:8

फा नं अशुद्ध खः, छाय्‌धाःसा वयागु तुतिख्‍वः ला बाः अय्‌सां वं लिन्‍ह्ययाः मनः। छिमिसं इमिगु ला नये मते, इमिगु सीम्‍ह नं थी मते।

व्‍यवस्‍था 18:11

तन्‍त्रमन्‍त्र याइम्‍ह, सीक दुबिना वइम्‍ह मनू, झाँक्री ज्‍या याइम्‍ह व सी धुंकूम्‍ह मनूयाके सल्‍लाह काइम्‍ह मनू छिमिगु दथुइ मदयेमाः।