यशैया 52:6 - नेवाः बाइबल

⁶ अथे जुयाः जिमि प्रजां जिगु नां म्‍हस्‍यू। थुकथं इमिसं व दिंखुन्‍हु इपिं लिसे नवाम्‍ह जि हे खः धकाः म्‍हसी। खः, जि व हे खः।”

यशैया 52:6 ပူးပေါင်းရင်းမြစ်များ

भजनसंग्रहया सफू 48:10

हे परमेश्‍वर फुक्‍क थासय् छिगु प्रशंसा जू। पृथ्‍वीया फुक्‍क थासय् छिगु नां थ्‍यंगु दु। छिं खःकथं न्‍याय यानादी।

प्रस्‍थान 3:13

मोशां परमेश्‍वरयात धाल, “जिं इस्राएलीतय्‌थाय् वनाः इमित ‘छिमि पुर्खाया परमेश्‍वरं हे जितः छिमिगु निंतिं छ्वयाहःगु खः’ धकाः धायेबलय्, इमिसं ‘वय्‌कःया नां छु खः?’ धकाः न्‍यन धाःसा जिं इमित छु धायेगु?”

प्रस्‍थान 33:19

वय्‌कलं धयादिल, “जिं छंगु न्‍ह्यःने हे थःगु फुक्‍कं भिंगु क्‍यने, अले छंगु न्‍ह्यःने हे परमप्रभुया नां च्‍वय्‌के। जिं सुयात कृपा याये मास्‍ति वइ वयात कृपा याये। सुयात जिं दया याये मास्‍ति वइ वयात दया याये।”

प्रस्‍थान 6:3

अब्राहाम, इसहाक व याकूबयाथाय् जि दक्‍व शक्ति दुम्‍ह परमेश्‍वर कथं खनेदय्‌क वया, तर परमप्रभु धकाः जिं थःगु नामं इमित म्‍हसीके मबिया।

यशैया 40:9

हे भिंगु खँ हइम्‍ह सियोन, तज्‍जाःगु पर्वतय् थाहां हुँ, अले थ्‍व भिंगु खँ न्‍यंकि! हे भिंगु खँ हइम्‍ह यरूशलेम, ततःसलं हा, मग्‍यासें ततःसलं हा! अले यहूदाया शहरयात धा, “छिमि परमेश्‍वर झायाच्‍वंगु दु।”

यशैया 42:9

स्‍व, न्‍हापायागु खँ ला जुइ धुंकल, आः न्‍हूगु खँ जिं कने। व जुइ न्‍ह्यः हे उकिया बारे जिं छिमित घोषणा याये।”

यशैया 49:23

छंगु निंतिं जुजुपिं बौ थें अले इमि रानीपिं सुसाकुसा याइम्‍ह मां थें जुइ। इपिं छंगु न्‍ह्यःने बँय् भ्‍वसू वइ। इमिसं छंगु तुतिया धू फ्‍यइ। अनंलि छं थुइकि जि हे परमप्रभु खः, जिके भलसा तइपिं लाजय् लाइ मखु।”

यशैया 60:16

माम्‍हं थः मस्‍तय्‌त बिचाःसंचाः याःथें जाति जाति व जुजुपिन्‍सं छन्‍त बिचाः संचा याइ, उबलय् छं परमप्रभु थःत मुक्ति बीम्‍ह, उद्धार याइम्‍ह व याकूबया दक्‍व शक्ति दुम्‍ह खः धकाः थुइकी।

यर्मिया 31:34

‘प्रभुयात म्‍हसीकी’ धकाः इमिसं थः जःलाखःलापिन्‍त व दाजुकिजापिन्‍त नं स्‍यना जुइ माली मखु, छाय्‌धाःसा चिधिकःपिन्‍संनिसें कयाः तःधिकःपिन्‍सं तकं जितः म्‍हसी। इमिसं याःगु मभिंगु बांमलाःगु ज्‍याखँ फुक्‍कं जिं क्षमा यानाबी। अले इमिगु पाप नं जिं लुमंके मखु,” परमप्रभुं धयादी।

इजकिएल 20:44

हे इस्राएलया घराना, छिमिगु मभिंगु पहःचहः व स्‍यंगु ज्‍याकथं मखु, तर जिं जिगु नांया इज्‍जतयात रक्षा यायेत जिं छिपिंलिसे व्‍यवहार यायेबलय् छिमिसं जि हे परमप्रभु खः धकाः सी। परमप्रभु परमेश्‍वरं धयादी।’”

गन्‍ती 23:19

परमेश्‍वर मनू थें मखु, मखुगु खँ ल्‍हायेत, वय्‌कः मनू मखु, थःगु मन हिलेत। वय्‌कलं धयादीगु खँ गुबलें मजूगु दु ला? वय्‌कलं बचं बियाः छु व पूवंकामदी ला?