यशैया 61:10 - नेवाः बाइबल

¹⁰ जि परमप्रभुया कारणं तसकं लय्‌ताये। जिगु प्राणं जिमि परमेश्‍वरयाके लय्‌ताइ। छाय्‌धाःसा वय्‌कलं जितः उद्धारया वसः पुंकादीगु दु, अले वय्‌कलं जितः धार्मिकताया वसतं त्‍वपुयादीगु दु। गथे ब्‍याहा याइम्‍ह मिजंनं थःगु छेनय् पुजाहारीं थें समाः याइ अले भम्‍चां थःत तसकं मू मू वंगु तिसां समाः याइ।

यशैया 61:10 ပူးပေါင်းရင်းမြစ်များ

उत्‍पत्ति 24:53

अले वं वसः, लुँ वहःया तिसा पिकयाः रिबेकायात बिल। वं वया मां व दाजुयात नं थिकय् थिकय्‌गु कोसेलि देछात।

२ इतिहास 6:41

“हे परमप्रभु परमेश्‍वर, दनाः छि थःगु शक्तिया सनूनापं थःगु आरामया थासय् झासँ। हे परमप्रभु परमेश्‍वर छिकपिनि पुजाहारीतय्‌त उद्धारया वसः फिकादिसँ। छु भिंगु खः, उकी छिकपिनि मनूत लय्‌तायाच्‍वनेमा।

नहेम्‍याह 8:10

नहेम्‍याहं इमित धाल, “आः छेँ वनाः भिंगु नसा व साःगु दाखमद्यनापं भ्‍वय् न हुँ। थःगु निंतिं भ्‍वय् ज्‍वरय् याये मफुपिन्‍त नं ब्‍व छ्वयाब्‍यु। थौंया दिं झी प्रभुया निंतिं पवित्र जू। नुगः मछिंके मते, परमप्रभुयागु लसता हे छिमिगु बल खः।”

अय्‍यूब 29:14

जिं धार्मिकतायात वसः थें फिना, इन्‍साफयात जिं जिगु वसः व फेटा थें पुना।

भजनसंग्रहया सफू 132:16

थनयापिं पुजाहारीतय्‌त जिं उद्धारया वसः फीकाबी, अले थनच्‍वंपिं विश्‍वास यायेबहःपिं मनूतय्‌सं लय्‌लय्‌तातां म्‍ये हाली।

भजनसंग्रहया सफू 132:9

छिकपिनि पुजाहारीत धर्मी जुइमा। अले छिकपिनि विश्‍वास यायेबहःपिं मनूतय्‌सं लय्‌लय्‌तातां म्‍ये हालेमा।

भजनसंग्रहया सफू 28:7

परमप्रभु जिगु बल खः, अले जिगु ढाल नं। जिं दुनुगलंनिसें वय्‌कःयागु भलसा कयागु दु। वय्‌कलं जितः ग्‍वाहालि यानादी, अले जिगु नुगः लसतां जाः। जिं वय्‌कःयात तःधंकाः म्‍ये हाले।

भजनसंग्रहया सफू 35:9

अले जि परमप्रभु खनाः लय्‌ताये वय्‌कलं जितः बचय् यानादीगुलिं जि वय्‌कः खनाः लय्‌ताये।

श्रेष्‍ठगीत 1:10

न्‍हाय्‌पनय् तयेगु चाचां छंगु न्‍यताः व सिखलं समा यानातःगु छंगु गःपः गुलि बांलाः।

यशैया 12:1

व दिंखुन्‍हु छिमिसं थथे धाइ, “हे परमप्रभु, जिं छिगु प्रशंसा याये! छि जिनापं तंचायादीगु दु, अय्‌नं आः छिगु तं क्‍वलाय् धुंकूगु दु अले छिं जितः सान्‍त्‍वना बियादीगु दु।

यशैया 12:2

परमेश्‍वर धात्‍थें जितः उद्धार याइम्‍ह खः, जिं वय्‌कःयात विश्‍वास याये अले जि छति नं ग्‍याये मखु। परमप्रभु जिगु शक्ति व भजन खः, वय्‌कः हे जिगु निंतिं छुत्‍कारा बीम्‍ह जुयादीगु दु।”

