यशैया 5:16 - नेवाः बाइबल

¹⁶ तर पाय्‌छिगु न्‍यायलं दक्‍व शक्ति दुम्‍ह परमप्रभुया नां च्‍वन्‍ह्याइ। पवित्र परमेश्‍वरं थःगु धार्मिकतापाखें थः हे पवित्र खः धकाः क्‍यनादी।

यशैया 5:16 ပူးပေါင်းရင်းမြစ်များ

१ इतिहास 29:11

हे परमप्रभु! महिमा, शक्ति, गौरव व वैभव छिगु हे खः, छाय्‌धाःसा आकाश व पृथ्‍वीइ छु छु दु व फुक्‍क छिगु हे खः। हे परमप्रभु! राज्‍य छिगु हे खः, अले छि फुक्‍कसिया शासक खः।

भजनसंग्रहया सफू 21:13

हे परमप्रभु! छिगु तःधंगु शक्तिया निंतिं जिमिसं छिगु प्रशंसा याये। छिगु शक्तियात तःधंकाः जिमिसं भजन हाले।

भजनसंग्रहया सफू 46:10

“सुम्‍क च्‍वँ! जि परमेश्‍वर खः धकाः सीकि! जितः फुक्‍क जातियापिन्‍सं तःधंकी, संसारय् न्‍यंकभनं जितः तःधंकी।”

भजनसंग्रहया सफू 9:16

परमप्रभुयात वय्‌कःया न्‍यायया हुनिं म्‍हसीकी। दुष्‍टत धाःसा थःगु हे जालय् तक्‍यनाच्‍वनी। हिग्‍गायेन सेला

यशैया 12:4

व दिंखुन्‍हु छिमिसं थथे म्‍ये हाली, “परमप्रभुयात सुभाय् ब्‍यु! अले वय्‌कःया नां घोषणा या। वय्‌कलं यानादीगु ज्‍या फुक्‍क जातितय्‌त न्‍यंकि, वय्‌कः गुलि तःधंम्‍ह खः धकाः फुक्‍कसित धयाब्‍यु!

यशैया 2:11

परमप्रभुया दिं वयाः मनूतय्‌गु फुइँ व तःधंछु नाश जुयावनी। थ्‍व दिंखुन्‍हु परमप्रभुयात जक तःधंकेगु जुइ।

यशैया 2:17

वय्‌कलं मनूतय्‌गु घमण्‍डयात क्‍वमिलु यानादी। व दिंखुन्‍हु मूर्तित फुक्‍कं मदय्‌का छ्वइ। अले परमप्रभुयात जक तःधंकेगु जुइ।

यशैया 2:9

उकिं यानाः फुक्‍कसिगु हेला व बेइज्‍जत जुइ। हे परमप्रभु, इपिं सुयात नं क्षमा यानादी मते।

यशैया 28:17

जिं इन्‍साफयात नापे यायेगु खिपः व धार्मिकतायात धाःसा गं खायेगु दय्‌काबी। प्‍वँनं मखुगु खँ ल्‍हाइपिनिगु शरण कायेगु थाय् चुइकायंकी, अले लखं छिमिगु सुपीगु थाय् त्‍वःपुयाबी।

यशैया 29:23

इमिसं थः यक्‍व काय्‌म्‍ह्याय्‌पिं व जिं इमित बियागु आशिष खनीबलय् इमिसं जिगु नांयात पवित्र याइ। इमिसं याकूबया तच्‍वकं पवित्रम्‍ह परमेश्‍वरयात धात्‍थें हे पवित्रम्‍ह खः धकाः नाला काइ, अले इस्राएलया परमेश्‍वरया भय काइ।

यशैया 30:18

अय्‌नं परमप्रभुं छिमिगु निंतिं दया यायेगु मतिइ तयादी। छिमिगु निंतिं माया यायेत वय्‌कः दनादी, छाय्‌धाःसा परमप्रभु न्‍याय यानादीम्‍ह परमेश्‍वर खः। वय्‌कःयात लं च्‍वनीम्‍ह धन्‍य खः।