यशैया 17:10

हे इस्राएल, परमेश्‍वर छन्‍त उद्धार याइम्‍ह खः, वय्‌कः ल्‍वहंधी व छंगु किल्‍ला थें खः, तर छं परमेश्‍वरयात ल्‍वःमंकल। अथे जुयाः छं तसकं बांबांलाःगु सिमात पित अले पिने हःगु दाखमात नं पित,

यशैया 25:1

हे परमप्रभु, छि जिमि परमेश्‍वर खः, जिं छिगु नांयात तःधंके अले छिगु नांया प्रशंसा याये, छाय्‌धाःसा छिं विश्‍वास यायेबहः जुयाः अजू चायापुगु ज्‍या यानादीगु दु, उपिं ज्‍यात यक्‍व न्‍हापा हे छिं ग्‍वसाः ग्‍वयादीगु खः।

यशैया 25:9

व दिंखुन्‍हु फुक्‍कसिनं धाइ, “धात्‍थें वय्‌कः हे झी परमेश्‍वर खः। झीसं वय्‌कःयाके भलसा तयाः अले वय्‌कलं हे झीत बचय् यानादिल। वय्‌कः परमप्रभु खः, वय्‌कःयाके हे झीसं भलसा तयागु खः। वय्‌कलं यानादीगु उद्धारया निंतिं झीपिं लय्‌ताया न्‍ह्यइपुकेनु।”

यशैया 35:10

अले परमप्रभुं मू पुलाः छुत्‍कारा यानादीपिं लिहां वइ। इपिं सियोनय् म्‍ये हा हां दुहां वनी। न्‍ह्याबलेंया लसता इमिगु छ्यंया श्रीपेच जुइ। इमिसं लसता व खुशी लुइकी, अले दुःखकष्‍ट व झसुका इपिंपाखें तापाक्‍क हे जुइ।

यशैया 41:16

छं इमित हायाछ्वइ अले फसं इमित च्‍वय् थत यंकी, अले ग्‍वःफसं इमित पुइकेयंकी। छं धाःसा परमप्रभुनापं हे लय्‌तायाच्‍वनी। अले छं इस्राएलया पवित्र परमेश्‍वरया महिमा याइ।

यशैया 48:18

छं जिगु आज्ञात बांलाक मानय् जक याःगु जूसां छंके शान्‍ति खुसि थें अले छंके धार्मिकता समुद्रया लबुत थें वइगु।

यशैया 49:18

छंगु मिखा ब्‍वयाः चाकःछिं स्‍व। छिमि काय्‌पिं फुक्‍क छन्‍थाय् मूंवइ। परमप्रभुं थथे घोषणा यानादी, धात्‍थें जि म्‍वाःम्‍ह खः थें, छं इमित तिसायात थें पुनी, छं इमित भम्‍चायात थें समाः याइ।

यशैया 49:4

तर जिं धया, “जिं सितिकं थाकुगु ज्‍या याना। जिं बलं यानागु ज्‍या सितिं वन। अय्‌नं जितः छु दयेमाःगु खः व परमप्रभुया ल्‍हातय् दु, उकिया इनाम जिमि परमेश्‍वरयाके हे दु।”

यशैया 51:11

परमप्रभुं मू पुलाः छुत्‍कारा यानादीपिं हाकनं लिहां वइतिनि। इपिं सियोनय् म्‍ये हा हां दुहां वइ, अले इमिगु छ्यंया श्रीपेच न्‍ह्याबलेंया निंतिं लसता जुइ। इमिसं खुसि व लसता कायेखनी। अले दुखं व झसुका इपिंपाखें तापाक हे जुइ।

यशैया 51:3

परमप्रभुं धात्‍थें हे सियोनयात सान्‍त्‍वना बियादी, अले वय्‌कलं इमिगु झिजांमिजां दंगु थाय्‌यात दया यानादी, अले मरुभूमियात अदनया बगैँचा थें व अनयागु गंगु बँयात परमप्रभुया क्‍यब दय्‌कादी। अन लसता व आनन्‍द, सुभाय्‌या म्‍येया सः न्‍यनेदइ।