यशैया 33:10

परमप्रभुं धयादी, “आः जि दने। आः जिं थःत थकाये। आः जिं थःत तःधंके।

यशैया 33:5

परमप्रभु दक्‍वसिबय् तःधंम्‍ह जुयादीगु दु, छाय्‌धाःसा वय्‌कः दक्‍वसिबय् च्‍वय् च्‍वनादी। वय्‌कलं सियोनयात न्‍याय व धार्मिकतां जाय्‌कादीगु दु।

यशैया 57:15

छाय्‌धाःसा सदां म्‍वानाच्‍वनादीम्‍ह, तच्‍वकं मानय् याये बहःम्‍ह, गुम्‍हय्‌सिगु नां पवित्र खः, वय्‌कलं धयादी, “जि दक्‍वसिबय् च्‍वय् पवित्रगु थासय् च्‍वनीम्‍ह खः, तर जि पश्‍चातापी व क्‍वमिलुपिंनापं नं च्‍वनीम्‍ह खः, अले जिं क्‍वमिलुया आत्‍मां छिमित बल्‍लाकाबी, अले पश्‍चातापयागु नुगःयात नं बल्‍लाकाबी।

यशैया 6:3

अले छम्‍हय्‌सिनं मेम्‍हय्‌सित थथे धकाः हालाच्‍वन, “दक्‍व शक्ति दुम्‍ह परमप्रभु, पवित्र, पवित्र, पवित्रम्‍ह खः। वय्‌कःया महिमां फुक्‍क पृथ्‍वीइ जायाच्‍वंगु दु।”

यशैया 61:8

“छाय्‌धाःसा जि, परमप्रभु धाःसा न्‍याययात माया याये, खुइगु व अधर्मयात जिं तसकं मय्‌के। जिं थःगु विश्‍वास यायेबहलं जिमि मनूतय्‌त सिरपाः बी। अले जिं इपिंनापं सदांया निंतिं बाचा ची।

यशैया 8:13

दक्‍व शक्ति दुम्‍ह परमप्रभुयात पवित्र भाःपियेमाः। वय्‌कःया भय का। वय्‌कः खनाः थरथर खा।

इजकिएल 20:41

जिं छिमित जाति जातितपाखें पित हयेबलय् अले छिमित छ्यालब्‍याल जुयाच्‍वंगु देशं छिमित मुंकेबलय् छिमित नस्‍वाःगु धुपाँय् थें नाले। अले जाति जातितय्‌गु न्‍ह्यःने जिं थःम्‍हं थःत छिमिगु दथुइ पवित्र क्‍यने।

इजकिएल 28:22

अले थथे धा, ‘परमप्रभु परमेश्‍वरं थथे धयादी, “‘हे सीदोन, जि छंगु विरोधय् दु, छंगु दुने हे जिं महिमा काये। जिं वयात सजाँय बीबलय् छं जि हे परमप्रभु परमेश्‍वर खः धकाः सी। अले जिं थःगु पवित्रता वयागु दुने हे क्‍यने।

इजकिएल 28:25

“‘परमप्रभु परमेश्‍वरं थथे धयादी – जात जातितय् दथुइ छ्यालब्‍याल जूपिं इस्राएलयापिं मनूत जिं मुंके, अले जाति जातितय्‌गु न्‍ह्यःने जिं थःम्‍हं थःत छिमिगु दथुइ पवित्र क्‍यने। अले जिम्‍ह दास याकूबयात जिं बियागु इमिगु थःगु हे देशय् इपिं च्‍वनी।

इजकिएल 36:23

जिं जिगु नां गुलि पवित्र खः धकाः क्‍यने। छिमिसं मेगु जातितय्‌गु दथुइ बदनाम याःगु जिगु नां। जिं थःत छिपिंपाखें इमिगु न्‍ह्यःने पवित्र क्‍यनेबलय् जाति जातितय्‌सं जि हे परमप्रभु खः धकाः सी, परमप्रभु परमेश्‍वरं धयादी।

इजकिएल 38:16

गथे सुपाँचं जमिनयात त्‍वपुइ, अथे हे छं जिगु जाति इस्राएलया देशय् हमला याइ। उकिं हे गोग, लिपा वइगु इलय् जिं थःत छपाखें इमिगु मिखाया न्‍ह्यःने पवित्र क्‍यनीबलय् जातितय्‌सं जितः सीमा धकाः जिं छन्‍त जिगु देशया विरोधय् हये।