यशैया 52:1

दँ, दँ, हे सियोन! छं बल व शक्तियात लं थें फ्‍यु! हे पवित्र शहर, यरूशलेम, थःगु महिमां जाःगु वसः फ्‍यु। थनिंनिसें म्‍हय् चिं मतःपिं व अशुद्धपिं छन्‍थाय् दुहां वइ मखु।

यशैया 56:7

जिं जिगु पवित्र पर्वतय् हया। जिगु प्रार्थना यायेगु छेँय् लय्‌ताय्‌केबी। इमिसं जिगु वेदीइ छाःगु होमबलि व बलित जिं यय्‌के। छाय्‌धाःसा जिगु छेँ फुक्‍क जातितय्‌गु निंतिं प्रार्थनाया छेँ जुइ।”

यशैया 58:14

छिपिं जि परमप्रभुपाखें लय्‌ताय् खनी, व जिं छिमित देशया तःधंपिं जुइगु थासय् वनीपिं यानाबी अले जिं छिमित छिमि पुर्खा याकूबया अधिकारपाखें भ्‍वय् नकिपिं यानाबी।” परमप्रभुया म्‍हुतुं हे थथे धयादीगु दु।

यशैया 61:3

व सियोनय् दुखं च्‍वनाच्‍वंपिन्‍त नौया पलेसा तसकं बांलाःगु श्रीपेच, व दुखं पलेसा लसताया चिकं बीत, ख्‍वःगु नुगःया पलेसा प्रशंसाया वसः पुंकाबीत, वय्‌कःया गौरव खनेदयेमा धकाः इमित परमप्रभुं हे पिनादीगु धार्मिकताया स्‍वसिमात धकाः धाइ।

यशैया 65:18

तर जिं सृष्‍टि यानागु खँय् न्‍ह्याबलें लसता व खुशी हँ। छाय्‌धाःसा जिं यरूशलेमयात खुसिं जाःगु व अनयापिं मनूतय्‌त लसतां जाःपिं यानाबी।

यर्मिया 2:32

छु सुं मिसामचां थःगु तिसा व सुं भम्‍चां थःगु समा ज्‍वलं ल्‍वःमंके फइ ला? तर जिमि प्रजां जुग जुगंनिसें जितः ल्‍वःमंके धुंकल।

इजकिएल 42:14

पुजाहारीत पवित्र थासय् दुहां वनीबलय् इपिं उगु पवित्र थासं पिनेया चुकय् पिहां मवनेमा, तर गुगु वसः फिनाः इमिसं सेवा याइ, उपिं वसः इमिसं अन हे त्‍वःताः तयेमाः, छाय्‌धाःसा उपिं पवित्र खः। मनूत मुनीगु थासय् इपिं वने न्‍ह्यः इमिसं मेगु हे वसः फीमाः।”

हबकूक 3:18

जि परमप्रभुयाके लय् लय्‌ताय्, जिं जितः उद्धार यानादीम्‍ह परमेश्‍वरयाके लय् लय्‌ताय्।

जकरिया 10:7

एफ्राइमयापिं मनूत वीर सिपाइँत थें जुइ, दाखमद्य त्‍वनाः लय्‌ताःगु थें इमिगु मन जुइ। इमि मस्‍त थ्‍व खनाः लय्‌ताइ। परमप्रभुयाके इमिगु नुगः लय्‌ताइ।

जकरिया 3:5

अले जिं धया, “थ्‍वया छेनय् छगू यचुगु बेतालि नं पुइकि।” परमप्रभुया स्‍वर्गदूतं स्‍वयाच्‍वंबलय् इमिसं वया छेनय् छगू यचुगु बेतालि पुइकाबिल अले वयागु म्‍हय् दकलय् तःधंम्‍ह पुजाहारीया वसः फीकाबिल।

लूका 15:22

“तर अबुम्‍हय्‌सिनं च्‍यःतय्‌त सःताः थथे धाल – ‘याकनं हे दकलय् बांलाःगु वसः हयाः वयात पुंकि। वयागु पतिनय् अंगू नं न्‍ह्याकाः ब्‍यु। अले तुतिइ लाकां नं न्‍ह्याकाः ब्‍यु।