इजकिएल 38:23

थुकथं फुक्‍क जातितय्‌त जि तःधंम्‍ह व पवित्रम्‍ह खः धकाः क्‍यने। अबलय् इमिसं जि हे परमप्रभु खः धकाः सी।’”

दानिएल 4:37

आः जि, नबूकदनेसरं, स्‍वर्गयाम्‍ह जुजुयात तःधंके, वय्‌कःयात तःधंके, अले हनाबना याये छाय्‌धाःसा वय्‌कलं यानादीगु फुक्‍क खँ पाय्‌छि जू व वय्‌कःया फुक्‍क लँपु न्‍यायलं जाः। तःधंछु जुया जुइपिन्‍त वय्‌कलं क्‍वमिलु यानादी फु।

लेवी 10:3

अले मोशां हारूनयात धाल, “परमप्रभुं धयादीगु खँ थ्‍व हे खः, “‘जिगु न्‍ह्यःने वइपिंपाखें जिं जिगु पवित्रता क्‍यने। जिं फुक्‍क मनूतय्‌गु न्‍ह्यःने थःगु महिमा क्‍यने।’” हारून सुम्‍क च्‍वन।

गन्‍ती 20:13

थ्‍व थाय्‌यात मेरीबाया लः धकाः धाल। थन हे इस्राएलीत परमप्रभुनापं कचकच याःगु खः। अन हे वय्‌कलं इमिगु दथुइ थःत पवित्र क्‍यनादीगु खः।

रोमी 2:5

छिमिसं थःगु छाःगु नुगः व पश्‍चात्ताप मयाःगु नुगलं यानाः परमेश्‍वरया धार्मिक न्‍याय खने दइगु उगु तंया दिंया निंतिं थःगु निंतिं तं मुंका च्‍वंगु दु।

१ पत्रुस 1:16

थ्‍व हे खँ थथे च्‍वयातःगु दु – “जि पवित्रम्‍ह जूगुलिं छिपिं नं पवित्रपिं जुयाच्‍वँ।”

१ पत्रुस 2:15

छिमिसं थथे भिंगु ज्‍या याना हे छुं मस्‍यूपिं मूर्खतय्‌गु म्‍हुतुप्‍वाः तिके फयेमा धयागु परमेश्‍वरयागु इच्‍छा खः।

१ पत्रुस 3:15

दुनुगलंनिसें ख्रीष्‍टयात छिमिसं “प्रभु” धकाः मानय् याना च्‍वँ। छिमिसं याना जूगु आशायागु खँ सुनानं न्‍यं वल धाःसा छिपिं लिसः बीत न्‍ह्याबलें न्‍ह्यचिला च्‍वँ।

प्रकाश 3:7

“फिलाडेल्‍फियाय् च्‍वंगु मण्‍डलीयाम्‍ह दूतयात थथे धकाः च्‍वया छ्व – “पवित्रम्‍ह, धात्‍थेंयाम्‍ह, दाऊदयागु ताःचा दुम्‍हय्‌सिनं थथे धयादी – गुम्‍हय्‌सिनं चाय्‌कूगु खापा सुनानं ति फइ मखु, अले तिनाब्‍यूगु खापा चाय्‌के फइ नं मखु।

प्रकाश 4:8

थ्‍व प्‍यम्‍ह जीवात्‍मातय्‌के खुपा खुपा पपू दु, अले दुनेपिने फुक्‍कभनं मिखाया मिखा दु। थुमिसं चच्‍छि न्‍हिच्‍छिं मदिक्‍क थथे म्‍ये हालाच्‍वनी। “पवित्र, पवित्र, पवित्रम्‍ह दक्‍वसिबय् तःधंम्‍ह व शक्ति दुम्‍ह परमप्रभु परमेश्‍वर। वय्‌कः न्‍हापांनिसें दीम्‍ह, आः नं दीम्‍ह, अले लिपा नं दीम्‍ह खः।”