रोमी 13:14

थथे मयासें बरु न्‍ह्यागु याःसां प्रभु येशू ख्रीष्‍टयात यय्‌क जक याना च्‍वँ। थः यःथें जक याना जुइ मते।

रोमी 14:17

परमेश्‍वरयागु राज्‍य नयेगु व त्‍वनेगु जक मखु, बरु पवित्र आत्‍मां बियादीगु धार्मिकता, शान्‍ति व आनन्‍द खः।

रोमी 3:22

येशू ख्रीष्‍टयात विश्‍वास याक्‍वसित परमेश्‍वरं धर्मी ठहरय् यानादी, छाय्‌धाःसा वय्‌कलं यहूदी व यहूदीमखुपिं धकाः पाकादी मखु।

रोमी 5:11

थुलि जक मखु, झीत परमेश्‍वर नाप मिलय् यानादीम्‍ह झी प्रभु येशू ख्रीष्‍टं यानाः वय्‌कः नाप झीपिं लय्‌ताय् खन।

गलाती 3:27

ख्रीष्‍टयात विश्‍वास यानाः बप्‍तिस्‍मा कयाः वय्‌कः नाप मिलय् जूपिं सकसिनं पहःचहः न्‍हूगु वसः थें पुंगु दु।

फिलिप्‍पी 3:9

व्‍यवस्‍थां धाःथें यानाजुयागुलिं जि धर्मी ठहरय् जूगु मखु बरु येशू ख्रीष्‍टयात विश्‍वास यानागुलिं परमेश्‍वरं हे जितः धर्मी ठहरय् यानादीगु खः।

फिलिप्‍पी 4:4

प्रभुयाके न्‍ह्याबलें लय्‌ताया च्‍वँ। जिं हानं धाये – “लय्‌ताया च्‍वँ।”

१ पत्रुस 1:8

वय्‌कःयात छिमिसं मखंनिसां माया यानाच्‍वंगु दु। आः नं वय्‌कःयात छिमिसं मखंनि, अय्‌नं छिमिसं विश्‍वास यानाच्‍वंगु दु। अले धयां मब्‍याक छिपिं लय्‌तायाच्‍वंगु दु।

प्रकाश 21:2

न्‍हूगु पवित्रगु यरूशलेम शहर स्‍वर्गं परमेश्‍वरपाखें क्‍वहां वयाच्‍वंगु जिं खना। थ्‍वयात बिया छ्वयेत्‍यंम्‍ह भम्‍चायात थें समाः यानातःगु दु।

प्रकाश 21:9

दुःखकष्‍ट दुगु ख्‍वल्‍चा ज्‍वनातःपिं न्‍हय्‌म्‍ह स्‍वर्गदूतत मध्‍ये दक्‍वसिबय् लिपायागु दुःखकष्‍ट दुगु ख्‍वल्‍चा कयातःम्‍हय्‌सिनं वयाः जितः थथे धाल – “थन वा, जिं छन्‍त भम्‍चा क्‍यनाबी। व भम्‍चा चीधिकःम्‍ह भ्‍याःचाया कलाः खः।”

प्रकाश 4:4

अले हानं छचाखेरं निइप्‍यंगू सिंहासन तयातःगु दु। लुँयागु श्रीपेच पुया तःपिं व तुयुगु वसतं पुनातःपिं निइप्‍यम्‍ह थकालिपिं व सिंहासनय् फ्‍यतुनाच्‍वंगु दु।

१ शमूएल 2:1

हन्‍नाहं थथे धकाः प्रार्थना यात, “परमप्रभुं जिगु मन तसकं लय्‌ताय्‌कादीगु दु, वय्‌कलं यानादीगु ज्‍या खनाः जि तसकं खुसी जुयागु दु। जि जिमि शत्रुतय् न्‍ह्यःने न्‍हिले, अले परमप्रभुं जितः ग्‍वाहालि यानादीगुलिं जि तसकं लय्‌तायागु दु।